住家飯 @ 媽咪屋企 ( 2-AUG-2012 )

豉椒炒蜆

白灼海蝦

黑椒牛仔骨

炒韭菜花

蝦米炒椰菜

陳皮蒸泥猛

髮菜花生眉豆雞腳螺片湯

中國馬天奴西瓜

( 2-AUG-2012  THU )

天氣焗到呢   又曬喎   見到有個女人仲用黑色遮遮太陽   其實咪仲吸熱 ~  

食完早餐   8 卦又話嚟   好在我食完先啫 ~ 

無嘢做又靜英英   大粒又全部唔喺度   真係好想出去行下呀 ~

終於 Lunch Time   今日食 Lunch Box   之前整茄汁豬扒有好多汁剩咗   咁又唔想倒咗去   所以即煮意粉   咁就變成今日嘅茄汁豬扒意粉喇 ~

里奧大人上大陸   我又番媽咪屋企食飯喇 ~

去到飲湯   傾下偈   等埋家姐番嚟就開飯喇   食完生果又傾下偈   9 點就同家姐一齊走 lu ~

番到屋企即開機洗衫   之後沖涼再熨衫   其實好想唔熨   不過我會覺得有嘢字做   會瞓得唔安樂   辛苦命也 ~

里奧大人差唔多 10 點半就番到屋企   睇陣電視   沖埋涼再 Hea 陣   咁都 11 點半喇   要瞓啦 ~ 

源發潮州粉麵 @ 九龍灣 ( 1-AUG-2012 )

清湯蝴蝶腩 - 蝴蝶腩原來係豬嚟嘅   我成日以為係牛腩呢   因為之前問有無牛丸  佢哋話無整牛㗎

蠔仔肉碎粥 - 之前食過幾次都好味道  

粉果 - 其實我哋好鬼飽   不過我真係好想食粉果囉   好在有叫咋   因為好好味呀   啲皮煙韌   又無咩肥豬肉餡   加埋豉油辣椒油   好味到爆呀

( 1-AUG-2012  WED )

又星期三喇   時間真係過得好快   今日又勁熱   真係熱又慘   落雨又煩呀 ~

早餐好想食濕嘢   所以食沙爹牛肉鮑片米粉喇   今次又要少米粉   咁就啱啱好   唔會飽到好辛苦 ~

菇場忙陣就 Hea 等 Lunch Time   今日好多人叮飯   我差唔多 12 點 45 分先開始食   但我唔可以熱辣辣咁食   會喉嚨痛   好唔舒服   所以我次次都灘凍啲先食   但好多同事真係即叮即食   我唔得囉 ~

終於等到放工   今晚去針灸   同醫師講話我條頸有粒嘢   腰又痛   佢笑笑口話小事啦   我話你梗係話小事啦   唔係你痛喎   佢就喺度笑   我覺得佢都幾風趣   會同人講下笑   之後我伏喺床度   其實做完手術之後   我伏喺度係好唔舒服   助手見我轉嚟轉去   佢話我好似游水咁   我覺得佢咁講又幾似   成條海獅咁   哈哈   之後醫師入嚟同我針   又係唔講我知幾多針   知我怕痛   不過我聽到話要 3 吋長嘅針囉   咁佢同助手講有支針飛咗出嚟   佢話我啲皮韌   我話係咪好似未燒嘅燒豬皮咁呀 ~

針 20 分鐘就搞掂   針完嗰下都痛   但之後就無痛   朝早起身仲好舒服添   但醫師都好老實講   針完無咁痛   但唔代表妳之後唔痛   咁我覺得佢又幾好   唔會係咁 Sell 針灸要幾耐療程   佢由得我針唔針呢 ~

好感恩里奧大人 7 點 15 分放工   原來佢想接我   因為我之前整鬼佢話要接我   不過我 7 點半已經走得   佢叫我等佢 10 分再喺尖沙咀食嘢   我話唔駛啦   咁頻樸做咩喎   一齊喺九龍灣食仲好 ~

佢喉嚨仲喺唔舒服   所以去食蠔仔粥就去藥房買嘢   又見到 Ivy 兩公婆   我特登阻住條路唔比佢行   佢真係認唔到我背面呀   之後我即擰轉身話係我呀   然後我去比錢   佢哋喺門口等我   之後我聽到佢同里奧大人講   以為有個大肚婆阻住佢呀   所以佢唔敢行   驚撞親大肚婆呀   哈哈   之後我哋喺條街度傾咗陣就各自歸家喇   我哋同佢哋真係幾有緣    好多時都喺街度見到   不過最搞笑係反而約食飯就約唔到   即慶就成事 ~

番到屋企諗住沖完涼先找卡數   再睇清楚張 Statement   見到 Late Charge $180 + Finance Charge $518   嚇到我心都離埋呀   即刻打去銀行問咩事呀   因為我已經找咗卡數嘛   原來係因為 PPS 關係   所以要遲一日先過數   我叫佢幫忙 Waive 呀   好感恩佢哋都肯呢 ~

呢幾晚都好攰   所以 10 點 50 分都瞓喇 ~

茄汁豬扒 + 江魚仔炒飯 ( 31-JUL-2012 )

( 31-JUL-2012  TUE )

今朝起身有電話響   原來係媽咪   不過我都估到係媽咪約我飲早茶呢   佢同工人散完步   所以就問我飲唔飲茶   我梗飲啦 ~

金粟煎魚餅 / 娥姐潮州粉果 / 家鄉鹹水角 / 健康素菜包 / 牛肉煲仔飯 / 鮑汁燜雞腳

菇場忙下停下   所以都好快到 Lunch Time 呢 ~

放工即走   番到屋企就預備晚餐   之後拖地   抖陣就煮飯 lu ~

今晚自己食先   不過又未餓   但都想早啲煮   早啲沖涼囉   沖完涼再慢慢食   又係好爽呀 ~

是日懶餐 - 茄汁豬扒 + 江魚仔炒飯

茄汁豬扒 - 之前喺大埔買咗 5 隻紅同黃椒   再唔煮就壞㗎喇   之後又唔駛煮飯   所以一次過將佢哋切粒粒   加埋茄汁豬扒   當一個有菜有肉嘅餸喇   見有咁多汁   倒咗好似好浪費   所以即煮多個意粉   留番後日做 Lunch Box   勁呀 ~

江魚仔炒飯 - 用馬來西亞買嘅 "江魚仔炒飯" 醬料炒   依家炒飯味道無咁單調   因為我平時炒飯好多時咩都無加呢 ~

里奧大人差唔多 9 點半先番到嚟   見佢喉嚨唔舒服   幫佢洗埋碗啦   等佢快啲沖涼休息 ~

梅菜蒸鯇魚 + Sambal 炒青豆角 ( 30-JUL-2012 )

( 30-JUL-2012  MON )

星期一 lu   又一個新開始   今日又係好好天   仍即係好鬼熱好曬呀 ~

又見到水草阿姐   今朝佢早咗搭車   所以又一齊食早餐喇   不過佢 8 點 35 分就番公司   我就坐到 8 點 50 分先走呢 ~

今朝唔飲咖啡   諗住熱檸檬茶都好濃茶   不過 11 點幾開始眼瞓 lu   下次都係飲咖啡   我都係飲半杯   好過唔飲中眼瞓 ~

晏晝同 8 卦一齊出去食   我提議去我食開間粉麵店   好在佢都話 OK   下次再食   咁都好   話哂大家口味都幾似   之後陪佢去惠康同零食店買餅   成身汗呀熱到   好想番屋企沖涼 ~

放工即走去街市買餸喇   居然無咩菜賣   有嘅都好黃   見到都唔想買嗰隻 ~ 

番到屋企即預備晚餐   再煲埋菊花茶   搞掂哂都已經 7 點 10 分   之後 7 點半里奧大人打嚟話唔舒服早啲番   好在未煮   咁樣就可以一齊食飯   好開心呀又 ~

是日懶餐 - 梅菜蒸鯇魚 + Sambal 炒青豆角

梅菜蒸鯇魚 - 媽咪之前教我   話將啲梅菜炒完再蒸先好味   所以今晚見有時間   我都先炒後蒸喇   如果里奧大人無唔舒服   我會加埋指天椒仲正呀   今次好感恩買到件鯇魚又大又平   $15 咋   好過食豬肉   話哂健康啲 ~   

Sambal 炒青豆角 - 自從上次喺馬來西亞食完 Sambal 青豆角炒飯之後   我念念不忘呀   所以今晚我行完一轉街市   已經出咗街市都再番轉頭買青豆角呀   $5 份抵食啦   我人生第一次煮呢啲青豆角   估唔到又比我想像中煮得好食呀   好爽脆呀   感恩感恩 ~

洗哂嘢再沖完涼都差唔多 9 點幾   條腸好痛呀   睇多陣電視   10 點 10 分頂唔順要瞓覺喇   我覺得好早瞓咁呀   哈哈 ~

青木瓜花生眉豆雞腳豬骨湯 ( 29-JUL-2012 )

( 29-JUL-2012  SUN )

今朝瞓到 10 點半   原來里奧大人唔記得拎電話入房   所以無響到鬧鐘   咁都番唔切教會 lu ~  

食完早餐   番屋企沖完涼就準備入大埔探 2 姑奶喇   打比佢約時間   佢叫我哋休息下   唔駛特登嚟探佢   其實我有好多家務未做   真係唔想出街   不過之前諗咗探就想探囉   唔會佢話唔好探   就比籍口自己唔探   有心做點都會做   我入到去   佢唔通趕我出去咩   咁我即問里奧大人想唔想探先   佢話想   因為下星期日又未必得閒   咁我話想就探囉   反正都預咗今日探嘛 ~

今日酷熱天氣呀   但見到藍天白雲真係好開心呢 ~ 

去到大埔墟買下嘢   我特登去番凍肉舖睇燒烤蜜糖幾錢   居然係 $11 咋   即買呀   里奧大人話屋企有蜜糖   點解唔用嗰啲   我話黐線啦   用幾百蚊嘅蜜糖整雞翼   唔係咁豪呀嘛   真係呢 ~ 

食埋豆腐花再買枝豆漿   買埋車厘子就去 2 姑奶屋企喇   去到 1 點   坐到 3 點就走喇   因為要趕住番屋企煲湯呀 ~

出到市中心都 3 點半   食埋 Tea 再買埋餸   又買咗 4 磅車厘子同 2 磅龍眼   買下買下都買咗 9 袋嘢   喺時候走喇   因為拎唔到   之後里奧大人話唔好煮餸同煮飯   因為就咁飲湯食湯渣已經夠飽   咁仲好   唔駛煮 ~

番到屋企即煲湯   之後沖涼   開機洗衫再熨衫   里奧大人沖完涼就瞓半個鐘   爽啦 ~     

是日懶餐 - 青木瓜花生眉豆雞腳豬骨湯

青木瓜花生眉豆雞腳豬骨湯 - 青木瓜係家姐屋企附近啲鄰居種㗎   所以比個我試下煲湯囉   媽咪就幫我買埋雞腳   我就咁買花生眉頭豬骨就搞掂 ~ 

食完飯洗埋嘢就去 OTO 買嘢   好感恩有 Discount 之餘再減 $200 呢 ~    

買完里奧大人拎番屋企   Set 好哂就出發去跑步喇   我唔去喇   好鬼攰   所以即沖涼 ~

呢年好多時腰骨都好痛   照過 X-Ray 又無事   兩個中醫就話做完婦科手術會咁   慢慢會無咁痛喎   希望快啲唔痛啦 ~ 

文記傳統車仔麵茶餐廳 @ 九龍灣 ( 28-JUL-2012 )

炸餃子 / 炸魚蛋


腸粉 ($7/3 條) / 牛腩 / 生菜 / 幼麵

( 28-JUL-2012  SAT )

今朝瞓到 8 點先起身   早餐食餐蛋治   星期六食咩都特別開心咁喎 ~ 

番到菇場有嘢做添   不過咁都好   時間過得超快 ~

放工即走   番到屋企坐一陣   之後家姐打嚟   叫我哋一齊去 :CHOCOLATE 買衫   之後趕到我腸又痛   仲標埋冷汗   口唇都白埋呀   睇嚟真係要減肥喇 ~

今次反而里奧大人有收穫   買到 4 件 Tee   真係次次無諗住買反而有收穫 ~

之後一齊去 Delifrance 食 Tea    食完就各自番屋企 lu ~

雜菜湯 / 歐陸沙律 / 鮮蝦扁意粉 / 煙三文魚雜菜扁意粉 / 迷你雪糖酥伴蛋糕 (配芒果醬) / 凍 Cafe Latte / 凍 Cafe Vanilla

4 點半番到屋企   玩 Line 又 Hea 下   6 點就出發喇   去文記食車仔麵同炸魚蛋就去睇戲喇 ~

今晚睇 "Batman 3"   我同里奧大人講一定要食爆谷   正想去買爆谷嘅時候   突然有人叫我   我好驚呀   即刻好大力捉住里奧大人隻手   佢比我嚇到唔知咩事呀   估唔到係 CC 叫我   好開心呀   估唔到會見到佢哋兩公婆   之後佢哋食唔哂 2 份爆谷   比咗 1 份我哋   無啦啦有免費爆谷同汽水   真係好感恩呀 ~

佢哋坐我哋後兩行   睇完一齊走   可惜佢哋約咗朋友   唔係一齊食飯   行到德福就分手喇   之後里奧大人講話見到熟朋友   感覺真係好唔同   唔需要刻意搵嘢講   呢啲感覺最舒服呢 ~

我食完爆谷仲好飽   所以唔想食嘢   里奧大人就去麥記買咗個豬柳蛋漢堡當晚餐算數 ~  

住家飯 @ 媽咪屋企 ( 27-JUL-2012 )

蟹柳炒蛋


節瓜蝦米

蠔油雞翼

果皮蒸泥猛

黃皮 / 石硤龍眼

( 27-JUL-2012  FRI )

Happy Friday 喇   不過唔落雨更 Happy   今朝終於忍唔住帶長身遮   因為縮骨遮實在好唔方便   最憎收遮整到隻手都濕哂 ~

今朝等車見到之前比我水草個阿姐   所以一齊坐啦   之後佢問我係咪食早餐   我話係咪一齊呀   佢話係   所以一齊食喇 ~

我唔影相喇   佢雖然都會手機影食物相   但我拎相機出嚟影就可能覺得我謗張   哈哈   又唔係啲咩特別食物嘛 ~

食完一齊番工添呀   同一座 Building   不過唔同樓層   感覺好得意呀 ~

菇場靜啦   出面又天陰陰   個人都覺得特別凍啲咁呀 ~  

Lunch Time 食穀麥片 + 維他奶   再加個茶粿   夠哂飽 ~

里奧大人今日上大陸   話應該好夜先放工   所以我 5 點先決定番媽咪屋企食飯   但就唔講比媽咪知   唔想佢又特登買嘢番嚟煮呀 ~

之後打去問家姐   叫佢打番屋企問有咩餸   佢好快做嘢   之後同我講番   話同媽咪係咁講好肚餓好肚餓   雞翼明明 5 隻就變 10 隻   嚇傻媽咪啦   又係喎   一加就加多 5 隻   唔係餓成咁呀嘛   之後媽咪即叫工人加啦   再叫家姐同工人講煮啲咩   咁家姐就話因為我番嚟食   所以煮多噂餸   但就唔好話比媽咪知   所以蟹柳明明 2 條變半包   雞蛋 2 隻變 4 隻   蒸魚明明 4 條變 8 條   樣樣 Double 呀 ~

去到媽咪屋企   我開門媽咪都唔知呀   之後望到我好愕然呀  ~

其實我今晚都唔想番㗎   因為屋企好多嘢未做   但家姐又問我番唔番   阿表又叫我番   咁我番啦   見屋企人都好緊要嘅   咁家務唯有遲啲做啦 ~

今晚無煲湯呀   媽咪問要唔要粟米湯   我話唔要呀   我好怕飽到上喉嚨感覺   所以今晚飽得好舒服呀 ~

差唔多 8 點半就同家姐一齊走   我番到屋企即開機洗衫   再抹廁所   雖然好鬼攰唔想抹   但抹完乾乾淨淨又覺得好鬼開心   之後沖涼再熨衫 ~ 

里奧大人 10 點半先番到屋企   傾下偈   等佢沖完涼睇陣電視就瞓 lu ~