臘潤腸 + 蠔油冬菇燜雞膇 + 菜心苗 ( 7-MAR-2022 )

( 7-MAR-2022  MON )

感恩一覺瞓天光   8 點唔夠都起身 lu ~

茶記阿哥聽到我叫外賣   佢都話好耐無聽我把聲   哈哈   之後去到見哂我識嘅員工   我就好開心   因為知道佢哋無中招   感恩感恩 ~

早餐都係奶醬多   自己一個人食   真係食奶醬多最好   其實咁都好飽 ~

我原本今日 WFH   但要番菇場處理緊急嘢   不過我都諗住今日點都會番嚟㗎喇   唔想成日心掛掛囉 ~

幾快又到 3 月   仲要 7 號先開始用 3 月   哈哈

今日大廳得我同阿齋   全公司加埋得 6 個人   咁樣靜靜地做嘢都唔錯 ~

阿齋問我做咩番嚟 ?!   我話掛住佢囉   講完都忍唔住笑   不過我話我真係開心見到妳嘅   知妳無嘢先可以番工嘛 ~

Lunch Time 又出去買嘢   差唔多 12 點半先番到菇場   不過今日就唔趕   因為只係食 Flakes 加乳酪 ~

快快手手做埋長命 Report   感恩 3 點半搞掂   可以準時放工 ~

番到屋企都即沖涼   抖陣又預備晚餐 lu ~

是日懶餐 - 臘潤腸 + 蠔油冬菇燜雞膇 + 菜心苗

臘潤腸 - 唔知煮咩呀   所以蒸臘潤腸呢 ~

蠔油冬菇燜雞膇 - 尋晚食剩又再食   勁入味 ~

菜心苗 - 第 3 餐   好在未食厭   哈哈 ~

洗埋碗就沖涼休息   同里奧大人傾開打針   傾到火都嚟   之後都無彩佢呀 ~

聖經教導 "不可含怒到日落"   呢句我成日記得   好遺憾我成日做唔到 ~

里奧大人唔會睇 "我是遺物整理師"   佢話唔想睇啲慘戲   但其實我想睇紆耐   所以今晚自己睇   居然睇咗 2 集   估唔到幾好睇   無話想像中咁慘呢 ~

睇到 12 點先瞓   我真係覺得夜   但呢排真係唔知點解   成日唔係咁眼瞓咁 ~

蠔油冬菇燜雞膇 + 菜心苗 + 青紅蘿蔔粟米螺頭湯 ( 6-MAR-2022 )

( 6-MAR-2022  SUN )

今朝 7 點醒咗   但無理由咁早起身嘛   之後再瞓到 8 點 50 分  但咁樣反而仲攰   哈哈哈哈   不過想整早餐比里奧大人食   如果唔係會繼續瞓 ~

食到好飽   所以要熨衫   搞掂哂就沖涼   等個人精神啲   哈哈~

睇下 Youtube 又投票   咁里奧大人出去買嘢   所以叫佢買 Lunch 番嚟食 ~

食完都休息   個人好攰呀   無啦啦仲覺得凍添喎   好在里奧大人同家姐都話晏晝凍咗咋   我呢排真係神經緊張 ~

我知道自己會瞓得好淋   所以上床瞓   3 點半瞓到 4 點半   當堂精神哂 ~

仍然繼續投票   之後又睇陣 youtube   差唔多 6 點預備晚餐 ~

是日懶餐 - 蠔油冬菇燜雞膇 + 菜心苗 + 青紅蘿蔔粟米螺頭湯

蠔油冬菇燜雞膇 - 終於清哂包冬菇   今次只用 3 隻雞膇   估唔到食剩 2 隻 ~

菜心苗 - 仍然係佢   食極唔完咁   哈哈 ~

青紅蘿蔔粟米螺頭湯 - 又要飲啦   其實煲湯真係好好   可以飲兩晚 ~

洗完碗再沖埋涼   就同里奧大人睇 "非常主播"   係 12 年前嘅戲    哈哈哈哈   但好好睇呀   我好鍾意個細路仔同朴寶英呀 ~

睇到 12 點左右   係時候瞓覺了 ~

辣汁金沙骨年糕 + 青紅蘿蔔粟米螺頭湯 ( 5-MAR-2022 )

( 5-MAR-2022  SAT )

今朝瞓到 9 點半自然醒   食完早餐就去買嘢 ~

花生醬法包   我覺得好乾呀   哈哈

差唔多 12 點就同家姐交收   里奧大人買咗測試劑比佢   我又買咗支念慈奄比佢   依家好難買到呀   我之前因為喉嚨痛   所以買定幾支喺屋企   咁可以比支家姐傍身 ~

我都唔同家姐傾偈喇   比完佢叫佢快啲開車走   因為我係高危人士 ~

番到屋企都拖地   之後即沖涼   煲埋湯就休息休息 ~

2 點食午餐   之後睇預苦期靈修集   感恩今次用兩日時間就睇哂呢 ~

呢碟係蒜蓉法包   之前買咗大法包   要分 3 餐食   食埋聽朝就食哂  

里奧大人 4 點半番到屋企   佢沖完涼就要抖下   佢話今日好攰呀 ~   

6 點飲湯   但之後真係好飽   所以 8 點先開飯 ~

是日晚餐 - 辣汁金沙骨年糕 + 青紅蘿蔔粟米螺頭湯

辣汁金沙骨年糕 - 今次用辣炒菜汁煮汁   之前喺一田買㗎   見十幾蚊唔貴就買嚟試   估唔到都幾惹味   不過我唔炒菜嘅   所以轉為炒肉就最好   哈哈 ~

青紅蘿蔔粟米螺頭湯 - 好耐無飲老火湯   所以煲嚟飲喇 ~

洗埋碗都即沖涼喇   咁都已經 9 點幾   好在聽日係假期呢 ~

今晚又 12 點瞓   希望遲啲可以早番啲瞓啦 ~

蒜蓉豆豉蒸鯧魚 + 菜心苗 + 皮蛋芫茜魚片湯 ( 4-MAR-2022 )

( 4-MAR-2022  FRI )

今朝食完早餐   里奧大人都要番公司處理啲緊急嘢   其實佢本身係 WFH   不過有啲嘢真係要番公司先做到呢 ~

得我一個人   咁就提前大清潔屋企   之後差唔多 11 點 45 分出去買餸   仲可以 1 點前番到屋企  好似平時番工咁   哈哈 ~

拿拿聲大清潔廁所就沖埋涼   之後就休息下 ~

1 點幾阿虫 Whatsapp 問我下星期一番唔番工 ?!   我話會番工   原來佢有急嘢要我處理   好在唔駛即刻番去呢 ~   

食完午餐就執衣櫃   換哂所有膠袋   用咗 3 個鐘先搞掂   真係整完之後無咩力 ~

里奧大人 5 點幾番到屋企   咁我都預備晚餐   所以今晚 7 點唔夠都可以開餐喇 ~

是日懶餐 - 蒜蓉豆豉蒸鯧魚 + 菜心苗 + 皮蛋芫茜魚片湯

蒜蓉豆豉蒸鯧魚 - 呢條魚要 $48   平時只係最多 $35   但好似好耐無食魚   所以先買囉 ~

菜心苗 - 仍然係食佢啦   應該仲可以食多一餐   哈哈 ~

皮蛋芫茜魚片湯 - 鯇魚片都要 $30   平時係 $18-20 咋   再加 3 棵芫茜 ($9) + 2 隻皮蛋 ($6)   真係咩鬼都貴哂 ~

洗埋碗就沖涼   之後家姐打嚟視像通話   Berry 眼瞓唔彩我呀   傷心傷心 ~

最搞笑家姐問我睇咩 ?!   我話睇劇   佢話做咩唔睇 ASTRO   哈哈 ~

睇到 11 點幾都瞓   依家真係最早係呢個時間瞓 ~

豆板醬炒雞柳 + 海帶拉麵 + 粟米蛋花湯 ( 3-MAR-2022 )

( 3-MAR-2022  THU )

尋晚瞓得麻麻哋   因為半夜熱醒呀   但里奧大人話佢就凍醒咗 ~

今朝 8 點 50 都起身   因為里奧大人 WFH   我要整早餐呢 ~

里奧大人唔食麵包皮   咁我將麵包皮切粒再焗   脆卜卜勁正

食完就開機洗衫   之後熨衫 ~

1 點半左右食 Lunch 喇   我唔想太晏食   之後夜晚又食唔落 ~

今日都係投票同睇 Youtube   最想快啲 4 點半放工   咁我唔駛成日望住部手機呢 ~

差唔多 6 點幾都預備晚餐   今晚 7 點唔夠就可以開餐 ~

是日晚餐 - 辣汁雞柳 + 海帶拉麵 + 粟米蛋花湯

辣汁雞柳 - 今次用豆板醬加蠔油炒雞柳   唔估到都好味喎   咁簡單真係可以成日煮   哈哈 ~

海帶拉麵 - 第一次煮海帶同鰹魚做湯底   唔記得喺邊度買咗包韓國海帶   我覺得乾淨過街市買嗰啲   好耐之前我買過   但最後都係掉咗   感覺好似好污糟咁 ~

粟米蛋花湯 - 無菜食喇   所以開罐粟米湯 ~

洗埋碗就沖涼    之後休息休息   一日煮三餐都咪話唔攰   哈哈哈哈 ~

睇電視同 Youtube   又 12 點瞓 ~

粉絲肉碎 + 福花 ( 2-MAR-2022 )

( 2-MAR-2022  WED )

今日里奧大人補假   但佢無熄鬧鐘   所以 7 點幾響咗 ~

今朝瞓到 9 點 20 分起身   今日里奧大人補假    但要同我咁早起身   因為我係 WFH   哈哈 ~

食埋早餐就 Stand By   阿爽 11 點打嚟話有人搵我   原來係阿怪   之後我話下星期先番呀   佢話幫我做   咁就好喇   感激感激 ~

11 點到阿渠 Whatsapp 問我有無改到嘢比工廠 ?!   我話今日唔駛番工呀   如果好急嘅話   我依家即番公司改   但佢話唔駛   之後問我星期五番唔番 ?!   我話呢個星期都唔駛番呀 ~

咁我覆完佢    我同里奧大人講話可能要番工   已經諗住換衫 ~

之後我話如果有需要即改   我星期五即番公司改都無問題呀   佢話叫阿花幫手   咁我星期五就唔駛番   感激佢幫忙 ~

今日同里奧大人洗把直身風扇   11 點半洗到 1 點   希望用得番啦 ~

搞掂哂就叫里奧大人買 Lunch   反正佢出開去   嘻嘻 ~

里奧大人話驚我唔夠飽   買個芝麻餡嘅包   但唔好食嘅

2 點左右食午餐   之後又休息 ~

6 點唔夠就預備晚餐   所以 6 點半可以食晚餐   算早呢   哈哈 ~

是日晚餐 - 粉絲肉碎 + 福花

粉絲肉碎 - 完全諗唔到煮咩   見到之前拎咗包粉絲都無煮   咁今晚煮埋去啦 ~

福花 - 里奧大人將福花切碎   再加肉碎撈飯   估唔到勁好味呀   搞到我都學佢咁食法   哈哈 ~

沖埋涼就投票   又打下機   之後先睇 Youtube   咁里奧大人又睇 FB   所以 12 點先瞓 ~

蝦仁臘腸豆腐 + 福花拚娃娃菜 ( 1-MAR-2022 )

( 1-MAR-2022  TUE )

今朝 9 點都起咗身   食埋早餐就開機洗衫 ~

我都係投票同睇 Youtube 到 12 點幾   之後就睇預苦期靈修集 ~

1 點半食 Lunch   蒸番尋晚嘅長通粉   感覺好似帶飯   哈哈 ~.

同阿花 Whatsapp 一陣   佢又買咗嘢比我   之後話睇 B 站睇到悶   我話我睇 Youtube 都一樣睇到悶呀 ~

佢話尋晚放工去超市要排隊   所以無買   但經過凍肉店見無人   就買件豬肉番屋企   呢下笑死我   係都要買嘢先安樂 ~

傾完就睇靈修集   差唔多 6 點就預備晚餐 ~

里奧大人 7 點番到屋企   咁依家等埋佢沖涼先開餐 ~

是日懶餐 - 蝦仁臘腸豆腐 + 福花拚娃娃菜

蝦仁臘腸豆腐 - 依家唔係蒸就焗㗎喇   之前買咗豆腐   咁又煮啦 ~

福花拚娃娃菜 - 食埋聽晚就係菜   好在屋企長期有粟米 ~

洗埋碗就休息   之後同里奧大人睇 "狼少年" ~

結局感人   又睇到喊   所以叫里奧大人瞓先   我要睇番啲笑嘢先可以瞓 ~