金拇指米線 @ 九龍灣 ( 7-MAY-2012 )

我嘅雞翼酸辣米線 (1 辣) - 我唔太鍾意呢啲酸辣   但我覺得越食越辣咁   好在無叫 3 辣   唔係人都顛 


里奧大人嘅雞翼重慶米線 (小辣) 配料有炸菜肉絲 / 芽菜 / 酸菜 / 花生 / 芝麻 / 芫茜 - 里奧大人要試新嘢   我無試咩味呀   不過佢話食落都幾辣

 蠔油菜心 - 好新鮮爽脆

( 7-MAY-2012  MON )

上個星期差唔多每晚都接近 12 點先瞓   但瞓到差唔多天光起咗身又好難瞓番咁   咁諗住第晚早啲瞓   但又無睡意喎   今日係星期一   終於嚟料   沖完涼都覺得好眼瞓咁 ~

早餐食腿蛋治 + 咖啡   嘆下報紙   不過越睇越攰   哈哈 ~

菇場忙咗陣就無嘢做啦   幾難先等到 Lunch Time   又係出去買炒米粉   今次試下食粉果   都 OK 啦   不過食完呢個 Lunch   個胃就唔多舒服咁喇   下次都係唔食粉果 ~

超級眼瞓呀   簡直 Dup 低頭就瞓得着呀   好在 8 卦得閒陪我 M   唔係暈都似 ~

放工去尖沙咀睇中醫   又係等到 7 點半先有得睇   睇完諗住 Join 埋里奧大人搭地鐵番屋企   點知佢無啦啦又比人捉住   同唔到佢一齊搭車 lu ~

今晚試新嘢   就係食酸辣米線喇   不過我就唔太鍾意呢啲酸辣囉   但都要比多次機會佢   就係試麻辣米線同小食呢 ~ 

板長壽司 @ 九龍灣 ( 6-MAY-2012 )

油甘魚 (黑松露醬) 壽司 x 2

油甘魚 (柚子) 壽司 x 2 / 一口帆立貝 / 珍珠廣島蠔壽司 x 2 / 三文魚壽司 / 蝦天婦羅 / 醬燒三文魚骨膠 / 牛肉鮮茄湯烏冬

( 6-MAY-2012  SUN )

今朝同里奧大人 9 點 15 分起身   食完早餐就番主日學   之後崇拜喇 ~  

崇拜完畢都差唔多 1 點幾 lu   即番屋企   因為里奧大人話好攰   想瞓喎 ~

佢瞓覺   我就熨衫啦   2 點半佢就醒喇   諗住去太興   又要等位   去金加利同椰林閣又要等   最後都係去大家樂算喇 ~

食完番屋企   里奧大人做公司嘢   我就執換季衫   執咗個幾鐘   好感恩呀   算好快搞掂㗎喇 ~

執完都 5 點幾喇   里奧大人去跑步   我唔去喇   執完嘢好攰 ~ 

今晚約家姐去板長   食食下飯比比中銀紀念鈔我哋睇   不過得 2 張   如果係 30 連就更好啦   食完就上屋企食雪糕   9 點走人   我都即沖涼喇   真係好鍾意沖完涼嘅感覺呢 ~

住家飯 @ 姑奶屋企 ( 5-MAY-2012 )

皮蛋豬骨粥

叉燒炒生麵 / 糉 (外賣) / 菜心炒鯪魚肉 / 花膠雞湯

( 5-MAY-2012  SAT )

尋晚成 1 點先瞓   所以今朝 8 點先起身番工   8 卦打嚟約食早餐   我差唔多 8 點 45 分先到   我一坐低就同佢講   佢食完可以走先   因為我唔想食得咁急   不過佢都等埋我 ~  

阿 Head Off 呀   發達喇   Hea 住上網等放工 ~

里奧大人今日要上姑奶屋企等人裝線   又要教佢 Ipad 點用   我話我唔咁快去㗎   咁悶   所以我就約媽咪飲茶喇   食下抖下傾下都 4 點 lu ~

海蜇 / 炸 BB 鴿 / 煎堆 / 高湯水餃 / 山竹牛肉 / 薑蔥牛柏葉 / 腐竹雞蛋糖水

飲完媽咪就去做運動   我就番媽咪屋企瞓下   正想瞓嘅時候   家姐突然開門   我同佢個樣都好驚   因為佢唔知我會喺媽咪屋企   我又唔知佢會番嚟   所以一齊講咗句 " 妳做咩番嚟嘅 "   係同一語氣同一說話   我覺得好搞笑   之後又問我食唔食榴槤   不過我真係食唔落 ~

同家姐一齊行落去搭車   之後就分道揚鑣喇   我都差唔多 6 點先去到姑奶屋企 ~

6 點 45 分開飯   今晚我話想食粥同炒麵   好在真係有粥咋   唔係我根本食唔落 ~

差唔多 8 點幾就打的走人喇   番到屋企幫埋里奧大人一齊做 Table   每人一部腦   佢講我打   唔好講笑   一齊做真係快好多呢 ~

10 點搞掂哂   之後佢就做分析   咁我幫唔到佢啦   所以我就睇電視睇雜誌   又 12 點先瞓 ~  

澤記魚蛋粉麵茶餐廳 @ 旺角 ( 4-MAY-2012 )

我嘅紅湯螺絲粉餐 - 影相好細碗咋   係裝紅湯嘅碗   但估唔到係裝麵嘅碗咁巨   食完飽到上頭殼頂

炒蛋焗脆豬包 / 瑞士雞翼 - 雞翼好入味呀   其他無特別

CC嘅芝士腸米粉餐 - 因為我碗紅湯螺絲粉嚟先   所以我哋覺得呢碗好清呀

火腿奄列 / 牛油方包 - 無咩特別   不過 CC 好少食呢啲嘢   我就真係有啲驚

( 4-MAY-2012  FRI )

Happy Friday 喇   食甜甜地嘅早餐先   雖然知道個菠蘿包係唔好食嘅   但都想食   因為唔想食三文治同湯麵餐 ~

晏晝出去行陣就買油雞飯番菇場食   本來想出去食其他嘢   但個天黑哂   我又無帶遮   都係番菇場最好 ~

里奧大人上咗大陸   所以我約 CC Shopping   放工即走啦   自己行完旺中再約 CC 行花園街   行到中途落好大雨   好在行舖頭   唔係真係好掃慶呢 ~

唔知做咩鬼   條腰超劇痛   所以行完就即刻去食嘢   我要坐呀   好在我哋食咩無所謂   最緊要仲有時間買衫 ~

一見到茶餐廳即入   好感恩又有卡位坐   唔好講笑   坐咗半個鐘   條腰真係唔痛呀 ~

今餐 CC 請   我比番佢佢又唔要   不過算啦   下次到我   一人一次最好 ~  

食完有氣力啦   要去聯合作最後衝刺喇   好感恩   買到好多長件 Tee 同 One Piece   今次買咗 17 件   真係非常之滿足喇 ~

今晚又搭小巴番屋企   今日我真係好好彩   因為出旺角同番屋企都係我最尾一個上車   所以好快開車   好快到目的地也 ~

估唔到里奧大人仲遲過我番屋企   佢差唔多 11 點幾先番到   仲買麥當勞番嚟食   好在我陪佢食下   陪佢傾偈   如果唔係都幾陰公 ~

住家飯 @ 媽咪屋企 ( 3-MAY-2012 )

白灼蝦

蒜蓉辣椒

梅菜炒排骨

蒸馬友

燒鴨 (外賣)

炒菜心

黨參百合生魚湯

西瓜 / 芒果

( 3-MAY-2012  THU )

星期四喇   時間過得好快   好似番咗工無耐就星期尾咁 ~

唔太餓   所以早餐食奶醬多 + 咖啡   如果食完唔駛番工就發達喇 ~

好忙呀   咁都好嘅   無咁悶 ~

晏晝行陣就買炒米粉 + 燒賣番菇場食   撈埋 XO 辣椒醬真係超正 ~

忙咗陣就等放工喇   雖然里奧大人唔駛上大陸   但我今晚都番媽咪屋企食飯   反正佢又遲放工   我都要食啖好啲嘅 ~

今晚同家姐差唔多 9 點先走   之後我去超市買嘢   買完即番屋企沖涼   超焗熱呀 ~

里奧大人 9 點幾先放工   今晚唔煮麵比佢食喇   好鬼攰   叫佢食完嘢先番屋企 ~

鮑汁螺片扒生菜 + 印尼撈麵 ( 2-MAY-2012 )

( 2-MAY-2012  TUE )

終於番工啦   超勁唔想起身呀 ~

早餐食餐蛋治   之前媽咪叫我自己整早餐   我話唔好搞   食完又要洗   假期又話啫 ~

Hea 到 Lunch Time   行一陣再買酸辣米線番菇場食   幾個同事見到碗米線都話好辣   其實唔係好辣咋   因為我叫中小辣呢 ~

晏晝要去執倉呀   我阿 Head 都落手落腳搬   8 卦同幾個男同事又幫手   不過一定要有男仔囉   唔係點搬喎 ~

搞掂哂都已經 5 點幾   都唔錯喎   坐一陣就可以放工 ~

今晚煮啲簡單嘅   就咁去超市買個生菜就番屋企喇   番到屋企又開始勞動啦   浸好菜就開機洗衫   拖地   食完抖陣就沖涼   之後再熨衫   里奧大人差唔多 9 點先放工   咁我熨完就煮麵比里奧大人食   時間啱啱好 ~

是日懶餐 - 鮑汁螺片扒生菜 + 印尼撈麵

鮑汁螺片扒生菜 - 呢個餸好味又簡單   但唔可以成日食   我覺得罐鮑汁螺片成 $33 都幾貴   罐頭咋   我買 $33 排骨有排食   話哂都無防腐劑吖 ~

印尼撈麵 - 阿表送比我㗎   我都幾鍾意食撈麵   因為唔會食到出汗嘛 ~

板長壽司 @ 九龍灣 ( 1-MAY-2012 )

蝦天婦羅壽司

安康魚肝軍艦

珍味廣島蠔壽司

芥末鮑魚軍艦 / 貝柱軍艦

一口帆立貝

加州卷

黃旗吞拿魚

金三文魚壽司

三文魚子軍艦

( 1-MAY-2012  TUE )

又放假喇   超勁開心   我好易滿足㗎咋   哈哈 ~

10 點半起身 lu   屋企附近嘅茶餐廳早餐時間做到 11 點咋   得番大快活係 11 點半   不過又唔想食   所以同里奧大人行遠少少食早餐喇 ~

番到屋企就整沙律   之後開機洗衫   里奧大人話想出去行下   近近哋行 Mega Box 啦 ~

又係行咗 H & M 先   今次多收穫喇   我買咗 3 件衫 + 4 條褲 + 1 對鞋 + 1 件手飾   里奧大人買咗 1 件單西褸 + 4 件裇衫   試衫都試到出汗呀 ~

買完又行 Jucso 十蚊店   其實依家樣樣都已經 $12   但都好抵嘅   起碼用爛唔會心痛嘛 ~

行完都 3 點喇   去 Ikea Cafe 食嘢   排隊都排咗半個鐘呀   超勁多人   之後行 Ikea   里奧大人話好似行花市咁多人   所以我哋買完香薰即走   此地不宜久留 ~

意式茄醬藍青口 - 好想食蕃茄醬   所以叫嚟食

脆炸黃金雞翼 - 今次最正   熱辣辣

燒火腿配蜜汁意粉 - 我鍾意食呢啲好腍嘅火腿

薯條 - 凍嘅

去埋 Jusco 超市買嘢就走喇   次次去 Mega Box 都只係去 H & M   之後就 Ikea 同 Jusco 超市   因為次次去其中一站都已經買到一袋二袋   好難再行其他舖頭 ~

諗住坐 Shuttle Bus   不過都唔知龍尾喺邊   所以最後都係搭小巴算喇 ~

番到屋企已經 5 點喇   超攰呀 ~  

今晚唔駛煮飯   因為家姐約咗我哋去板長   話想做會員喎 ~

食完就上嚟食沙律   又叫里奧大人幫佢 Download Game   再坐陣就走 lu ~