蒜蓉蒸帆立貝 + 蜜糖焗雞全翼 + 蕃薯苗 ( 10-JUL-2013 )

( 10-JUL-2013  THU )

今朝見幾好天   諗住拎番把縮骨遮出黎   雖然把遮唔係太重   但個袋好多嘢嘛   加加埋埋就好鬼重啦   所以放少一樣得一樣   咁之後睇天文台   話間中有狂風驟雨   就係見到呢 4 個字就驚啦   即刻同里奧大人講都係帶遮喇   唔帶遮肯定烏雲蓋頂   好邪㗎 ~

一落車   個天黑哂呀   同九龍灣係兩個世界   真係好彩有帶遮咋   幫完菇場掃貨之後   一出超市門口勁大雨添呀   如果無遮都唔知點算咯   我唔要濕身呀 ~

食埋早餐   差唔多 9 點 45 分到菇場喇 ~

依家 Partner 坐喺我後面   我唔駛望到佢   心情真係幾好   我依家係獨家村   隔離無人   不過有人都無用   都唔會出聲傾偈啦   咁鬼靜   都係用 Skype 傾好啲呢 ~  

有 Lunch Box   本來想出去行   但又天暗暗咁   咁唔出 lu   留喺菇場上網算喇 ~

放工去菇場附近嘅舖頭買咗包急凍北海道帆立貝 (M $118/1 Kg ) 同廣島蠔 (2L $138)   再買多盒芝士餅就番屋企喇 ~

番到屋企勁喇   即預備晚餐   之後先醒起原來未煲中藥   唔怪得硬好好似有嘢未做咁啦   我之所以今晚特登蒸餸   就係想一邊爐頭搞掂哂   一邊就煲中藥嘛   好在真係突然醒起   唔係真係煮完飯先幾得煲都似 ~

搞掂哂就拖地   抹雪櫃   之後再執嘢   想執好耐啦   執完真係了咗件心事咁呢 ~

今晚里奧大人 9 點幾先放工   我食先喇   唔想太夜食   咁夜食完真係瞓唔到㗎 ~

是日晚餐 - 蒜蓉蒸帆立貝 + 蜜糖焗雞全翼 + 蕃薯苗

蒜蓉蒸帆立貝 - 無啦啦勁想食呀   所以即買嚟整  加埋粉絲墊底   真係好好食呀 ~

蜜糖焗雞全翼 - 真係好有 BBQ Feel   但又唔可以食咁多喎 ~

蕃薯苗 - 尋晚食剩   今晚就咁淥就算喇   一個字 "懶" ~

等埋里奧大人食完飯   再食埋生果都 10 點幾   又差唔多要瞓覺 lu ~   

豆豉鯪魚炒蕃薯苗 + 茄汁洋蔥豬扒 ( 9-JUL-2013 )

( 9-JUL-2013  TUE )

今朝食碎蛋吞拿魚飛碟   超級勁好味   麵包脆卜卜   啲餡又熱辣辣   所以食得好慢   同埋咬到個口好攰呀 ~

菇場唔忙   所以勁想番屋企執屋   次次都係咁   一悶起上嚟就好想番屋企執屋呢 ~

終於又 Lunch Time 喇   今朝實在太飽   所以食半杯麥皮   再加多 2 塊雞仔餅   當堂漏哂   不過好鍾意食雞仔餅時   "必" 啲油出嚟嘅感覺   又煙煙韌韌   細個成日食   食到好驚   所以好耐無食   食番又好好味咁   但真係最多 2 塊   因為真係好漏囉 ~

放工即走   因為趕住煲中藥   所以去超市買菜就番屋企喇 ~

7 點諗住煮飯   之後自己食先   咁心血來潮打比里奧大人   問佢幾時放工   估唔到佢話放得工   咁實在太好啦   我又可以再抖多陣先煮   同埋最開心係可以一齊食嘛 ~

是日晚餐 - 豆豉鯪魚炒蕃薯苗 + 茄汁洋蔥豬扒

豆豉鯪魚炒蕃薯苗 - 難得有蕃薯苗   咁就買 2 Pack 啦   $15 有 2 Pack   今晚煮咗 1 Pack 咋   因為煮哂好似好多咁   就咁炒好似無咩味道   所以用豆豉鯪魚炒   估唔到又好夾喎 ~ 

茄汁洋蔥豬扒 - 今晚又係煮一塊豬扒就搞掂   其實我煮茄汁洋蔥豬扒   我最主要係食洋蔥同啲汁嘅啫 ~

又要飲中藥   8 碗煲成 2 碗   仲要煲個半鐘   所以真係要留肚飲中藥呀 ~

洗埋碗抖陣   諗住自己去散步   估唔到里奧大人又話一齊去   今次行咗 6 個圈   出咗汗真係好舒服   同埋最正係番到屋企可以即刻沖涼呢 ~

沖埋涼抖陣就食生果   藍梅甜   火龍果無味   所以一齊食真係好鬼夾   中和番嘛   哈哈 ~

呢排真係好攰   今晚又 10 點 45 分瞓喇 ~ 

煎．餃子專門店 @ 九龍灣 ( 8-JUL-2013 )

口水雞 - 唔好食嘅   唔麻又唔辣
 
煎韭菜餃子 - 好味呀   另外仲有 5 隻原味餃子  都好好味   我呢期超勁鍾意食餃子   今次仲未夠喉呢

滷水雞翼米線

( 8-JUL-2013  MON )

今朝雖然 8 點先起身   但都眼瞓噃   不過又覺得好開心   因為有里奧大人陪我食早餐呢   佢就辛苦啲喇   拎完辦要上大陸呢 ~

菇場唔忙   好在唔忙   唔知做咩鬼    右手掌好痛   唔知係咪尋晚炒嘢用錯力呢   但加加埋埋炒咗都無 5 分鐘   因咩事會痛呢   但真係尋晚煮完飯先痛㗎喎 ~

晏晝有 Lunch Box   依家食糙米 + 珍珠米   啲口感勁正呀 ~

放工即走喇   要去尖沙咀睇中醫   呢個中醫係同事介紹   我同事同我身體狀況差唔多   但睇完呢個醫師之後   身體都唔錯   所以我又睇   一打脈就問我瞓得係咪好差   半夜係咪要去廁所   呵呵   講中哂   因為我腎虛   所以條腰又痛埋   今次要 3 劑藥   話唔好就番嚟睇   好就唔駛嚟睇   咁奇怪嘅   不過如果好   我都會再睇   調理下都好   因為成日涼住冷氣   個人真係覺得好濕重囉 ~

6 點 20 分到   差唔多 7 點就睇完   感恩里奧大人 6 點半可以準時放工   本來佢想陪我食壽司   但我都係忍下口   唔食咁多生冷嘢   所以轉去食餃子喇 ~

等嘢食嘅時候   有個黑鬼入嚟叫外賣   之後個 Waiter 無啦啦向里奧大人求助   不過黑鬼都醒   Mark 低啲食物名稱喺電話度   里奧大人好似 Staff 咁續樣解釋啲餃子係咩味道   又問里奧大人有咩好介紹   搞笑 ~  

今晚里奧大人唔駛做公司嘢添呀   真係超級勁難得   番到屋企沖埋涼    睇下電視   食下生果   晚晚係咁就好咯 ~ 

黑椒牛展 + 蒜蓉炒菜心 + 粟米蛋花湯 ( 7-JUL-2013 )

( 7-JUL-2013  SUN )

今朝 10 點自然醒   梳洗之後就同里奧大人落去大家樂食早餐喇 ~

去完屈臣氏買嘢   之後再陪里奧大人買 2 條短褲就番屋企 lu ~

沖完涼抖陣就番教會喇   崇拜完畢都已經 1 點 15 分   咁去地鐵站拎番對皮鞋   之後陪里奧大人去 Zara 買衫   再去埋 Market Place 買生果就番屋企喇   吽緊雨   所以好鬼好鬼熱呀 ~

差唔多 3 點食 Tea   食完去百佳買菜就番屋企   好似無咩點做嘢就 4 點咁呀 ~

里奧大人做公司嘢   做到 5 點幾就話瞓陣覺   咁我就預備晚飯   睇下雜誌咁啦   佢 7 點幾起身   咁我都煮飯喇 ~

是日懶餐 - 黑椒牛展 + 蒜蓉炒菜心 + 粟米蛋花湯

黑椒牛展 - 之前喺百佳買咗 Pack 牛展   $23 都唔少份量   所以間唔中都會買定包喺冰格   諗唔到煮咩就食佢喇 ~ 

蒜蓉炒菜心 - 百佳買嘅  $7 Pack 又唔貴喎   咁講法即係街市仲平   但里奧大人話食落有啲苦   我都覺   唔通我炒燶咗 ?!

粟米蛋花湯 - 想食多啲蔬菜   咁就滾粟米湯喇 ~

搞掂哂再沖埋涼就食生果喇   好耐無喺屋企食生果   因為我真係好懶   好唔鍾意切生果呢 ~

麗豪酒店 @ 沙田 ( 6-JUL-2013 )

唔睇到嘢食都好啲   但一睇到就好鬼餓   咩都要啲   懶得行嚟行去   我最鍾意食黃蘿蔔壽司 

芝士蛋糕 - 我想食芝士蛋糕好耐家嘛   一見到佢喺我後面   已經非常開心   因為方便拎嘛   我拎第一碟嘢食番埋位時   同里奧大人講幫我睇住   佢問我睇住啲咩   我話叫佢小心啲幫我睇住個芝士蛋糕   如果見差唔多無   要即刻幫我拎   佢聽完喺度笑呀   以為叫佢睇住啲咩   哈哈

( 6-JUL-2013  SAT )

今朝 8 點起身   食埋早餐就番菇場喇 ~

無嘢做等放工   後面同事 Off   我全程 Full Screen 上網   唔錯唔錯   所以覺得今日好快就放工咁呢 ~

放工番九龍灣   Join 埋里奧大人去 Mega Box   因為要去 UA 做會員   1 點半等到 2 點   唔餓等到餓   所以搞掂哂就即刻去食 Lunch 喇 ~

鮮蝦沙律 - 黑醋好開胃呢

炭燒美國安格斯肉眼 - 好有牛味   如果大塊啲更好   因為次次睇啲鬼佬飲食節目   塊扒係好巨   同埋把刀都好巨呢   好過癮

是日精選比薩 (莎樂美腸芝士) - 我同里奧大人都好愛莎樂美腸呢   正呀  

咖啡 - 奶係分開上   咁我倒嘅時候見到有啲啫喱狀物體   我仲以為係特別嘢   即同里奧大人講   不過佢話唔應該係咁   所以叫 Waiter 換個杯咖啡   因為我已經倒咗奶落杯咖啡度   之後杯奶又係問題喎   正常液體   如果飲咗頭先杯怪奶就慘喇

食完 Lunch 就周圍行下   之後坐 Shuttle Bus 去九龍灣   再坐巴士入沙田呢 ~

記得幾年前去過新城市   之後真係覺得好焗好辛苦   完全無行就走   估唔到幾年後都一樣咁焗   同里奧大人行咗一個圈就去希爾頓中心行好過   不過其實係無嘢行嘅   所以去麥當勞食過餐   抖陣先去酒店喇 ~

今晚係姑奶銀婚紀念   所以有個感恩聚餐   7 點開始   食完嘢   聽埋分享都差唔多 10 點幾   好鬼眼瞓呀 ~

同埋姑奶一齊坐的士番屋企   沖埋涼又 12 點先瞓   好在聽日可以瞓晏啲啫 ~ 

住家飯 @ 媽咪屋企 ( 5-JUL-2013 )

咖哩薯仔牛腩煲

蝦醬炒芥蘭魷魚仔

蒸石斑仔

韭菜炒蛋

當參淮山茨實山斑魚湯

Prama Ham / 哈蜜瓜

( 5-JUL-2013  FRI )

終於又 Happy Friday 喇   雖然我唔係星期六 Off   不過都會好開心嘅   話哂星期六都係番半日之嘛   日子應該會好易過呢   哈哈 ~

早餐食碎蛋吞拿魚治   今次啲包唔係凍冰冰   所以又覺得好好食咁喇 ~

菇場無嘢做呀   之後 8 卦突然 Skype 同我講   話一陣提佢講嘢比我知   無耐佢 Skype 比我講講講啦   之後話好在可以喺我面前講真心話   唔係佢會顛   我覺得呢句好感動呀   因為佢真係好信任我   不過講真   佢同我講嘅公司嘢   我真係唔會同同事講   我喺菇場同佢最 Frd 之嘛   同埋如果我講出嚟   啲人實知佢講啦   因為好多時都係佢哋內部開會嘅嘢   我唔會害佢嘅 ~

無啦啦好想食酸辣米線   不過又未餓   所以行陣先買番菇場食呢 ~

今日里奧大人唔駛上大陸   我都照番媽咪屋企食飯喇   媽咪最期待呢日家嘛   我覺得 ~

家姐又係 7 點番到嚟   即開飯喇   依家家姐話番媽咪屋企食晚飯會有策略   就係 Lunch 只食個包   咁夜晚可以食多啲   同埋話今晚飲魚湯無咁滯   我都覺㗎   飲肉湯係好滯咁呢 ~

食埋生果   差唔多 8 點半就走喇 ~

好焗咁呀   番到屋企即沖涼   咁里奧大人 9 點番到屋企   又食四寶飯   我叫佢唔好再食   因為我見到都好驚呢   我講完都覺得自己衰呀   飯又唔煮   仲咁話佢喎 ~  

辛辣麵 ( 4-JUL-2013 )

我自己食齋麵咋   煮比里奧大人食就豐富啲啦   雖然都係無益

( 4-JUL-2013  THU )

今朝又好開心呀   因為里奧大人要去九龍灣拎嘢先上大陸   所以又陪我食早餐喇 ~

番到菇場又坐啦   好在星期四   感覺好似就嚟放假咁   咁樣好好多呢 ~

Lunch Time 出去行到 1 點先去麥當勞食魚柳包餐   食完行陣就番菇場 lu ~

無啦啦心情好差   勁想放工呀 ~

放工即走喇   番到屋企抹下嘢   之後沖涼喇 ~

7 點煮麵食   7 點半里奧大人就打嚟話放工   平時佢上大陸實唔會咁早放工   因為我今日同佢講心情好差   所以我估佢應該特登早啲放工呢   見佢咁好   我都煮麵比佢食啦   其實因為我好想快啲見到佢呀 ~