蒜蓉西冷牛扒 (外賣) + 節瓜元貝湯 ( 6-JAN-2024 )

餸就咁再焗熱

飯就要蒸熱

( 6-JAN-2024  SAT )

感恩一覺瞓天光   但起身前係應該發緊夢   因為聽到鬧鐘音樂係嚇醒咗 ~

今朝都有做運動   朝早睇住日出提示要番工   夜晚就喺菇場睇住日落提示要放工   哈哈 ~

同里奧大人去食早餐   我一入去   老闆同我講話: 阿妹  已經有人幫妳叫咗早餐喇   實在太開心有人叫我做阿妹啦   平時啲人叫我做阿姐㗎   哈哈哈哈 ~

今朝里奧大人有胃口食嘢喇   個樣係笑㗎   之前無胃口又成日嘔心感覺   個樣愁到不得了   搞到我擔到到呢   當住佢臉前喊咗出嚟   佢以為咩事   之後知我好擔心佢囉 ~

火腿通粉嘅份量好巨呀

食完就去里奧大人公司坐陣   同佢執咗少少嘢都要番工喇 ~

菇場雖然忙   但同阿花傾下偈先開工 ~

除咗名牌嘢   阿花一見係車銀優賣嘅廣告  就會一定支持   哈哈   遲啲又去 FANMEET 喇   勁羨慕

但做做下嘢   聽到阿怪同阿輸投訴阿B   話佢同小A成日嘻嘻哈哈無嘢做喎   同埋阿B唔聽佢講嘢   真係好心啦   人哋放假就話人 ~

最重要係做嘢係公司安排囉   成日覺得人針對妳   妳自己都要好好檢討一下自己啦   日日番 9 點半   去廁所又起碼 20 分鐘   仲好意思話人無嘢做 ~

估唔到忙到 12 點 58 分先做完   熄埋機就啱啱好放工 ~

同里奧大人去十二味食午餐   食完就去買餸   里奧大人就番屋企休息 ~

雞翼麻辣香鍋 - 食剩 4/5 呀   所以幾乎成個套餐拎番屋企

酸菜魚 - 份量好似細咗咁嘅

餸喺碗底㗎   我叫里奧大人幫我壓實啲飯   如果唔係唔夠裝呀   哈哈

咁我去 A1 買杏仁批   因為今日額外有 95 折   但家姐話佢今朝喺 A1 買買買   點知係指明款式先有額外 95 折   我話無寫明係指定幾款喎   咁我問職員啦  佢話所有都係 95 折   之後話今日系統有問題   要 11 點後先回復正常   但家姐今朝 10 點去買又無拎單   所以都退唔到錢 lu ~

買完就去買餸啦   行行下先記得無用張 Coupon 呀   激死我   家姐仲幫我計到最抵添   嗚嗚 ~

之後特登去買魚肉燒賣   我同里奧大人都覺得好食   所以買多包比家姐喇 ~

$20 包都算抵食   因為真係好難買到好食嘅魚肉燒賣呢

買埋四條脆肉瓜同兩條節瓜諗住走   但難得同家姐交收   所以買啲黃金百香果比家姐   再買豬腰芒比姐夫   本來仲要買急凍雞翼同雞膇   最後買包雞膇算喇   因為個袋無哂位   哈哈 ~

番到屋企原來都 3 點半   我同里奧大人講話買咗包魚肉燒賣   估唔到佢話想食幾粒   咁實蒸比佢食啦   難得佢有胃口嘛 ~

好大粒   真係食四粒都飽哂   哈哈

食完就熨 2 機衫  搞掂就睇 Youtube ~

同家姐 6 點半交收   但落到樓行多陣先知手機得 2% 電咋   所以即打比家姐   叫佢喺老地方等   千奇唔好走開呀   哈哈 ~

傾咗一陣都走喇   今晚 7 點半先開餐 ~

是日晚餐 - 蒜蓉西冷牛扒 (外賣) + 節瓜元貝湯

蒜蓉西冷牛扒 (外賣) - 唔知煮咩呀   但就唔想食雞翼囉 ~

節瓜元貝湯 - 想清埋啲元貝呀   所以滾呢個湯 ~

洗埋碗就抖陣   之後同里奧大人去做運動喇 ~

開埋機洗衫就沖涼   抖陣就食果仁批   里奧大人成日記住要食呀   哈哈   感恩佢有番胃口   感謝神 ~

我去兩間凍肉店比錢   咁我將佢放低喺櫃面再拎銀包出嚟   因為怕自己 Fing 嚟 Fing 去整鬼爛   兩間老闆娘都話個蛋糕仔好靚呀   邊度買㗎 ?!   家姐尋日又問靚唔靚 ?!   咁其實個杏仁批又真係整得幾靚嘅

我話靚呀   家姐就話買   所以外表真係幾咁重要呢   哈哈   但我覺得家姐呢個無咁多糖份仲靚喎

焦糖果仁批 ($60) - 折咗只係 $51.30   家姐諗住 11 號先買   我話其實我同佢 Share 咪得囉   反正我兩個人又食唔哂一個   依家 Share 下一齊食仲好   最搞笑佢話如果好食就叫我食埋去   我話好食就更加要同妳 Share 啦

最上面係焦糖雜錦果仁   之後就到杏仁餡  海綿蛋糕   酥脆批皮

睇下 Youtube 又打機   差唔多 11 點幾先瞓 ~

蕃茄豚肉意粉 + 豆苗 ( 5-JAN-2024 )

( 5-JAN-2024  FRI )

感恩一覺瞓天光呀   6 點 47 分都起身做運動喇 ~

里奧大人瞓得唔好   所以晏少少番公司   所以我自己食早餐先喇 ~

早餐仍然食丹麥條   估唔到又幾好味喎   呢間都整得酥酥脆脆   但如果無提子就更好啦   哈哈 ~

菇場忙呀   不過做咗個幾鐘就搞掂 ~

今日老闆請飲茶   我哋分咗兩張枱   之後留咗兩個位比司機同肥仔豪   點知阿怪嬲爆爆咁即坐埋嚟   我哋個個 O 哂咀   因為無人鍾意佢   同埋佢行為好怪異   所以更加無人咁話佢 ~

咁坐咗落嚟都由佢啦   我同船頭坐嗰邊比較迫   之後船頭叫阿怪坐過少少   阿怪居然叫番船頭自己坐過啲咪得囉   船頭即刻大聲話佢   就係好迫無位先叫妳坐開啲   妳係咪唔識聽廣東話呀 ?!

阿怪就笑住坐過少少   真係痴痴哋   佢應該覺得個個同事都針對佢囉   但其實妳都醒水啦   妳隔離個位未有人坐   妳坐過少少咪得囉 ~

之後食嘢   蝦餃燒賣又每樣食兩粒   咁其中一個人咪無得食囉   因為預咗一人一粒嘛   雖然可以再叫   但妳食咗就等多陣   真係轉多幾轉無人食先食嘛 ~ 

睇住佢夾完蝦餃再夾鳳爪落碗   之後再即刻夾叉燒包   好心食完一樣先夾啦   唔夠食一定會再叫   我哋次次差唔多食哂   就會再叫多幾轉   想食咩大叫就得 ~

我哋好似叫咗 4x 籠點心同小食   其實都好有食力   但我哋以前仲叫得多呀   每次嚟點心都係一棟棟咁㗎   仲要有炒粉麵飯添 ~

飲到 1 點半就開工   我同船頭仲諗住飲到 2 點添   哈哈 ~

頭先喺酒樓都有影大合照   我哋嗰枱就係肥仔豪影嘅   阿花話影到佢咁   溫總又話影到佢無咩頭髮   阿虫叫肥仔豪換手機啦   真係笑鬼死呀   哈哈   女人一影相就會叫人要影得靚啲瘦啲   大佬   本身妳係咁先得㗎   哈哈 ~

忙咗陣又做自己嘢   所以好快就放工 ~

番到屋企即預備晚餐   里奧大人差唔多 6 點幾先放工   咁即係佢有精神做嘢喇   感謝主 ~

是日晚餐 - 蕃茄豚肉意粉 + 豆苗

蕃茄豚肉意粉 - 今次都係用車厘茄煮成蓉   時間係用耐少少   但我覺得好味過大蕃茄 ~

豆苗 - 今次只係加咗煲仔飯豉油同麻油   懶得用蒜蓉炒呀 ~

洗完埋抖陣就同里奧大人做機   今晚都係做 20 分鐘算喇 ~

番到屋企即開機洗衫   之後沖涼休息喇 ~

今晚都係食蜜瓜   之後喉嚨又唔舒服咁   同尋晚一樣呀   我估真係食完蜜瓜先係咁囉   因為我今晚都無食薯片 ~

睇多陣 Youtube   今晚 10 點半都瞓覺 lu ~

魚香茄子 + 臘腸炒豆苗 ( 4-JAN-2024 )

( 4-JAN-2024  THU )

尋晚瞓到半夜熱醒呀   條頸出哂汗   抹完就諗住去沖涼   但望個鐘係 12 點 59 分就即刻瞓番 ~

早餐繼續食咖啡瑞士卷   里奧大人就食丹麥條 ~

同里奧大人講話尋晚熱到出汗呀   里奧大人話佢尋晚覺得凍   所以驚我都凍就幫我蓋埋佢張被呀   怪唔得我咁熱啦   哈哈 ~

佢話尋晚瞓得唔錯   可能無飲中藥   夜晚無咁熱   因為佢啲中藥加咗薑呢 ~

菇場唔忙   又執下枱面嘅嘢 ~

喺 Pantry 見到溫總   佢話我做咩依家唔食早餐   我話依家喺屋企食呀   因為以前我都好早番到菇場食早餐呢 ~

Lunch Time 出去行下   見船頭就咁着短袖 tee 出去   我話我都覺得凍呀   之後我話可能我位凍啦   佢話關咩事 ?!   因為佢聽到我話我矮所以凍呀   哈哈哈哈 ~

食完鯪魚球河再去買菜   之後又周圍行下先番菇場   次次都差唔多 12 點 40 分番到菇場   咁都唔錯㗎   始終食完都想行下呢 ~

   

今次鯪魚球河要小河   我覺得咁樣最好   食河粉比較脹胃嘛

好想食蒜蓉花生同花生糖   所以買包嚟食   每包 $5 真係好抵   因為如果好味先再買大包   哈哈   咁話梅薑就同里奧大人 Share   食薑都好㗎   但唔可以食太多囉

唔忙就做下自己嘢   好快又放工咁 ~

番到屋企即預備晚餐   呢排動作比較慢   差唔多 6 點 50 分先開餐 ~

是日晚餐 - 魚香茄子 + 臘腸炒豆苗

魚香茄子 - 用現成醬料包就最方便   里奧大人有番啲胃口咁呀   因為話食唔哂就留比佢帶飯   之前話食唔到咁多   唔好留比佢㗎 ~

臘腸炒豆苗 - 今次買豆胚   $18/半斤   因為我驚里奧大人食得唔多   所以煮一半先   但其實煮完都好細碟下   哈哈 ~

洗埋碗就申請 Passport   搞掂哂都唔做運動喇   我今晚係超級勁攰呢 ~

沖埋涼都休息   衫都唔熨住喇 ~

之前喺 HKTV Mall 買嘅網紋蜜瓜   真係擺咗好多日先熟   哈哈

里奧大人切到咁   又幾細心喎

睇多陣電視   今晚 10 點都要瞓覺 lu   真係勁早呀   哈哈 ~

沙茶醬焗海鮮卷 + 蒜蓉蒸茄子 ( 3-JAN-2024 )

尋晚食剩嘅豉油雞同上海麵   

( 3-JAN-2024  WED )

感恩算係一覺瞓天光   但臨醒前係咁發夢   同埋半夜其實都凍醒咗呀   好似呢幾晚都成日凍醒咁 ~

今朝仍然去做運動   不過做咗 15 分鐘又突然肚痛   要即番屋企 lu ~

里奧大人瞓得唔好呀   所以晏啲先番工   咁我沖埋涼再去買芝士條比佢做早餐呢 ~

我嘅早餐仍然係咖啡瑞士卷   其實仲剩一件   但真係食唔落   要留番聽朝再食 ~

食完就靈修半個鐘   之後番工喇 ~

菇場 3D   但都有啲嘢做下  咁都好   時間過得快啲 ~

Lunch Time 出去行陣   今日要食鯪魚球米   因為菇場真係好鬼凍   我要食熱嘢呢 ~

有兩個男人傾偈   話朋友個家姐已經係適婚年齡   應該要結婚   不過個男就唔係咁好   但我唔記得講咩唔好喇   之後再聽到佢問個男仔有無做嘢先 ?!   男人最緊要有做嘢   唔係頭家點養呀 ?!   咁佢又講得啱喎   世界上無咩幾個好似水公咁好命呢 ~

食完就去買埋茄子同橙   之後再行多陣都番菇場喇   拎住袋橙有啲重   哈哈 ~

丹麥條賣相都唔錯   所以買嚟做聽朝早餐  

唔忙就做下自己嘢   咁就好快放工㗎喇 ~

放工即走   番到屋企都預備晚餐了 ~

是日懶餐 - 沙茶醬焗海鮮卷 + 蒜蓉蒸茄子

沙茶醬焗海鮮卷 - 焗完再加沙茶醬再焗   其實咁樣都幾乾下   哈哈   下次都係落鑊兜下好啲   今晚特登加啲豬肉鬆   咁睇下里奧大人有無開胃到先   果然佢第一樣係夾肉鬆   不過佢話新東陽好食好多   我話我有買到嘅   但今晚食住啲泰國肉鬆先啦   係就係淡味咗啲嘅   好在買咗 1 包咋 ~ 

蒜蓉蒸茄子 - 唔想里奧大人難消化   所以食啲軟身嘅蔬菜   咁蒸茄子就最好喇 ~ 

洗埋碗抖陣就同里奧大人去做運動   仍然做 20 分鐘 ~

番到屋企即開機洗衫   沖埋涼就熨衫 ~

睇陣 Youtube   今晚 10 點 35 分都瞓覺喇 ~

豉油雞 (外賣) + 福花 ( 2-JAN-2024 )

( 2-JAN-2024  TUE )

尋晚瞓得唔係咁好呀   其實我都預咗   因為好多時放完假要番工就係咁呢 ~

今朝的起心肝去做運動   6 點 55 分要起身刷牙洗臉   本身真係好想唔去啦   又瞓得唔好喎   但都係唔好比籍口喇 ~

做咗 20 分鐘動就番屋企沖涼   之後就食早餐喇 ~

早餐食咖啡瑞士卷   好耐無食   不過唔會話覺得好好食   哈哈哈哈 ~

菇場忙呀   所以時間過得好快 ~

里奧大人好鍾意 XO 㗎   我就近幾年先鍾意   不過佢唔會買呢啲月曆啦   男人好少用公仔月曆嘛   哈哈

里奧大人初初以為我只係齋睇日子   但其實我真係會寫嘢㗎

我買比家姐嘅 KAKAO FRIENDS 月曆都好靚㗎   我覺得

所以我都要影相記錄一下   哈哈

Berry 陪住家姐 WFH   工人話如果家姐喺房   佢想摸家姐呢   Berry 會吠佢㗎   好似好保護主人咁喎

Lunch Time 出去行下   之後食墨魚丸米粉   食完又再行下先番菇場 ~

忙下停下又做下自己嘢   再望個鐘原來已經 5 點 27 分   真係拿拿聲去廁所喇 ~

買埋餸就番屋企   今晚都係炒上海麵   所以差唔多 7 點先開餐呢 ~

是日晚餐 - 豉油雞 (外賣) + 福花

豉油雞 (外賣) - 諗唔到煮咩呀   所以就買半隻豉油雞算喇 ~

福花 - 終於食哂   好在買個細咋   咁唔駛再食多餐嘛   嘻嘻 ~  

洗埋碗都抖陣   差唔多 8 點就同里奧大人去做運動   不過我覺得有啲占寒占凍   所以做 15 分鐘算喇 ~

沖個熱水涼真係舒服好多   之後就可以休息   因為里奧大人晏晝熨咗衫   我只係開機洗衫就搞掂 ~

因為里奧大人負責沖中藥粉   咁佢強調話黃色杯係我嘅   透明杯係佢   因為我平時兩隻杯都會用嘛 ~

咁等里奧大人沖完涼出嚟   我拎住佢隻嘅杯喺度扮飲   佢一望見就即刻碌大對眼話妳飲咗我嗰杯呀   真係笑死我   我話整鬼你咋   再話飲錯都唔怕啦   佢話始終係藥都唔好嘛   哈哈 ~

里奧大人就飲哂五日中藥   我就飲埋聽朝就飲完   雖然中藥唔係話苦到震   但點都有啲苦嘛   所以好想快啲飲完囉   之後兩星期先再睇中醫 ~

睇多陣 Youtube   其實我 9 點 55 分已經想瞓   但驚太早瞓會好早起身   不過頂到 10 點 15 分都要瞓喇 ~

蒸撻沙魚 + 豚肉炒上海麵 + 福花 ( 1-JAN-2024 )

( 1-JAN-2024  MON )

今朝 6 點 15 分起身去完廁所   感覺好似醒醒哋咁   但無可能咁早起身啦   哈哈 ~

最後瞓到 8 點 50 分都醒咗喇   同里奧大人一齊去食早餐 ~

食完就去買餸   里奧大人就番屋企 ~

諗住買鯧魚   但唔記得邊檔   喺度行來行去   見到一個菜檔店主同我打招呼   咁我同佢打完招呼又繼續行   其實地方唔大   不過行來行去唔知邊度咁囉   之後又見番個菜檔店主   佢都好愕然咁再打多次招呼   哈哈哈哈 ~

最後買件撻沙魚都番屋企喇   番到去都已經 11 點   搞掂哂嘢就即沖涼喇 ~

家姐話 Berry 咁樣瞓   係咪唔想望住佢 ?!   我話行動已經表明一切啦   哈哈

呢排都睇 "臥底旅行團"   每集嘅時間係十幾分鐘左右   咁樣就最好 ~

2 點幾食午餐   都係尋晚食剩嘅   我同里奧大人講話佢好慘   假期要食隔夜午餐   佢話一啲都唔慘喎   有幾多人無得食呀   所以一啲都唔覺得慘 ~

丹麥酥係尋日早餐食剩   好在記得食埋佢咋

洗埋碗就開機洗衫   之後又睇 Youtube 喇 ~

今晚差唔多 7 點半先開餐   因為我唔餓呀   所以唔想咁快食   哈哈 ~

感恩里奧大人都有胃口食嘢嘛   最緊要快啲適應戴眼鏡嘅日子   咁我就唔駛咁擔心喇   求主繼續保守醫治 ~

是日晚餐 - 蒸撻沙魚 + 豚肉炒上海麵 + 福花

蒸撻沙魚 - 第一次買嚟蒸   唔駛下下食鯧魚咁悶嘛   好在里奧大人都話好食   咁我下次可以再買嚟食   家姐問做咩唔加啲榨菜絲 ?!   因為媽咪以前都有咁整   但我話第一次整   真係唔記得係要加啲咩咁囉 ~      

豚肉炒上海麵 - 淥一個上海麵要成 25 分鐘先熟   好在唔餓咋   哈哈   材料只係幾塊豚肉加一個細洋蔥咋   咁樣聽日里奧大人就有 Lunch Box 喇 ~   

福花 - 食半個先   因為今日食咗糯米飯仲滯緊 ~

洗埋碗就同里奧大人去做運動   仍然都係做 20 分鐘 ~

番到屋企沖埋涼就休息下喇   睇多陣 Youtube   但今晚 10 點半都無咩睡意咁   不過又唔想咁夜瞓   最後 10 點 50 分有少少眼瞓   所以都即刻去瞓覺喇 ~