福源餐廳小廚 + 港記糖水 @ 官塘 ( 23-MAY-2017 )

拔絲咕嚕肉 - 仍然好味道同好熱氣呀   哈哈   



羅漢齋炒麵 - 里奧大人第一時間夾脆卜卜嘅麵比我    算佢對得幾好啦   加番 0.00075 分  



綠豆沙涼粉 - 食完真係無咁熱氣咁   所以我都忍唔住要食呢

紅豆大菜糕 - 里奧大人係都要我食紅豆補血   仲要我食紅豆沙   我話唔食呀   會勁飽肚   所以食呢個啦   我食哂啲紅豆就算   之後佢就叫人拎隻碗   我以為因為 Share 食   所以要多隻碗   咁我話唔駛啦   點知原來佢話聽到我講話影大菜糕好難影   佢就倒出來比我影   所以要多隻碗   但可惜我已經整到碎哂呢     



( 23-MAY-2017  TUE )

今朝有啲焗   好似想吽雨咁 ~

早餐食蛋牛治   今次麵包好軟糯   好味道呀 ~



菇場唔忙   勁爽   可以寫旅遊 Blog ~

Lunch Time 去買麵包比里奧大人   本來想買埋包做 Lunch   但上次真係幾日食包   食到有啲驚   所以都係去 7 仔買咖哩烏冬算喇 ~

差唔多 1 點先番到菇場   好在大粒唔喺度   可以慢慢食呢 ~

仍然 Hea 等放工   今日里奧大人 3 點喺石門見客   之後就出旺角拎番部手機   咁我都應該唔煮 lu ~

準時放工   咁啱里奧大人又搞掂   所以喺飯堂等啦 ~

我 6 點去到   好在坐下等下   6 點半先食   其實我唔係咁想咁早食飯   始終唔係成日可以咁早嘛   唔想習慣早食呢 ~

次次食完呢兩樣都超級熱氣呀   所以我話要食綠豆沙清熱呀 ~

食完番屋企   拖埋地就沖涼   9 點幾先食沙律   今晚無食菜   點都要食番啲生果呢 ~

估唔到今晚都幾攰   所以 11 點都瞓喇 ~

蜜糖焗雞翼 + 西蘭花 + 蘋果粟米沙律 ( 22-MAY-2017 )

( 22-MAY-2017  MON )

今朝又天陰陰   真係唔係咁好啦   堅無咩 Mood 咁㗎 ~

好餓呀   所以食通粉餐 ~



菇場忙咗陣就 Hea 喇   所有大粒唔喺度   勁 Free 呀 ~

Lunch Time 又食營養餐   間唔中食真係幾好味嘅 ~

仍然 Hea 過   爽爆   放工可以即走 ~

無啦啦情緒好低落呀   所以去超市買嘢   咁啱有 92 折   實在太好喇 ~

買咗 16 包出前一丁同 2 Pack 福麵同其他立立雜雜嘢   最緊要買夠 $100   唔係無 92 折就蝕喇   因為其實好多都唔需要買家嘛 ~

番到屋企原來已經 6 點半   要即預備晚餐喇 ~

落雨濕濕呢啲天氣   真係令人份外傷感   超勁掛住媽咪呀   所以搞掂哂啲嘢就大喊一場   個人舒服好多呢 ~

里奧大人 7 點 15 分放工   好在今晚只係焗嘢同淥嘢   咁快好多啦 ~

咁我都諗住煮福麵比里奧大人食   但整鬼佢   話佢食擔擔麵   我食福麵   佢即覆我   其實佢都想食福麵   哈哈 ~

是日懶餐 - 蜜糖焗雞翼 + 西蘭花 + 蘋果粟米沙律  

蜜糖焗雞翼 - 上星期一都好似焗雞翼   不過星期一煮嘅嘢   真係最緊要快囉   依家啲雞翼真係好細隻   定係泰國雞翼比較細隻啲呢 ?! 

西蘭花 - $6.9 有 2 個   即買   平時 $9.9 有 3 個就覺得太多   一次食又多   分兩次食又唔平均咁   哈哈   所以雙數嘅份量係最好 ~

蘋果粟米沙律 - 上星期買咗 4 個蘋果   真係要清埋佢啦   加多罐椰果   再加埋 2 罐就嚟到期嘅粟米粒   話咁快搞掂 ~

洗埋碗就沖涼   之後開機洗衫   吹埋頭就休息喇 ~     

咁我食沙律啦   里奧大人見我落煙肉碎   佢話我可唔可以正正常常食個沙律   笑死我   落煙肉碎好唔正常咩 ?!   我覺得佢用正常呢個形容詞好搞笑   哈哈 ~



今晚都幾攰   11 點唔夠都瞓喇 ~

蛋黃鹹肉糉 ( 21-MAY-2017 )

右邊係榮華出品   左邊就唔知喇   榮華啲糯米比較煙韌   但無咩料囉  



左邊呢隻就多料喇   我覺得似美心出品呢   



( 21-MAY-2017  SUN )

今朝里奧大人 9 點幾醒咗   不過我就繼續瞓   瞓到差唔多 11 點先醒   所以番唔到教會 lu ~

梳洗之後就食早餐   食完番屋企喇 ~



番到屋企即刻熨 3 機衫   熨完就沖涼   之後可以抖喇   爽 ~

無啦啦好餓   所以 3 點去食下午茶   再買埋生果就番屋企 lu ~

抖下又執下櫃桶   里奧大人好多筆嘅   我比筆桶比佢裝住   之後比個盒佢裝住   佢就每度裝幾支   總知我比咩佢   佢都係有嘢裝嘅   我咪話佢囉   我比一百個盒佢   佢係會分別裝唔同嘅嘢   但我其實比個盒佢   係想佢將啲嘢分類   咁搵嘢就方便好多家嘛   但佢手機又會將啲嘢分類得好整齊㗎喎   真係唔知佢咩心態   不過依家我醒喇   佢唔見嘢   叫佢自己搵   因為係自己無手尾做成呢 ~

執下嘢啲時間真係好快過   望下個鐘都 5 點半   咁啱家姐今晚比糉我   咁我落樓交收   傾下傾下   傾咗 20 分鐘 ~

家姐成日都會望我個咀唇   咁今晚唔知做咩鬼   個咀唇真係白到無血色咁   嚇到佢以為我咩事   咁我唯有話凍囉 ~

咁家姐有 10 隻糉   所以比 5 隻糭我嘛   佢只係話啲糉係 美心 榮華同海港   但無話係咩嘢糭來   咁我 Whatsapp 問佢比咗咩糉我 ?!   佢好快答: 做咩 ?!   我覺得佢好似好驚咁   之後我問佢係咪好驚 ?!   佢話係   哈哈   可能我無加公仔 Icon   佢覺得我語氣重呀   哈哈哈哈 ~

真係好感恩   之前里奧大人先問有無糉食 ?!   我話家姐今年無比呀   要食咁我買啦   佢又話唔駛   咁我同家姐講話以為今年無糉   家姐話未咁快有啫   有嘅話一定同我分享   佢咁講   我嗰下好想喊   因為佢真係有咩好嘢食   真係一定記得我同媽咪㗎 ~

番到屋企已經 6 點 15 分   咁諗住去飯堂食嘢   但落毛毛雨   里奧大人又驚我冷親   又話我個咀唇好白   係咪肚餓呀 ?!   其實我不嬲都係咁   應該係貧血呢   咁我話不如番屋企食糉啦   哈哈 ~

上次蒸糉   以為 20 分鐘已經好夠   點知食食下係凍   又要翻蒸   浪費時間   咁今次啲糭又大隻   所以蒸夠 35 分鐘   最搞笑阿 mi 叫我記得要夠熱呀   唔係腸胃炎   冰姑就叫我唔好食呀   驚我難消化   其實我真係好感恩   咁多朋友錫我關心我   真係好開心呢 ~

咁之後家姐問我蒸幾耐 ?!   我話 35 分鐘起碼   佢話佢蒸咗 15 分鐘   食食下係凍呀  哈哈   之後佢話我叻過佢   我話之前豬過一次   今次仲唔醒咩   嘩哈哈哈 ~

唔好講笑   今次蒸兩隻大嘅   真係食到眼琼琼   但我依家唔會格硬食   真係唔會食到頂住個胃先停囉   唔係又痛死晚架   咪搞 ~

問里奧大人飽唔飽   佢啲語氣好慢咁話: 好飽呀   笑死我   可能佢都滯到呆咗呀   今次我又豬啦   蒸一大一細咪好囉   做咩鬼蒸 2 隻大喎 ~

洗埋碗   沖埋涼就休息喇   今日天氣唔錯   雖然落毛毛雨   但涼涼地好舒服   可以瞓覺先開冷氣呢 ~

好嘢   今晚有啲攰   所以可以 11 點幾瞓   我初初擔心今晚好夜瞓架   因為朝早晏起身呢 ~

南記粉麵 @ 旺角 ( 20-MAY-2017 )

( 20-MAY-2017  SAT )

今朝又同家姐食早餐   真係最開心呢   依家佢成日要 OT   得番星期日休息   所以唯有約食早餐   希望遲啲唔駛成日 OT   咁就可以夜晚食飯呢 ~

我有時自己一個人喺屋企瞓   冰姑就一定話有事咁點 ?!   估唔到我同家姐咁講   家姐第一句都係話我夜晚有事咁點 ?!   我話如果我死咗妳會點呀 ?!   家姐好激動話咁咁咁   但我見到佢個樣咁激動   我覺得好搞笑   哈哈 ~

呢大半年   真係令我實實在在知道咩人錫我   咩人唔錫我   所以我都將自私嘅賤人   永遠分類為無謂人   唔駛旨意我再作出任何關心問候   同埋見面時   都唔好諗住我會說說笑笑   對住妳咃   唔值得我同妳笑 ~

傾下傾下   8 點 45 分就走喇   今朝菇場無哂大粒   所以遲到唔係咁驚 ~

居然忙下停下   不過預咗啦   次次星期六都咁 ~

放工即走喇   今日同教會傳道人 Farewell 飲茶   估唔到都有 2 圍枱   我同里奧大人 1 點半先到   無計啦   我要番工   唔係 12 點半都到呢 ~



飲到 2 點半就各散東西喇   我同里奧大人即搭小巴去旺角   我去 LG   里奧大人就去旺角機樓拎超市 Coupon ~

去到 LG 已經 3 點 15 分   又係等咗 2 個鐘   真係無多又無少   哈哈 ~

整完就周圍行下   里奧大人話想買嘢飲   我話去 Come Buy 買啦   之後問我飲唔飲   飲就買咩珍珠 xx   我聽見珍珠有啲驚   上次食完之後個胃痛到顛   所以我叫佢買椰汁算喇 ~

去埋朗豪坊睇鞋   但唔啱心水   所以去食嘢喇   原來已經 6 點半   唔怪得有少少餓啦 ~

上次同里奧大人講話旺角有間南記   佢今日一出旺角   已經話夜晚去南記食   我話佢囉   之前又話唔食南記嘅 ?!   佢話只係唔食銅鑼灣果間喎 ~

食完再去旺中行下   之後搭小巴番屋企 lu ~

番到屋企即沖涼   之後開機洗衫   今晚唔做家務喇   留番聽日做 ~

咁我食埋啲大樹菠蘿嘛   但剪到一條條食囉   因為我發覺應該係我食得太急   所以胃痛   咁一條條再慢慢咬   應該會好啲   里奧大人問我做咩咁食 ?!   我話你唔係以為我咁講究要一條條食呀嘛   哈哈   我話胃痛   所以切條囉   之後佢話幫手食   一早應該係咁啦   衰 ~



今日滕來滕去都幾攰   所以 11 點幾都瞓喇 ~ 

三色椒炒豚肉 + 鹹蛋節瓜乾魷魚湯 ( 19-MAY-2017 )

( 19-MAY-2017  FRI )

好在尋晚都瞓得好咋   唔係就慘   不過成個人都無哂力咁 ~

早餐食芝腿治   今次烘得好靚仔呀 ~



菇場忙下停下   又好似無咁攰咁   哈哈 ~

無啦啦勁餓呀   諗住食牛雜河   點知無位   咁去食上海麵啦唯有   其實好驚去食   因為好驚啲餃又唔熟呀   其實次次食佢   我都一定浸下啲餃先   以防萬一   哈哈 ~



食完去買菜   再去超市買杯麵   最後買埋大樹菠蘿就走人喇   開始落大雨了 ~

好嘢   Hea 到放工   準時走人 ~   

里奧大人見完客   都應該同我差唔多時間番到屋企   估唔到同步等 Lift 番屋企 ~

放低個袋就預備煮嘢喇   之後開機洗衫 ~

今晚 7 點 10 分已經食得飯   不過我唔太餓   食餸飲湯算喇   但就煮個拉麵比里奧大人食呢 ~

是日晚餐 - 三色椒炒豚肉 + 鹹蛋節瓜乾魷魚湯  

三色椒炒豚肉 - 用黑椒汁炒勁惹味   炒三色椒嘅時候   勁想食煎釀   搵晚整下先 ~      

鹹蛋節瓜乾魷魚湯 - 1 隻鹹蛋 + 3 個節瓜 + 3 隻乾魷魚   唔想落肉呀   乾魷魚係阿 mi 比我嘅   估唔到 3 隻已經咁夠味   無肉嘅湯   真係飲落無咁滯 ~

洗埋碗就拖地   之後即沖涼 lu ~

抖多陣就食大樹菠蘿   里奧大人又唔食   本來想一次食哂 8 嚿   但真係驚難消化   所以食 4 嚿算喇   食完知死喇   個胃位置好似突然硬哂咁   即係又胃痛 lu ~



連續兩晚胃痛   堅辛苦   不過都費事同里奧大人講   唔係以為我扮可憐 ~

慘啦   粟米 珍珠 大樹菠蘿通通都係我最鍾意嘅食物   依家食一次痛一次   我真係唔敢再食喇   嗚嗚嗚嗚   其實我依家食花生同杏仁都胃痛   唔通 Quota 真係已經用盡 ?!   紅顏薄命 ?!   哈哈哈哈 ~

痛一次半次無所謂   雖然都係超級辛苦   但今次連痛兩晚   真係好難頂   我都相信我會戒一戒口   唔係真係好易歸西了 ~

今晚呀   痛到直頭有啲攰添呀   所以 10 點 15 分即上床瞓   點知瞓到 12 點幾   又痛醒   又要去嘔   咁又舒服咗啲   之後再喺胃度搽白花油    大大力搓住個胃   估唔到又好 OK 喎   當堂無咁痛   感恩感恩 ~    

蕃茄吞拿魚螺絲粉 + 粟米蛋花湯 ( 18-MAY-2017 )

( 18-MAY-2017  THU )

感恩一覺瞓到 7 點半   但都唔想起身住   哈哈 ~

以前成日都想唔駛番工   自然醒就最好   不過自從媽咪走咗   我就無再咁諗 lu   因為無人比我陪啦   哈哈 ~

早餐食腿蛋治   好想食熱嘅三文治呀 ~



菇場忙呀   11 點幾先搞掂 ~

Lunch 食健康餐   估唔到咁鬼飽肚 ~

仍然忙下停下   所以好快又放工了 ~~~~

番到屋企就抖陣   想早食早休息   6 點 45 分就食晚餐   勁早呀 ~   

里奧大人 7 點半放工   原來佢未食飯   咁佢又唔講話番嚟食   唔理佢喇   等佢自己出去食 ~

是日懶餐 - 蕃茄吞拿魚螺絲粉 + 粟米蛋花湯  

蕃茄吞拿魚螺絲粉 - 尋晚食剩半碗   今晚食埋去啦   加啲茄汁再翻煮   都成 10 分鐘   仲諗住兜幾兜就搞掂添 ~

粟米蛋花湯 - 好想飲熱嘢   咁就整粟米湯啦 ~

食完只係 7 點幾   洗埋碗就休息下先 ~

唉   個胃開始唔舒服   頂到我好辛苦   有啲氣喘嘅感覺   其實頭先飲粟米湯   飲到最後嗰幾啖已經有啲辛苦   不過飲埋去啦   點知即出事 ~

呢個月個胃已經痛咗 3 次   食珍珠痛一次   食檸檬再痛一次   加埋今次粟米湯再痛一次   我都係時候要停一停食呢啲喇 ~

里奧大人 9 點番到喇   咁我都沖涼喇   頭先唔敢沖住   因為驚暈呢 ~

仍然痛到呢   食粒胃仙 U   不過無咩料到咁嘅 ~

嘔咗又好似舒服啲   係無咁痛囉   之後 10 點幾個胃都唔痛喇 ~

咁再睇多陣電視   11 點幾就瞓啦   點知又開始痛   背脊都痛埋   最後再嘔多次   好似舒服啲咁囉   唉   呢個月真係成日唔舒服   5 月快啲過啦   哈哈 ~       

蕃茄吞拿魚螺絲粉 ( 17-MAY-2017 )

( 17-MAY-2017  WED )

今朝好好陽光呀   個人心情都好啲呢 ~

早餐食餐蛋治   餐肉口感好怪   又無味   之前唔係咁㗎喎 ~

菇場忙下停下   但唔係咁願郁   哈哈 ~   

Lunch Time 唔餓   所以出去行陣   差唔多 1 點先買嘢番菇場食 ~

仍然忙下停下   但無啦啦勁眼瞓呀 ~

放工即走   番到屋企抹櫃   搞掂哂都已經 7 點   預備煮嘢食了 ~

里奧大人今日番大陸   估唔到 8 點幾仲喺沙田   好在有麵包   唔係都幾慘 ~   

是日懶餐 - 蕃茄吞拿魚螺絲粉

蕃茄吞拿魚螺絲粉 - 完全唔記得仲剩 2 罐吞拿魚   但已經過咗期 2 星期   唔理喇   反正里奧大人唔番來食   所以一次煮埋   我其實只係煮咗十幾條螺絲粉 + 一碗雜豆   估唔到煮埋咁鬼大碗 ~

食完抖陣就沖涼   之後睇下電視   又同冰姑傾下偈   一傾傾到成 12 點   咁要快啲瞓喇   哈哈 ~