炸子雞 + 炒飯 ( 23-JUL-2018 )

( 23-JUL-2018  MON )

雖然一覺瞓天光   但都有啲攰   係個人熱氣定濕得滯呢下 ?!

早餐食蛋牛治   其實好想食濕嘢   但又唔想食到咁鬼飽 ~



菇場忙呀   好在 11 點幾搞掂 ~

Lunch Time 都唔出去喇   食 K 餐   其實都唔餓   但已經 1 點   再唔食就趕唔切㗎喇   無理由開工先來慢慢食嘛 ~

攰呀   放工都即走   菜菜子無啦啦約咗里奧大人 4 點半去 APM 飲嘢   咁又好喎   我可以抖陣先煮飯   哈哈 ~

里奧大人 6 點半番到來   我都啱啱焗完啲雞同炒好個飯   可以開餐了 ~

洗埋碗就沖涼   上星期五拖完地再大清潔廁所   所以今晚可以抖下 ~

睇下電視   玩下手機   里奧大人話要瞓喇   原來已經 11 點半   我以為 10 點半咋   所以我都即刻瞓覺呢 ~

百樂門國際宴會廳 @ 九龍灣 ( 22-JUL-2018 )

( 22-JUL-2018  SUN )

今朝 9 點幾自然醒   里奧大人都沖埋涼換好衫添喇   我要快手啲呢 ~

食完早餐就番教會   崇拜完畢就即走喇 ~      





約咗家姐 姐夫去彩晶軒飲茶   因為麥包 3 點半做儀式呢 ~

我哋先到先等   我哋到咗 10 分鐘左右就有位   感恩感恩   家姐都話估唔到咁快有位 ~

家姐 姐夫無耐都嚟到   家姐話好肚餓   佢講得餓真係超級餓㗎喇   哈哈 ~

度小月揚州炒飯 ($78)



百吃不厭家鄉咸水角



老干媽蒸金錢肚



紫金名醬豉蒜蒸鳳爪



老爺子古法馬拉糕



叫哂點心就傾偈啦   家姐問我哋尋晚聞唔聞到自己個身成陣煙味 ?!   我話完全聞唔到喎   不過家姐好怕煙味   所以特別敏感呢 ~

原來肥妹真係對家姐好好㗎   佢幫家姐日日抹傷口   家姐話 Lunch 約咗人食飯   唔得閒買膠布   佢話妳照去食飯   佢去買 ~

咁肥妹去咗 2 次旅行   去日本就買咗支七味粉比家姐   之後去唔知邊又買咗手信比家姐   肥妹啲 朋友都話妳做咩成日要買手信比妳個同事 ?!   咁佢話因為家姐要睇住啲狗   所以唔敢去旅行   佢有得去旅行   咪想買手信比家姐囉   仲話家姐好好人   對佢好好   所以要買手信比佢   我覺得對話好感動   家姐真係一個好人   佢啲朋友好多都係舊同事嚟㗎   有幾個仲係第 2 份工識添   又會成日記得家姐生日   送嘢就一定送 8 哥嘅嘢 ~

原來家姐又 "High" 花咗架車   我都估到實有咁情況啦   掛住麥包定啦   PK 都係應該咁   不過我唔想家姐傷心   所以唔提麥包   之後家姐話: 妳點知嘅 ?!   我話我係妳邊個先得㗎 ?!

今次飲茶   大家都有傾有講   好開心 ~

差唔多 3 點走人   因為家姐個工人同前工人都到咗   咁我哋一齊行去喇 ~

唉   越接近 3 點半   個心就越卜卜跳   勁唔開心囉   嗚嗚 ~

麥包好鍾意食   但其實家姐啲狗隻隻都好為食㗎   哈哈

工作人員一抱麥包出來   我同家姐簡直缺堤咁   家姐就肯定比我傷心一萬陪添啦   嗚嗚 ~

家姐一話: 麥包   好耐無摸你喇   我就喊到黐咗   我話我係最後一次為啲狗狗咁喊 ~

火化要 1 個鐘   所以又傾下偈   今次見家姐新工人   但家姐好搞笑   成日話佢對眼好大   朝早見到佢對眼碌到咁大   話好驚喎   黐鬼線   不過佢眼白好白就真嘅 ~   

5 點搞掂   佢哋搭的士番屋企   我同里奧大人就行官塘廣場同 APM ~

譚仔二哥   呵呵 
   


之後再行德福   行到 6 點幾覺得好鬼攰   所以去 KFC 食杯雪糕   我好想食番啲甜嘢 ~

曲奇朱古力新地 ($14) - 味道唔值呢個價錢喎



咁我喊完好攰嘛   直頭瞓着咗添呀 ~

坐小巴去百樂門   去到 7 點 15 分   兒生女未到   所以等多 20 分鐘都開餐喇 ~

食到 9 點左右就走喇   兒生仔車我哋番屋企 ~

沖埋涼就休息   11 點幾都自己瞓先喇 ~

新興小菜火鍋 @ 官塘 ( 21-JUL-2018 )

飲勝   飲啤酒要講飲勝先過癮   哈哈



阿喂 Hea 影   好在阿 Mi 話佢   呵呵

椒鹽鮮魷 ($89) - 味道偏鹹

新興小炒皇 ($89) - 呢個好味呀



金牌炸乳鴿  ($65) - 里奧大人唔食   阿喂食咗 2 件   我食 1 件   又唔留比老婆定啦   好在家姐唔食 



銀芽豉油皇炒麵 ($65) - 我同阿喂食第一啖   都話唔夠乾身   如果乾身就一流喇   哈哈 



川辣回鍋肉 ($89) - 我叫嘅   阿 Mi 以為我食羅漢齋定啦哈   呢個完全唔掂   仲諗住川辣好辣添

蜆芥鯪魚球 - 阿喂叫㗎   呢個好味呀   新鮮炸起   真係乜鬼都好味   哈哈   不過味道仍然係偏鹹   呢餐飯我飲咗 2 罐忌廉呀    



蜆芥醬好鹹 



( 21-JUL-2018  SAT )

今朝同家姐食早餐   我話轉場呀   唔鍾意 Toast Box 個通粉湯底   以前係蕃茄味   依家係公仔麵湯底   唔係咁鍾意   同埋次次食完   個口好苦咁 ~

去 Delifrance 食早餐   味道差哂呀 ~

自選特級早餐 (煙火腿 / 烤雞 / 珍寶腸 / 法國貴族牛角酥) ($43) - 得個牛角酥最好味



煙三文魚炒蛋配全麥百吉包 ($42) (+$4 中杯咖啡)



咁家姐隻腳仲有啲痛   但傷口好番好多呀   之前鮮紅色   依家粉紅色   感恩感恩 ~

最搞笑係佢個肥妹同事   成日讚支傷口藥膏好正   因為佢見住家姐個傷口痊癒程度   家姐一打比我   佢就會問家姐   妳有無同妳阿妹講好好用 ?!   之後家姐再打嚟   肥妹又話有無同妳阿妹講 3M 膠布好貴   但真係好好用 ?!   佢話佢只買細細塊嗰啲膠布咋   咁呢啲膠布都係里奧大人買嘅   我之前比暖水袋淥傷咗嘛   所以里奧大人咪大包圍囉   所以我都好感激里奧大人   佢真係緊張埋家姐個傷口㗎   仲話我唔得閒比家姐   佢幫我比家姐呢 ~

食下傾下   當中又知道家姐真係好錫好錫我   唔係只係得把口   不過我成日都話㗎   唔駛擔心我   最緊要佢健康開心   人生為咩先 ?!   就係呢兩樣先最緊要 ~

差唔多 8 點 50 分就走喇   各自搭巴士番工 ~

菇場唔忙   可以揀相  ~

但又係 12 點先忙   不過好在唔趕 ~

家姐 12 點幾打來問我今晚食咩   我都知佢想約我食啦   不過我話阿 Mi 即慶約咗我哋今晚喺官塘食飯   咁我叫埋家姐來囉   反正大家都差唔多時間喺官塘   但我話要睇阿 mi 佢哋有無問題先   哈哈   咁阿 Mi 話無問題   我就再講埋地點比家姐知啦   今晚我一定非常之開心   因為我所愛嘅都喺哂度   呵呵 ~

放工即走   番到屋企抖陣   2 點半出去食下午茶 ~

食完又番屋企   咁阿 Mi 話想一齊行下官塘   咁我哋 5 點幾都出發   里奧大人順便去拎埋雜誌 ~

我同里奧大人講話官塘有咩特產   想買比阿 Mi   衰奧笑到差啲噴咗粒糖出來呀   話佢都想知官塘有咩特產   哈哈 ~

呢度已經無人住 Iu   舊區嘅官塘   永別喇

6 點左右到   我哋熱烈歡迎荃灣區代表   哈哈 ~

要我哋做導賞團   里奧大人話官塘無嘢行   咁阿喂話去街市睇有無靚海鮮   買完叫飯店煮 ~

咁行咗個圈都無靚嘢   所以直接去飯店喇 ~

估唔到都幾爆場   好在阿喂訂咗位咋 ~

一路飲住一路等家姐   佢 7 點到咗   仲諗住帶佢上來   點知佢自己上嚟 ~

咁開始叫嘢食喇   家姐其實對中菜無咩興趣   所以都係我哋話事啦   因為姐夫同糟糟好鍾意食中菜   次次出去食飯都係去酒樓   哈哈 ~

佢又 3 點先食完下午茶    基本上唔會咁快餓   咁佢坐阿 Mi 隔離   可以一齊傾偈   佢哋仲好好傾   里奧大人講咗 2 次   話估唔到佢哋咁好傾   不過都係人夾人緣   家姐同我啲朋友確實好好傾   佢有時見到 CC 都會傾一大輪嘢㗎   糟糟都係我朋友嚟嘅   之後佢同家姐仲更加 Frd   幾乎日日 Whataspp 添呀 ~

里奧大人話阿 Mi 愛屋及烏   哈哈   咁事實係   阿 Mi 都好錫家姐㗎   手信又買比佢   整嘢食又預埋佢   又成日叫佢嚟屋企食海鮮   但家姐好多時星期六都 OT   今晚佢哋可以親自問佢   我無老作㗎   哈哈哈哈 ~

全場幾乎係麻甩佬   又嘈到死   我哋真係要好大聲講嘢先得 ~

講開舅父   阿喂話喎   做得人哋舅父   年紀唔會細   點知家姐好快咁答佢: 唔係喎   你知唔知我鄰居就係 10 歲做人舅父   仲有   可能阿婆遲生   所以最細個舅父年紀唔會好大   哈哈哈哈   笑死我哋   唔講以為家姐下下頂到行呀 ~

咁最搞笑   老闆推咗阿喂張櫈前少少   行入另一張枱   之後喇   阿喂好驚咁指住前面方向   話點解老闆喺前面嘅 ?!   我同家姐阿 Mi 同一時間同一個 Tone 話: 佢出咗嚟好耐啦   之後阿喂又喺度笑   以為我哋又串佢   阿 Mi 話阿喂一定以為老闆要推佢張櫈   先出得番來喎 ~

阿 Mi 問我同家姐官塘有咩好嘢食   我同家姐都好大反應同一個 Tone 話: 官塘 ?!   阿 Mi 都話駛唔駛咁大反應   哈哈 ~

之後我哋 3 個一齊去廁所   老闆話女廁果邊   家姐話又會知我哋去廁所   佢話聯群結黨咁一定係去廁所啦   哈哈   佢形容得好搞笑 ~

家姐知阿 Mi 煮嘢食好叻   咁家姐工人會買幾日餸   阿 Mi 仍都會買幾日餸   但阿 Mi 係買完再諗煮咩   家姐即刻話阿 Mi 好似肥媽咁   買完先諗煮咩   我哋成日覺得佢好勁囉   咩都識煮   要是我係咁   里奧大人唔駛咁慘   哈哈 ~

阿喂都貓貓哋但扮清醒   之後仲話講得出邊區有 100 條村   我幫佢數   講得 9 條村咋   衰奧即幫住哂   話喎   你求其講乜村物村佢都唔知啦   哈哈   咁又係   我真係唔識呢 ~   

佢哋飲呀飲   一共飲咗 9 支大啤   堅勁呀   不過睇佢哋飲得咁開心   就算我唔飲都睇得好開心   哈哈 ~

話咁快就 11 點   係時候走人喇   比錢又爭來爭去   好在家姐清醒   唔係我哋就比少錢比阿喂 ~

番到屋企都即沖涼   等埋哂佢哋平安回家   我都即瞓喇 ~

豬柳漢堡炒韓國年糕 + 鹹蛋節瓜湯 ( 20-JUL-2018 )

( 20-JUL-2018  FRI )

感恩一覺瞓天光呀   我同里奧大人講   唔知係咪尋晚喺屋企做運動   一路睇波一路 Fing 手 Fing 腳   好記得係 10:22 開始 Fing   再望時間已經係 10:37 了   可能做完運動會好瞓啲 ~

里奧大人今朝要去拎嘢   但佢早咗起身   咁叫佢陪我食早餐啦   哈哈 ~





菇場唔太忙   但仍然有啲攰   又咳咳哋   唉 ~

Lunch Time 出去買生果   買咗 1 個哈蜜瓜 + 8 隻香蕉 + 3 個蘋果   估唔到咁鬼重   買嘅時候又唔覺   買埋麵包就番菇場   突然間好肚餓 ~



仍然 Hea 過   放工就即番屋企 ~

里奧大人約咗舊同事食飯   之後菜菜子又約佢去佐敦飲嘢   咁我自己食就簡簡單單算 lu ~

6 點 20 分煮嘢   6 點 50 分就食得 ~   

是日懶餐 - 豬柳漢堡炒韓國年糕 + 鹹蛋節瓜湯

豬柳漢堡炒韓國年糕 - 旨在清嘢   我就咁淥熟啲豬柳漢堡咋   又唔係難食喎   可能加埋啲忘不了   當堂惹味   哈哈 ~   

鹹蛋節瓜湯 - 2 個節瓜 + 1 隻鹹蛋   估唔到就咁得兩樣嘢都好夠味 ~

洗完會就抖陣   7 點半出去徑步   好耐無徑步喇   出咗好多汗   勁開心 ~

徑半個鐘都好啦   係咪先   我旨在郁下㗎咋 ~

番到屋企即拖地   之後大清潔廁所   沖埋涼就休息休息 ~

我 11 點都自己瞓先喇   里奧大人 11 點幾番來   傾咗幾句我又瞓番了 ~

翠河餐廳 @ 官塘 ( 19-JUL-2018 )

菠蘿生炒排骨 - 今次到我好想食呢個餸   但其實好似成日都食呢個餸咁   哈哈

蝦醬通菜炒牛肉



( 19-JUL-2018  THU )

今朝 6 點 54 分起身去廁所   之後就 Whatsapp 家姐   因為我都係想今朝比傷口藥膏比佢   估唔到佢即覆我   哈哈   佢話以為乜事咁早   嚇親佢呢 ~

之後問我食唔食早餐   咁好啦   但其實我好攰   好想瞓   哈哈 ~

佢尋晚本身話今朝 8 點 15 分喺屋企巴士站交收   之後番工   但我話等佢放工先比佢啦   但今朝醒咗   佢又應我   所以真係好似整定要朝早比佢咁 ~

7 點 45 分到餐廳   佢拐下拐下咁行   平時係飛過嚟咁家嘛   真係睇見都心痛 ~

佢最搞笑   一見到支藥膏就即刻搽落隻手指度   仲話好舒服   好在真係今朝比佢   佢唔駛咁痛 ~







我好驚溶呀   所以拎咗部份朱古力比家姐   佢見到勁開心   哈哈 

食到 8 點幾就各自番工喇   佢上巴士嘅時候   我同佢講可以坐關愛座喇   哈哈哈哈 ~

番到菇場都係忙下停下   但喉嚨痛呀   個人好攰咁囉 ~

番工最緊要有長袖外套 / 絲巾 / 毛毯呢啲保暖裝備   我咁怕熱都覺得菇場勁凍   可想而知係幾咁凍呢



今朝停一停中藥   改飲以羅   勁好味   哈哈哈哈 ~

Lunch Time 出去買飯   買完勁唔想食   好後悔買盒飯呀 ~

好眼瞓呀   好想快啲放工 ~

放工即走   本來想去淘大人食嘢   但好大雨   最後都係同里奧大人去翠河食晚餐算喇 ~

食完去超市買米   今次買金鳳 2 Kgs 嘅米   特價 $37.9 嘛   但珍珠米 5 Kgs 只係 $53.9   不過真係唔想買 5 Kgs 嘅米啦   成日食唔哂   仲有好多一隻隻嘢呀   已經放哂指天椒   但都無用   今次試下放雪櫃   真係唔想成日倒米   好鬼折墮呢 ~

番到屋企抖陣就沖涼   之後就抹柜   咁尋晚開咗包芒果乾   我放哂落 Lock Lock 盒   最離奇係無咗   我驚自己掉咗嘛   但里奧大人話唔會   雪櫃又無喎   之後唯有繼續抹櫃囉 ~

咁我會抹埋櫃桶家嘛   終於比我搵到盒芒果乾   但個櫃桶係裝其他用品嘅   之後諗番起   尋晚里奧大人問我嘢   我開咗個櫃桶   黐咗線咁擺埋盒芒果乾落去   講真   呢個櫃桶唔係成日開㗎   搵得番算好彩   哈哈 ~

沖埋涼就休息   今晚勁攰   10 點都瞓覺喇 ~

豉油雞 (外賣) + 絲瓜魚蛋湯 ( 18-JUL-2018 )

( 18-JUL-2018  WED )

尋晚一覺瞓天光呀   感恩感恩 ~

早餐食腿蛋治   唉   都唔知食乜好 ~



同 8 卦傾偈   講有個球員媽媽比人 "老笠"   之後我話正確係應該點講呀 ?!   佢話係縛架 ?!   哈哈哈哈   我話我教書就死得 ~

菇場忙   但仍然係 Holiday Mood   同埋難得老闆兩公婆唔喺度   好想快啲 Load 相寫 Blog 囉   但又無咩 Mood 寫咁   可能仲係好攰   哈哈 ~

Lunch Time 出去買菜   之後再買 Lunch 番菇場食 ~



無啦啦喉嚨痛   慘 ~

放工即走   買埋半隻豉油雞就番屋企 lu ~

今晚都好簡單   再淥個辛辣麵比里奧大人就搞掂 ~

是日懶餐 - 豉油雞 (外賣) + 絲瓜魚蛋湯 

豉油雞 (外賣) - 半隻要 $60   最搞笑里奧大人成日話唔好買咁多   堅想串佢   最少買半隻喎   你以為半隻好多呀 ?!

絲瓜魚蛋湯 - 呢個滾湯真係夠哂方便   我依家好鍾意食絲瓜   但唔可以食咁多㗎   醫師話好涼   但我又成日唔記得加薑喎 ~

洗埋碗都 8 點   沖埋涼就食生果   之後休息喇 ~

咁尋日約家姐聽晚食飯   因為里奧大人約朋友食飯嘛   之後家姐話聽晚唔去食飯   真係邪   咁啱里奧大人又突然話唔同朋友食飯 ~

家姐話我做咩唔問佢點解唔食飯 ?!   佢話有咩好問喎   唔去咪唔去囉   我哋幾時食都得家嘛   之後佢先講佢朝早 PK   嚇鬼死我   以為佢喺醫院   因為佢好少講到咁嚴重咁 ~

佢喺屋企附近巴士站 PK   佢同事問佢做咩唔番屋企處理傷口   但家姐話無諗過   仲話坐巴士都 Feel 到流緊血添 ~

佢啲同事勁好呀   幫佢消毒抹傷口   又買膠布比佢   仲話損到咁   其實應該要打破傷風針添呀 ~

咁里奧大人叫佢影傷口尺寸比我哋睇囉   之後里奧大人話一定要搽藥膏   唔係一陣發炎仲煩 ~

之後佢就即刻拎支傷口藥膏同膠布出來   叫我比家姐搽   呢下好感動   因為睇住佢好忙咁搵膠布   又度 Size 咁 ~

家姐把聲都開始驚驚哋啦   真係唔嚇鬼佢唔得   佢想約我聽朝   不過我話唔想咁趕   同埋我喉嚨唔舒服   想瞓多陣   咁我話聽晚等佢放工再比佢囉 ~

我知佢唔會比我探佢   所以要咁講   佢先肯影比我睇

我 11 點都自己瞓先   個人熱氣真係好攰咁 ~

魚香豆角 + 牛肉腸仔炒銀針粉 ( 17-JUL-2018 )

( 17-JUL-2018  TUE )

尋晚瞓得一般啦   呢排都 6 點起身去廁所   如果遲多個半鐘就好啦   哈哈 ~

早餐食芝腿治烘底   好似好耐無食過咁呀 ~



菇場忙下停下   但攰囉   唔係咁想做住   哈哈 ~

Lunch Time 出去行陣   再買水餃麵番菇場食   好想食熱辣辣嘅嘢呀 ~

放工去睇中醫   順便問佢我條頸生咗粒乜鬼嘢   原來係痰火核   咁都好   無咁驚嘛 ~

睇波夜瞓   之後去旅行   再每月一到   我覺得體力上未完全復原咁呀   等天氣好嘅時候   真係要徑步   點攰都每晚 20 分鐘出去徑步   好過唔郁呢 ~

番到屋企都 6 點半   即煮嘢喇 ~

是日晚餐 - 魚香豆角 + 牛肉腸仔炒銀針粉

魚香豆角 - 星期日買咗 1 扎豆角 ($9) 同埋 4 條幼茄子 ($5)   用現成嘅魚香茄子醬炒呀粉   好味道呀   味精嘢嘛   哈哈   里奧大人出街會食菜   但喺屋企就唔係點食   麻鬼煩   所以有時啲菜都要用下醬汁炒囉 ~         

牛肉腸仔炒銀針粉 - 最緊要快   順便清埋包腸仔 ~

食完都 7 點半   洗埋碗就抹地   呢排攰   懶做家務   平時會拖地   但今晚用濕紙巾抹地算喇 ~

沖埋涼就開機洗衫   之後食埋紫米糕同生果   想唔肥都難   哈哈哈哈 ~

今晚 11 點 15 分都自己瞓覺先喇   我真係要全力補眠   補得幾多得幾多呢 ~