滷水雞翼 & 滷水金錢肚米線 + 雞脾肉 & 魚腐米線 + 川辣口水雞 + 蠔油唐生菜 (外賣) ( 7-AUG-2022 )

$148 二人餐

滷水雞翼 & 滷水金錢肚米線 (麻辣蕃茄湯底)

雞脾肉 & 魚腐米線 (麻辣蕃茄湯底)  

川辣口水雞

蠔油唐生菜

( 7-AUG-2022  SUN )

今朝 9 點幾都醒咗   所以都整早餐食喇 ~

食完抖多陣就做小清潔   拖完地再大清潔廁所   沖完涼就要抖下先喇   今日趕兩場   所以真係要抖抖先出發 ~

去到教會   有人叫我   原來係教友個細女   我望佢嘅時候   真係碌大對眼向上望佢呀   佢都喺度笑啦   我話妳都應該知我想講咩啦   哈哈 ~

之前見佢都係高咗㗎喇   但今次再見佢   真係高咗好多咁囉   佢話依家 174cm   真係高我一個頭咁滯   佢 14 歲咋 ~

傾完都要做嘢喇   今日差唔多 1 點先結束崇拜   所以要即刻趕去里奧大人公司幫手呢 ~

好在里奧大人買定午餐咋   食完又要即刻做嘢喇 ~

今日可能趕兩場   真係好攰   之後做完哂嘢   我真係坐低都差啲瞓着呀 ~

6 點左右可以走人   咁要去姑奶屋企喇   因為買咗手機比佢做生日禮物呢 ~

咁又傾下偈啦   佢問婆婆仲喺唔喺度 ?!   我即刻鬧爆佢呀   我話妳咁問   係咪即係覺得佢應該唔喺度呀 ?!   我話妳想知我婆婆依家點樣   唔該妳問婆婆近期點 ?!   唔係問佢喺唔喺度囉   之後佢仲話因為公公唔喺度好耐喎   我直頭鬧佢講嘢用下個腦好無 ?!   公公走咗好耐所以婆婆都要跟住走 ?!?!?!   呢啲係咩邏輯呀 ?!   無腦 ~

里奧大人聽到佢咁講嘢   都叫佢唔好講啦   講多錯多 ~

我同里奧大人講   佢已經第 3 次咁問婆婆仲喺唔喺度 ?!   我話真係好憎佢咁問人嘢   好似咒我婆婆咁呀   之後里奧大人話妳都 Understood 佢係咁㗎啦   呢句我就笑出嚟   因為講得出呢句   我就知咩事   哈哈 ~

無諗過搞到接近 9 點呢   拿拿聲買完晚餐就番屋企喇 ~

今日大家都滕嚟滕去   所以沖埋涼先食喇 ~

我同里奧大人講話今晚咁夜食   起碼 12 點先瞓   但我 11 點 15 分都頂唔順要瞓覺   哈哈 ~

川味雞扒飯 + 原條龍脷柳飯 (外賣) ( 6-AUG-2022 )

川味雞扒飯- 個汁辣辣哋   所以下次都會叫嚟食   哈哈   不過今晚太夜食   所以我只食兩啖飯   其他留起去呢

原條龍脷柳飯 - 真係原條龍脷柳   咁又抵食喎

牛肉薯餅 ($15) / 吉列炸生蠔 ($15) - 兩樣都即炸   最細心係用錫紙袋包住呢

( 6-AUG-2022  SAT )

今朝 9 點唔夠都起身   所以即刻整早餐食喇 ~

又焗燶咗

食完抖陣就沖涼   之後又再抖下   家姐差唔多 10 點就嚟接我   好在我真係無做家務咋   如果唔係就會到我遲到呢 ~

兩個月無見家姐喇   我又買咗嘢比佢   所以今次係裝滿哂 1 個大嘅 Ikea 袋比家姐   真係好似人哋番鄉下咁 ~

家姐話工人之前先問話我好耐無嚟   點知今日就嚟   其實上個月 Off 撞正打風   所以無得去家姐屋企囉 ~

家姐喺門口開門   佢已經話 Berry 唔會理佢   一定會撲我   但事實真係   好多次都係咁   真係連隻狗都要蝦家姐 ~

放低哂所有嘢   家姐就叫我比封生日利是比里奧大人   我摸到好厚囉   之後又比封大利是我   話有錢要開心 Share 喎   不過佢呢幾年比我嘅利是   基本上我都無拆嚟用 ~

有 4 包零食係買比工人   其他就全部買比家姐   

家姐最鍾意收藏紫色利是封   因為我見到紫色就比佢   所以里奧大人一見紫色就知道係家姐比嘅  哈哈

糟糟朋友送比家姐   我話個盒好靚   佢話個個都想要個盒   哈哈

真係好耐無坐定定同家姐傾偈   實在太開心   因為真係咩都傾下   唔係會有好多嘢唔 Update 呢   哈哈 ~

Berry 又喱埋喺梳化底   但工人一叫就會出嚟   真係好搞笑 ~

影到佢細細隻咁

一見零食就樸過嚟

 好味呀呢

咩料呀 ?!    哈哈哈哈

家姐買咗風乾機    所以整鴨胸比 Berry 食

似乎幾鍾意食咁噃

之後佢係咁黐埋嚟   家姐話佢要我成條裙都係佢陣味喎   不過其實 Berry 細細個都係咁   所以我次次成條褲都係佢啲毛囉 ~

唔記得做咩講開血壓心跳   我話我心跳多數 8x   最低都係 78   有時追完車就 130   抖陣就 108 咁囉   因為來來去去都係呢啲數字   所以我會記得   哈哈 ~

個天無啦啦想落雨咁   所以家姐想快啲車我番屋企   驚我買完嘢會濕身   但其實都已 12 點 45 分   我都差唔多要番屋企   家姐話覺得好似趕我走咁喎   我話真係黐鬼線 ~

番到屋企又再沖涼   今日唔係好熱咁   所以都唔駛開冷氣   我真係覺得呢排涼咗好多咁呀 ~

里奧大人 2 點半番到屋企   所以叫佢買下午茶番嚟食呢 ~

食剩大半盒廈門炒米   聽晚再食

家姐唔食腰果   所以我拎嚟食   佢話支茶好好飲又比支我   細細包零食係工人買比佢   又比包我食   仲話好辣喎  

食完就睇 Youtube   里奧大人 5 點左右瞓晏覺   我都坐喺梳化瞓下醒下咁   之得我都上床瞓啦   仲諗住自己會頂到添   哈哈 ~

今晚都唔駛咁早出發番學   因為我唔想又買嘢 ~

我仲諗住番學會攰   但估唔到狀態又好 OK   今晚 Miss 仲讚我添呀   所以勁開心   之後又係話唔好再咁咁咁   我話知喇知喇   哈哈哈哈   因為佢成日都咁講 ~

放學買埋晚餐   因為里奧大人遲落 Order   咁唯有同老闆一路吹水一路等啦   原來都等咗 20 分鐘 ~

食完抖陣又沖涼   之後睇下電視   不過今晚夜食   所以我其實 11 點想瞓   但都忍到 11 點半先瞓呢 ~

薄餅 & 炸雞 & 肉醬意粉 + 粟米粒 ( 5-AUG-2022 )

( 5-AUG-2022  FRI )

感恩一覺瞓天光   里奧大人直頭話瞓得好好   真係好少聽佢咁講   所以我仲開心   哈哈 ~

早餐食奶醬多   間唔中食都唔係咁想食添 ~

里奧大人今朝真係搞笑   居然拎咗另一盒肉醬意粉   明明自己飯盒係圓型都可以拎錯   好在我無醃肉咋   唔係拎錯就真係大大鑊呢   哈哈

菇場唔忙   但今日星期五就無問題啦   感覺時間係過得快啲咁呢 ~

Lunch Time 出去行陣   之後又買牛肉米線番菇場食 ~

仍然唔忙啦   又係傾偈到放工 ~

番到屋企都預備晚餐了   今晚真係勁簡單   就咁焗熱就搞掂 ~

是日懶餐 - 薄餅 & 炸雞 & 肉醬意粉 + 粟米粒

薄餅 & 薄餅 & 肉醬意粉 - 今晚再接再厲   好在都叫做鍾意食咋   哈哈 ~

粟米粒 - 去超市睇下青瓜   但真係唔靚   所以開罐頭粟米食算喇 ~

洗埋琉就開機洗衫   之後即沖涼 lu ~

同里奧大人一齊睇培靈會   之後再睇多陣 Youtube ~

今晚里奧大人 11 點都瞓   我差唔多 11 點半先瞓 ~

環遊世界 (薄批) + 炸雞 + 招牌肉醬意粉 (外賣) ( 4-AUG-2022 )

今次好多芝士呀

我話啲紙巾好似有x血咁   里奧大人話我痴痴哋   哈哈哈哈   其實我係想話你一個人用 4 張紙巾好浪費呀

( 4-AUG-2022  THU )

感恩一覺瞓天光呀   真係瞓得好嘅人   係絕對唔會明白我可以一覺瞓天光   係一件幾咁感恩嘅事   哈哈 ~

今朝個天都灰灰暗暗   但天文台都話會連絡落 9 日雨   雖然落雨比較煩   但天氣無咁熱都好啲 ~

早餐食吞拿魚治烘底   想食酸咪咪嘢呀 ~

買咗呢包特別版比阿花同家姐

菇場忙呀   因為要做長命 Report ~

Lunch Time 出去行陣   再買燒賣+炒米粉番菇場   今日食到 1 點咁滯呀   唔知點解買完好唔想食囉 ~

菇場仍然忙啦   但差唔多 3 點左右就搞掂個長命 Report   咁可以抖下啦 ~

就嚟用新 System   但我無試過   因為真係唔知點入手   上次個人講到飄來飄去   連阿渠同船頭都話佢講嘢一忽忽   所以船頭同我一樣   入到新 System 都唔知點用囉 ~

但其實我都成日想問溫總點樣用   不過佢又唔得閒   到佢得閒又到我唔得閒   咁我諗住下星期先問啦   點知小說突然間走嚟同我講話下星期會開會   有人上嚟教我哋每個 Step   我當下真係覺得非常感恩   因為我就係最想咁   同埋最奇妙就係好在我無問溫總   因為小說講之前學咗嘅全部唔會用呀 ~

今日幾乎全日同阿花傾偈   講下對其他同事嘅感覺   估唔到佢同我嘅感覺係一模一樣   呢度某幾位同事係超級八   又鍾意八人嘢   自己嘢又唔講   一係就鍾意問人哋同講人哋啲嘢   其實我以為我自己咁諗   估唔到佢都係咁   但我覺得呢度嘅同事都係好好嘅   即係唔會分黨派咁   因為我個個都傾得   唔會聽見一嚟就講人是非咁囉 ~

放工即走   今晚會叫 Pizza 外賣   里奧大人話到下星期三都唔可以煮飯   咁可以一齊舒舒服服咁聽培靈會呢 ~

番到屋企都即沖涼   我一出嚟   原來 Pizza 已經到咗 ~

今晚 7 點 45 分左右都可以聽培靈會了   開心開心 ~

又睇下電視同 Youtube   不過 11 點幾都要瞓㗎喇 ~   

燒汁焗雞翼拚腸仔 + 油麥菜 ( 3-AUG-2022 )

尋晚食剩嘅芋絲同茄子

( 3-AUG-2022  WED )

今朝里奧大人應該 6 點幾起身出門口   之後我都醒醒哋   根本瞓唔番囉   唉 ~

咁早一班車出門口啦   其實多咗時間食早餐   不過又無咩胃口   所以食奶醬多算喇 ~

菇場唔忙   同阿花係咁 Whatsapp   所以好快到 Lunch Time 了 ~

行咗 15 分鐘   之後突然想食米線   不過都等咗 20 分鐘   好在條街唔熱咋   咁啱阿花同船頭都係食米線   佢哋落完單就行陣先再拎   所以佢哋問我做咩唔叫定 ?!   我話因為係突然間想食呢 ~

菇場仍然唔忙   所以非常之靜 ~

3 點左右係咁行雷   真係勁恐怖   大雨到直頭睇唔出面添呀 ~

今朝問 8 卦有無去過海底撈 ?!   點知 4 點幾 Jetso Club 有海底撈優惠   8 卦即 Send 比我睇   仲話好邪   我把好口   哈哈哈哈 ~

放工去買薯格比家姐   因為佢今日去 Aeon 想買   但我話 759 抵   所以我想買番比佢囉   佢唔想食係唔會買的   哈哈 ~

是日晚餐 - 燒汁焗雞翼拚腸仔 + 油麥菜

燒汁焗雞翼拚腸仔 - 好耐無用光波爐焗雞翼   真係焗出嚟靚好多架   同埋啲皮係脆囉   咁再加多 3 條腸仔   感覺多啲嘢食   哈哈 ~

油麥菜 - 自己煮菜真係特別抵   呢度 3 棵只係 $6.8 咋 ~

特登煮個炒麵比里奧大人聽日帶飯   最衰我食完叮嘢喉嚨痛   唔係間唔中帶飯都唔錯   因為真係食到唔知想食咩   我食嘅選擇又唔多呢 

洗埋碗就沖涼   之後休息一下 ~

里奧大人搵嘢   我問佢搵咩 ?!?!   佢話搵電視機搖控   話明明擺咗喺枱   我就即刻串佢   咁你都話明明擺喺枱   你又做咩要周圍搵嘅 ?!?!   佢當然唔敢再出聲啦 ~

我都見佢搵咗 20 分鐘都有   其實如果我見到   我都唔會話佢知   等佢慢慢搵   呢啲人要受下教訓   佢成日話唔搵就遲啲會出番嚟   咁我會話點解唔將啲嘢放好啲   用完放番原位   有啲手尾咁呢 ?! 

沖完涼就開機洗衫   抖陣就同里奧大人一齊睇培靈會   我覺得個胃唔係咁舒服   有嘢撩撩下咁   個人又好凍咁喎 ~

死忍爛忍   最後都忍唔住要去嘔   之後舒服好多   可能頭先食芋絲難消化呀 ~

今晚 10 點唔夠都瞓覺   咁都好   今朝太早起身了 ~ 

洋蔥雞柳日式炒麵 + 紅油蒜蓉蒸茄子 ( 2-AUG-2022 )

( 2-AUG-2022  TUE )

感恩一覺瞓天光   我覺得係 7 點左右已經醒咗   不過就等里奧大人鬧鐘響先起身   咁佢可以瞓多陣嘛 ~

早餐食芝腿治烘底   今朝飲凍咖啡   其實我唔熱   但唔想飲咁濃啡   所以就凍飲喇 ~

Lunch Time 出去萬寧買嘢   之後見個天開始黑哂   所以即去買 Lunch 啦   其實可以去近啲買   不過真係唔太餓   咁都係行遠啲買   感恩番到菇場先落大雨咋 ~

里奧大人話太多飯   我話 1 盒只係 $7 仲可以分兩餐   真係好過特登煮飯呀   諗番起以前佢點都唔會帶飯   話想出去食完可以抖下   依家就鍾意帶飯   話喺公司食飯舒舒服服   又唔駛諗食咩   所以真係好感謝神給予里奧大人一份好喜歡嘅工作呢   

唔忙就做 Email Filing   但又唔可以全日做   因為對眼會超過攰呢   我又成日唔眨眼   所以對眼好乾呢 ~

落場雨真係涼咗好多   我要着番件外套添呀 ~

放工即走   番到去都要即煮晚餐了 ~

是日懶餐 - 洋蔥雞柳日式炒麵 + 紅油蒜蓉蒸茄子

洋蔥雞柳日式炒麵 - 我食番尋晚嘅餸同白飯   所以煮日式炒麵比里奧大人食   佢又可以聽日帶飯   一舉兩得 ~

紅油蒜蓉蒸茄子 - 用芋絲墊底   但完全無食過   哈哈   因為我唔醒起要食埋尋晚食剩嘅餸同白飯 ~

洗完碗都即沖涼喇   抖一陣就同里奧大人睇培靈會 ~

睇多陣 Youtube   今晚 11 點幾先瞓 ~

燒汁焗三色椒牛板腱 ( 1-AUG-2022 )

( 1-AUG-2022  MON )

感恩尋晚都瞓得 OK   本身 7 點 20 分醒醒地   但都係瞓到 7 點 40 分先起身 ~

早餐食奶醬多   今朝想食啲甜嘢 ~

菇場忙咗陣   之後又可以 Hea 喇 ~

真係話咁快又 8 月喇

Lunch Time 出去買菜   之後再去 759 買桃哈多比家姐   最後買埋粉果粉麵就番菇場喇 ~

仍然唔忙   好想快啲放工 ~

反正要等車   所以放工去買雞骨草比里奧大人   差唔多 6 點半先番到屋企   所以要快快煮晚餐喇 ~

今晚勁想食泡菜拉麵   平時多數同里奧大人 Share 一個食   但今晚煮兩個   里奧大人見到都問我做咩煮兩個嘅 ?!?!   我話今晚想自己食一個麵呀   哈哈 ~

終於開呢盒飯喇

估唔到份量都好多喎

是日懶餐 - 燒汁焗三色椒牛板腱

燒汁焗三色椒牛板腱 - 唔係太多牛板腱   所以加 4 條腸仔   咁里奧大人可以帶飯喇 ~

食完就開機洗衫   沖埋涼就休息一陣   之後同里奧大人一齊睇培靈會 ~

我同家姐講話 Berry 鼻短短似細個嘅時候   家姐話就係記得我咁講   所以即影比我睇   哈哈

今晚 11 點半瞓覺   我覺得算夜呀 ~