麥蘆卡蜜糖烤雞 2 人餐 (外賣) ( 23-JUL-2021 )

麥蘆卡蜜糖烤雞2人餐 ($89) - 麥蘆卡蜜糖烤雞1隻 + 芝士肉醬意粉 + 牛油粟米 & 紅豆冰 2 杯   因為諗住聽晚唔煮飯   所以就要食哂隻雞囉   不過最後都食剩啲   唉

( 23-JUL-2021  FRI )

感恩一覺瞓天光   所以 6 點 40 分都醒咗 lu   希望唔好越來越早啦   哈哈哈哈 ~

徑步完就買早餐番屋企   因為今朝里奧大人番晏少少   所以同佢一齊食呢 ~

兩份早餐太多   我咁早真係食唔到   所以我再買個甜餐包就算

菇場唔太忙   不個呢排個肚扯住扯住   個人好攰咁 ~

Lunch Time 出去行陣   之後買牛筋丸米番菇場慢慢食 ~

仍然唔忙呀   準時放工   咁就可以買支雞骨草比里奧大人 ~

番到屋企就等里奧大人放工   之後我再去買外賣 ~

等埋里奧大人沖涼就開餐   里奧大人問我今晚徑唔徑步 ?!   我話一定會   佢話估唔到話 "一定"   哈哈   又係嘅   以前懶到出汁嘛 ~

差唔多 8 點去徑步   其實條街好焗   不過今晚食到超級飽   真係點焗點攰都要做運動   呢半個鐘我都真係慢行   好在都爆汗咋 ~

今晚唔洗衫住   所以沖完涼都休息 ~

真係好攰   我 10 點半已經瞓覺   之前咁早瞓   里奧大人以為我唔舒服   我話徑步要早起身   所以想早啲瞓呢 ~

蜜糖焗雞翼拚竹輪 + 菜心苗 ( 22-JUL-2021 )

( 22-JUL -2021  THU )

今朝醒醒地就望下個鐘   但原來只係 5 點 40 分   咁梗係再瞓啦 ~

但 6 點 40 分都醒咗   所以去徑步喇   我同家姐講話就嚟做阿婆喇   哈哈 ~

早餐食腿蛋包   其實想食吞拿魚包㗎   不過未出爐囉   咁我都唔等喇 ~

菇場唔係咁忙   咁就好喇 ~

Lunch Time 出去行 15 分鐘   之後買鯪魚球米番菇喇 ~

又忙下停下   好快又放工 lu ~

放工番屋企   今晚可以抖陣先預備 ~

是日懶餐 - 蜜糖焗雞翼拚竹輪 + 菜心苗

蜜糖焗雞翼拚竹輪 - 得雞翼一樣好似太單調   所以加多一包竹輪   其實以前叫獅子狗卷㗎   唔知點解要改名呢 ?!

菜心苗 - 菇場附近嘅凍肉店買㗎   一盒只係 $5.3   估唔到仲好甜   好開心又多個地方買菜呀   仲要唔駛行咁遠添 ~

洗埋碗抖陣   差唔多 7 點 45 分就同里奧大人一齊去徑步 ~

我徑半個鐘咋   因為好攰呀   所以買屋企先 ~

里奧大人同事知我鍾意食零食   但話零食好難戒   所以特登買呢包健康零食比我   勁感動呀

開機洗衫就即沖涼   之後睇 ASTRO Zone ~

今晚 11 點都瞓覺   算係遲瞓㗎喇 ~

泡菜年糕餃子鍋 + 菜心苗 ( 21-JUL-2021 )

( 21-JUL-2021  WED )

今朝鬧鐘未響都醒咗   咁即去徑步啦 ~

早餐食腸仔包   雖然鍾意食但又唔可以日日食呢 ~

家姐無啦啦 Whatsapp 問我要唔要齋燒鵝 ?!   我話唔要啦   之前我買咗兩包大嘅都未食   我可以比包佢   點知佢話只係想買嘢   佢又係同我一樣   買買埋埋又唔係食   不過我都好啲   如果想買嘢   可以買比里奧大人同事食   之後又問我要唔要薯片 ?!   我話屋企仲有幾包呀   同埋依家又唔係咁想食零食   買完都唔知要擺幾耐   所以叫佢咩都唔好買比我喇 ~

菇場忙呀   做到頭暈暈 ~

Lunch Time 同阿渠一齊落樓   見到好似好細雨   我哋話唔會開遮囉   點知大家講完之後   即刻落大雨呀   真係笑死   咁唔開唔得啦 ~

行咗陣就去買魚片頭米番菇場喇   啲雨越落越大呢 ~

3 點幾終於忙完   但要做其他嘢   仲要係對數   所以慢慢做   因為一錯就好鬼麻煩 ~

放工即走   番到屋企見到風扇無關   再入廁所又係無關燈 ~

之後見到餐枱有花生醬同果醬   即係里奧大人朝早搽完無放雪櫃   所以即影相比佢睇   我話驚佢一陣要搽   等你番嚟先放入雪櫃   有時有會將方包個吉袋放喺枱面   呢樣最憎   好心掉咗去啦   咁樣好易惹小強嘛   所以我見到就會將個袋放喺佢電腦上面   我肯定唔會幫佢掉   因為真係覺得呢啲行為好得我憎   幾乎每次佢遲出門口就係咁   硬係甩甩漏漏無手尾   唉 ~

見佢講對唔住就算啦   不過都會再話   其實風扇唔關唔緊要㗎   可以快啲壞可以更快買部新   同埋見你咁鍾意咁樣唔關嘢   我都會學下你呢 ~

今晚 7 點唔夠可以開餐   算係快㗎喇 ~

是日懶餐 - 泡菜年糕餃子鍋 + 菜心苗

泡菜年糕餃子鍋 - 煮呢個勁簡單   最開心係清埋包韓國蠔   本身想連埋個辛辣麵一齊煮   但咁樣好似好大鍋咁   真係未食都覺得飽   所以就分開煮喇 ~

菜心苗 - 就咁泡菜唔夠菜   所以煮多 10 條菜心苗   哈哈 ~

洗埋碗就徑步   里奧大人話做咩咁快   其實都已經 7 點 50 分啦   原來佢都想徑步   不過我話佢飲咗啤酒就唔好徑喇 ~

今晚徑步 40 分鐘   最搞笑里奧大人問我做咩咁耐 ?!   係咪去買嘢 ?!   我話見無咩汗就行多陣囉 ~

最離奇係我沖涼出嚟見電視關咗   之後佢話唔睇所以關咗   我真係好想話應關唔關   我沖涼得 10 分鐘   一陣我又開   又開又關好易壞啦   頂佢唔順 ~

咁我專心投票都無開電視   佢以為我嬲   問我做咩唔睇電視   堅搞笑 ~

今晚勁喇   10 點半瞓覺   里奧大人就繼續睇 Youtube ~

黑椒扎肉 + 蒜蓉蒸節瓜粒 ( 20-JUL-2021 )

( 20-JUL-2021  TUE )

今朝 6 點 40 分都醒咗   雖然落雨   但都照去徑步喇 ~

又早一班車番工   始終落雨驚塞車   寧願早少少出門口好過 ~

買得早餐再番到菇場洗杯抹枱   其實有時都要 8 點半先開始食   不過依家食個包   其實 20 分鐘都已經好夠   哈哈 ~

菇場忙呀   做到 Lunch Time ~

仍然落超級大雨   所以今朝已經買定吞拿魚包   又帶隻大蕉   再加埋支涼茶   肯定十級飽呢 ~

3 點幾終於忙完   估唔到 4 點幾又嚟忙   好在放工前搞掂哂咋 ~

放工就即番屋企   今晚晚餐好簡單   可以抖下先預備煮 ~

里奧大人 6 點幾放工   我都要整晚餐喇 ~

是日晚餐 - 黑椒扎肉 + 蒜蓉蒸節瓜粒

黑椒扎肉 - 唔知煮咩又唔知買咩現成餸   所以就煎扎肉喇 ~

蒜蓉蒸節瓜粒- 清埋最後 3 隻節瓜   以前唔太鍾意食節瓜   呢幾年就開始鍾意食   可能可以簡單煮   所以先鍾意   哈哈哈哈 ~

洗完碗就去徑步   里奧大人就好攰   所以唔徑步喇 ~

8 點半去徑步   又徑半個鐘   我覺得咁嘅時間最好   始終做咗成日嘢   點都有啲攰呢 ~

番到屋企即開機洗衫   沖埋涼就睇 Youtube ~

今晚 11 點都瞓喇   呢排天氣涼涼地   好似好快眼瞓咁 ~

羅宋燉豬軟骨 + 菠蘿咕嚕肉 + 燒鴨拚油雞 (外賣) ( 19-JUL-2021 )

羅宋燉豬軟骨好味喎   燜到啲肉好林   食剩一盒飯同埋半盒油雞同燒鴨   聽晚再焗熱食

( 19-JUL-2021  MON )

今朝 7 點半起身   不過就無去徑步   以為會狂風雷暴呀   不過就落好鬼大雨囉 ~

早餐食粟米吞拿魚包   其實我都鍾意食吞拿魚包架   唔知幾時會食厭呢   哈哈 ~

菇場超級勁忙呀   做到人都顛 ~

Lunch Time 都仲係落大雨   所以食杯裝拉麵算喇 ~

仍然忙到顛   好在 4 點幾搞掂   終於可以抖下 ~

諗住打比里奧大人   點知佢 Whatsapp 話收到公司一個非常好嘅消息   實在感恩   真的感受神嘅保守帶領 ~

放工即走   今日里奧大人番工嘛   所以我話唔煮喇   咁放工番到屋企可以一齊即刻食 ~

買完外賣都 6 點半   食完又可以抖下 ~

今晚我話唔駛開冷氣   我仲食完都無出汗   反而里奧大人沖完涼之後食   之後話食完碗糖水就出哂汗   真係誇張 ~

差唔多 7 點半就同里奧大人去徑步   雖然落雨   但我之前搵到個新路線可以徑步   所以里奧大人都話去徑步喇 ~

又徑半個鐘   出一身汗真舒服 ~

番到屋企就開機洗衫   沖埋涼就熨兩機衫   之後叫里奧大人熨佢自己嘅裇衫同褲   咁我就可以抖下喇 ~

今晚 11 點都自己瞓先喇   里奧大人就繼續睇 Youtube ~

西洋菜豬肉水餃 + 節瓜元貝湯 ( 18-JUL-2021 )

今朝食剩嘅炒麵

( 18-JUL-2021  SUN )

今朝又係 8 點半自然醒   咁可以早啲去徑步喇 ~

徑完步再買早餐番屋企慢慢食   咁樣真係唔錯架 ~

沖埋涼就抖陣   今朝想早啲去里奧大人公司幫手 ~

阿妹話睇我後面都覺得又瘦咗   同埋高咗   我忍唔住話唔會係變咗 5 點 4 呀嘛   哈哈 ~

原來佢知我做運動之後   佢都開始做運動呀   但做咗一個月但無瘦   不過我話我都係咁   初初無瘦架   但做做下就開始慢慢減磅   減咗 1x 磅   所以好驚喜呢   不過仍然要再減   因為始終仲係肥 ~

傾傾下   里奧大人打嚟問我喺邊 ?!  阿妹話里奧大人佢人唔到聲都要到   哈哈 ~

見到 B San   佢即約我崇拜後傾偈   不過我話今日唔得呀   崇拜完要即走呀 ~

崇拜完畢就等里奧大人放工   食埋 Lunch 就去姑奶屋企拎嘢   里奧大人就要去開會 ~

2 點半左右到姑奶屋企   又傾咗成個鐘先走 ~

去街市買餃子同冰鮮豬肉   最後去埋青林買無激素雞翼就番屋企 lu～

番到屋企放低哂所有嘢   之後換對波鞋又出去徑步喇 ~

沖埋涼就開機洗衫   之後就執下衣櫃 ~

里奧大人 7 點半先開完會   無諗過咁夜   真係辛苦佢喇 ~

是日懶餐 - 西洋菜豬肉水餃 + 節瓜元貝湯

西洋菜豬肉水餃 - 姑奶介紹我買㗎   $42/打   估唔到幾好味喎   同埋都幾大隻   餡料有好多菜   我鍾意呀 ~

節瓜元貝湯 - 今朝浸定元貝   所以點夜都要飲湯 ~

沖完涼都休息喇   居然有得睇 ASTRO Zone   即刻話比阿花知   可以一齊睇   哈哈 ~

里奧大人 11 點唔夠就瞓   我就 11 點幾先瞓 ~

西洋菜豬肉水餃麵 ( 17-JUL-2021 )

( 17-JUL-2021  SAT )

今朝鬧鐘未響都醒   快快梳洗就去徑步喇 ~

徑半個鐘就番屋企   感恩又可以早一班車番工 ~

早餐食吞拿魚包   今朝要食飽啲   哈哈 ~

菇場勁忙呀   所以好快好快就到 1 點 ~

放工同里奧大人食午餐   之後佢就番工啦   但居然唔記得帶銀包   咁要上番屋企拎喇 ~

咁我都番屋企換對波鞋就去徑步 20 分鐘   頭先食完河粉   好想快啲消化一下   哈哈 ~

2 點半番到番到屋企即沖個涼   之後大清潔屋企同廚房   搞掂哂已經 6 點 15 分   無諗過咁就做咗 4 個鐘   不過今日都涼涼哋   做大清潔都無咁辛苦 ~

好想做運動呀   所以又出去徑步半個鐘喇   家姐問我有無徑步 ?!   我話有呀   仲話好想做運動添   之後佢都話 "勁喎   好想做運動"   我相信識我嘅人都無諗過我會講呢句說話   哈哈 ~

徑完步買豉油雞   不過又無哂   即去大昌買水餃啦   諗住支付寶減 $8   但唔記得按印花   咁比咗錢就無計啦   我又再入去手多多即按減 $8 印花   點知原來係聽日要用埋   咁唯有再買啦   又買咗 $8x   明明諗住減 $8   點知用多埋 $8x   激鬼死我 ~

番到屋企都 8 點幾   里奧大人放工   我都要預備喇 ~

9 點半先開餐   所以我話食麵算喇 ~

是日懶餐 - 西洋菜豬肉水餃麵

西洋菜豬肉水餃麵 - 實在太夜食   所以 1 包水餃 + 1 包出前一丁 Share 食就算喇 ~

洗埋碗就抖陣   咁就過咗一日 lu ~

今晚唔係咁眼瞓   所以睇 Youtube 睇到 12 點左右先瞓 ~