大快活 @ 九龍灣 ( 20-SEP-2014 )

( 20-SEP-2014  SAT )

今朝約咗 8 卦食早餐   所以 7 點 45 分要起身喇 ~

菇場唔忙喇   可以睇團購   不過無咩嘢好團   只係團咗 2 張 Burger Mix 比家姐 ~

時間過得好快   放工即走喇   約咗里奧大人喺鑽石山地鐵站   一齊去旺角幫晴晴買 Tee 呢 ~

有啲餓呀   所以去食嘢先   食我最鍾意嘅酸辣米線   食多幾餐唔會食㗎喇   之後食嘢要清啲 ~ 

食完去買 Tee   點知舖頭嘅人有事外出   又要周圍行 ~

行咗陣真係唔想行喇   叫里奧大人陪我去大家樂食 Tea   想坐下嘛   其實都唔餓   但無理由齋坐嘛 ~

差唔多 4 點再去買   買咗 3 件 Tee 比佢   佢肯定好開心 ~

買埋 4 碗芝麻糊就坐小巴番屋企   勁攰呀 ~

7 點出去食嘢喇   依家要食多啲補血食物   所以諗住去 Cafe Lagoon 啦   點知執鬼咗   咁去大快活算喇   最近要夠近 ~

食完就番屋企喇   沖埋涼就食芝麻糊   我就睇下電視   里奧大人做公司嘢   我差唔多 11 點半就自己瞓先 lu ~

煎魚餅 + 唐生菜 + 蕃薯糖水 ( 19-SEP-2014 )

媽咪煲嘅紅棗當參山斑魚湯 

( 19-SEP-2014  FRI )

今朝去拎報紙   點知無啦啦比後面阿婆推我   我忍唔住話佢啦   話佢駛唔駛推呀   妳成個袋都係報紙啦   真係好討厭呀 ~

早餐又食芝腿治烘底喇   因為諗唔到食咩 ~

菇場唔太忙   終於可以做自己嘢喇 ~

出去食 Lunch   之後行埋超市就番菇場喇   超勁熱 ~

放工即走   條街超級焗熱呀   仲想徑步添   依家唔駛 lu ~

去街市買餸   買完就番屋企  抖陣就預備晚餐   諗住食埋就沖涼   點知里奧大人 7 點半放工   咁我等埋佢食完   洗埋碗先沖涼    之後再煮蕃薯糖水 ~

是日懶餐 - 煎魚餅 + 唐生菜 + 蕃薯糖水  

煎魚餅 - 無心機煎   所以煎到燶哂 ~

唐生菜 - 買咗 1 斤   里奧大人成日話 1 斤好多   其實都係每人食半斤   3 棵菜之嘛   有幾多喎 ~  
蕃薯糖水 - 之前買咗㗎喇   再唔食真係壞囉   里奧大人最驚食我煮嘅糖水   因為料多糖水少喎   話糖水唔係咁㗎喎   所以呢   佢見到碗嘢就話 " 最可怕嘅事終於發生喇"   衰啦   食就食   咪講咁多嘢 ~

搞掂哂都 10 點   係時間休息喇   同里奧大人一齊睇 "愛情公寓"   睇到 11 點半   不過唔可以繼續睇喇   因為我聽日要番工   所以一齊去瞓覺喇 ~ 

元氣壽司 + 松記糖水店 @ 九龍灣 ( 18-SEP-2014 )

玉米熟蝦船 X 2

厚燒玉子

炸蝦天婦羅 - 今次好大隻蝦呀

彩虹卷

燒牛肋骨 - 估唔到塊牛肉都好長   同埋好有牛味呀

筋子

芥辣八爪魚軍艦 / 飛魚子

三文魚 / 油甘魚 / 玉子 / 海膽軍艦 / 三文魚籽軍艦

炸軟殼蟹

炸野菜餅烏冬

中華沙律

三文魚頭湯

里奧大人嘅芝麻糊 (熱) - 食完變烏咀狗   哈哈

我同家姐 Share 食幻彩珍珠   啲生果無咩味   家姐話食完啲涼粉   好有薄河味定咩   我話涼粉不嬲係咁喎   

家姐抽嘅

我抽嘅

( 18-SEP-2014  THU )

里奧大人上大陸   不過我 7 點半起身喇   因為約咗 8 卦食早餐   不過我想食完睇下報紙   之後佢嚟咗先再傾偈囉 ~

菇場忙啦   有時唔明啲人做乜鬼   做嘢快唔係問題   但要睇清楚先做嘛   阿矮無啦啦同我講話開咗重覆 D/N   但我話唔會喎   有 Commission 先會開   同埋資料係佢比家嘛   之後我就再即刻 Check System 啦   原來我之前 Lock 咗 Nnumber   但寫明會 Will Use   我咪話佢囉   妳月中咁快 Posted   以前月尾 Posted 㗎   月尾都會有 D/N 家嘛   佢話同番佢阿頭講   要開番 C/N 衝番條數   之後我先慶啦   我同佢講   上次我又係有張 D/N 寫明 Will Use   妳都照 Post   今次又係咁   唔該睇清楚 Remark 先 Post 啦   寫咗都照 Post   咁我唔駛寫啦   之後佢好尷尬話知道知道   我真係頂佢唔順囉   表現自己唔係咁家嘛 ~

忙到 12 點就搞掂   可以抖下 ~

又勁想食酸辣米線呀   不過 Lunch Time 仲未餓   所以出去買生果   差唔多 1 點先去買酸辣米線番菇場食   勁趕   哈哈 ~

感恩唔太忙喇   所以即做 Filing   張枱少咗好多嘢喇   開心開心 ~

放工即走   約咗媽咪去元氣   依家超方便呀   淘大間板長改咗做元氣   咁我唔駛去德福咁遠 ~

唔醒起要坐卡位   所以我 6 點要去到啦   好感恩有最入果張卡位   其實仲有 1 張   不過近門口就唔多鍾意   好熱咁   不過最入嗰張又超勁凍   所以我拎湯番屋企嘅時候   順便拎件披肩   唔係凍病都似   哈哈 ~

家姐 6 點 45 分到喇   食下傾下   差唔多 8 點就走喇 ~

送埋媽咪搭的士   家姐已經想開車門   點知個司機見到媽咪坐輪椅就即走   勁衰格   所以我一定會投訴囉 ~

同家姐行萬寧   之後同家姐行淘大   問佢要唔要扭蛋   因為有 8 哥   估唔到佢話扭喎   咁每人比一次錢啦   哈哈   扭一次要 $16   真係貴啦   好在扭咗唔同嘅狗仔咋 ~         

咁家姐叫里奧大人一陣抽一次   咁我打比里奧大人啦   原來都已經 9 點   佢仲咁啱已經喺九龍灣添   佢話食糖水喎   咁家姐又話好   咁一齊去松記啦 ~

差唔多 10 點走喇   番到屋企即沖涼   之後打陣機   11 點瞓喇 ~

煎鯖魚 + 節瓜粉絲 + 齋滷味 (外賣) ( 17-SEP-2014 )

( 17-SEP-2014  WED )

感恩一覺瞓天光   如果晚晚係咁就好喇   哈哈 ~

今朝一去到小巴站就有車   快好多呀   咁就可以慢慢嘆早餐呢 ~

番到菇場抖陣就去倉執嘢   執到身水身汗   本來想抖陣先再執   因為實在好鬼熱   我要紮起啲頭髮添呀   不過都係一次過熱好過分開兩次熱   所以最後都執好哂   之後 8 卦問我係咪好熱   因為我塊臉紅哂   咁我再照鏡   原來成臉都係汗   唔怪得 8 卦咁問我啦 ~

仲有其他 File 未 Pack 㗎   不過留番晏晝先 Pack   因為搬嚟搬去好鬼攰   要比自己抖下先 ~

今日有 Lunch Box   其實係打風嗰日嘅 Lunch Box   如果啲餸係蒸嘅話   咁果日夜晚可以蒸番熱嚟食   但炒過嘅餸呢   蒸番熱係好難食㗎   所以先拎番菇場做 Lunch Box 囉 ~

又去 Pack File 喇   船頭都好好   見我開箱即刻問駛唔駛叫同事幫手   不過我話唔駛啦   一個人做好啲   之後佢同我講   阿 Head 同佢講咗   我放假就佢哋 3 個一齊做我啲嘢   因為依家好難請人喎   咁都好   我唔駛番菇場幫手   因為我之前諗住休養期間   如果菇場真係好多嘢做   而我身體狀況 OK   我會番去幫手清嘢   咁依家唔駛啦 ~

入好哂箱都已經 5 點   咁聽日做埋啲手尾   咁就搞掂哂   我想入院前搞掂哂啲嘢   唔係心掛掛咁呢 ~

放工去百佳買嘢   之後番屋企 lu ~

今日出咗一身汗   所以 6 點半都煮飯喇   想快啲沖涼 ~

是日懶餐 - 煎鯖魚 + 節瓜粉絲 + 齋滷味 (外賣)

煎鯖魚 - 上次喺百佳買   好似 $7.9/條   所以買 2 條試下   估唔到又 OK 喎   最緊要係唔腥   咁下次可以入多啲貨喇 ~

節瓜粉絲 - 之前食剩 1 個大節瓜同 1 條脆肉瓜   所以加埋粉絲   用海皇醬做調味   真係唔錯   不過今次用咗 2 包粉絲   原來好鬼多囉   食到好辛苦   哈哈 ~

齋滷味 (外賣) - 喺百住買㗎   好似 $15   所以買嚟試下   都唔錯喎 ~

煮完即沖涼啦   之後先慢慢食 ~

里奧大人 8 點半先放工   食完又要做公司嘢   所以依家我攰都想煮   唔係下個月又無咩住家飯食㗎喇 ~

今晚 11 點自己瞓先喇   真係次次出完汗都好鬼攰咁囉 ~

蕃茄海鮮扁意粉 ( 16-SEP-2014 )

( 16-SEP-2014  TUE )  

尋晚 1 點幾比啲風聲嘈到醒咗   真係好似殺到埋嚟咁   又令我諗起果次去馬來西亞咁   臨出發前一晚先嚟 9 號風球   不過好感恩   朝早 3 點幾已經落波   可以預期出發   感恩 ~

里奧大人 7 點話我知   依家仲係 8 號風球呀   不過睇個勢   應該唔會掛全日囉 ~

9 點半都醒咗喇   咁啱媽咪打嚟   話 11 點左右可能會落波呢 ~

10 點先同里奧大人去太興食早餐   今次到我食餐蛋麵喇   因為要頂到夜晚 ~

阿 Head Whatsapp 話 1 點半番到菇場   咁又好喎   我仲諗住 12 點幾番去添 ~

里奧大人 11 點半出門口   我就 12 點半出門口   去 Happy Lemon 買杯 Jumbo 珍珠奶茶當 Lunch ~

1 點都番到菇場   估唔到都有同事番咗   但佢哋話之前上唔到網   真係好在唔係咁早番   唔係坐喺度唔知做咩好呢 ~

忙到差唔多放工   終於搞掂 ~

放工番屋企喇   開機洗衫之後就抖陣   之後又要預備晚餐 ~

里奧大人 8 點半先放工   所以我煮完就即沖涼   再慢慢嘆喇 ~

是日懶餐 - 蕃茄海鮮扁意粉  

蕃茄海鮮扁意粉 - 喺百佳買嘅急凍海鮮包   完全唔掂   又多蟹柳   但啲蟹柳好麵粉囉   最驚呢啲口感 ~

等埋里奧大人食完   陪佢傾下偈   差唔多 10 點半就一齊睇聖經   11 點幾先瞓 ~

柱候炒牛展 ( 15-SEP-2014 )

( 15-SEP-2014  MON )

尋晚半夜里奧大人發開口夢   話唔知咩嘢收咗未   聽佢啲語氣   應該係同女同事講啦   好溫柔咁㗎   哈哈 ~

好焗熱呀   不過聽日就會狂風雷暴大驟雨   仲可能會打風添 ~

早餐食米粉餐   超勁飽 ~

番到菇場即做 Report   唔係又唔記得㗎喇   之後又忙喇 ~

食完 Lunch Box 就去一田買蘋果   點知無得賣   激氣 ~

又忙呀   同事又催我 Pack 箱   我話忙呀   Pack 唔到囉   大佬   依家一對手做嘢咋   唔係唔 Pack 喎   而係真係無時間 Pack ~

今晚可能 8 號風球呀   唔該 "海鷗" 唔好咁快走呢 ~

今晚遲咗 10 分鐘放工呀   都開始有啲雨   快快趣去埋百佳買生果就番屋企 lu ~

抖到 7 點就煮飯   話午夜前考慮改發 8 號風球   要快啲打比里奧大人   叫佢聽日唔好上大陸 ~

好餓呀   所以煮完就即沖涼   之後即食飯喇   7 點半里奧大人打嚟話放工   不過我都食先 lu ~

是日懶餐 - 柱候炒牛展  

柱候炒牛展 - 之前睇食譜見到柱候燜牛展   不過我都唔會燜啦   同埋我係買一 Pack Pack 嗰啲牛展   咁鬼薄   燜完都唔知去咗邊 lu   所以我就用柱候醬炒   都幾好味喎   好過成日用黑椒汁同茄汁   無咁悶嘛 ~

家姐 8 點幾 Whatsapp 我知 10 點 45 分改發 8 號風球   咁睇嚟聽日都要番工㗎喇 ~

等埋里奧大人食完   洗埋嘢都 9 點幾   佢做公司嘢呀   我就抖喇   今日好鬼攰 ~

家姐 10 點半打嚟   話有件白痴嘅事話我知   佢頭先睇電視見到 3 號風球   同工人講話乜咁快改 3 號風球㗎   工人同佢講   10 點 40 分先 8 號   依家只係 10 點半喎   我話好在佢無 Whatsapp 話我知改 3 號囉   不過我都試過咁 Case 啦   我睇錄影嘅電視節目   錄緊嗰晚係 1 號風球嚟嘅   咁我睇嗰晚當然無話打風啦   所以一見到 1 號風球就即刻同里奧大人講啦   之後佢話我睇緊嘅係錄影節目嚟㗎   哈哈 ~

今晚勁喇我   11 點唔夠就自己瞓先喇 ~    

豆豉鯪魚炒油麥菜 ( 14-SEP-2014 )

( 14-SEP-2014  SUN )

今朝  8 點 45 分起身喇   去太興食早餐   諗住靜靜哋   點知坐對面嘅媽咪係咁教個女呢樣點解咁咁咁   嗰樣點解咁咁咁   問足全程   頭先一坐低   個小朋友都好開心咁㗎   之後比佢媽咪問問問   問到都無哂表情   我都覺得好煩   食完即走 ~

番到屋企抖陣沖涼   之後番主日學喇   今朝上堂好精神呀   感恩感恩 ~

崇拜完畢就去街市買餸   里奧大人要番屋企做嘢 ~  

無瓦遮頭真係勁熱勁熱   所以我番到屋企又再沖涼啦   3 點先去食 Tea ~ 

抖多陣   5 點幾飲湯   其實我好眼瞓   不過唔瞓啦   一陣夜晚瞓唔到就慘 lu ~

家姐尋日比我嘅西洋菜鹹鴨腎生魚湯

6 點 45 分開始煮飯   7 點 15 分有得食   不過我煮完食唔落   食咗少少餸咋   哈哈 ~

是日懶餐 - 豆豉鯪魚炒油麥菜  

豆豉鯪魚炒油麥菜 - 之前食到驚   但今晚又好想煮呢個餸囉 ~

沖完涼就抖喇   上星期買咗金奇異果   點知都唔甜嘅   我仲買咗 9 個添   所以每次要食 2 個   真係夠哂消滯 ~

10 點 15 分就同里奧大人一齊睇聖經   有時間一齊靈修   感覺實在太好喇 ~

不過 11 點都瞓喇   好攰   哈哈 ~