梅菜蒸鯇魚 + Sambal 炒青豆角 ( 30-jul-2012 )

( 30-jul-2012 mon )

星期一 lu   又一個新開始   今日又係好好天   仍即係好鬼熱好曬呀 ~

又見到水草阿姐   今朝佢早咗搭車   所以又一齊食早餐喇   不過佢 8 點 35 分就番公司   我就坐到 8 點 50 分先走呢 ~

今朝唔飲咖啡   諗住熱檸檬茶都好濃茶   不過 11 點幾開始眼瞓 lu   下次都係飲咖啡   我都係飲半杯   好過唔飲中眼瞓 ~

晏晝同 8 卦一齊出去食   我提議去我食開間粉麵店   好在佢都話 ok   下次再食   咁都好   話哂大家口味都幾似   之後陪佢去惠康同零食店買餅   成身汗呀熱到   好想番屋企沖涼 ~

放工即走去街市買餸喇   居然無咩菜賣   有嘅都好黃   見到都唔想買果隻 ~ 

番到屋企即預備晚餐   再煲埋菊花茶   搞掂哂都已經 7 點 10 分   之後 7 點半里奧大人打黎話唔舒服早 d 番    嘩   好在未煮   咁樣就可以一齊食飯   好開心呀又 ~

是日懶餐 - 梅菜蒸鯇魚 + Sambal 炒青豆角

梅菜蒸鯇魚 - 媽咪之前教我   話將 d 梅菜炒完再蒸先好味   所以今晚見有時間   我都先炒後蒸喇   如果里奧大人無唔舒服   我會加埋指天椒仲正呀   今次好感恩買到件鯇魚又大又平   $15 咋   好過食豬肉   話哂健康 d ~   

Sambal 炒青豆角 - 自從上次喺馬來西亞食完 Sambal 青豆角炒飯之後   我念念不忘呀   所以今晚我行完一轉街市   已經出咗街市都再番轉頭買青豆角呀   $5 份抵食啦   我人生第一次煮呢 d 青豆角   估唔到又比我想像中煮得好食呀   好爽脆呀   感恩感恩 ~

洗哂嘢再沖完涼都差唔多 9 點幾   條腸好痛呀   睇多陣電視   10 點 10 分頂唔順要瞓覺喇   我覺得好早瞓咁呀   哈哈 ~