蕃茄豚肉炒意粉 + 冬瓜元貝夜香花湯 ( 21-AUG-2020 )

( 21-AUG-2020  FRI )

感恩一覺瞓天光呀   勁開心  因為好難得 ~

里奧大人去買早餐   我都即刻刷牙沖涼喇 ~

食埋早餐   9 點 15 分出門口番工 ~

菇場今日無咁忙   可以做下自己嘢   爽 ~

12 點先出去行陣   之後再買椰絲奶油包就番菇場喇 ~

又係 2 點幾先來忙   好在 4 點前搞掂   可以準時放工 ~

買埋冬瓜就番屋企   沖埋涼都要預備滾湯了 ~

之前剩咗 1 條脆肉瓜   一切開已經係爛嘅   咁諗住清埋 2 隻鹹蛋   點知又壞嘅   真係心都痛埋   因為本身係唔買   但最後又好想買咁囉   唉 ~

今晚都要 6 點 40 分先開餐   仲諗住 6 點可以食得添   哈哈 ~

是日晚餐 - 蕃茄豚肉炒意粉 + 冬瓜元貝夜香花湯

蕃茄豚肉炒意粉 - 諗住用現成蕃茄醬汁   但屋企仲剩 2 個蕃茄   咁煮埋啦   之後再加乾蔥同蒜蓉   最後都係自己調汁   咁下次先用包蕃茄醬汁 lu   里奧大人話個汁好味道   最開心聽到呢啲說話   哈哈 ~

冬瓜元貝夜香花湯 - 仲剩一份夜香花   所以今晚一定要煮埋去呢 ~

洗物碗就大清潔廚房   再開機洗衫   沖埋涼就休息喇 ~

睇下 Youtube 又 11 點幾   要瞓覺 lu ~

招牌餃子 (外賣) + 手拍青瓜 + 菠菜 ( 20-AUG-2020 )

( 20-AUG-2020  THU )

感恩一覺瞓天光   精精神神番工 ~

我其實可以搭下一班車   但我又覺得追到班車   咁即出門口   搞到個人勁緊張 ~

去到九龍灣個肚有啲搞搞下   又頭暈又標冷汗   真係出事喇   所以要落車搵洗手間 ~

勁驚會暈低   又唔想坐喺啲石櫈   其實我望到所有嘢都好係濛查查   同埋幾乎全部係白色   一路祈禱直至行到入餐廳   我都無坐低住喇   要去洗手間先再叫早餐   我覺得自己行路好似飲醉酒咁呀 ~

去完洗手間望下個鐘已經 9 點   我以為自己遲到呀   但其實我番 10 點 ~

坐陣再食埋早餐   番到菇場都只係 9 點 40 分 ~

感恩番到菇場又無事   所以抹完所有嘢就開工喇 ~

超級勁忙   好在今日番工 ~

家姐話隻手好痛   要去睇醫生   如果食完藥仲痛就要睇骨科   搞到我都無咩心機添 ~

本身里奧大人今日係 WFH   但無啦啦有 Urgent 嘢要搞   所以要即刻番公司喇 ~

Lunch time 去幫里奧大人配鎖匙   之後買墨魚丸河番菇場食   茶記老闆問我做咩呢排失蹤呀 ?!   我話因為番 10 點同埋 WFH   所以有時喺屋企食   佢話佢都估我家居工作   之後阿姐又問我呢排去咗邊   我答佢番晏囉   講真   我依家都唔係咁想堂食   但偏偏今朝唔舒服   哈哈 ~

仍然忙呀   3 點 40 分搞掂 ~

放工即走   去買餃子同去超市買生果   之後番屋企喇 ~

沖埋涼就休息一下   里奧大人 6 點左右放工   我都預備晚餐 lu ~

是日懶餐 - 招牌餃子 (外賣) + 手拍青瓜 + 菠菜

招牌餃子 (外賣) - 呢排好想食濃味嘢   所以我自己嘅就整紅油+醋   里奧大人條脷生瘡呀   咁只有蘸醋食呢 ~    

手拍青瓜 - 用生果刀拍   拍到天一半地一半   最後用心手拍   估唔到細細粒嘅青瓜   都會拍到手心痛 ~

菠菜 - 終於食哂喇   短期內唔會再買嚟食 ~

洗埋碗即沖涼   今晚真係唔做家務喇   勁攰 ~

今晚聽歌聽到 11 點半先瞓   本來想繼續聽   但原來里奧大人話等我瞓覺 ~

糖醋小排骨 + 菠菜 ( 19-AUG-2020 )

( 19-AUG-2020  THU )

今朝 8 點 20 分起身   仍然掛 8 號風球   咁可以瞓多陣   不過 9 點幾都醒 lu ~

梳洗之後就焗麵包   食埋早餐就沖涼   因為天文台話中午前改發 3 號風球   我預備番工 ~

11 點 15 分改發 3 號風球   里奧大人要番工   我就唔駛番   但聽日同後日就要番喇 ~

里奧大人 12 點出門口   我就寫 Blog   不過寫咗陣都唔寫喇   難得唔駛望電腦   想比對眼休息下 ~

1 點半食 Lunch   又係今朝嘅麵包   本來諗住留番 WFH 食   但之後都番工   所以點都食埋去喇 ~

包呀   我真係好鍾意食包呀   哈哈哈哈

突然好眼瞓   2 點半瞓到 3 點半   好在 Whatsapp 無突發嘢咋   哈哈 ~

睇多陣 Youtube   5 點預備晚餐 ~

里奧大人 6 點左右番到屋企   沖埋涼就可以開餐 ~

是日晚餐 - 糖醋小排骨 + 菠菜~

糖醋小排骨 - 想煮呢個餸好耐   今日有時間就煮啦   上網搵咗半個鐘食譜   最後都係用 12345 食譜   因為屋企有齊材料   本身以為屋企得香醋   點知開完先見到支鎮江醋   激死我   今次算成功呀   但里奧大人話酸少少更好   我話本身試汁好酸   怕佢唔鍾意所以加多啲糖   不過佢最後就話都係甜好啲   酸嘢有時個胃頂唔到喎 ~

菠菜 - 食埋今次要停喇   真係唔係咁鍾意食菠菜 ~

洗埋碗就大清潔廚房   之後開機洗衫   沖埋涼就休息休息 ~

里奧大人 10 點半瞓喇   我就 11 點半先瞓   呢排唔知做乜   成日唔係咁眼瞓   我覺得係燥熱囉 ~

焗雜丸 + 菠菜 + 自家制麵包 ( 18-AUG-2020 )

懶到不得了嘅懶人餐

份量好多   因為依家里奧大人同事會預埋我份量   哈哈

( 18-AUG-2020  TUE )

今朝里奧大人起身   咁問佢公司買電腦搞成點 ?!   傾完諗住瞓   點知里奧大人話衣櫃入面嘅防潮盒漏水   咁我就起身抹啦   最煩係抹呢啲   搞到個櫃會立黐黐   要抹幾轉先搞掂 ~

諗住瞓啦   但都瞓唔到   8 點 10 分起身 ~

但其實尋晚瞓得勁差   感恩今日 WFH ~

梳洗之後就整早餐   預熱焗爐又聞到一陣肉味   心諗係咪想壞呀 ?!   之後拎個焗盤出來睇睇   原來我尋晚唔記得洗焗盤呀   好在尋晚只係就咁焗海鮮卷   無落油咋 ~

尋日食剩嘅合桃包   家姐話我好有心機切粒粒   我話其實因為尋日咬到啲包好肉酸   所以切粒粒無咁肉酸囉   哈哈

抖咗一個鐘先熨 2 機衫   熨完有啲虛脫 ~

沖埋涼就休息   1 點幾食午餐 ~

里奧大人 2 點打比我   以為佢去買電腦   原來係叫我開門 ~

佢仲係有啲唔舒服   沖埋涼都要瞓覺 ~

其實我都好攰   3 點幾都忍唔住上床瞓   一瞓就瞓到 4 點   當堂精神哂 ~

里奧大人 4 點 45 分先起身   佢話瞓醒好好多呀   感恩感恩 ~

我問佢想淥啲丸定焗完掃蜜糖   佢話焗丸掃蜜糖   我話都估到你鍾意咁   之後佢話知道就唔好問啦   哈哈哈哈   一起身就串串共 ~

聽日 8 號風球   佢要去姑奶屋企幫手 Lock 窗   咁我就抖下先煮飯 ~

里奧大人 6 點幾番到屋企   沖埋涼就可以開餐 ~

是日懶餐 - 焗雜丸 + 菠菜 + 自家制麵包

焗雜丸 - 我食嘅就加咗孜然粉去焗   想惹味啲   里奧大人嘅就掃蜜糖 ~   

菠菜 - 上星期日買   食埋聽晚就清哂   真係唔係咁鍾意食菠菜   哈哈 ~

自家制麵包 - 里奧大人同事整㗎   但今晚太飽食唔落   留番聽日做早餐 ~

頭先食飯   里奧大人收到個大陸電話   以為係呃人嗰啲   點知原來係佢好耐之前嘅同事呀   真係好在里奧大人無改手機號碼   如果唔係就聯絡唔到㗎喇   我同里奧大人都間唔中會提起呢個同事   疲情過後真係要上去同佢聚聚呢 ~

洗埋碗就開機洗衫   之後叫里奧大人幫我染髮   其實勁想去剪頭髮   大半年無剪喇   之前剪短就想留長頭髮   依家長頭髮又想剪短   不過其實我只係想修修前面啲頭髮   唔係咁想帶髮夾 ~

搞掂哂就沖涼   之後休息 ~

里奧大人 10 點幾瞓   我又唔太眼瞓   差唔多 11 點先瞓呀 ~

焗海鮮卷 + 冬瓜冬菇夜香花湯 ( 17-AUG-2020 )

芝士年糕已經到期   咁就要食埋去啦   但其實好難食

( 17-AUG-2020  MON )

感恩一覺瞓天光   鬧鐘差唔多響都醒咗喇 ~

隻手真係無咁痛喎   感恩感恩 ~

沖埋涼就食早餐   我同里奧大人講話   唔駛郁就食早餐   到依家都唔係咁慣   要等下先食   哈哈 ~

菇場超級超級忙呀   好在 9 點半已經番到去開工 ~

Lunch Time 去惠康買嘢   用埋 $123 八達通積分   終於用哂   唔駛成日心掛掛   因為月尾到期呀 ~

買完抖陣就食 Lunch   但只食咗 1 塊半麵包 ~

無啦啦好想嘔   可能飲咗玫瑰花茶   唉   幾粒又無味   十幾粒又濃味得滯 ~

收到公司群組訊息   今星期係番一三五 TBA   感恩感恩 ~ 

4 點幾走人   買埋冬瓜就番屋企預備喇 ~   

里奧大人都喺姑奶屋企走喇   佢今日幫手執屋   我同佢講囉   唔該得閒就叫佢執屋啦   成日坐喺度乜都唔抹   依家執得乾淨就好好珍惜   唔好成日等廿年先嚟清潔一次   里奧大人聽完喺度哈哈笑   我話講事實   一入屋好似比賊人打劫咁   又亂又污糟   根本影響埋心情   因為屋企真係要乾淨   咁樣先住得舒服家嘛 ~

滾好個湯就可以抖陣   今晚簡單煮   再煮丁麵就搞掂   所以 6 點幾可以開餐 ~

是日懶餐 - 焗海鮮卷 + 冬瓜冬菇夜香花湯  

焗海鮮卷 - 之前喺新都城嘅街市買   不過口感麻麻哋   好在有泰式甜辣醬   嘻嘻 ~

冬瓜冬菇夜香花湯 - 上次買咗 2 包夜香花   今星期點都要煲喇   我覺得用乾冬菇係香好多 ~

洗埋碗就沖涼   之後睇 Youtube ~

喺廣良興買嘅低糖菠蘿乾   呢度要廿蚊   我覺得貴呀   但好想食就買囉   里奧大人係咁食   又話好甜唔好買   我話其實係我係買比自己食㗎噃   食人哋啲嘢仲喺度嘈嘈嘈   之後佢喺度笑

里奧大人 11 點瞓喇   佢話頭痛   可能今日執屋焗親 ~

我唔眼瞓呀   唔知係咪今日飲得多咖啡   所以 12 點先瞓到 ~

黑椒金菇肥牛卷 + 孜然焗茄子 + 花生糯米飯 ( 16-AUG-2020 )

( 16-AUG-2020  SUN )

里奧大人今朝 6 點左右起身   之後佢話瞓唔番   咁番公司喇 ~

我都瞓到 8 點左右起身   家姐同里奧大人話做乜咁早起身   但我瞓唔到咪起身囉 ~

食埋早餐就抖下   唔錯唔錯 ~

家姐以為我嘅麵包係尋日買嘅合桃包   話點解咁嘅色   我話係我星期一買嘅黑糖包來㗎   哈哈

10 點開始大清潔屋企   今日好熱咁   加上隻手又痛   所以係慢動作做 ~

拖埋地就搞掂哂   之後即大清潔廚房同廁所   沖埋涼就休息 ~

已經 12 點半   勁攰呀 ~

煲埋石斟就休息   1 點半左右食 Lunch ~

又係包   食到好驚   但都要食   因為唔想開爐煮麵   更加唔想落街   哈哈

里奧大人今日開會   我 5 點左右開始預備   估唔到里奧大人 5 點半已經番到屋企   但要 6 點點半先開餐   如果佢早啲話我知放工   咁就唔駛咁晏食了 ~

是日晚餐 - 黑椒金菇肥牛卷 + 孜然焗茄子 + 花生糯米飯

黑椒金菇肥牛卷 - 4 塊牛肉 + 1 包金菇就可以做一個餸   真係簡單方便平靚正呀   哈哈 ~

孜然焗茄子 - 係時候清埋 2 隻台灣茄子   我日日摸下佢哋㗎   驚佢哋腍劈劈爛哂呀   今晚唔想整魚香茄子   所以就用孜然焗喇   勁好味 ~

花生糯米飯 - 之前買咗包花生   咁就整個懷舊糯米飯啦   又係好好味㗎 ~

洗埋碗又大清潔廚房   之後即沖涼喇 ~

里奧大人話我有骨火   所以隻手咁痛   咁其實呢排瞓得唔好   係咁發夢 ~

今晚同里奧大人 10 點半都一齊瞓   因為我真係勁眼瞓呀 ~

雜菜魚丸米粉 + 菠菜 ( 15-AUG-2020 )

( 15-AUG-2020  SAT )

今日 Off   不過瞓到 9 點幾都自然醒 ~

梳洗完就等里奧大人去買早餐番嚟食   其實真係好嘆   哈哈 ~

里奧大人 12 點半番工   我就等家姐 1 點嚟接我 ~

一泊好車   家姐就比里奧大人嘅生日利是比我   其實佢上星期車完我番屋企   之後話唔記得比利是我   次次家姐都好早比定利是   佢真好有心㗎   因為我唔會提早比利是比里奧大人㗎 ~

行咗無耐都已經 2 點   咁去越棧食下午茶   本來我想去沙爹王   但要等 12 張枱   咁唔等喇   寧願快快食完番屋企陪 Berry 好過 ~

越式扎肉蝦片 + 香茅雞翼 ($40) - 每樣都係細細件

香茅豬扒撈檬 ($40) - 我同家姐都鍾意食撈檬

椰汁三色冰 (+$3) - 飲完呢杯冰   當堂飽哂

之後去廣良興同萬寧買嘢   話咁快又 3 點   要番屋企喇 ~

一入屋   Berry 興奮到尖叫   我哋話變咗女仔聲   但其實佢根本就係一個女仔   哈哈 ~

呢個樣   如果我一摸佢   佢就即跳開㗎喇

其實我好錫妳㗎   妳知唔知啫   哈哈哈哈

咁咪幾 Cute 囉

街坊朋友幫家姐整晾衫架   Berry 即縮入梳化底   咁啱妹妹嚟探 Berry   所以一齊陪 Berry 行街 ~

縮入梳化底就好有安全感

又要八

八完就會望出面

望來望去   點都唔出來

家姐同事介紹   話如果戴 Mask 戴帶到皮膚敏感   搽呢隻都 OK   萬寧價錢係 $135

番到屋企就一齊入房傾偈   妹妹講嘢老積但又有份童真   同埋佢都好乖女   所以都好鍾意佢   哈哈 ~

佢話比新鮮蘆薈比我   我話下次先啦   之後話好想比我呀   番去屋企拎完又坐多 15 分鐘先走 ~

7 點走人   去糟糟屋企拎嘢   之後就送我番屋企 ~

家姐話好在我陪佢   我話係咪好在妳陪我呀   原來佢話頭先揸車好眼瞓   好在我陪佢傾偈 ~

里奧大人 8 點幾番到嚟   咁等佢沖完涼先開餐   原來都接近 9 點了 ~

是日懶餐 - 雜菜魚丸米粉 + 菠菜

雜菜魚丸米粉 - 之前喺一田買嘅雜菜魚丸都幾好味   最緊要唔腥 ~

菠菜 - 雪櫃有菠菜   咁淥幾棵啦   健康啲   哈哈 ~

洗埋碗就沖涼   之後休息 lu ~

糟糟送咗盒粉紅色口罩比我   家姐又比咗 4 個口罩套比我

無啦啦隻左手臂勁痛   直頭舉唔起手添呀   咁啱家姐就右手痛   手指都腫埋   可能用錯力拖地喎   之後我話可能我哋成日打機呀   唉 ~

里奧大人 11 點左右瞓   我就 12 點先瞓   今晚太夜食喇   唔想咁早瞓 ~