麻辣手撕雞 (外賣) + 韓式上湯小籠包 + 法邊豆 ( 24-SEP-2021 )

用菜心葉墊底   咁樣就唔會甩底   哈哈

( 24-SEP-2021  FRI )

感恩一覺瞓天光呀   如果瞓得唔好   雖然起身無難度   但動作就慢好多咁呢 ~

好似涼咗啲咁喎   但個天就好似想落雨咁囉 ~

早餐食芝腿治烘底   勁好味 ~

菇場忙呀   所以有啲餓 ~

Lunch Time 就去行陣先   之後買牛雜米番菇場食   頭先已經諗住食㗎喇   好想食濃味嘢 ~

忙完一樣又忙另一樣   好快又放工了 ~

去完超市買嘢再買手撕雞就番屋企   放低個袋都要預備晚餐   因為里奧大人已經搭緊車番嚟 ~

今晚都唔煮飯   煮個辛辣麵 Share 食   以前辛辣麵嘅份量係好多   近排買嘅就份量少咗   可能價錢平咗啦 ~

是日懶餐 - 麻辣手撕雞 (外賣) + 韓式上湯小籠包 + 法邊豆

麻辣手撕雞 (外賣) - 我加咗兩條青瓜墊底   有肉又有蔬菜嘛 ~   

韓式上湯小籠包 - 買 1 送 1 只係 $20 咋   估唔到仲幾好味   起碼個皮唔係乾爭爭咁呢 ~

法邊豆 - 里奧大人問我係咪好鍾意食   我話家姐買咗 2 Pack 比我嘛   今晚食埋去囉 ~

洗埋碗就抖下   8 點就同里奧大人去徑步   我話今晚點都要做運動   因為今日食咗好多嘢呀 ~

番到屋企即沖涼   之後我就休息喇   叫里奧大人幫手熨 2 機衫   嘻嘻 ~

11 點唔夠都自己瞓先喇   我初初仲以為係 10 點半添呀   仲心諗真係越嚟越早瞓    哈哈 ~

煙鴨胸 + 法邊豆 ( 23-SEP-2021 )

( 23-SEP-2021  THU )

尋晚瞓得勁差呀   感恩起身都 OK 呢 ~

早餐食奶醬多   今朝唔想周圍滕呀 ~

菇場忙呀   好快又到 Lunch Time ~

出面落大雨呀   所以食 Flakes + 乳酪   食到一半要着外套   食凍嘢好凍呀   哈哈 ~

話咁快又要開工   我覺得過咗 3 點半   啲時間就會過得好快呢 ~

口痕就食幾粒齋燒鵝啦   之後肚痾   唔知係咪油得滯 ~

放工即走   番到屋企即預備了   因為里奧大人已經放工   等到佢番屋企先煮拉麵 ~

是日懶餐 - 煙鴨胸 + 法邊豆

煙鴨胸 - 唔知煮咩   又焗鴨胸 ~

法邊豆 - 家姐尋日比架   今晚同聽晚都有得食   哈哈 ~

洗埋碗就煮湯丸   頭先已經煮定糖水   可能暖水落湯丸   居然爆哂餡但係個皮唔熟   之後再蒸 20 分鐘先熟   下次都係熱水落喇   哈哈 ~

我問里奧大人啲湯丸熟未 ?!   佢話熟哂啦   啲餡都爆哂出嚟

蒸湯丸都幾特別   哈哈

今晚唔係咁舒服咁   可能瞓得唔好   周身骨痛   所以唔去徑步 lu ~

睇多陣 ASTRO   我 10 點 45 分都自己瞓先喇 ~

Hungry Korean @ 九龍灣 ( 22-SEP-2021 )

開餐

豆腐湯 ($52) - 我勁鍾意呢個湯飯   里奧大人叫我成碗飯倒落湯   仲話韓國人係咁食架   不過我話唔想呀   我唔鍾意啲飯索哂啲湯   我想飲湯   哈哈

鐵板辣雞肉飯 ($60) - 呢個都好味

估唔到份量都好多

( 22-SEP-2021  WED )

今朝 9 點半自然醒   但唔徑步喇   等里奧大人買早餐番嚟食 ~

里奧大人話佢尋晚 1 點幾先瞓   呢排佢好多時咁夜瞓   真係唔可以咁囉 ~

食完就抖下   里奧大人睇 Youtube 整嘢   我就執 2 個衣櫃 ~

10 點半家姐 Whatsapp 問安   都估到佢又嘢比我   佢話頭先去完 Aeon 買咗好多嘢比我   一陣就會拎比我呢 ~

喺車入面傾下偈   家姐話想帶埋 Berry 嚟   我話千奇唔可以   一陣佢跳嚟跳去就煩   實在太危險啦   妳估仲係以前手掌咁大隻咩 ~

又比 2 袋嘢比我   我覺得好似救濟物資咁呀   哈哈 ~

家姐話佢都每樣有一份   但其中一樣係我有兩份   原來係法邊豆   上次佢喺 Aeon 買   我話好抵   佢就覺得無買比我就好衰咁   真係好搞笑

仲買咗呢啲零食比我

放低哂嘢就再繼續執衣櫃   之後家姐打嚟傾偈   原來都傾咗 1 個鐘頭 ~

里奧大人本身諗住同我出佐敦   但我見佢仲好有心機上網整嘢   咁我又想執屋   之後佢無啦啦即刻熄電腦話出發喇   我話唔出去都得架   我都想執下嘢   最搞笑佢仲以為我好想出街呢 ~

我 2 點幾去買嘢食   咁我再買 3 pack 象啤   之後里奧大人話要幫手拎   佢話今日好在無去街   因為好熱   依家佢真係怕熱過我呀 ~

肥仔餐

食完又執鞋櫃   再執雜物櫃桶   今日唔出街係最好   因為我好想專心執嘢 ~

執到 5 點左右就執完   沖埋個涼就休息喇 ~

差唔多 6 點就出發去九龍灣食晚餐   因為我話好攰唔想攰呀 ~

又好想食韓國嘢呀   哈哈   好在里奧大人都 OK 咋   佢本身話同我去太興食乳豬   但我話唔想食呢 ~

食完必須要行陣消化下啦   我買咗絲瓜刷同按摩梳   又買咗不锈鋼碟仔同黃蘿蔔   去 4 間店就買咗 4 樣嘢   雖然價錢係平   但我同里奧大人話咁樣唔掂   行一間店就買一樣嘢   之後佢話得妳係啫   佢唔會囉   咁佢又講得啱嘅 ~

8 點左右番到屋企   沖埋涼就食生果 ~

今晚 11 點半都要瞓覺   但其實未眼瞓 ~

焗豆腐卜 + 焗腸仔 + 泡菜餃子辛辣麵 + 韓式排骨湯拉麵 + 菜心苗 ( 21-SEP-2021 )

里奧大人同事比嘅豬仔月餅

里奧大人同事特登送比我嘅迷你金箔全黃蛋白蓮蓉月餅

家姐之前比我口嘅生果

( 21-SEP-2021  TUE )

尋晚半夜去咗次廁所   好在算快瞓得番咋 ~

今朝 6 點 15 分鬧鐘響   因為里奧大人上星期二要去離島   但佢唔記得取消鬧鐘囉   衰 ~

感恩 6 點 45 分起身都精神   今朝好似涼咗啲咁喎   中秋節喇   唔好咁熱啦 ~

早餐食吞拿魚包   又突然好想食番喎 ~

菇場忙呀   11 點公司群組發信息   今日中秋佳節放 4 點   我仲同 8 卦諗住會係出 Email 添 ~

Lunch Time 出去買菜   之後即去買鯪魚球米番菇場   因為個天已經黑哂喇 ~

個個等 4 點   所以一到 4 點就全世界人一齊走喇 ~

番到屋企都即預備一下晚餐   之後開機洗衫喇 ~

同阿妹又 Whatsapp 咗一個鐘   傾下買餸煮飯嘅搞笑嘢   原來大家都好似   哈哈 ~

里奧大人今日放假   我仲話 6 點食   點知煮得嚟要 7 點先開餐 ~

是日懶餐 - 焗豆腐卜 + 焗腸仔 + 泡菜餃子辛辣麵 + 韓式排骨湯拉麵 + 菜心苗

焗豆腐卜 - 今日到期喇   所以即刻焗哂嚟食   就咁蘸泰式甜辣醬都好好味 ~

焗腸仔 - 好想食腸仔   再掃埋蜜糖   勁似 BBQ 呢   哈哈 ~

泡菜餃子辛辣麵 - 煮比里奧大人食   等佢開心下 ~

韓式排骨湯拉麵 - 我煮埋上次剩嘅半個拉麵   如果一個肯定食唔哂   因為呢個湯包份量唔少呢 ~

菜心苗 - 點都要有啲菜   呢個份量最好 ~

洗埋碗就抖陣   同里奧大人一齊去徑步   我話腳板有啲痛   諗住行 20 分鐘   不過最後都行咗半個鐘 ~

番屋企即沖涼   本身諗住食湯丸   但大家都好飽   所以聽晚先食 ~

睇陣 Youtube   今晚好攰咁   所以 10 點半都瞓喇 ~ 

住家飯 @ 姑奶屋企 ( 20-SEP-2021 )

海斑 - 姑奶話呢條要 $140   我話唔貴啦   都算大條嘛   同埋我點都要食魚   因為肯定係唯一一碟係熱嘅餸

南乳粉絲祝腐竹豆卜 - 唔知點解   我次次都好驚見到呢碟嘢   因為次次都係凍嘅

豉油雞 - 又係凍   所以食咗一嚿算喇   今晚有蕃茄魚湯   但 6 點 10 分已經放喺枱   我 7 點半先食完   碗湯係凍   咁開咗冷氣嘛    碗湯真係好似飲緊凍水嘅凍咁喎   救命

叉燒 - 蒸翻熱   但肯定唔係隔夜   因為我問咁少係幾錢 ?!   佢無答我   唉   做節食凍同埋食隔夜嘢   老實講   我屋企人肯定唔會咁   就算唔係做節   都唔會比隔夜嘢我食囉 

( 20-SEP-2021  MON )

感恩一覺瞓天光   今朝都精神呀   話哂無頭暈暈呢   勁開心 ~

早餐食腿蛋包   呢排食包食到好悶呀   哈哈 ~

菇場忙下停下   咁就好喇   無嘢做好鬼悶 ~ 

Lunch Time 出去行下先   之後就買牛筋丸米番菇場   突然間勁想食呀 ~

家姐打嚟   咁我食完嘢好似封住喉嚨咁   佢聽我把聲咁樣   佢好驚呀   以為我感冒 ~

我話食完辣嘢係咁   又問我食咩   我話好想食牛筋丸   佢話想食就要即刻買嚟食架   唔係個心會籮籮孿   我話駛唔駛呀 ?!   哈哈 ~

菇場唔忙喇   所以越坐越凍 ~

放工即走   今晚去姑奶屋企做節 ~

6 點半左右開飯   食下傾下都 7 點半   我哋都走喇   要去官塘海濱長廊賞月呢 ~

估唔到都有幾多人   不過就唔係人迫人   行得都舒服 ~

月球

其實月球附近好多嘢   哈哈

里奧大人影得好啲   哈哈

唔算多人

再見月球

我感覺成個地方啲人都好開心咁   所以雖然行到成身汗   但都好開心呀 ~

燈籠

影完相就再慢慢行下   之後都搭車番屋企喇 ~

頭先都行到出汗   所以今晚唔去徑步   番到屋企即沖涼   抖陣就食生果 ~

今晚 11 點都瞓先喇   始終朝早徑步唔想咁夜瞓 ~

鮮竹卷 & 雞扎 + 豉椒排骨飯 (外賣) ( 19-SEP-2021 )

鮮竹卷 & 雞扎 - 我覺得呢兩樣比較好食啲   燒賣個味道始終唔同酒樓   所以唔想買嚟食呢

豉椒排骨飯 - 我真係好鍾意食排骨飯   好似麻甩佬   哈哈

( 19-SEP-2021  SUN )

尋晚一瞓上床   簡直天旋地轉咁呀   呢排成日暈暈哋咁 ~

今朝瞓到 8 點半都醒   其實都有少少暈咁   不過照去徑步   但就係慢慢行嗰隻   依家時間許可嘅話   我會行夠 4 千步呢 ~

買埋早餐就番屋企   即開機洗衫同埋小清潔廚房先 ~

食埋早餐就拖地   沖埋涼就出發去里奧大人公司幫手喇 ~

我同阿妹講話呢排好暈   今日唔快得   同埋唔好叫我轉身   因為我會暈暈哋 ~

之後佢話佢呢星期又係咁   今朝勁驚番唔到工添呀   但坐一陣又好啲   所以都番到工   我話係咪咁邪呀 ?!   我上次肚唔舒服   佢又係咁呀 ~

今日又有人話我哋好似   真係幾乎每星期都有人話我哋似兩姊妹   其實里奧大人都成日都咁講㗎 ~

崇拜之後就等里奧大人放工   又同 B San 傾偈   我講買菜好平   佢同阿妹好激動問我幾錢先 ?!   我叫佢哋冷靜啲先   唔係啲人以為佢哋鬧我呀   哈哈 ~

傾傾下偈   頂爺又比咗 2 個迷你月餅比我   之後 B San 話佢老公唔鍾意食月餅   我話里奧大人都係㗎   所以我一食   就會話又肥又剩   我話咩都要試下嘛   B San 都話佢都會咩都食下試下   其實家姐都係咁㗎   所以成日咩都叫我買嚟試下呢 ~

里奧大人 1 點幾放工   我食完飯就番屋企   里奧大人就要去開會 ~

頭先食完飯   真係好想做運動   所以番到屋企換對波鞋就徑步喇 ~

唔經唔覺又行咗半個鐘   之後番屋企沖涼休息 ~

已經 3 點幾   又睇下 Youtube   咁 4 點幾開始眼瞓   之後瞓咗半個鐘就好精神喇 ~

里奧大人 7 點鬆啲先開完會   叫里奧大人買晚餐番屋企食 lu ~

雖然晏晝沖咗涼同無汗   但最後都沖多次   我覺得舒服啲咁 ~

今晚里奧大人 10 點唔夠都瞓   我就 10 點 45 分先瞓呢 ~

細雜燴 + 馳名狗仔粉 + 魚蓉燒賣 (外賣) ( 18-SEP-2021 )

( 18-SEP-2021  SAT )

感恩一覺瞓天光   又精精神神去徑步喇 ~

早餐食腿蛋包 + 檸檬茶   家姐覺得我好鍾意食包咁   但其實朝早無咩選擇   粉麵類肯定唔食   燒賣腸粉就多數晏晝食   所以咪成日食包囉 ~

菇場唔忙啦   又做下自己嘢 ~

放工即飛落去喇   因為家姐已經到咗餐廳 ~

今日同家姐一齊食 Lunch 當做節   因為我依家星期六夜晚要番學   肯定無可能食晚飯囉   所以里奧大人話約家姐食 Lunch 喇 ~

家姐買咗冬菇比我   又拎咗盒車厘子   仲有 2 個金奇異果同梨   佢好搞笑   成日話我番學唔好拎咁多嘢 ~

里奧大人 1 點半左右到   佢一坐低就幫家姐整張 SD Card   呢下我都好感動   因為我都完全唔記得呢回事   哈哈 ~

前菜/餐湯 - 兩樣都 OK 呀   湯係熱   沙律啲菜都新鮮 

德國鹹豬手配酸菜及薯仔沙律 ($218) - 其實想試好耐   難得 3 個人食就最好   不過都係一般呢

西班牙海鮮飯 (2人) ($188) - 一般啦   但都好多材料

是日甜品 - 我喺 Menu 睇到有蛋糕   同家姐講話一陣個餐要芝士蛋糕   家姐話是日甜品應該唔係呢啲   咁又係   點會 $4x 係是日甜品喎   最後其實係呢兩件 Brownie   勁細件   但就好好味喎

飲品

埋單嘅時候   里奧大人猜輸   所以佢請   但其實本身我話請   哈哈哈哈 ~

因為家姐手機 Whatsapp 備份唔到   所以要去我屋企搞呀   都搞咗兩個鐘咁滯   感恩最後搞掂咗 呢 ~

原來都已經 5 點   咁我送家姐搭車   之後再去 7-11 買涼粉就番屋企 lu ~

抖下又到 6 點鬆啲   係時間出發番學喇 ~

早咗好多到學校   所以又買咗 2 條裙   下次都唔好咁早到   次次買嘢唔係咁掂 ~

輕輕鬆鬆又到 8 點幾   今晚又買狗仔粉番屋企食   因為我好想食呀 ~

食完抖下先   之後大清潔廁所再沖涼 ~

今晚 11 點幾瞓呀   始終太夜食晚餐   唔想咁早瞓住呀 ~