茄汁豬扒 + 瑤柱燜節瓜 + 海鮮炒飯 ( 22-OCT-2013 )

( 22-OCT-2013  TUE )

woo   天氣又好清涼呀   真係心情都好 d 呢 ~

早餐又食芝腿治烘底啦   其實都幾驚熱氣架   但我又唔鍾意食唔烘嘅麵包   硬係覺得有陣味咁 ~

菇場忙咗陣就優優閒閒咁過喇   整下依樣整下果樣   又好快到 lunch time   呢期鍾意帶 lunch box   因為珍珠米真係好好食呢 ~

又放工喇   今晚唔駛去買餸   所以又去超市行下   之後就番屋企 lu ~

抖咗陣就預備煮晚餐喇   今晚自己食先   因為想早 d 去徑步呀 ~

是日晚餐 - 茄汁豬扒 + 瑤柱燜節瓜 + 海鮮炒飯 

茄汁豬扒 - 我喺豬肉檔買架   阿姐好好人幫我拍埋   咁我唔駛自己慢慢刴   依家會用埋蒜蓉一齊醃   好味好多呢   個洋蔥都好耐架喇   估唔到無爛之餘仲好香洋蔥味  哈 ~  

瑤柱燜節瓜 - 今次勁喇   買咗 6 個中型節瓜   抵丫嘛   $6/份咋   買咗 2 份   今晚只係食節瓜都飽 ~  

海鮮炒飯 - 清埋冰格 d 蝦仔同蜆   咁令到個炒飯有 d 咬口咁啦   真係唔錯   哈 ~

之前睇中醫   我仲係無咩氣   所以醫師叫我用當參同北芪燉肉汁   不過我又唔記得買瘦肉   所以就咁煲當參北芪水   聽日拎番菇場飲先 ~

差唔多 8 點 45 分出去徑步   里奧大人都已經係屋企附近   咁叫佢自己搞掂   我番黎先幫佢洗碗   今晚我徑咗 6 個圈   都差唔多半個鐘架   依家其實唔會出好多汗   但都有 d 咁嘅   最緊要係比自己郁下呢 ~

真係超鍾意徑完步之後可以即刻沖涼   抖陣再食生果   食完又抖陣   之後 11 點瞓覺 ~