源發潮州粉麵 @ 九龍灣 ( 1-aug-2012 )

清湯蝴蝶腩 - 蝴蝶腩原來係豬黎嘅   我成日以為係牛腩呢   因為之前問有無牛丸  佢地話無整牛架    

蠔仔肉碎粥 - 之前食過幾次都好味道  

粉果 - 其實我地好鬼飽   不過我真係好想食粉果囉   好在有叫咋   因為好好味呀   d 皮煙韌   又無咩肥豬肉餡   加埋豉油辣椒油   好味到爆呀

( 1-aug-2012 wed )

又星期三喇   時間真係過得好快   今日又勁熱   真係熱又慘   落雨又煩呀 ~

早餐好想食濕嘢   所以食沙爹牛肉鮑片米粉喇   今次又要小米粉   咁就啱啱好   唔會飽到好辛苦 ~

菇場忙陣就 hea 等 lunch time   今日好多人叮飯   我差唔多 12 點 45 分先開始食   但我唔可以熱辣辣咁食   會喉嚨痛   好唔舒服   所以我次次都灘凍 d 先食   但好多同事真係即叮即食   我唔得囉 ~

終於等到放工   今晚去針灸   同醫師講話我條頸有粒嘢   腰又痛   佢笑笑口話小事啦   我話你梗係話小事啦   唔係你痛喎   佢就喺度笑   我覺得佢都幾風趣架   會同人講下笑   之後我扒喺床度   其實做完手術之後   我扒喺度係好唔舒服   助手見我轉黎轉去   佢話我好似游水咁   我覺得佢咁講又幾似   成條海獅咁   嘩哈哈   之後醫師入黎同我針   又係唔講我知幾多針   知我怕痛   不過我聽到話要 3 吋長嘅針囉   咁佢同助手講有支針飛咗出黎   佢話我 d 皮韌   我話係咪好似未燒嘅燒豬皮咁呀 ~

針 20 分鐘就搞掂   針完果下都痛架   但之後就無痛   朝早起身仲好舒服添   但醫師都好老實講   針完無咁痛   但唔代表妳之後唔痛   咁我覺得佢又幾好   唔會係咁 sell 針灸要幾耐療程   佢由得我針唔針呢 ~

好感恩里奧大人 7 點 15 分放工   原來佢想接我   因為我之前整鬼佢話要接我   不過我 7 點半已經走得   佢叫我等佢 10 分再喺尖沙咀食嘢   我話唔駛啦   咁頻樸做咩喎   一齊喺九龍灣食仲好 ~

佢喉嚨仲喺唔舒服   所以去食蠔仔粥就去藥房買嘢   又見到教友兩公婆   我特登阻住條路唔比佢行   佢真係認唔到我背面呀   之後我即擰轉身話係我呀   然後我去比錢   佢地喺門口等我   之後我聽到佢同里奧大人講   以為有個大肚婆阻住佢呀   所以佢唔敢行   驚撞親大肚婆呀   嘩哈   之後我地喺條街度傾咗陣就各自歸家喇   我地同佢地真係幾有緣    好多時都喺街度見到   不過最搞笑係反而約食飯就約唔到   即慶就成事 ~

番到屋企諗住沖完涼先找卡數   再睇清楚張 Statement   嘩   見到 Late Charge $180 + Finance Charge $518   嚇到我心都離埋呀   即刻打去銀行問咩事呀   因為我已經找咗卡數嘛   原來係因為 PPS 關係   所以要遲一日先過數   我叫佢幫忙 waive 呀   好感恩佢地都肯呢 ~

呢幾晚都好攰   所以 10 點 50 分都瞓喇 ~