臘潤腸拚臘肉 + 臘肉炒甜豆 + 豆苗 ( 7-DEC-2023 )

( 7-DEC-2023  THU )

尋晚半夜去咗次廁所   真係唔望鐘就好快瞓得番   哈哈 ~

早餐食甜餐包夾芝士   諗起以前成日食芝腿菠蘿包   甜甜鹹鹹真係好正㗎 ~

我同里奧大人講話做咗麥當勞會員   佢好奇怪   因為我話唔鍾意食麥當勞

我話好感恩呀   因為本身想買個水樽   依家做會員送水樽同埋幾張麥記 E-Coupon   所以咪做會蹟囉

菇場唔忙   又做自己嘢 ~

今日陪里奧大人去睇眼   所以下午放假   咁啱里奧大人公司有活動搞大食會   可以去食嘢 ~

感恩好快有車   好快到里奧大人公司   一去到袋都未放就睇下有咩嘢食   哈哈   其實阿妹已經幫我拎咗㗎喇   不過我仲想睇下 ~

里奧大人話驚我趕唔切   佢用細碗仔幫我裝嘢食   勁哥話點夠裝㗎   之後阿妹即刻拎個大碗去裝   好感動呀   同埋佢哋兩個成日都叫里奧大人拎嘢比我食㗎   話比里奧大人食即係嘥嘢   哈哈 ~

阿妹拎完再 Whatsapp 埋比我睇

我話想食燒鴨皮   諗住夾 2 塊   點知阿妹係咁夾比我   之後我夾燒肉皮   勁哥見到又係咁夾比我   又叫我一定要食魚肉燒賣   我話其實阿妹幫我留咗好多嘢食㗎喇   但佢係都要夾比我   里奧大人就覺得件紅豆糕好味又留件比我   呢個午餐真係充滿咗滿滿嘅愛呀   感動感動

阿妹同里奧大人好緊張我夠唔夠食 ?!   所以睇我再拎咗啲乜嘢   我影完張相   佢哋幫我拎出去   因為一個人拎唔到 4 個碗   哈哈哈哈

里奧大人同勁哥佢哋本身唔食㗎   但真係太多食物   所以佢哋再叫埋阿妹一齊食呢 ~

最搞笑係勁哥同阿妹話叫埋妳老婆啦   鴛鴦媽見到里奧大人又係咁講   叫妳老婆一齊食啦   但其實咁好彩我今日放下午咋   所以里奧大人話鴛鴦媽一見我   就樸出嚟攬住我   哈哈 ~

里奧大人去做嘢   所以阿妹就陪我食   鴛鴦媽又拎個鉗仔比我   之後又一齊傾偈   我個咀無停過添 ~

咁諗住走啦   皇太后見到我   話買咗嘢比我   不過唔知我今日會嚟   所以無拎到 ~

咁又傾偈   佢話佢諗咗好耐   終於知道我點解食零食   我話上次里奧大人講咗比我知呀   哈哈 ~

傾到 1 點 45 分都要走 lu   之後番到屋企抖陣就出發去睇眼喇 ~

里奧大人話諗住頭先食完就走   點知今日我咁忙  哈哈 ~

3 點準時睇醫生   里奧大人呢幾個月成日話對眼好攰   有時好濛同埋個頭仲會痛   不過休息又無事   但呢排又係咁   所以我叫佢快啲睇眼科囉   感恩唔係白內障同青光眼呢 ~

因為落咗藥水放大瞳孔   但里奧大人又話無咩嘢喎   只係隻眼有啲唔舒服同埋少少濛   之後就陪我去裕華行個圈   再去埋髮品店買洗頭水就番屋企喇 ~

番到屋企都 4 點幾   本來有啲想瞓   不過又瞓唔到   所以睇 Youtube 喇   里奧大人就瞓咗陣～

5 點半就預備晚餐   但差唔多 6 點半先開餐   今晚做咩都好慢咁   哈哈 ~

是日懶餐 - 臘潤腸拚臘肉 + 臘肉炒甜豆 + 豆苗

臘潤腸拚臘肉 - 其實我都幾鍾意食臘味   因為夠方便   哈哈 ~

臘肉炒甜豆 - 今次到我煮到啲甜豆黃咁咁添   我鍾意食甜豆   不過里奧大人唔係咁鍾意   所以都好少買嚟食 ~

豆苗 - 又加啲臘肉一齊炒啦   確實係好味好多嘅 ~

洗完碗就燜餸   之後再煲蕃薯糖水   搞掂都差唔多 8 點   要同里奧大人去做機喇   我都係做 20 分鐘   太耐條腰係頂唔順 ~

番到屋企即沖涼   之後食蕃薯糖水 ~

焗蕃薯就好甜   但整蕃薯糖水又唔甜嘅   里奧大人話好在我個糖水整得甜咋   可以中和番咁話喎

睇完電視再睇 Youtube   今晚 10 點 45 分都瞓覺 lu ~

蜜糖焗雜丸 + XO 醬炒豆苗 + 五香肉丁餐肉炒飯 ( 6-DEC-2023 )

( 6-DEC-2023  WED )

今朝起身去廁所   望下個鐘係 6 點   我次次望完時間就好難瞓得番咁   下次都係唔望喇   哈哈 ~

早餐食全麥合桃牛油卷   不過今朝唔夾芝士   尋朝食完好滯咁呀   里奧大人就食窩夫 ~

食完早餐再靈修一陣先番工   依家搭遲一班車就有時間咁呢 ~

菇場唔忙呀   但就做 Email Filing ~

Lunch Time 行陣再去食牛筋米   之後忍唔住又做咗麥當勞親子會會員   其實佢個名真係好誤導人   真係以為係父母先申請到囉   哈哈 ~

2024 年親子會會員招募   入會費 $58

好記得我之前係申請媽咪會會員   我真係以為係媽媽先可以申請呀   咁船頭話佢啲會員卡   男人都可以申請㗎   我話細路都申請得添啦   哈哈 ~

唔忙就做自己嘢喇   所以好快放工 ~

買埋麵包就番屋企   估唔到里奧大人已經番到嚟   佢話好攰唔去做運動   咁我叫佢沖涼先啦   反正未食得嘛 ~

是日懶餐 - 蜜糖焗雜丸 + XO 醬炒豆苗 + 五香肉丁餐肉炒飯 

蜜糖焗雜丸 - 突然間好想食呀   其實呢個餸真係好方便   不過唔可以成日食 ~

XO 醬炒豆苗 - 終於清埋樽 XO 醬   今次啲豆苗麻麻哋好食   好在只係買咗 1 斤咋 ~

五香肉丁餐肉炒飯 - 里奧大人中午食剩㗎   不過我都無再煮米粉   因為留肚食蕃薯 ~ 

洗埋碗就開機洗衫   之後沖涼喇 ~

抖陣就食蕃薯   今次啲蕃薯好甜呀   里奧大人直頭話甜得滯   哈哈 ~

終於清哂啲韓國蕃薯

味道都好香好糯

隻手唔小心掂到啲蜜汁就最煩   因為會立痴痴呀

食飽就熨衫   之後又睇 Youtube   今晚睇到 11 點幾先瞓呀   因為里奧大人留咗杯珍珠奶茶比我飲   可能飲咗奶茶   唔係咁眼瞓咁呢 ~

土耳其 & 印度餐廳 @ 紅磡 ( 5-DEC-2023 )

2人套餐 ($188) - 仲有 2 罐汽水

薄脆小食 - 好脆呀   但齋食就有啲鹹

春卷 - 新鮮炸起   當然好食啦

馬沙拉茄子 (BAINGAN MASALA) - 好味道喎   但食唔出有咩香料   哈哈

咖哩魚配烤餅  - 咖哩就少少辣   但件魚柳好鹹   我發覺好多時食咖哩魚都係咁

無諗過份量咁多   我諗住得 1 大塊㗎咋

( 5-DEC-2023  TUE )

感恩一覺瞓天光呀   我 7 點 20 分都醒咗   所以祈完禱都要起身喇 ~

早餐食全麥合桃牛油卷但夾芝士   咁唔似又食同一樣嘢咁嘛   哈哈 ~

去到巴士站等車   見到阿妹行得好急   所以特登叫停佢   同佢講早晨   原來佢約咗人食早餐遲到   怪唔得行得咁急啦 ~

菇場唔忙就執下文件啦   好想放番哂入箱   整整齊齊望落舒服好多嘛 ~

Lunch Time 出去行陣再去食牛筋粗麵   食完就去買菜   依家咁樣都唔錯   我都係鍾意食完先行 ~

因為手機 Load 唔到相去電腦   所以叫 BG 幫我   因為佢都話應該一插條 Len 線就可以過相   佢仲好有心機幫我搵哂手機所有設定添呀   不過都整唔到呢 ~

突然忙呀   做到 5 點左右先做完   抖陣又可以放工了 ~

放工要去里奧大人公司呀   睇下佢公司部電腦係咪咁 ?!   因為屋企部電腦又可以 Load 相嘛 ~

最後終於知道點解啦   因為之前系統更新咗   所以按嘅制就唔同哂位   依家係要向上掃先再按入就見到版面   但里奧大人喺屋企整嘅時候   無話我知向上掃個動作啦   唔係就唔駛搞咁多嘢   哈哈 ~

搞到 6 點 20 分先走   不過今晚都預咗唔煮呢 ~

呢間餐廳係阿妹介紹嘅   咁講起佢   里奧大人話阿妹同佢講今朝好開心   因為我好開心同佢講早晨   里奧大人仲以為佢收到座枱同曆好開心添   哈哈 ~

食完就番屋企   抖咗 45 分鐘就一齊去做機   不過我有啲攰  都係做 15 分鐘算喇 ~

開埋機洗衫就沖涼   之後休息休息 ~

睇陣 Youtube 又打陣機   今晚 10 點半都瞓覺 lu ~

客家原味粉 @ 紅磡 ( 4-DEC-2023 )

一品什會米粉 ($60) - 我想咩都試下   所以叫呢個一品什會   但佢比錯米線   不過我都比番米線比里奧大人食   我覺得夜晚食米線會好滯

除咗豬潤   仲有粉腸 豬手同鮮牛肉   啲餸多到食極唔完咁呀   

魚球肉丸米線 ($48) - 仍然咁好味呀

( 4-DEC-2023  MON )

感恩一覺瞓天光呀   所以好開心   哈哈 ~

早餐食全麥合桃牛油卷 ($19/5 個)   強調係不添加防腐劑同不含反式脂肪添   所以買嚟食喇   順便幫家姐儲積分 ~

菇場忙咗陣   之後做自己嘢喇 ~

Lunch Time 出去行下   買埋腸粉就番菇場慢慢食 ~

仍然做自己嘢   但 4 點半先嚟有 Urgent 嘢   真係做到啱啱放工 ~

番屋企整一陣嘢就出去食晚餐   之後就同里奧大人一齊番學   放學之後我再有義工分享   差唔多 9 點 40 分先完畢 ~

番到屋企即沖涼   睇多陣電視   今晚 11 點幾先瞓 ~

燒腩肉拚蜜汁叉燒 (外賣) + 菜心苗 ( 3-DEC-2023 )

( 3-DEC-2023  SUN )

感恩一覺瞓天光   但臨醒之前發咗個好恐怖嘅夢 ~

今朝食蕃茄肥牛通粉   里奧大人仍然係丁麵餐   不過今朝個丁麵係無味   睇個樣都知   哈哈 ~

同里奧大人食完早餐就去佢公司幫手   之後同阿妹同細細聲一齊傾花經   佢哋個個養唔掂嘅植物就拎番公司   但真係喺公司又生長得好好㗎喎   所以我次次去里奧大人公司都好開心   因為望到好多綠色嘅植物 ~

傾完就陪阿妹食早餐   又一齊傾下密偈   開心開心 ~

9 點 03 分打去預約睇醫生   最快都要 10 點 15 分   咁都照去睇喇 ~      

我 9 點幾都出發去睇醫生   好感恩第 4 個就到我呢 ~

今次又係睇腳趾甲倒生   我痛咗 2 日㗎喇   同埋點都鉗唔到出嚟   所以睇醫生啦   好驚發炎呀 ~

醫生幫我用個鉗   再加啲力就鉗咗出嚟   估唔到係 1 條幼幼嘅指甲   大約 0.5cm   我以為只係一粒細細地嘅腳趾甲   但估唔今次係 1 條   鉗咗出嚟當堂唔痛了   感恩感恩 ~

里奧大人先好笑   佢問醫生用咩儀器睇到有趾甲倒生 ?!   我話佢用個細電筒咋   之後里奧大人話醫生好眼過我哋   哈哈哈哈 ~

拎埋藥只係 10 點 45 分   真係好感恩呀   因為今日有事奉   有姊妹突然請假   如果我都番唔到就會變咗突然唔夠人囉   所以好感恩今日咁快睇完醫生呢 ~

去埋 A1 買麵包   見有時間就同家姐 Whatsapp 傾偈   傾完就番教會 lu ~

對住家姐瞓   好似好嗲咁

今日事奉到 1 點 45 分   之後就買午餐番屋企食喇 ~

食完就要整嘢   我搞掂就去買燒味   里奧大人就要再番公司做啲嘢 ~

買咗 1 斤燒腩肉同家姐 Share   之後再買半斤叉燒比家姐

呢度係比家姐嘅

里奧大人去做運動   不過我今日比較攰都唔去喇 ~

睇下 Youtube 已經 6 點   諗住差唔多時間同家姐交收   不過最後差唔多 7 點幾先交收   因為之前話 6 點交收嘛   如果咁晏先交收   之得食埋飯先啦 ~

交收完就叫里奧大人淥菜   我番到屋企   佢話啲菜未熟   我好奇怪 10 分鐘都未熟 ?!   原來佢用凍水淥菜   我話之前講咗兩次話水煲煲熱啲水就可以淥菜   之後再煲水焗麵   但佢話我無講過喎   我真係好想話你都唔識淥   我點會唔教你點做呀 ?!?!   不過是鬼但佢啦   費事又嘈嘈閉   佢仲話下次同佢講完叫佢再講多次   就等於佢知道係咁做喎   佢咁講又好喎   下次咩都 Whatsapp 仲要佢覆 Noted 再做記錄就最好添   我自己唔駛咁勞氣 ~

之後見佢仲冚蓋焗熟啲菜   我都唔理佢點煮喇 ~

家姐之前去澳門   我都叫佢乜都唔好買比我   但佢都係要買盒脆豬肉比我   好在佢買盒細 size 咋   因為呢啲一開要好快食完   唔係就會腍㗎喇

是日懶餐 - 燒腩肉拚蜜汁叉燒 (外賣) + 菜心苗

燒腩肉拚蜜汁叉燒 (外賣) - 我夾咗 4 件叉燒比里奧大人做 Lunch Box   因為佢蒸飯嘛   無理由蒸燒肉啦   哈哈 ~ 

菜心苗 - 里奧大人煮咗 20 分鐘嘅菜   成碟菜都黃咁咁   佢仲話咁腍定咩   我話好彩係你煮啫   佢當堂無出聲   呵呵 ~

里奧大人幫手洗埋   我就煮熱啲紫米露   之後佢又漏咗隻碗未洗   我真係真心唔明   拎嘢去洗唔係全部拎哂嘅咩 ?!

開機洗衫就再去沖涼   抖陣先食紫米露 ~

一路食一路睇 "回魂夜"   依家睇就覺得好笑   我好記得第一次住公立醫院   嗰晚就係做回魂夜   里奧大人話笑片嚟㗎   唔恐怖㗎   咁探病時間又只係到 8 點   所以我最後都無睇   間房有 8 張床   雖然我瞓最近門口   但係轉身會望到對面大樓嘅後樓梯   咁我一定唔會向嗰邊瞓 ~

咁我同姑娘講話我好驚   問佢可唔可以開燈瞓 ?!   佢話唔可以呀   但就幫我開咗最開張床嘅床頭燈   咁樣我仲驚呀   因為盞燈照住張吉床   所以我最後都熄咗去   哈哈 ~

睇完再睇下電視   今晚 10 點 50 分都瞓覺 lu ~

昇麵館 @ 紅磡 ( 2-DEC-2023 )

酸齋 + 麻辣豬肚 + 靚靚豬腩肉粗麵 ($49) - 秘製辣汁   唔覺得有咩味道咁喎

蟹柳豬扒炒烏冬 ($46) - 好味呀   但好油

( 2-DEC-2023  SAT )

感恩一覺瞓天光   今朝鬧鐵未響都醒   忍唔住望下個幾點   原來都 7 點 19 分   不過唔會起身住   哈哈 ~

今朝里奧大人去買早餐   今次到我想食五香肉丁米線喇 ~

食完就靈修 20 分鐘   依家搭晏車   時間真係好好用   哈哈 ~

菇場唔忙啦   同阿花傾偈   佢之前去日本見到車銀優呀   勁羨慕 ~

放工即走   同里奧大人去飯堂食午餐 ~

慾望酸梅 (+$8) - 今次小食改咗拍青瓜   實在太好喇   因為我唔係咁鍾意食土豆絲

酸菜魚 (少辣少油)  ($68) - 隔咗排無食   仍然覺得好味道

水煮牛肉 (小辣) ($68) - 我想食濃味嘢   所以又揀番佢喇    

食完就去整嘢   里奧大人就番屋企休息一陣再番公司開會 ~

整完嘢都 4 點幾   所以番到屋企都抖陣先 ~

同里奧大人 6 點左右出發去食晚餐   食完行陣就番屋企 lu ~

抖咗半個鐘就同里奧大人一齊做機   不過我只係做 15 分鐘   今日好攰呀   真係至在郁下咁咋 ~

咁里奧大人就繼續做   我就番屋企沖涼先 ~

開埋機洗衫就休息   睇下電視   今晚 10 點半都瞓覺 lu ~

手撕雞 (外賣) + 泰式無骨鳳爪 (外賣) + 菜心苗 ( 1-DEC-2023 )

( 1-DEC-2023  FRI )

感恩一覺瞓天光呀   今朝鬧鐘響咗都唔願起身   我覺得打機其實都幾傷神   下次都唔好打到咁夜了 ~

今朝里奧大人放假   又唔駛問焗爐焗麵包   諗住好多時間用   點知都用咗 15 分鐘刷牙洗頭沖涼吹頭   其實我覺得耐   不過好多人可能覺得快   哈哈 ~

早餐食雞蛋糕   係同事結婚請食嘅唐餅   不過好乾呀   初初諗住換幾個番嚟   依家唔會諗咯 ~

我驚里奧大人食得急又唔咬耐啲    所以都係剪開一粒粒比佢食

食完又靈修   感覺真係好好   始終夜晚比較攰嘛   但其實係懶 ~

菇場忙呀   日日係咁就好   哈哈 ~

2023 年   好快就成為過去了

Lunch Time 出去行陣再去食鯪魚球米   之後去買菜再去萬寧買嘢   買完就番菇場喇   因為已經 12 點 50 分 ~

仍然忙呀   差唔多 4 點先忙完 ~

放工即走   買埋手撕雞都番屋企 lu ~ 

今晚煮辛辣麵   咁尋晚食剩一碗飯   特登留啲臘肉嘅肥膏用嚟炒飯   真係好味好多   哈哈 ~

里奧大人話皇太后今日比 1 斤菜比佢   咁當然唔會要啦   之後佢仲同里奧大人講話諗咗好耐   話我煮菜唔加薑又唔落鑊炒   所以個人好寒涼   成日要食零食係因為啲零食係燥然嘢   等個人中和番   里奧大人話佢咁都可以幫佢講好說話   哈哈 ~

是日晚餐 - 手撕雞 (外賣) + 泰式無骨鳳爪 (外賣) + 菜心苗

手撕雞 (外賣) - 今次去另一間買手撕雞   我要辣嘅   估唔到幾好味   之前買嗰間都好味   但比錢要受氣   所以唔係咁想幫襯囉 ~

泰式無骨鳳爪 (外賣) - 想食好耐所以買   不過呢盒完全無味道呢 ~

菜心苗 - 本身想買甜豆   不過唔見有   所以又買 1 斤菜心苗   我同里奧大人話今晚用臘肉嘅肥豬膏炒㗎   咁樣好味好多   之後佢話聽皇太后講完即炒菜   哈哈   其實我係淥完再炒㗎咋 ~      

洗埋碗就沖涼   里奧大人就去做機 ~

今次終於焗到外皮流蜜汁   拎出嚟嘅時候好似拔絲咁   味道勁似麥芽糖添呀   里奧大人話今次啲蕃薯好甜   但甜得滯   我話想點呀   唔甜又話唔甜   依家甜又話甜得滯   佢都忍唔住笑   哈哈

同里奧大人一齊睇 "MI7"   不過我睇到 10 點半都瞓覺 lu ~