煎青咖喱扎肉 + 真打稻庭冷烏冬 + 旺菜 ( 21-JUL-2020 )

芝士年糕唔太好味   好在 1 包份量唔多   哈哈

( 21-JUL-2020  TUE )

今朝臨起身前發夢   夢見自己無帶鎖匙   之後即飛跑去巴士站搵里奧大人   但佢已經上咗巴士   我係咁叫佢   咁我摸下個袋   原來係有鎖匙   諗住佢睇我唔到啦   原來佢落咗車   仲話我做乜鬼呀   哈哈哈哈 ~

8 點半鬧鐘響   其實 7 點幾醒咗再瞓   係有啲壓力   所以都預咗係咁發夢 ~

去到大快活只係 9 點 15 分   又無人喎   所以堂食   但都真係驚驚哋   下次都係外賣算喇 ~

番到菇場只係 9 點 45 分   有好多同事都番咗   好在唔係我最後一個番咋   嘻嘻 ~

今朝問同事拎支 Ink   咁用完擺喺枱   之後我諗住滴眼藥水   奇怪點解好似唔同咗色咁   真係好彩望真啲個盒咋   哈哈哈哈

忙下停下   好快 Lunch Time ~

今朝買定個菠蘿叉燒包   差唔多 1 點先食到   始終 9 點幾先食完早餐   三個鐘頭後又午餐   相隔時間太短   同埋坐喺度又唔郁   唔會咁快餓囉 ~

又係忙下停下   話咁快又 4 點放工 ~

去超市買啤酒比里奧大人   象啤之前只係 $34.9   買咗兩次之後就加到 $36.9   依家加到 $40.9 呀   大佬   飲咗唔夠半年就加 $6   我叫里奧大人唔好飲象啤   改飲 Tiger   12 罐都只係 $56.9 咋   最緊要係 330ml 一罐   豪花園得大罐   佢又飲唔哂   無理由倒嘛 ~

番到屋企即沖涼   依家如果時間許可   我都想沖涼再煮飯呢   抖陣就拖地  6 點就預備晚餐 ~

里奧大人 6 點 45 分左右番到屋企   咁可以即開餐喇 ~   

是日晚餐 - 煎青咖喱扎肉 + 真打稻庭冷烏冬 + 旺菜 

煎青咖喱扎肉 - 終於煎埋最後一條扎肉   呢半年煮咗好多餐飯   平時好少咁快食哂幾條扎肉   好在家姐比哂我   咁我懶起上來   就咁煎扎肉都唔錯嘛 ~

真打稻庭冷烏冬 - 之前家姐比咗 Pack 比我   係時候開來食喇   里奧大人問我係咪手打烏冬 ?!   我話放心   唔係我手打的   哈哈   今次第一次整冷烏冬   加咗 1 條小青瓜同芝麻醬   真係勁好味   但里奧大人唔鍾意撈烏冬同芝麻醬   所以整個湯嘅比佢呢 ~

旺菜 - 好在今晚食咋   原來有幾塊菜已經雪到變冰   本來想蒜蓉炒   但無啦啦又淥咗去   咁算啦   清清哋   哈哈 ~

洗埋碗就沖涼   之後食提子   唔甜嘅   我覺得係酸呀   同里奧大人講話激鬼氣   橙又酸提子又酸   嗚嗚 ~

食完就休息   里奧大人就熨衫   呢樣佢好主動   因為我熨得耐   腰會痛   所以佢會幫手熨 ~

今晚里奧大人 10 點半瞓   估唔到我 10 點 40 分都超勁眼瞓   所以即瞓喇 ~

三杯馬蹄煎肉餅 + 燒鴨拚油雞 + 滑蛋粟米魚塊 (外賣) ( 20-JUL-2020 )

$100 有 3 個餸 + $15 (2白飯+2糖水+1油菜)   真係平過自己煮   所以間唔中都要買來食   哈哈

( 20-JUL-2020  MON )

感恩又一覺瞓天光   但其實尋晚半夜都凍醒咗   不過好快瞓得番呢 ~

早餐又外賣   人生第一次食咁多餐麥皮   雖然話無糖   但覺得甜甜地幾好味   同埋朝早食熱嘢   我鍾意㗎   不過大前題係要冷氣地方   哈哈 ~

忙呀   不過個人好似有啲唔舒服咁   有少少鼻塞塞   即飲 Hot Lemon ~

我覺得帶口罩令到我鼻塞   之後問里奧大人係咪咁 ?!   原來佢都係 ~

11 點半收到公司群組訊息   今星期工作時間係 10:00 am - 4:00 pm   實在太感恩喇   之前都諗住無得放早   估唔到放早之餘仲番晏 1 個鐘 ~

Lunch Time 出去買魚皮餃米粉   食到唔知食咩好了 ~

忙呀忙   一到 3 點半就要勁 Check 住 Email   因為一收到 Email 就要即做呢 ~

4 點 02 分走人   最搞笑係無人走   我都再睇下係咪真係放 4 點   之後 8 卦都走人   佢又係望下係咪放 4 點呀   哈哈 ~

番到屋企就抖陣   5 點半就同里奧大人去超市入貨   之後我番屋企沖涼先   里奧大人等外賣 ~

我今晚唔煮呀   個頭有啲痛 ~

食完飯就開機洗衫   難得唔駛煮   做下家務   哈哈 ~

無啦啦好似喉嚨痛   即用鹽水漱口   里奧大人話我精神緊張呀   因為依家實在太多本土個案   公司附近又係重災區   真係驚驚哋囉 ~

今晚 10 點 45 分瞓覺   個人好似好攰咁 ~

燒汁炒豚肉 + 自家制烏冬 + 粟米 ( 19-JUL-2020 )

( 19-JUL-2020  SUN )

今朝里奧大人同平時一樣時間起身   佢出咗門口   我都唔知 ~

一起身以為係 8 點 25 分   再望個枱鐘   原來已經 10 點 25 分喇   怪不得咁精神爽利啦   哈哈 ~ 

刷埋牙就即刻整早餐   抖陣就開始執櫃 ~

3 塊方包 + 1 塊芝士   其實加咗牛油烘熱   但咁睇唔覺   哈哈

里奧大人今日要開會到 5 點   佢又唔想出街食 Lunch   咁我都唔駛去陪佢喇   所以我就可以用盡所有力執嘢   哈哈 ~

執呀執   加拿大嘅姑姐 12 點幾打來   話啱啱睇片   知道香港疫情嚴峻   所以即打來   佢原來之前都睇咗好多片   但覺得每條都 Send 來無乜意思   但佢又好驚我唔知呀   哈哈 ~

佢哋嗰邊疫情又係比 2 月時嚴重咗   其實個個國家都咁 ~

傾咗半個鐘   即係抖咗半個鐘   又繼續執喇 ~

我由 11 點執到 4 點   執咗鞋櫃 書櫃同冬天衣櫃同廚房   其實仲有一個衣櫃未執   但要抖抖喇 ~

無諗過一執就執 5 個鐘   不過執完真係好鬼爽   難得今日唔駛出街   平時一至五番工   星期六又全日唔喺屋企   星期日番到屋企又 4 點   所以無咩時間執嘢   我唔想浪費星期六執嘢   因為想見家姐同 Berry   星期日又想見多陣里奧大人   咁唯有屋企嘢要慢慢做囉 ~

今日得閒   所以整烏冬   其實係包中筋粉已經啱啱好過期 1 個月   所以想試下整烏冬   最方便嘛 ~

跟咗我 1 年喇   好唔捨得你呀   哈哈

沖埋涼就休息   之後有啲餓呀   食埋最後 1 塊方包   里奧大人 5 點左右番到屋企   叫佢即沖涼喇 ~

我同里奧大人講話今朝瞓到咁晏勁驚呀   佢話駛咩驚呀   瞓到幾點就幾點起身囉   因為佢知我平時瞓得唔好   所以佢見我咁好瞓   會替我開心   哈哈 ~

今日覺得非常舒服   因為今日全日唔駛帶口罩呀   哈哈   所以我鍾意喺屋企呢 ~

是日晚餐 - 燒汁炒豚肉 + 自家制烏冬 + 粟米

燒汁炒豚肉 - 呢個餸真係非常簡單   所以冰格要長期有豚肉㗎 ~

自家制烏冬 - 勁呀   口感勁似刀削麵   里奧大人話仲有好大嘅進步空間   佢又唔敢話唔好食   但身體係最誠實的   佢係咁夾啲夾啲落我隻碗   我話囉   唔好以為我唔知你咋咋啼啼比我喎   佢喺度笑   之後我話其實啲烏冬係出面賣㗎   佢好大反應話: 肯定唔係   如果整到咁   肯定執笠都似   哈哈哈哈   終於講出心聲喇   佢自己都大笑啦   我話係咪難食到咁呀   硬咗啲之嘛   你當刀削麵咁食咪得囉   哈哈哈哈 ~

粟米 - 放喺雪櫃幾日   係時間食埋去呢 ~

洗埋碗再大清潔廚房   之後沖涼喇 ~

今晚食橙   我覺得好酸呀   里奧大人話我食到打冷震   個橙佬又話包甜   下次唔再信佢呀 ~

里奧大人 10 點半瞓   我想晏啲瞓   但估唔到 10 點 40 分已經好眼瞓   所以我都瞓喇 ~

辣椒芝士香腸 + 芝士年糕 + 旺菜 ( 18-JUL-2020 )

( 18-JUL-2020 SAT )

今朝 7 點 40 分起身   沖埋涼就去買早餐   之後家姐車我去佢屋企喇 ~

Berry 好驚我咁喎   唔通見我拎住份早餐入屋 ?!

陪 Berry 坐地下   其實係我想掂住佢   哈哈

餵到埋口都唔願食咁   衰得佢吖

又望下我

瞓喺梳化   其實佢真係好想瞓覺

如果 Miss 知道我哋咁餵佢食零食   肯定鬧死   哈哈哈哈

最鍾意睇到啲狗隻眼有白色   好得意呀

做咩啫   哈哈

佢應該就瞓㗎喇

夾住佢

好樣衰

呢張搞笑

瞓咗 5 分鐘

又轉下位

之後又繼續中眼瞓   但點都唔瞓 lu

食完又打下機傾下偈   他他條條真係好舒服 ~

家姐話佢煲咗嘢飲 ?!   我問係咩呀 ?!   佢話冬瓜祛濕水   我好開心咁話喺邊呀 ?!   佢話喺雪櫃   仲諗住起身拎比我   之後我話唔飲   家姐話頭先我咁問嘅聲氣   以為我好想飲喎   哈哈 ~

之後又問我今晚食乜 ?!   我話韓餐   家姐好開心咁話係咪烤肉 ?!   我話係辛辣麵   好搞笑呀佢   我點會整烤肉咁大陣仗呀   哈哈 ~

我係咁摸 Berry   家姐話估唔到我咁鍾意佢   成日以為我只係鍾意佢 BB 嗰陣時 ~

12 點幾一齊出發去糟糟屋企拎嘢   之後送埋我番屋企都已經 1 點幾 lu ~

里奧大人 1 點 40 分左右番到屋企   我叫佢沖涼先啦   我幫佢買下午茶 ~

我食沙律碎蛋包 + 西梅汁

佢食完下午茶又精神番好多   可能太餓呀佢 ~

我都 5 點瞓到 5 點半   起身勁精神   哈哈 ~

又唔係咁餓   所以 7 點先煮   7 點半開餐 ~

是日懶餐 - 辣椒芝士香腸 + 芝士年糕 + 旺菜 

辣椒芝士香腸 + 芝士年糕 - 一齊焗就最方便   芝士年糕就煙煙韌韌   但唔夠芝士味呢 ~

旺菜 - 好甜呀   買旺菜最好   可能擺得耐   哈哈 ~  

食完都差唔多 8 點幾   洗埋碗就沖涼 ~

睇多陣 Youtube   今晚 11 點幾都一齊瞓喇 ~

四川辣子雞丁套餐 + 時菜牛肉炒河 (外賣) ( 17-JUL-2020 )

開餐喇

四川辣子雞丁套餐 ($63) - 雞肉就無乜味   但配菜好味呀   越食越辣

時菜牛肉炒河 ($45) - 份量超級多

( 17-JUL-2020  FRI )

尋晚去咗 2 次廁所   之後仲熱醒   成條頸都係汗呀   係咪飲湯嘅時候   落得太多胡椒粉呢 ?!   定係潮熱呀 ?!

早餐仍然去買外賣   呢排都要咁㗎喇 ~

菇場忙呀   之後 Pack File   終於都 Pack 好哂   真係了咗件心事   哈哈 ~

Lunch Time 諗住即刻食 Flakes   因為勁肚餓   之後睇 FB 見到眼霜好平   阿齋又話用開好好用   咁我即飛去萬寧買番 4 支先   之後番到菇場又唔係咁餓了   但都要食喇   已經 1 點鐘 ~

$78/支真係超級抵

阿豪走埋來同我謂   話我行得好快   落樓時見到我出去   佢番到嚟就見到我已經坐埋位   哈哈   鬼咩   條街非常熱呀   同埋都唔想留喺條街咁耐嘛 ~

忙忙忙   又好在放工前搞掂 ~

今晚里奧大人 10 點先放工   所以放工即去佢公司呢   因為我話陪佢食飯 ~

一齊買外賣番公司食   食完抖陣都走喇   唔阻住佢做嘢了 ~

番到屋企都 7 點幾   即沖埋休息喇 ~

里奧大人 10 點先番到屋企   沖埋涼抖陣都瞓覺 ~

我就睇 Youtube 睇到 11 點幾瞓   難得聽日 Off 嘛 ~

豉汁蒸鯇魚 + 絲瓜元貝湯 ( 16-JUL-2020 )

( 16-JUL-2020  THU )

今朝個人醒醒哋   原來都差唔多鬧鐘響   有時覺得咁樣醒呢   好似啲阿婆咁   唔駛校鬧鐘   到時到侯就會醒咁   哈哈 ~

里奧大人呢兩日 WFH   佢今朝想同我食早餐   但我叫佢瞓下好過 ~

公司附近係疫情重災區   所以我都買早餐番菇場食喇 ~

同阿虫一齊搭 Lift   佢話呢排好熱   佢本身都唔係成日流汗嘅人   話急步行兩條街   成個口罩都濕哂 ~

喺度做咁耐   真係除咗遲到之外   從未買過早餐番來食呢   不過咁樣食得安心   之後都會咁做了 ~

平時喺茶記食三文治勁方便   今次份早餐比較多嘢   麥皮要開蓋   蛋要拻殼   多士要搽牛油   咖啡要落煉奶   食完又要執   之後抹枱   不過我其實每次一番到自己位   第一時間係抹電話 Mouse 同 Keyboard   之後再抹成張枱   感覺乾淨好多 ~

食完早餐就開始忙   一忙就忙到 Lunch Time ~

好想食牛雜河   所以即飛去買呢 ~

忙呀忙   放工前搞掂哂   可以準時走 ~

番到屋企即預備晚餐   里奧大人 6 點幾番到屋企   又係叫佢沖涼先 ~

今晚 7 點前可以開飯   爽呀 ~

是日懶餐 - 豉汁蒸鯇魚 + 絲瓜元貝湯  

豉汁蒸鯇魚 - 呢條魚要 $40   之前買開都只係 $30-33 㗎咋   依家唔比堂食   所以預咗街市買嘢一定會貴咗   好日唔食魚旗部位   我見有好多肉咁就食啦   點知差啲哽骨  嚇鬼死我呀   感恩最後無事呢   下次一定唔會再食喇 ~

絲瓜元貝湯 - 唔想蒸   因為驚隻碟唔夠位放   所以滾湯就最好   哈哈 ~

好鍾意蒸嘢   因為洗嘢都方便   如果煎嘢又要做埋大清潔   無計啦   天氣熱   真係好懶   哈哈 ~

里奧大人頭先用豬肉鬆送飯   又唔記得擺番入雪櫃   我即刻火來   已經第 2 次   佢叫我幫佢擺   我話你自己擺   唔會再同你執手尾   我真係覺得好煩   之後我話如果我見到第 3 次係咁   我會將成包豬肉鬆掉去垃圾桶   唔好再問仲有無豬肉鬆 ~

大佬   之前又係將啲筆周圍擺   又唔關好去   寫嘅時候就斷哂墨   所以我唔會將佢用完嘅嘢放番好   有時佢喺屋企開會   想搵番支筆   見佢周圍搵   我都唔會話比佢知喺邊   因為要佢承擔番自己唔放回原位嘅後果 ~

睇多陣 youtube   今晚我 11 點唔夠就瞓喇 ~

老少平安 + 梅菜蒸鯇魚 ( 15-JUL-2020 )

好健康嘅一餐

( 15-JUL-2020  WED )

感恩一覺瞓天光   但都仲係覺得好攰   哈哈 ~

早餐食吞拿魚治烘底   好味道 ~

菇場忙呀   話咁快又到 Lunch Time ~

Lunch 食魚片頭米粉   食粉麵食到有啲悶   但又諗唔到食咩好 ~

忙咗陣諗住抖   點知 4 點又開始忙爆   好在 5 點 26 分掂掂   可以準時放工 ~

去街市買餸同買定幾日瓜菜   咁唔駛日日去街市   實在太多人喇 ~

今晚買咗 2 棵旺菜 + 3 條絲瓜 + 2 條粟米 + 8 條細青瓜 + 7 個橙   樣樣都好抵咁   我其實最驚拎絲瓜   太長喇   我打斜放喺袋度   好似拎住支 AK47 咁   幾咁威呀   哈哈哈哈 ~

番到屋企即預備喇   之後里奧大人都番到屋企   叫佢沖涼先啦   實在羨慕佢 ~

是日晚餐 - 老少平安 + 梅菜蒸鯇魚

老少平安 - 突然好想食豆腐   所以買咗 1 件硬豆腐   依家豆腐檔係 $4.5/件 同 $12/3件   以前唔係咁㗎喎   無話買 3 件平啲咁呢   本身諗住墊魚底嘅   因為懶呀   想一碟放哂所有嘢   但又好似好怪咁   咁啱記得 8 卦話想整老少平安   咁我就即買 $10 鯪魚肉喇   估唔到里奧大人話好味喎   好記得之前佢話唔鍾意㗎   我估轉咗用硬豆腐   所以鍾意食呢   下次再整   哈哈   呢個餸超級正呀   成本平又健康 ~

梅菜蒸鯇魚 - 一份只係 $10   但今次有啲腥咁呀   定係我太耐無食鯇魚呢 ?!   但原來有 1 條切開嘅鯇魚同埋脆肉鮠   咁下次唔再買一份份果啲喇   今晚終於食埋最後 1 棵梅菜   最開心 ~

洗埋碗就開機洗衫   沖埋涼就休息   依家真係沖凍水涼咁滯   天氣實在太熱   我只用熱水洗頭   之後會全程用凍水沖涼 ~

抖陣就食綠豆沙   波仔出品   我覺得都 OK 喎   但里奧大人話無咩料   之後叫我煲綠豆沙   話好易喎   我話要加埋臭草同海帶先好味㗎   但呢兩樣唔識買   同埋煲得糖水   唔係話一兩碗咁家嘛   如果唔好食又要食幾晚   我最驚   所以我話唔會煲㗎   哈哈 ~

里奧大人 10 點半唔夠就瞓   之後我話我都瞓   佢話無諗過我咁早瞓   但其實頭先 10 點已經開始眼瞓   可能今晚去完街市用盡哂所有力   所以好攰呀 ~