嘉華大酒樓 @ 官塘 ( 27-DEC-2013 )

紅燒斑腩煲

柱候牛腩煲

燒味雙拚盤 (油雞 / 叉燒)

臘味粒扒時菜

鮑參燴肚翅

時令生果

( 27-DEC-2013  FRI )

今個星期真係唔錯   放兩日番兩日   今日番工仲係星期五添   所以星期六唔駛番嘅   都會請埋假   連放幾日假真係好鬼開心呢 ~

早餐食腿蛋治   今次烘得好靚仔呀 ~

菇場靜啦   加埋又有幾個同事請假   所以更加靜 ~

Lunch Time 同 8 卦出去食   食完再行一田   因為我真係超級勁飽 ~

我嘅咖哩牛肉飯

8 卦嘅土魷馬蹄蒸肉餅

飯氣攻心   超勁想瞓呀   晏晝真係唔可以食咁飽 ~

放工番媽咪屋企坐陣   之後再去酒樓   家姐 7 點就到喇    可以開餐 lu ~

食到 8 點幾就番媽咪屋企   拎湯拎生果拎牛扒   之前同媽咪講話里奧大人鍾意食皇帝蕉   所以媽咪就買比佢   所以我話佢一定要錫媽咪呀   哈哈 ~

同家姐 8 點 45 分走喇   里奧大人就慘啦   雖然唔駛上大陸   但差唔多 9 點半先放工呀 ~

我番到屋企就即沖涼   之後都唔想開電視睇   所以就打機喇 ~

無啦啦鬧鐘壞咗   真係最鬼驚   所以即打比里奧大人   叫佢 Set 佢電話鬧鐘   我自己又 Set 埋電話鬧鐘   妳知啦   依家凍凍咃好好瞓家嘛   聽唔到鬧鐘響就出事㗎喇   所以要雙重保障   哈哈 ~

里奧大人食埋嘢先番屋企   番到嚟都 10 點半   又陪下佢咁   又 12 點先瞓 ~

大快活 @ 九龍灣 ( 26-DEC-2013 )

穀飼肥牛 (沙爹湯底)

好似已經淥熟咁   因為好腍

鐵板牛扒 + 司華力腸 (黑椒汁) 

( 26-DEC-2013  THU )

今朝 9 點醒咗喇   諗住再瞓   不過懶床 15 分鐘都瞓唔到   正想出廳睇雜誌之際   咁啱里奧大人都醒咗去廁所   之後佢話都醒咗唔瞓 lu   我一睇就知佢實唔會再瞓啦   有心事嘛   因為部機頂盒用唔到   佢梗係想快快去整啦 ~

去太興食早餐   估唔到要等位   感恩等咗 5 分鐘左右就有位   因為諗住走㗎喇   企喺街等位好凍呀 ~

番到屋企抖陣就沖涼   因為里奧大人要買手機   所以 11 點就出門口喇 ~

今次里奧大人終於買 Samsung Note 3   無計啦   佢之前 Download 啲歌無哂呀   同埋部 Iphone 間唔中又 Shot Shot 哋   所以要換機   影相顏色唔靚都要接受㗎喇   哈哈 ~   

依家加 $699 有部 Samsung Tab 7   里奧大人話好抵喎   因為出面買要千幾蚊   所以佢買嚟送比家姐呀 ~ 

搞到 12 點半   企到腳都軟埋   之後又去深水埗喇 ~

尋日買個機頂盒要 $689   咁里奧大人番到屋企上網睇   標價係 $499 咋   咁去番間舖整機嘅時候   咁啱有個男仔買同一部機頂盒   佢買 $499 咋   咁里奧大人問番職員   佢話個男仔買埋個 Mon   根本講大話啦   個男仔明明只係話買機頂盒   之後佢又話買之前可以講價   嘥氣啦   所以里奧大人當面講話佢哋根本唔老實囉 ~

不過我同里奧大人講算啦   我哋唔上網睇就唔知原來只係 $499   唔好比負能量影響我哋呢 ~

再幫晴晴買埋 Ink 就走喇   佢 Daddy 尋日話想買多 2 支 Ink   咁里奧大人就 Whatsapp 同佢講今日會買   嚇到佢 Daddy 即打嚟話唔急㗎   搞笑啦   其實我哋咁啱要去換機   所以先買埋呢   咁講真   買多啲比佢哋好過   唔係次次比運費仲貴囉   同埋最慘係唔可以 By Air   寄去澳洲要 37 日   佢哋又急用   因為佢哋每個月起碼要 Print 3,000 paper 備課   佢哋買 Ink 要 HK$240 一盒  香港買就 HK$125 一盒   所以點都會幫佢買㗎喇 ~

買埋 2 張 SD 咭就走喇   任務完成   所以即刻去食嘢喇   因為我好想坐呀 ~

去泰國人海南雞食 Lunch   里奧大人又拎部手機出嚟整   我唔準佢整呀   因為想傾下偈嘛   之後佢話有聽我講嘢   所以我問番佢   我之前第 3 句嘅尾音係咩   答唔到就要收埋手機   不過佢答啱都會話佢錯   哈哈 ~

海南雞飯套餐



肉碎扎肉金邊粉 - 超級勁大碗囉   不過又幾好食喎   可能我落咗辣椒粉

食完就去買電話套   之後再行多一個圈就番屋企喇 ~

同里奧大人一齊實係坐小巴番屋企嘅   真係好唔明白啲人咩心態   一個人坐 2 人座位   但佢個大盒就唔係擺喺自己腳底   妳知啦   啲小巴唔會等妳坐定先開車家嘛   如果唔想擺個大盒喺自己腳底   咁咪打的囉   唔好咁自私嘛 ~

番到屋企差唔多 4 點   咁里奧大人又係第一時間整機頂盒   感恩終於睇到喇 ~

我勁攰呀   所以喺梳化瞓咗半個鐘   瞓醒都 5 點   咁煲中藥 lu ~

7 點有啲餓   咁里奧大人咀角爆瘡   但我又勁想打邊爐   所以去大快活喇 ~

食完又去商場兜一個圈就番屋企   第一件事就係沖涼   真係好鍾意番到屋企即沖涼嘅感覺   因為代表已經做哂所有嘢   哈哈 ~

一路電視一路食花生糯米糍   估唔到芝麻糕都超級煙韌   勁好味 ~

聽日要番工   今晚 11 點瞓喇 ~     

別府 @ 九龍灣 ( 25-DEC-2013 )

山葵八爪魚軍艦 / 三文魚壽司

九洲拉麵

( 25-DEC-2013  WED )

聖誕連放兩日假期   實在太開心喇   不過去旅行又貴到離譜   如果唔係都幾好㗎   好多星期六都唔駛番工嘅   咁樣可以自制長假期   請 3 日可以放 9 日 ~

今朝瞓到 10 點 45 分呀   開機洗衫之後就到自己梳洗   唔駛心掛掛   哈哈 ~

咁晏先起身   所以去金姆指食早餐   因為早餐時間至 11 點半呀 ~

我一睇碗麵就覺得啲麵好腍   最衰里奧大人啦   成日要腍啲腍啲   搞到我一齊落單嘅麵都腍哂   不過佢話唔關佢事   係擺得耐喎   哈哈

里奧大人之前成日問呢兩日有咩節目   依家唔駛諗啦   因為機頂盒壞咗   咁啱又要幫晴晴買 Ink   所以就去深水埗喇 ~

食完早餐就番屋企   之後沖埋涼又抖下   差唔多 1 點幾先搭地鐵出深水埗 ~

出到去都差唔多 2 點 15 分   咁見到阿明無人排隊   所以就去食啦   次次話唔食都會去食   哈哈 ~

加多加多飯團 (大辣) - 終於問到一嚿嚿白色係咩來   原來係飯團   我今次要大辣   不過一啲都唔辣   所以又係好反胃   今次真係最後一次食㗎喇

黃薑飯 (巴東牛肉) - 我覺得咁樣裝住都幾好   因為唔駛洗碗

里奧大人仍然食番同一樣嘢   最穩陣   同埋黃薑味真係好好味嘅

甜茶冰 - 我覺得味道有啲似銀菊露   等我仲諗住用嚟解辣添

食完就去高登買機頂盒同 Ink   不過真係好驚去高登   太焗喇 ~

買完都 4 點幾   里奧大人去買椰汁   我就買珍珠奶茶同炸豬大腸   因為我唔想拎住杯嘢飲   所以快快飲啦   加埋食埋啲珍珠   所以飲完成個肚脹哂   有啲辛苦   哈哈 ~

坐小巴番屋企喇   估唔到一上車就見到教友   尋晚先同佢打招呼   今日又見到   因為好少同呢位教友打到招呼嘛   因為佢都有事奉   唔會同埋我哋一齊坐嘅呢 ~

里奧大人番到屋企即整機啦   咁我就煲菊花茶   之後就執書房   原來自己買咗好多 Day Cream 同 Night Cream 都無用到   慳鬼哂   嗚嗚 ~

執執下嘢   里奧大人話部機無啦啦無哂晝面   點開都唔得   所以又只能力用舊機睇高清台   仍即係話聽日又要去番深水埗喇 ~

8 點半先餓呀   咁去別府食啦   勁想食壽司 ~

食完兜個圈就番屋企喇   睇下電視又睇下雜誌   原來差唔多 1 點   要瞓㗎喇   不過我又唔話好眼瞓喎  ~   

金姆指米線 @ 九龍灣 ( 24-DEC-2013 )

( 24-DEC-2013  TUE )

今日係平安夜   好多公司一係放早   一係放半日   實在太羨慕啦   而我就一定無得放早囉 ~

無咩胃口   所以早餐食奶油多 ~

所有大粒又唔喺度   真係完全無 Mood 做嘢 ~

菇場好鬼凍呀   所以 Lunch Time 就出去行下   入埋票就買酸辣米線番菇場慢慢食喇 ~

終於等到終於放工啦   今晚要番教會   所以唔煮飯 lu ~

感恩里奧大人可以 6 點 40 分放工   因為好驚會遲放工呀   同埋今晚佢約埋媚媚齊番教會   如果遲放工就未必趕得切番教會呢 ~   

我 7 點落去別府攞位   但要等 10 張枱   咁一定唔等啦   唯有去金姆指   不過佢都要等位   好在等咗 10 分鐘有位咋 ~

里奧大人差唔多 7 點 15 分就到   媚媚同男朋友就喺明輝食嘢   因為里奧大人初初驚唔知幾點放工   所以唔約埋一齊食 ~

8 點開始   差唔多 10 點完畢   之後就各自歸家 lu ~

聽日放假   所以都唔會咁早瞓啦   不過機頂盒壞咗   只可以睇高清台   咁唔睇 lu   睇雜誌好過 ~ 

Champer's @ 鰂魚涌 ( 23-DEC-2013 )

一日椰菜絲炒肉碎 - 好味呀   同埋份量都幾多

軟煮牛肋黑芝麻咖哩 - 都好味   牛肋好林

啲飯有粟米同紅蘿蔔   我鍾意食呀 

日式炸雞 - 外脆內嫩

唔記得咩茶   只記得佢話要 $3 茶位

( 23-DEC-2013  MON )

瞓晚瞓得唔係咁好呀   加上今日又係星期一   所以特別唔想番工   哈哈 ~   

早餐食芝腿治烘底   如果有燒賣粉果炒米粉呢啲就好 lu ~

菇場無嘢做啦   勁想瞓 ~

今日有 Lunch Box   食完諗住去入票   但都係唔出喇   無咩 Mood ~

真係好眼瞓   4 點沖咗 1/3 杯咖啡   飲完又精神啲噃   之得早啲飲啦   哈哈 ~

放工去睇中醫   去到地鐵站   一路口噏噏話去鰂魚涌鰂魚涌鰂魚涌   因為上次搭錯車嘛   咁去到彩虹   我以為又搭錯車   仲諗住喺鑽石山先轉番車   之後聽到下一站係九龍灣   原來我係無搭錯   好彩咋   因為我頭先心大心細想喺彩虹轉車囉 ~

家姐幫我排隊等   感恩我去到無耐之後就有得睇   咁樣快好多㗎 ~

醫師又話我血虛   之後好大力按我隻腳   話我勁水腫喎   佢按嗰下真係痛到差啲一腳伸埋落佢度呀   嗚嗚 ~

好記得有次里奧大人話兒甥女似水腫   所以係咁按下佢隻腳   點知之後見到兒甥女   佢話佢半夜起咗身   覺得對腳好痛   好驚喎   之後見到瘀咗   笑死我啦   鬼咩   里奧大人係咁大力按   唔瘀先奇呀    哈哈 ~

家姐飲完中藥一定要食山楂餅   但我又唔駛㗎喎   飲慣咗嘛 ~

今晚同家姐又試新嘢   其實鰂魚涌都好多小本經營嘅餐廳   食物水準都好 OK 呀 ~

食完就同家姐去惠康買嘢   我買三角黑朱古力   佢就買咗幾包桃哈多   我哋仲勁   買咗包童星闊條麵一路行一路食   勁有去旅行 Feel 呀 ~

我哋行去北角搭巴士   基本上我對香港區唔係好熟   所以過馬路真係會等綠公仔先會過   因為我唔知啲車喺邊度嚟嘛   咁今晚見到條馬路無車   所以過馬路啦   點知老遠有架的士好似想駛埋嚟我哋果邊咁   但我哋已經過咗一半馬路    咁我話好驚呀   捉住家姐 "Dun" 番後去安全島   點知家姐話唔駛驚啦   照向前行   之後佢話原來佢知道已經係紅燈   同埋話   如果我哋 "Dun" 後行   架的士咪撞我哋囉   向前行先安全   哈哈哈哈   咁又係喎    驚起上嚟真係方吋大亂呢 ~

今晚坐 671   喺九龍灣地鐵站落車   所以陪埋家姐等巴士   佢上車之後我就番屋企喇 ~

里奧大人食埋嘢先番屋企   佢仲係早我一架 Lift   管理員問我係咪同里奧大人一齊食飯 ?!   我話梗係唔係啦   佢問我點解會答 "梗係唔係"   我話點會前後 Lift 㗎   一部 Lift 時間無可能唔等埋我囉   如果一齊食飯嘅話   除非我買嘢要好耐   我先會叫里奧大人番屋企先   否則多數一齊番呢 ~

番到屋企就即沖涼休息   今晚 10 點半瞓喇 ~ 

手撕火雞 + 臘潤腸 + 西蘭花 ( 22-DEC-2013 )

( 22-DEC-2013  SUN )

今朝 9 點半起咗身 lu   梳洗之後就落去食早餐 ~

番上屋企抖陣   沖埋涼就番教會喇   教友話我同里奧大人臉色好咗好多呀   可能冬天好瞓啲呢~

約咗媽咪同家姐去飲茶當做冬   所以奉獻完之後就走呢 ~

飲完都 3 點咯   之後各自歸家喇 ~

番到屋企又即洗衫同煲中藥   早啲做哂嘢就最好   感覺唔駛做到夜晚咁   哈哈 ~      

里奧大人 5 點幾瞓咗陣   所以 6 點先可以飲湯   咁今晚啲餸完全無難度   可以 7 點半準時開飯 lu ~

是日懶餐 - 手撕火雞 + 臘潤腸 + 西蘭花 

手撕火雞 - 尋晚食剩架   我要咗隻火雞肶   不過焗完嘅火雞真係好鬼 "鞋" ~            

臘潤腸 - 無得買滷水雞翼   所以就蒸臘潤腸   一個字 : 懶呀 ~  

西蘭花 - 又係尋晚食剩   本來我要芥蘭   不過工人姐姐比呢包我   話已經洗好咗   咁仲好   哈哈 ~

搞掂哂就沖涼   又睇下電視   11 點就瞓 lu ~