住家飯 @ 媽咪屋企 ( 25-OCT-2013 )

煎薯仔餅 

燜豬手 

蒸龍躉仔 

炒菜心

蓮藕紅蘿蔔豬橫脷瘦肉湯 

梨

家姐買比媽咪嘅柿   我覺得貴呀   不過家姐次次喺 Apita 買嘅生果又真係好好味呢   同埋好新鮮好靚  

( 25-OCT-2013  FRI )

又 happy friday 喇   今朝有啲凍呀   不過我懶呀   仍然着短袖衫呢 ~

早餐食奶油多   想清清哋 ~   

菇場超級靜   所以我講電話真係超級辛苦   勁鬼祟㗎   之後我打比朋友   因為佢教我打 Pokopang   佢又細聲喎   聽到我幾辛苦   咁我都終於明白   人哋聽我講電話原來係咁辛苦呢   哈哈 ~

但有啲嘢又唔可以 Whatsapp   因為真係打到手指都攰   好似之前家姐 Whatsapp 我   佢話見到藍田有間 "譚仔三哥"   問我係咪好過譚仔   咁我話係呀   之後我話下次再同佢食蒜泥白肉   佢話藍田噃   我話牛下咪有囉   駛咩去藍田   之後佢話可以睇下有咩分別嘛   我咪話佢食過囉   之後佢仲打 "譚仔三哥 ?"   我咪話係呀   之後我覺得唔對路   問佢講咩 ?   佢又話頭先果間叫 "譚仔三哥"   仲話我話係堅添   咁我又再話同佢喺牛下食過囉   之後佢打嚟喇終於   原來佢睇到嗰間係藍色嘅 "譚仔三哥" 覺得好奇   因為佢記得譚仔係黃綠色家嘛   仲話所以 Whatsapp 都唔係咁好   搞到啲嘢唔清楚   我咪話係妳自己打得唔清楚咋   唔關 Whatsapp 事囉   講咁鬼耐   重點係 "譚仔三哥係藍色字" 又唔講   如果佢一早講話係藍色字   就唔駛講一大輪嘢囉   哈哈 ~

呢日咁好天   所以 Lunch time 出去食酸辣米線   其實我唔餓   不過唔知點解成日好想食囉 ~

食完行咗陣商場   又買咗 2 件長 Tee 同 2 條褲   想買好耐啦   終於買到   所以好開心呀 ~

里奧大人上大陸做嘢   我又順理成章番媽咪屋企食飯呢 ~

家姐今晚早咗少少番   又可以早啲食飯   之後佢哋食生果   不過我無食   傾下傾下又同家姐食咗 1 筒薯片   都幾勁   因為係咁飽嘅情況之下都食到成筒   哈哈 ~

媽咪依家真係唔敢亂食嘢   真係樣樣跟足哂份量   又無咩油   所以夜晚會餓   就會食包梳打餅   都唔知係咪熱氣得滯   條脷生咗粒黑色痱滋   之前佢話大粒㗎   仲痛添   搞到我嗰晚都唔安樂   一番到屋企上網 Check 點解會咁   之後佢話飲好多水   條脷無咁痛同埋無再凸出嚟   咁我都安心啲   依家粒痱滋好似芝麻咁 Size   但就唔痛   希望快啲消失啦 ~

同家姐 8 點半走喇   番到屋企又即刻開機洗衫同沖涼   里奧大人就差唔多 9 點半番到屋企   算快喇 ~

譚仔雲南米線 @ 牛頭角 ( 24-OCT-2013 )

( 24-OCT-2013  THU )

今朝其實都幾涼   不過一袋二袋   又上又落   都有啲熱咁 ~

早餐食通粉餐   已經要少通粉   同埋將份奄列留咗做 Lunch   不過都係好飽   下次都係唔食喇 ~

菇場靜   係特別靜 ~   

Lunch time 其實唔餓   所以慢慢食個 Lunch Box ~

放工去鰂魚涌睇中醫   今晚等 1 個咋   感恩呢 ~

搞掂哂都係 6 點 45 分   又未餓   所以坐巴士   等咗 15 分鐘車   不過我真係好唔鍾意搭地鐵   一入到去已經有種壓迫感   雖然我都係香港人   步伐都係快   但去到地鐵站   真係想放慢腳步都唔得   好似阻住人哋咁呀 ~   

去到牛頭角落車   又諗下食咩好   諗到去譚仔食米線呀   勁想食好耐   下次一定要叫埋家姐   因為我又見到對面食麻辣豬耳   勁想食呀 ~

食完之後里奧大人打嚟話放工   原來都差唔多 8 點半喇 ~

番到屋企即煲中藥   之後沖涼   無耐里奧大人就番到屋企   我叫佢買嘢番屋企食   因為我想快啲見到佢   我呢排好自然會同佢講   見到佢好開心   可能之前佢好忙   夜放工之餘   番到屋企仲要做嘢   我又早瞓喎   所以見到佢係好難得呢 ~

今晚佢都有做公司嘢   好在 11 點做完   之後一齊睇埋新聞   差唔多 12 點先瞓呀 ~ 

  
分享一個小故事

他家貧，大學是靠自己打零工和賣血的錢念完的。 她家富，是城市姑娘，父母是高幹，家裡有保姆。第一次去鄉下時，她認不清麥苗和韭菜。 他和她初次相見是在操場上。她忽然來月經，染紅了白裙子，卻渾然不覺，還在和同學說笑。他看見後臉紅了，脫下自己的上衣讓她圍在腰間。那一刻，是她一輩子也難忘的⋯⋯。 

之後是纏纏綿綿的四年戀愛，她試圖幫他，而他不肯；男人哪會用女孩子幫忙？ 畢業時，他們本來免不了天各一方，但她死心塌地地跟著他走。家里人反對，幾乎與她反目，她卻認定這男人是她想要的。 

她有一隻珍貴的玉鐲，是母親給她的。到小城後，看見家徒四壁，她摘下了玉鐲。是的，在這樣的地方哪裡用得著戴玉鐲啊！ 不久，她懷孕了，見她反應厲害，他跑到附近的山上為她摘山杏，不料一腳踩空，從山上摔了下去。這一摔，幾乎摔掉了她和他的未來。她常常這樣想：如果他不去摘山杏呢？可是，這個世界從來沒有如果。 他癱了，家裡的一切都靠她。父母來接她，畢竟在小城裡的一生可以預見。是的，誰都能想像以後的生活會是什麼樣子。但這最後的機會，她仍然拒絕了。 

為了給他治病，她賣掉了那隻鐲子，接受父母給的錢。到底是父母啊，看見固執的女兒這麼苦，心疼了。 他們在小城過著貧苦的日子，她當中學教師，他病退在家翻譯一些書。她早已沒了大城市姑娘的驕傲，低下頭來做一切，和小菜販討價還價，買廉價的衣服……與當地的女人並無二致。 大夫說她丈夫不可能再站起來了，可她還是堅持給他按摩，十幾年如一日。她並不指望奇蹟發生，只希望他的腿不萎縮。 

35歲那年，她聽說有位大夫針灸功夫好，但要翻過一座山才能找到那位大夫。她找來一輛平板車，每兩天就拉著他翻山去扎針。風雪中，她弓著背，艱難地往前走。他看著她的背影，哭了："下一輩子，我再也不要遇到你，再也不愛你。因為，你太苦了。" 所有人都希望來生再愛，可是他說："來生，再也不愛你。" 

奇蹟是一年後出現的。他的腿居然有了知覺，慢慢能走了。好事成雙，他寫的論文在國際上獲了獎。有許多人來找他，他也四處講學，同時講這十幾年自己在輪椅上的生活，講自己背後的那個女人。 誰也沒有想到會有這一天，誰也沒有想到柳暗花明了。 法國請他去講學三年，他猶豫了。她說："去，一定要去！這是千載難逢的機會。" 這時，36歲的她已初露滄桑的端倪，黑髮裡有了白髮，眼角堆起了皺紋，衣服永遠是過時的，身體有些發胖，再也沒有了當年的樣子；而他，正是最好的時候。 法國，是多麼浪漫的國度啊！有人擔心他一去不回，問她："你不怕嗎？"她輕輕搖頭："不怕。"她說，他和她的愛情如果經歷了這麼多還這麼脆弱，那就一定不是愛情。 

三年後，他準時回來了，留在了北京。他做的第一件事就是去小城接她，但沒有告訴她準確的到達時間，只是說這一兩天回來，想給她驚喜。誰知下了火車，他就看見了她。 他驚喜地跑過去："你怎麼知道我乘這趟車？" 她說："我每天都在這裡等你，凡是從北京來的車，我一輛也不會放過。

" 這次，他說："來生，我再也不會讓你愛，因為你的愛讓我心疼，你的愛實在太苦。" 她卻說，愛情從來都是苦的，如果愛是一朵蓮花，最美麗的愛一定是那清苦的蓮心，一直苦到心裡，然後才能有那朵美麗的蓮花。

甘香炒雞肶 + 雜豆炒飯 ( 23-OCT-2013 )

( 23-OCT-2013  WED )

今朝要滾熱中藥同北芪當參水   再加埋 Lunch Box   個袋好鬼重   因為要用暖杯裝住北芪當參水   暖杯又比較重喎   今次真係 Balance 喇   左一袋右一袋 ~

早餐食蛋牛治烘底   無鹹牛味嘅   其實都預咗   不過真係想試下   因為我之前買咗罐鹹牛肉   真係咩味都無囉   依家樣樣貴到黐哂線   但質素就下降到無得再下   可悲 ~

菇場唔忙   但大粒番哂嚟   所以都唔敢咁放肆喇   哈哈 ~

食完 Lunch Box 就去銀行過數   行咗陣就番菇場   食完行下真係唔錯   依家天氣又咁好   唔好嘥咗去呢 ~

放工即走喇   諗住去超市買菜同生果同蟹柳   買哂要買嘅嘢就買零食   諗住買一百左右   點知買咗二百幾   真係嚇一跳囉   不過買零食都差唔多買咗一百   如果自己唔為食幾咁好呢   慳番唔少錢㗎真係 ~

我之前喺百佳買包齋燒鵝要 $13.9   惠康 $10.9 咋   所以激鬼氣買 2 包   咁 2 包 朱古力就真係好抵   因為買滿 $60 就加 $29.9 換 2 包   平時 1 包要 $27.9 嘛   但包 M&M 花生朱古力   我就真係覺得貴喇   要 $23.9   不過我超勁想食囉   好記得之前買咗包細   不過做完手術唔好食花生   咁就比咗家姐   之後諗住買嚟食   但覺得貴   買細包又少得滯咁   所以今次唔理喇   買咗先    

番到屋企就預備晚餐   之後開機洗衫同煲中藥   抖陣就煮飯喇 ~

家姐無啦啦打嚟   同我講話佢朋友焗咗曲奇比佢食   好好味咁話喎   放咗喺雪櫃   拎番出嚟凍凍哋都好鬆化喎   咁佢朋友同佢一齊嘛   又問我用咩粉   佢話朋友係用高粉焗   仲用啲普通牛油添   之後我問佢用咩焗爐   咁家姐問佢朋友啦   咁佢朋友可能覺得唔關事   哈哈   之後我聽到家姐講話賴到無嘢好賴呀   哈哈哈哈哈哈 ~

今晚自己食飯先   不過都要 7 點 45 分先搞掂 ~            

是日晚餐 - 甘香炒雞肶 + 雜豆炒飯

甘香炒雞肶 - 包甘香醬喺馬來西亞買   都買咗好耐   仲過咗期一個星期   所以拿拿聲用埋佢喇   呢隻醬好味   我又加口咗啲辣油   辣辣哋   我今次煮咗 2 隻雞肶   之後仲煮個印尼麵撈埋啲汁   正到呢   下次再去一定要入貨   就咁炒飯都好好食呢 ~ 

雜豆炒飯 - 前日煮多咗飯   真係唔識計份量   所以又要食多餐炒飯   不過都無問題   因為啲炒飯醬料過咗期幾日   都要用埋佢喇   今晚無買菜   所以加雜豆   我鍾意咁食架   不過里奧大人就麻麻地鍾意青豆   但無計啦   雜豆實有青豆 ~

食完又抖陣   里奧大人差唔多 9 點放工   咁我就去徑步   徑咗 6 個圈   番到屋企就啱啱好見到里奧大人 ~

今晚勁呀   唔駛開冷氣   沖完涼開咗陣風扇   之後都熄喇 ~

食埋生果再睇陣電視   11 點瞓覺   實在太好喇   我真係唔想咁夜瞓呢 ~

茄汁豬扒 + 瑤柱燜節瓜 + 海鮮炒飯 ( 22-OCT-2013 )

( 22-OCT-2013  TUE )

天氣又好清涼呀   真係心情都好啲呢 ~

早餐又食芝腿治烘底啦   其實都幾驚熱氣   但我又唔鍾意食唔烘嘅麵包   硬係覺得有陣味咁 ~

菇場忙咗陣就優優閒閒咁過喇   整下依樣整下嗰樣   又好快到 Lunch Time   呢期鍾意帶 Lunch Box   因為珍珠米真係好好食呢 ~

又放工喇   今晚唔駛去買餸   所以又去超市行下   之後就番屋企 lu ~

抖咗陣就預備煮晚餐喇   今晚自己食先   因為想早啲去徑步呀 ~

是日晚餐 - 茄汁豬扒 + 瑤柱燜節瓜 + 海鮮炒飯

茄汁豬扒 - 我喺豬肉檔買㗎   阿姐好好人幫我拍埋   咁我唔駛自己慢慢刴   依家會用埋蒜蓉一齊醃   好味好多呢   個洋蔥都好耐喇   估唔到無爛之餘仲好香洋蔥味  哈哈 ~

瑤柱燜節瓜 - 今次勁喇   買咗 6 個中型節瓜   抵丫嘛   $6/份咋   買咗 2 份   今晚只係食節瓜都飽 ~

海鮮炒飯 - 清埋冰格啲蝦仔同蜆   咁令到個炒飯有啲咬口咁啦   真係唔錯   哈哈 ~

之前睇中醫   我仲係無咩氣   所以醫師叫我用當參同北芪燉肉汁   不過我又唔記得買瘦肉   所以就咁煲當參北芪水   聽日拎番菇場飲先 ~

差唔多 8 點 45 分出去徑步   里奧大人都已經係屋企附近   咁叫佢自己搞掂   我番嚟先幫佢洗碗   今晚我徑咗 6 個圈   都差唔多半個鐘   依家其實唔會出好多汗   但都有啲咁嘅   最緊要係比自己郁下呢 ~

真係超鍾意徑完步之後可以即刻沖涼   抖陣再食生果   食完又抖陣   之後 11 點瞓覺 ~

金銀蛋菠菜 + 臘腸蒸排骨 ( 21-OCT-2013 )

( 21-OCT-2013  MON )

尋晚瞓得都好好呀   所以起身都唔駛懶床   同埋依家朝早要滾熱啲中藥   真係唔可以慢吞吞囉   唔係會令到自己好緊張咁呢 ~

早餐食腿蛋治烘底   見到人哋食沙爹牛肉麵真係勁想食   不過真係食唔落囉 ~   

菇場唔忙呀   大粒又唔喺度   超級勁 Free   爽呀 ~

食埋 Lunch Box 就幫媽咪買梳打餅   之後行陣就番菇場喇   因為唔想比自己又亂買嘢呢 ~

放工去街市買餸   買埋聽晚嘅餸   咁聽晚唔駛又嚟   呵呵 ~

番到屋企即煲中藥   依家一煲就 2 劑   咁嘥番唔少時間同煤氣嘛 ~

浸埋菜就開機洗衫   之後拖地   好鬼攰呀   抖陣又要煮飯   本來炒飯   不過好攰   同埋得一邊爐   所以蒸熱算喇   唔想洗呢 ~

今晚差唔多 8 點先食呀   計錯哂時間   因為諗住今晚會早食早徑步家嘛 ~     

是日懶餐 - 金銀蛋菠菜 + 臘腸蒸排骨 

金銀蛋菠菜 - 明明想買茄子   點知見到菠菜 $8/斤   所以即刻買咗   之後先醒先我本來要整魚香茄子家嘛   仲連醬料都買埋添   咁買咗菠菜就唔整茄子咋   因為菠菜好多泥   要浸好耐呢 ~   

臘腸蒸排骨 - 懶呀   其實本來整魚香茄子   但無整到   所以轉排骨囉 ~     

里奧大人 9 點番到屋企   等佢食埋   我洗埋碗就即去徑步喇   其實 9 點幾真係唔想出去   不過真係唔想又打機   做下運動好啲 ~

清清涼涼嘅天氣   徑步真係好舒服   今晚徑咗 4 個圈咋   但都覺得夠喇   因為今晚真係有啲攰 ~

沖完涼就休息喇   不過又打下機   又 Cherry x 2 呀   但打到 11 點半就瞓喇 ~

滷水雞翼 (外賣) + XO 醬炒油麥菜 ( 20-OCT-2013 )

( 20-2020( 20-OCT-2013  SUN )

今朝瞓到 8 點醒一醒   其實好好囉   話哂一覺瞓 8 個鐘嘛   之後再斷斷續續咁瞓   咁慘喇   係咁發夢 ~

去完大家樂食早餐就番屋企抖抖   沖埋涼就番教會喇 ~

奉獻完之後就同媽咪 家姐飲茶   因為媽咪話仲有啲頭暈暈   所以都係想睇下佢   里奧大人就番屋企做公司嘢   今次媽咪又係唔知我去飲茶㗎   但家姐好餓   所以要剔點心紙先   咁佢叫咗 4 籠點心   媽咪好驚啦   平時叫 1 籠㗎咋   之後媽咪話食得哂就叫囉   因為今日媽咪同工人 Share 碗雞飯   所以覺得家姐無食飯會餓啲   好好笑   唔食飯都唔駛一下子食咁多點心啦   哈哈 ~

之後媽咪見到我好驚啦   估唔到我嚟嘛   食下傾下差唔多 2 點幾 lu   媽咪做運動   我同家姐就各自番屋企呢 ~

我真係好飽   所以我陪里奧大人去大快活食叉燒瀨就算喇 ~

番到屋企就熨 2 機衫   熨咗個半鐘   之後抹下嘢   再飲埋碗湯煲定飯就抖陣   今晚 7 點 15 分可以開飯   勁開心呢   因為早食飯係多好多時間用 ~         

是日懶餐 - 滷水雞翼 (外賣) + XO 醬炒油麥菜 

滷水雞翼 (外賣) - 知道要熨衫   所以唔想煮餸呀   咁買雞翼就好啦   又可以做埋 Lunch Box ~

XO 醬炒油麥菜 - 之前買咗個蔬菜脫水器   用咗幾次又無用   真係好嘥咁   所以今晚就炒菜喇   哈 ~

搞掂哂   沖埋涼都係 8 點幾咋   實在太爽喇 ~

最開心係里奧大人都做完公司嘢   又一齊睇佢之前錄咗嘅電視劇同埋食生果   不過今晚 11 點就瞓   呢啲時間瞓覺最好呢 ~    

ME.N.U @ 九龍灣 ( 19-OCT-2013 )

部隊鍋

其實都好多肉   所以 3 個人食就最好呢

( 19-OCT-2013  SAT )

今朝同 8 卦一齊食早餐   不過我講明起碼 8 點 45 分先到   因為我想瞓晏啲同埋唔想咁趕囉 ~

番到菇場勁開心   因為後面同事無番   大粒又全部唔喺度   我真係放大 Screen 上網㗎 ~

上網睇到無嘢睇   所以睇下有咩好團購   好感恩呀   因為又見到 Shake n Take 攪拌器套裝   $128/Set   所以又買喇   其實屋企有個大嘅攪拌機嘅   不過懶得又拆又洗嘛   呢個好方便呢   Shake 完就可以飲 ~

買開有條路   再買多個 JNC 智能乾果麵包機 (輕便版) 只係 $468 (原價 $1,780)   其實想買好耐   不過其他牌字要千幾蚊   我又覺得貴   因為我知道自己唔係成日用家嘛   依家平平哋買個玩下都好   其實我都唔鍾意食麵包   整完都係比家姐佢哋食㗎咋   佢哋慘 lu   哈哈 ~

話咁快又放工   約咗里奧大人喺鑽石山地鐵站等   之後再一齊去深水埗呢   唔知點解突然好鬼餓   餓到有啲想暈咁呀   但其實朝早係好鬼飽㗎喎   里奧大人背囊本身有 2 包芝麻糕   不過佢原來轉咗另一個背囊   所以無啦   好在我有包 Skittles 咋   食完真係好啲咁呢 ~

去到都差唔多 2 點   但勁想食印尼嘢   不過要等 16 個人   咁我排隊等先   叫里奧大人自己去黃金睇電腦   不過佢睇完我都仲要等 12 個 人   佢驚我餓暈呀   所以叫我食第啲   咁我話食傷心酸辣粉   經過陳記魚蛋   買串大辣魚蛋食先   辣到呢   勁過癮   哈哈 ~

好感恩去到有卡位   同埋我想食口水雞同蒜泥白肉都有套餐   咁就最好   因為唔想太大碟 ~

傷心酸辣粉 - 我要小辣   里奧大人要 BB 辣   但我果碗其實一啲都唔辣   佢有比樽醋   不過我唔落   我驚又油又酸   個胃頂唔到呢   如果勁辣再加醋   咁應該真係會食到流眼淚   依家我點都食唔到有傷心嘅感覺呢下先最傷心   哈哈

口水雞 - 小小麻辣咁啦   唔知係咪因為頭先陳記大辣魚蛋太勁   搞到無哂味雷

蒜泥白肉 - 五花腩真係好肥   真係無咩肉食   同埋呢度啲蒜泥有啲都好大粒   所以乸親條脷   我最驚呢   呢碟又係好油   我唔敢食咁多啲蒜泥   驚肚屙呀   話哂唔係食完即番屋企嘛   哈哈

因為我着淺色裇衫   所以好驚比啲油彈到落件衫到   好難洗嘛   所以叫里奧大人除件裇衫比我着住   佢以為我凍添呀   我話我件貴嘢唔想整污糟   之後食完喇   佢話其實佢件裇衫係貴過我件裇衫   哈哈   我求其講之嘛   但深色污糟無咁礙眼嘛   真係呢 ~

食完就去高登   比我買到個油壓式電話座   $34 都 OK   之後里奧大人再買埋個無線 Keyboard 就走喇 ~

再周圍行下   行到 5 點就坐小巴番屋企   我坐小巴一定唔會坐門口隔離   因為有次行緊公路   對門無啦啦開咗呀   嚇到我即刻同司機講囉   大佬  如果掟彎就不得了喇   有時着啲褲嘅質地係好跣家嘛   一陣飛咗出去就慘 lu ~

番到屋企就抖陣先   里奧大人就瞓咗陣   之後 6 點就出門口去攞位   今晚又食部隊鍋   但就唔加多個辛辣麵喇   上次飽到好辛苦呢 ~

今餐都係超勁飽   所以食完要行商場消化下   咁今日去黃金   勁想買 Earphone 呀   包住隻耳聽歌真係好正   不過想要果個係要插電腦   咁即係唔啱   但無理由買 B 字牌字果個嘛   二千幾蚊呀   太貴   同埋最慘係我呢下想要   一陣唔用實比里奧大人鬧死都似   咁好感恩啦   比我買到個  Pioneer 玩下   $298 咋   都抵玩啦   之後再去日本城買個不鏽鋼煲就番屋企喇 ~

今日無 Planning   但反而成日無停過咁   所以番到屋企   煲埋中藥   沖埋涼就真係要抖喇   不過里奧大人今晚要 Relax   想睇之前錄咗嘅電影   咁我都陪下佢啦   又 12 點先瞓 lu ~