旺菜粉絲 + 燒汁雞翼 ( 7-DEC-2021 )

( 7-DEC-2021  TUE )

今朝鬧鐘響咗   之後再瞓番落床   里奧大人話唔好勉強去徑步   不過我想再瞓又瞓唔到   所以去徑步 lu ~

早餐食奶醬多   因為想晏晝食飽啲呀 ~

菇場超級勁忙   好快又 11 點 45 分 ~

Lunch Time 出去買菜   之後都已經 12 點 15 分   要即去買牛雜河喇   一陣又要體力勞動   所以食河粉飽啲 ~

今次無扣底   原來呢個師傅比嘅份量都好多   之前個師傅呢   如果扣底只係呢度 1/3 咋   正常份量都只係呢度一半   咁下次見係呢個師傅就可以扣底了

仍然超級勁忙   阿花仲問我今日有無投票 ?!   我話無啦   我幫完妳哋又要清自己嘢   今日仲要係 Double Pink   真係堅對唔住 Binnie 呀   哈哈 ~

放工即走   又係 6 點幾先番到屋企   要即預備晚餐喇 ~

是日晚餐 - 旺菜粉絲 + 燒汁雞翼

旺菜粉絲 - 菜同粉絲係清淡嘢   但加埋臘肉當堂變濃味嘢   哈哈 ~

燒汁雞翼 - 好在喺焗雞翼咋   因為唔需要太多時間呢 ~

洗埋碗就抖下   之後同里奧大人一齊去徑步喇 ~

沖埋涼就開機洗衫   之後休息喇 ~

今晚比里奧大人激死   食完包豬肉乾居然唔記得放喺邊   我話唔緊要啦   知你都鍾意引啲巨強番屋企   頭先又將電視 Remote Control 周圍擺   要用手機熄電視   之後我揾到喺邊   但我唔同佢講   我覺得好煩   成日亂擺要浪費時間搵   點解唔可以樣樣都放番原位呢 ?!   所以我成日話好肯定你屋企人係咁   呢啲係身教   一定係屋企人咁做你先會咁做囉 ~

里奧大人今晚 10 點半瞓覺   我投完票   10 點 45 分都瞓 lu ~

青咖哩扎肉 + 焗韓國腸仔 + 辣菜脯旺菜 + 自家制麵包 ( 6-DEC-2021 )

( 6-DEC-22021  MON )

今朝又暖番喇   真係每次都係凍兩日 ~

早餐食奶醬多   呢排真係食咗好多餐   哈哈 ~

菇場忙呀   好快到 Lunch Time ~

諗住去一田買酸齋   點知原來無咗個 Counter   可能依家要讓位呀   哈哈 ~

明明想買完就走   點知又行咗半個鐘   所以拿拿聲買墨魚丸米番菇場食喇 ~

今日叫阿慢幫手搬箱   佢居然只企喺到睇住我同阿花搬   我叫佢快啲一齊幫手搵 Number 啦   唔係企喺度望住我哋呀 ~

之後去 Store Room 啦   我要最高層但係要最底嗰個   佢停一停再由上而下咁望   8 卦話你將上面啲箱搬落下面咪得囉   我都忍唔到話你唔係諗住扯佢出嚟嘛 ?!   佢搬去隔離位置啦   但係阻住自己拎啲箱落嚟   其實佢係咪唔想做呀 ?!?!?!?! 

好鬼攰呀   所以真係放工準時走   之後去買雞骨草比里奧大人   不過今晚等咗好耐車呀   6 點幾先番到屋企 ~

今晚開鑊煎嘢   所以煮完都要 7 點先開呢 ~

是日晚餐 - 青咖哩扎肉 + 焗韓國腸仔 + 辣菜脯旺菜 + 自家制麵包

青咖哩扎肉 - 唔知食咩就食扎肉啦   蘸泰式甜辣醬好好味呢 ~

焗韓國腸仔 - 好想食腸仔呀   所以一次過焗哂去   依家里奧大人帶飯可以煮多啲   哈哈 ~

辣菜脯旺菜 - 差啲唔記得有辣菜脯   今晚煮旺菜就啱喇 ~

自家制麵包 - 連埋腸仔一齊焗   所以比較乾   不過唔想開鑊蒸囉   嘥煤氣同水呀 ~

大清潔廚房就抖下   之後同里奧大人一齊去徑步   番到屋企都即開機洗衫   沖完涼就食生果 ~

我話 8 卦咁高做唔到賊   里奧大人問點解 ?!   我話生得咁高   偷嘢實比人見到   里奧大人話依家仲邊有人偷嘢吔㗎 ?!   妳思想仲係停喺 60 年代    我覺得呢句笑死我呀   佢話依家打個電話就可以呃到錢啦   駛咩露面呀 ?!   與時並進啦唔該   我話就係你啲咁嘅人   依家資訊科技發達   你就學埋啲偷呃拐騙嘅嘢   佢之後駁唔到咀啦   哈哈 ~

睇多陣電視   今晚 10 點 45 分瞓覺 ~

八方雲集餃子專門店 @ 官塘 ( 5-DEC-2021 )

韭菜鍋貼餐 & 麵線套餐 (韭菜鍋貼 & 大腸麵線)

( 5-DEC-2021  SUN )

里奧大人出門口之後   我瞓得勁差   仲係咁發夢   臨醒前仲發緊夢㗎   鬧鐘響咗我仲要按 10 分鐘之後再響   真係第一次係咁   不過其實祈禱完之後都起身了 ~

沖埋涼就即出發去食早餐   之後去里奧大人公司幫手再番學   一落堂就去自己教會事奉喇 ~

今次都遲咗 5 分鐘   但事奉崗位唔同咗   所以唔駛咁趕住去做嘢 ~

一入到去   姊妹話我清減咗好多   以為我咩事 ?!   我話做運動減肥嘛   之後佢話夠喇   唔好再減   我話仲要減啦   依家仲係肥呀   嗚嗚 ~

傾完就回崗位啦   組長想我做繼續做番原來崗位   因為我會同人傾偈   咁無問題啦   但知我崗位好忙   點都要再搵另一個幫我手呢 ~

今日做新崗位   之後同工問我   有無時間做多一樣嘢 ?!   我話唔得呀   因為全 Team 人已經等緊我   無可能再做多一樣嘢㗎喇 ~

崇拜完再做另一個事奉   搞掂哂就可以走 lu ~

Ivy 問里奧大人放工未 ?!   我話肯定未放   因為無打比我   之後見到佢到 F 哥坐喺梳化傾偈   原來佢好早到咗教會   之前仲同牧師 & 同工傾咗成 10 分鐘添 ~

諗住去 Hungry Korean 食午餐   不過無位   所以去南記喇 ~

食完就去買長袖簿底衫   Uniqlo 好似 $129   所以唔買住   之後再去 MUJI   我叫里奧大人自己睇底衫   我去睇螢光筆   試筆嘅時候   有個小妹妹同我講話佢買咗黃色同橙色   之後我問佢好唔好寫呀 ?!   佢話好寫   仲話幼筆用嚟畫畫   我問佢鍾唔鍾意寫字呀 ?!   佢點頭話鍾意   我話佢好乖女   哈哈 ~

里奧大人問我係咪好好傾 ?!   我話你點知㗎 ?!   佢話一直喺我哋後面   哈哈 ~

最後買咗 5 支螢光筆 + 1 支藍色原子筆 + 1 支鉛芯筆   里奧大人話明明佢買嘢   無啦啦變咗我買到嘢   呵呵 ~

MUJI 又係要 $129 一件長袖底衫   我都話太貴   所以去 MegaBox 睇下先   如果價錢同 MUJI 一樣   咁先去 MUJI 買啦 ~

坐 Shuttle Bus 去 Megabox   第一時間去搵底衫喇   都係買番 TOPVALU 品牌   長袖底衫仲抵    由 $79.9 減到 $49.9   里奧大人即買 6 件 ~    

我就買咗灰色同黑色嘅長袖外套   原價 $139 減到 $99 咋   我搵咗呢啲外套好耐㗎喇 ~

今日真係好感恩   想買嘅所有嘢都做緊特價 ~

最後去超市買男爵薯餅就搭車番屋企喇   番到屋企都開機洗衫   睇下電視   6 點幾出去食晚餐 ~

里奧大人話麻糬好味   下次有機會再買先 

食完行陣就去搵神沙機   因為屋企有超多 2 毫子同 5 毫子   基本上已經無咩機會用   之前又已經比咗好多比家姐工人用   但都仲剩好多   所以落去入神沙機   居然有接近 $160   我初初諗住最多 $50 咋   所以好開心   哈哈 ~

沖埋涼就休息   又睇下 Youtube 同投票咁啦 ~

今日出咗街成日好攰呀   所以 10 點 45 分都要瞓 lu ~

煎釀三寶 + 香茜牛肉腸 + 蜜汁叉燒腸 (外賣) ( 4-DEC-2021 )

( 4-DEC-2021  SAT )

今朝鬧鐘響咗   真係唔想起身咁呀   之後祈禱完都精神   所以都係去徑步喇 ~

臨醒前發咗 2 個夢   夢見屋企廚房有幾隻巨強   之後家姐話噴香茅噴   咁佢哋會自己溶埋一粒   我覺得係尋晚睇東張西望囉   講有間巨強屋   睇完真係毛管動 ~

之後另一場景係打牌   有人話 2 番起糊   我話 3 番 8 蚊啦   最大 72 蚊   佢話貴   之後佢話 2 番起糊最大 472 蚊   我話 472 蚊貴呀   但我都照打   我成副牌係番子同萬子   但副牌起碼有 20 隻   之後鬧鐵響了 ~

早咗一班車   所以去大家樂買早餐喇 ~

菇場唔忙啦   放工一齊準時走 ~

感恩趕到巴士   我仲快過家姐番到屋企   哈哈 ~

Berry 係咁撲我   佢實在太興奮   但點都要洗咗手先可以摸佢囉   順便等佢冷靜下 ~

本身家姐買 Mos Burger 比我   但最後我想食雜丸 + 印尼麵   因為我真係勁想食印尼麵同埋蘸英記辣椒油   哈哈

鬼鬼祟祟

個樣好肉酸呀   哈哈

唔怕曬黑嘅 Berry

家姐 4 點幾出去整嘢   咁我繼續陪 Berry 女   好在佢喺梳化瞓覺   我隻腳可以掂住佢   哈哈 ~

其實家姐好細力順住條頸搓上去   但佢咁嘅樣   好似好大力捉住佢咁   哈哈

對眼好搞笑

佢其實係勁眼瞓   所以先可以咁樣整佢咋

比我哋整完   個樣好慘咁   哈哈

瞓啦 

6 點唔夠就去番學   今晚番學又係勁開心   到響鐘先落堂   Miss 仲話乜咁快嘅 ?!   勁搞笑   快啲收工唔好咩 ?!   哈哈 ~

買埋晚餐就番屋企   食完抖陣就沖涼 ~

里奧大人 11 點左右瞓   我就繼續投票   差唔多 12 點先瞓 ~

黑椒洋蔥豬扒 + 菜心苗 ( 3-DEC-2021 )

家姐買比我嘅大蕃鬼荔枝   尋日同事請我食一個糖梨   我覺得勁正呀   所以又買 1 磅   聽日就會買 2 磅比家姐

家姐話店員話一星期內要食哂

呢盒花生糖係新鮮整嘅   又係要快啲食哂   哈哈

( 3-DEC-2021  FRI )

感恩仍都一覺瞓天光   所以徑步嘅時候都覺得好舒服   話哂唔眼瞓嘛   哈哈 ~

早餐食奶醬多   真係仲係鍾意食喎 ~

菇場超級忙呀   做到 11 點 50 分先走人 ~

行去買菜再行多陣   買埋豬軟骨酸辣米線就番菇場   今日食米線完全唔驚肥   因為一陣係會超級體力勞動 ~

忙完自己 Part 就即幫阿花喇   又幫咗個幾鐘   佢好開心話今日超級快   咁我話要幫就出聲啦   最緊要我搞掂哂自己嘅嘢先   咁就可以幫妳 ~

放工走人   今晚等咗好耐車   好多時星期五都係咁呢 ~

快快手預防晚餐   不過都係簡單嘢 ~

里奧大人 7 點左右番到屋企   煮埋個拉麵就食得喇 ~

是日晚餐 - 黑椒洋蔥豬扒 + 菜心苗

黑椒洋蔥豬扒 - 好耐無食黑椒汁嘅餸   所以就煮喇 ~

菜心苗 - 呢份只係 $6   如果里奧大人唔帶飯   呢個份量就啱啱好 ~

洗埋碗就抖陣   之後同里奧大人一齊去徑步 ~

開機洗衫就沖涼   食埋生果就休息下 lu ~

今晚 11 點先瞓   希望聽朝精精神神去徑步啦   哈哈 ~

蕃茄雞肉意粉 ( 2-DEC-2021 )

( 2-DEC-2021  THU )

感恩又一覺瞓天光呀   真係好開心㗎 ~

今朝勁凍   但都會照樣徑步   我唔想成日比藉口比自己   除非我腳痛或者好攰   否則都會繼續徑步呢 ~

里奧大人唔舒服呀   今日都要喺屋企休息了 ~

早餐食芝腿治烘底   落車嘅時候好餓   但番到菇場又唔餓   之得叫奶醬多算啦 ~

菇場忙呀   真係飲水都唔得閒 ~

Lunch Time 出去行陣   之後買鯪魚球米番菇場慢慢食 ~

做完個長命 Report 就幫阿花影印   一影就成個鐘   之後條腰痛到爆 ~

放工走人喇   感恩去到巴士站即有車   所以好快番到屋企呢 ~

今晚 6 點幾都可以開餐   因為得一樣嘢食   哈哈 ~

是日晚餐 - 蕃茄雞肉意粉 

蕃茄雞肉意粉 - 好想食腸仔  所以又加幾條 ~

食完抖陣就自己去徑步   番到屋企都即沖涼喇 ~

軟齋雞粒勁好味呀   不過要$40/半磅就超級貴囉

里奧大人切木瓜比我食   第一次切到一粒粒咋   真係千年一遇呀   一定要影相做記錄呢   哈哈

睇多陣電視   今晚 10 點半都瞓添呀   咁肯定天氣凍   哈哈哈哈 ~

日式咖哩豬扒 + 日式炒麵 + 菜心苗 ( 1-DEC-2021 )

( 1-DEC-2021  WED )

又一覺瞓天光喇   感恩感恩 ~

早餐食粟米吞拿魚包   去到大家樂大排長龍   所以都去茶記買咖啡算喇   但原來加到 $16 一杯   咁真係食多士餐仲抵   不過買咗個包又唔想晏晝食囉   一杯咖啡價錢可以買兩個包   今朝有啲心痛呀   哈哈哈哈 ~

今朝勁忙呀   真係 11 點 45 分先停到手 ~

12 月喇   眨下眼就過完 2021 年了

Lunch Time 一定要去一田掃貨   因為家姐鍾意食嘅 Jagabee 做特價呀 ~

買嘢真係好開心   仲要係買特價嘢   哈哈

   買完都 12 點 15 分喇  要即去買炒麵番菇場喇 ~

阿齋見我又買咗一大袋嘢   即刻睇我買啲咩 ?!   之後佢都忍唔住即刻去一田買   哈哈 ~

仍然忙呀   但放工都即走   今日里奧大人 5 點半左右放咗工   我要快啲番屋企煮飯 ~

今晚 6 點幾先開餐   算係快喇 ~

是日懶餐 - 日式咖哩豬扒 + 日式炒麵 + 菜心苗

日式咖哩豬扒 - 第一次用包裝咖哩汁   估唔到又幾香咖哩味喎   不過話中辛   但一啲都唔覺辣   不過都好味   哈哈 ~

日式炒麵 - 其實煮呢個炒麵勁簡單   煮完撈味粉就搞掂 ~

菜心苗 - 今晚點都要食喇   好多時買完又唔即時食   其實唔應該買住   哈哈 ~

里奧大人話好攰   所以唔徑步   咁我自己快快趣出去徑步喇 ~

番到屋企就開機洗衫   之後沖涼   我搽哂 Cream 諗住睇電視   點知家姐打嚟話比豬肉乾比我   想我襯新鮮食   同埋唔駛番學拎咁多嘢 ~

最邪係頭先徑步   行咗只係 2 千幾步   平時我起碼 3 千步嘛   但覺得好攰所以番屋企   依家行來行去都行咗成千步   實在太好了 ~

番到屋企又要再沖身沖頭   始終落咗街嘛 ~

今次買得唔係好多   同埋餅乾零食係買埋比家姐 & 里奧大人同事

12 條梭坤敬泰式扎肉 & 2 包 Johnsonville 辣肉腸

6 包 KETTLE 薯片 & 9 包 卡樂 B 宅卡B 原味紫薯條

12 盒森永碎朱古力曲奇餅 & 2 包樂雷神迷你朱古力 

1 罐新東陽豬肉鬆 & 2 包九龍城寨白魚蛋

家姐話花生糖買咗 $482   豬肉乾買咗 $535   其實依家呢啲零食真係好貴   以前家姐住元朗嘅時候都唔係平   但上咗電視之後就直頭係貴囉

純黑芝麻軟糖 / 開心果脆糖 / 腰果合桃軟糖   仲有盒唔知咩   因為家姐買比我㗎

辣味豬肉乾 & 牛肉乾 / 蜜汁豬肉乾 / 軟齋雞粒

咁我再上屋企拎扎肉比家姐   之後佢又話比個岩鹽包比里奧大人

今晚 10 點 45 分瞓覺   好鬼凍呀   所以好快眼瞓 ~