甘香炒雞肶 + 雜豆炒飯 ( 23-OCT-2013 )

( 23-OCT-2013  WED )

今朝要滾熱中藥同北芪當參水   再加埋 lunch box   個袋好鬼重   因為要用暖杯裝住北芪當參水   暖杯又比較重喎   今次真係 balance 喇   左一袋右一袋 ~

早餐食蛋牛治烘底   無鹹牛味嘅   其實都預咗   不過真係想試下   因為我之前買咗罐鹹牛肉   真係咩味都無架   唉   樣樣貴到痴哂線   但質素就下降到無得再下   可悲 ~

菇場唔忙   但大粒番哂黎   所以都唔敢咁放肆喇   哈 ~

食完 lunch box 就去銀行過數   行咗陣就番菇場   食完行下真係唔錯   依家天氣又咁好   唔好嘥咗去呢 ~

放工即走喇   諗住去超市買菜同生果同蟹柳   買哂要買嘅嘢就買零食   諗住買一百左右   點知買咗二百幾   真係嚇一跳架   不過買零食都差唔多買咗一百   如果自己唔為食幾咁好呢   慳番唔小錢架真係 ~

我之前喺百佳買包齋燒鵝要 $13.9   惠康 $10.9 咋   所以激鬼氣買 2 包   哈   咁 2 包 朱古力就真係好抵   因為買滿 $60 就加 $29.9 換 2 包   平時 1 包要 $27.9 架   但包 M&M 花生朱古力   我就真係覺得貴喇   要 $23.9   不過我超勁想食囉   好記得之前買咗包細   不過做完手術唔好食花生   咁就白白比咗家姐   之後諗住買黎食   但覺得貴   買細包又小得滯咁   所以今次唔理喇   買咗先    

番到屋企就預備晚餐   之後開機洗衫同煲中藥   抖陣就煮飯喇 ~

家姐無啦啦打黎   同我講話佢朋友焗咗曲奇比佢食   好好味咁話喎   放咗喺雪柜   拎番出黎凍凍地都好鬆化喎   咁佢朋友同佢一齊嘛   又問我用咩粉   佢話朋友係用高粉焗   仲用 d 普通牛油添   之後我問佢用咩焗爐   咁家姐問佢朋友啦   咁佢朋友可能覺得唔關事   嘩哈哈   之後我聽到家姐講話賴到無嘢好賴呀   嘩哈哈哈哈哈哈   衰   我話叫佢做妳阿妹啦 ~

今晚自己食飯先   不過都要 7 點 45 分先搞掂 ~            

是日晚餐 - 甘香炒雞肶 + 雜豆炒飯

甘香炒雞肶 - 包甘香醬喺馬來西亞買架   都買咗好耐   仲過咗期一個星期   所以拿拿聲用埋佢喇   呢隻醬好味   我又加口咗 d 辣油   辣辣地   我今次煮咗 2 隻雞肶   之後仲煮個印尼麵撈埋 d 汁   正到呢   下次再去一定要入貨   就咁炒飯都好好食呢 ~    

雜豆炒飯 - 前日煮多咗飯   真係唔識計份量   所以又要食多餐炒飯   不過都無問題   因為 d 炒飯醬料過咗期幾日   都要用埋佢架喇   今晚無買菜   所以加雜豆   我鍾意咁食架   不過里奧大人就麻麻地鍾意青豆   但無計啦   雜豆實有青豆 ~

食完又抖陣   里奧大人差唔多 9 點放工   咁我就去徑步   徑咗 6 個圈   番到屋企就啱啱好見到里奧大人 ~

今晚勁呀   唔駛開冷氣   沖完涼開咗陣風扇   之後都熄喇 ~

食埋生果再睇陣電視   11 點瞓覺   實在太好喇   我真係唔想咁夜瞓呢 ~