黑椒焗野生紅魚柳 + 菠菜苗 ( 24-NOV-2023 )

( 24-NOV-2023  FRI )

感恩一覺瞓天光呀   望個鐘只係 7 點 17 分   所以懶床到 7 點 22 分都起身 lu ~

早餐食糙米芝士包   因為今朝要食哂去呀 ~

我同里奧大人講話尋日再買咗 6 包窩夫   佢話得㗎喇   屋企永遠都有足夠食物   我信妳   哈哈哈哈 ~

之後問佢買唔買潔麗兒洗手液好呢 ?!   佢話係消耗品可以買定啦   我話屋企有 9 包呀   佢即刻碌大對眼話以為得 3 包先咁問買唔買 ?!   又再問係咪平好多先 ?!   我話唔知喎   家姐話抵咋   佢話有9包就唔駛買啦   1 個月先用 1 包   我話諗諗先   驚下次無 $59.9 咁平呀 ~

等車嘅時候   咁我聽緊歌同睇緊 Whatsapp   有個人企喺我面前拍下我   嗰下真係有啲驚   原來係娜姐   之後同佢傾咗幾句   佢都要趕住走喇 ~

菇場忙呀   今朝要快手快腳做嘢 ~

Lunch Time 出去行陣   再去食皮蛋艇仔粥   之後去一田買嘢喇 ~

讚岐本舖讚岐冷烏冬 ($23.90) & 潔麗兒柑橘芳香泡泡潔手液套裝 ($59.90)

仍然忙呀   忙到 4 點半先搞掂 ~

阿怪又發顛大力拍嘢   做得唔開心就唔遲工唔好做嘛   唔好成日做埋影響同事嘅嘢啦 ~

放工即走   里奧大人今晚晏啲放工   所以我有多啲時間煮晚餐呢 ~

里奧大人又有手信喇   一睇就知係去韓國   哈哈

是日晚餐 - 黑椒焗野生紅魚柳 + 菠菜苗

黑椒焗野生紅魚柳 - 唔想蒸呀   因為要清埋之前買咗嘅車厘茄   所以連埋魚柳一齊焗喇   求鬼其啦   哈哈 ~

菠菜苗 - 菠菜苗都好食   但好多泥要洗好耐   如果好似生菜咁就好喇 ~

洗完碗即開機洗衫   之後沖涼 ~

抖阡陣就熨衫   睇完 "新聞女王" 就睇 Youtube ~

今晚都幾攰   所以 10 點半都瞓覺 lu ~

百樂金宴國際宴會廳 @ 九龍灣 ( 23-NOV-2023 )

高湯美國龍蝦伊麵 ($88) - 7 人 送 2 餸   所以就咁抵喇

脆皮一品燒雞 ($48/半隻) - 呢個都係7人送2餸之1   又係抵   同埋都好食呢  

脆果小炒皇 ($98) - 好味呀   有我鍾意嘅魷魚鬚

海皇豆腐煲 ($108) - 無食呀

菠蘿生炒骨 ($108) - 個汁唔錯   但好多排骨斬到好細粒

欖菜肉碎四季豆 ($98) - 都好味   因為我唔識整   哈哈 

冰梅欖角骨 ($108) - 無食呀

油麥菜 - 姑奶叫㗎   清清哋都唔錯

( 23-NOV-2023  THU )

臨起身前發夢   個夢係船頭買毛巾仔話好好用   我又去買   之後同兒生仔一家喺附近食飯   食完又再去買毛巾仔   總之成個夢嘅場景   都係圍繞住同一個地方   好搞笑 ~

今朝早餐勁喇   有 3 款唔同嘅嘢   迷你包同糙米包嘅頭尾   再加窩夫   因為要比里奧大人試下嘛   佢話好食呀   所以中午再去一田買 ~

菇場唔忙   做完 Emali Filing 就做下自己嘢 ~

工人影比家姐   之後仲整個 (-_-)   哈哈哈哈   真係好少見 Berry 背脊向出面   所以我覺得好得意 

Lunch Time 即刻去食鯪魚球米   之後再去一田買窩夫 ~

丸中生忌廉窩夫 ($45.9/2 件) x 3   咁我都覺得幾好食   所以比包家姐試下 

唔忙就做自己嘢   所以時間過得勁快 ~

今晚九龍姑娘們約咗德國舅父食飯   咁放工都即走喇 ~

同里奧大人同一班車去到九龍灣   原來舅父舅母同姑奶都到了 ~

水姑都差唔多 6 點 15 分到   咁可以叫嘢食喇 ~

今日兒生仔個仔突然手口足病   姑奶話一定係學琴   今日學完即刻就病咗   我話我要替琴行講句公道說話   首先佢成日只係去琴行 ?!   雙手無掂任何嘢 ?!   仲有就係彈完琴有無自己消毒清潔雙手先 ?!   妳唔知情況就喺度亂咁講   依家核心問題係有無做足個人衛生喎 ~

連里奧大人都忍唔住話姑奶   妳呢啲人只係話人哋問題人哋問題人哋問題   自己係唔會有問題嘅   姑奶當堂無聲出   事實上佢任何事   都永遠只會話係人哋問題   我已經唔止一次聽里奧大人咁話佢 ~

之後又問我啲嘢   我直接話唔會同妳講   因為妳太口疏   成日周圍同人講我啲嘢   佢話人哋問唔通唔答呀 ?!   我話答唔知咪得囉   我啲嘢關佢咩事呀 ?!   同佢又唔係熟   有啲人根本仲唔識添   我話我所有屋企人唔會成日問人啲嘢之後周圍同人講囉   係妳先會咁做   成日是非做人情 ~

好多年前因為有兩單嘢比佢亂講   所以我同里奧大人講過   我同我屋企人啲嘢   叫佢唔好同姑奶講   我唔鍾意啲人加鹽加醋講大話   同埋我上次都同里奧大人講過   我會直接話姑奶   叫佢唔好再周圍同人講我哋啲嘢   里奧大人都點頭   佢知我講得出做得到 ~

其實我只係憎佢呢兩樣嘢   咁食飯都有全程夾餸比佢   都有同佢傾偈   我知道佢都係關心我嘅   佢行路都會拖住我隻手   又教我點做運動   所以我係想話佢知   人哋嘅嘢就等如唔關妳事   妳咁多口做咩 ?!

食完就去完舖頭拎嘢   搞掂就搭的士番屋企   原來已經 9 點   要即刻沖涼喇 ~

突然好想食朱古力雪條   所以同里奧大人 Share 食   我只咬咗 2 啖就比番佢   佢話其實我有無食過 ?!   我話只係想過下口癮咋   哈哈 ~

睇多陣電視又打機   今晚 10 點 45 分都瞓 lu ~

燃 (Yakiniku Sashimi Oyster) @ 大圍 ( 22-NOV-2023 )

九洲叉燒拉麵定食 ($73) - 里奧大人最鍾意食拉麵

日式咖哩炸雞飯定食 ($78) - 呢個味道唔錯呀   但里奧大人話啲飯比較硬   所以佢話我實鍾意食   哈哈

是日前菜 + 沙律 + 味噌湯 + 甜品 - 蕨餅好食呀   之前第一次食蕨餅係腍劈劈   但今次食係有啲煙韌嘅感覺

( 22-NOV-2023  WED )

尋晚瞓得都唔錯   所以今朝想繼續瞓   哈哈 ~

里奧大人唔係咁舒服   所以我自己食早餐先 ~

今朝仍然食極醇湯種迷你軟包   夾咗芝士就飽啲   同埋好味啲 ~

靈修 15 分鐘   差唔多 8 點半就叫醒里奧大人   之後都出門口了 ~

菇場忙呀   實在太開心 ~

慘慘眼好得意呀

朝早 11 點就已經咁好瞓

Lunch Time 出去食完雲吞河就要去一田買嘢喇   家姐話唔覺得我係番緊工   哈哈 ~

一個人行超市係最無定力   因為激安就咩都想買   依家我算好忍手㗎喇 ~

韓國袋裝蕃薯 ($29.8/2 件) & 丸中生忌廉窩夫 ($45.9/2 件)

新東陽豬肉鬆 ($49.9/罐) & ITSUKI 五本 3 食拉麵 ($16.9)

三立源氏批 ($45.9/2 件) - 忍唔住買比里奧大人啲同事   所以我成日同里奧大人講   我買嘢唔係乜都買比自己㗎   呵呵

仍然忙呀   好在 3 點 50 分搞掂咋 ~

4 點放工   咁啱里奧大人今日中午請假   所以我番到屋企放低嘢   都即刻同里奧大人出發去大酒店喇 ~

差唔多 5 點半到   感恩見到 Auntie 都 OK   但佢對手好凍   我問佢係咪唔夠衫呀 ?!   佢話佢哋 3 點已經嚟到誦經   所以之後個場唔會有人誦經   佢話因為誦經好嘈   同唔到人傾偈   寧願早啲做 ~

之後又同糟糟籮籮傾陣偈   坐到 6 點 15 分都想走喇   佢哋開始多親戚嚟   咁我同里奧大人一齊見世伯最後一面   佢個樣真係好安詳   糟糟先搞笑   話唔知有頂帽   不過我話就算睇人哋   都唔會留意呢啲啦 ~

之後里奧大人問佢 Daddy 幾高 ?! 糟糟答咗x尺x吋x分   仲話年年都係一樣   佢真係好錫 Daddy   所以我真係覺得佢 Daddy 好有福氣   個女咁錫佢   同埋我都成日同家姐同里奧大人講   糟糟真係好孝順父母   問佢父母啲咩   佢答得好清楚呢 ~

佢哋聽日上完山就去馬會食飯   不過我唔去喇   因為全部都係佢啲親戚   佢哋又全部講英文   我好驚呀   哈哈 ~

糟糟係咁推我走   雖然 Auntie 同親戚傾偈   但我話都係講聲好喎   佢話嚟得嘅都係自己人   唔駛講啦   最後我都係要同 Auntie 講聲拜拜   咁啱個主持人又番咗嚟   再次鞠躬就走喇 ~      

吉儀再加包濕紙巾   又幾細心喎

同里奧大人去大圍食晚餐   見到間食店唔錯就入去喇 ~

食完搭地鐵番屋企   到依家我都仲係講火車同地鐵   哈哈 ~

紫色花好靚   但驚開哂花之後就要掉   所以唔敢買

番到屋企都 7 點幾   即刻開機洗衫同沖涼喇 ~

抖陣就熨 2 機衫   之後睇 "新聞女王" 再打陣機   今晚 11 點幾先瞓覺呀 ~

咖哩煙燻腸蝴蝶粉 + 菠菜苗 ( 21-NOV-2023 )

( 21-NOV-2023  TUE )

感恩瞓得唔錯呀   轉身嘅時候   條腰都無痛   希望之後都係咁啦 ~

早餐食朱古力包同極醇湯種迷你軟包   呢款迷你軟包嘅口感都 Soft   同埋 7 個好似 $18 都幾抵 ~

菇場唔忙呀   但 10 點無啦啦話去開會   又係傾 System   今次傾 BOM 真係仲頂癮   核心問題都唔知係乜就開會   明明 1 個 Parts Number 可以 Cover 所有 Item   依家要每個 Item 跟 1 個 Parts Number   真係佩服佩服   所以聽到想瞓覺   我聽到 11 點 48 分都走喇   佢哋繼續開 ~

今日食牛筋河   之後行去買菜   又去超市買下零食   差唔多 12 點 45 分先番到菇場 ~

仍然開會   咁保險 Agent 拎文件比我   但我行唔開   叫佢交低比阿後   我再同阿後講話一陣 Agent 有份文件比我   妳幫我代收 ~

不過咁啱我出去拎嘢見到 Agent   咁可以即場文收   到我入去開會   我見到阿後 Whatsapp 話 Agent 嚟咗請出來   但我頭先明明同佢講話比低比佢嘛   佢仲話好   我真係有啲暈暈哋 ~ 

開到 5 點 28 分呀   仲要話開多 2 日   真係好心啦   核心嘅嘢都未做就要去做最後嗰步   根本做唔到   完全係浪費時間 ~

番到屋企都即預備晚餐   里奧大人又係 6 點幾先番到屋企   辛苦佢了 ~

里奧大人話阿妹比佢嘅時候   阿妹話唔係比你㗎   里奧大人話梗係知啦   寫住 "美美的您" 呀   一睇就知唔係比我啦

同里奧大人講番今日開會嘅嘢   佢都好佩服我公司 Set 嘅 Parts Number   我話無計   要就番工廠嘅人   因為好幾十年都沿用呢個方法   再加上呢個 System 又廢   啲人又順以往方法去 Set-up   完全係要個人去配合個電腦   咁唔知買 System 做乜囉 ~

是日晚餐 - 咖哩煙燻腸蝴蝶粉 + 菠菜苗

咖哩煙燻腸蝴蝶粉 - 唔知煮咩   見到有包咖哩醬就煮啦   阿妹比嘅西芹好香呀   下次問佢喺邊度買先 ~

菠菜苗 - 今晚食半斤   因為留肚食牛油果同蘋果 ~

洗埋碗就開機洗衫   搞掂就沖涼 ~

睇咗陣 "新聞女王" 好似幾好睇   不過唔係成日可以準時睇到   以前會錄起去   依家就唔會㗎喇      因為錄完又唔記得睇咁囉   哈哈 ~

打陣機又 10 點半   所以都瞓覺喇   今晚都比較攰 ~

仿鮑片+雲吞+腩肉酸辣米線 & 秘製豬軟骨+紅腸酸辣米線 (外賣) ( 20-NOV-2023 )

( 20-NOV-2023  MON )

感恩一覺瞓天光呀   其實 7 點 20 分都醒咗   不過懶床 ~

里奧大人話尋晚熱醒要開冷氣   因為天氣凍   我就會發揮暖爐嘅作用   所以佢好多時都話係熱醒   哈哈 ~

早餐食芝士棒   食完早餐就靈修 20 分鐘   之後里奧大人都起身   我都要出門口了 ~

里奧大人食唔哂 2 個朱古力包   又要留番聽朝食 lu

菇場超級勁忙呀   所以好開心呢 ~

Lunch Time 一定要出去抖下   因為個腦實哂呀 ~

食完牛筋米再行下   最後都係忍唔住行一田 ~

好多時去超市買嘢   都會問家姐抵唔抵 ?!   今日又問下佢啲蘋果抵唔抵 ?!   佢話唔駛 $10 一個就抵喎   咁我話買 2 Pack 啦   之後佢話又買   哈哈哈哈 ~

方宜昌豬肉鬆 ($22.9) & UCC 無糖黑咖啡 ($20/5 罐)

日本土岐蘋果4個裝 ($32.8) & 日本袋裝紅雅生薯 ($17.9)

仍然忙呀   忙到差唔多 3 點先搞掂   可以休息下喇 ~

放工去買外賣先番屋企   因為想比里奧大人再試下酸辣米線 ~

食完抖陣就去番學   今晚上堂好好玩呀   一齊分組傾設計   諗住半個鐘都夠   但最後用咗 40 分鐘   所以 10 點 10 分先放學 ~

番到屋企都即沖涼   之後打陣機   再同里奧大人傾陣偈   差唔多 11 點 45 分先瞓呀 ~ 

蕃茄芝士和牛漢堡蝴蝶粉 ( 19-NOV-2023 )

( 19-NOV-2023  SUN )

今朝鬧鐘一響都起身   因為今朝要早啲去里奧大人公司幫手 ~

但遲咗出門口呀   所以飲凍啡   咁我又食得比較急   之後有啲胃痛添 ~

今朝拍住勁哥做嘢   搞掂就傾下偈   傾到過哂時   咁我都唔番學 lu ~

我覺得今朝唔係好熱   咁我掂下阿妹隻手   佢話我掌心超級熱呀   但我唔係熱喎   其實好多人都咁講   之後就會明白點解里奧大人成日話瞓覺會好熱   因為佢有個火爐喺佢側邊喇   哈哈 ~

今日事奉到接近 1 點   咁里奧大人又要開會   所以快快腳去買埋午餐呢 ~

今朝食麵餐   所以一盒飯 Share 食   其實最緊要係里奧大人食   因為我一陣餓   喺番屋企食咩都可以嘛

食完都即走喇   里奧大人趕住去開會 ~

今日唔駛去買餸   所以就徹底大清潔屋企呀 ~

2 點做到 4 點幾   之後就網上敬拜   抖陣就預備晚餐 ~

里奧大人 6 點半先番到屋企   叫佢快啲沖涼   今日做足成日好攰呢 ~

我問里奧大人邊個去旅行呀 ?!   佢話唔知呀   係鴛鴦叫佢拎呢啲

是日晚餐 - 蕃茄芝士和牛漢堡蝴蝶粉

蕃茄芝士和牛漢堡蝴蝶粉 - 里奧大人食咗幾啖咋   我就食一啖試味   咁留啲比佢做午餐   其他就要星期二晚食喇   無諗過里奧大人食咁少   如果唔係都唔鬼煮囉 ~

洗埋碗就沖涼   之後休息休息 ~

今日又用錯力   前腎有啲痛添 ~

我叫里奧大人食開心果   佢望到好驚訝   因為我拻哂啲開心果出嚟   之後佢話真係縱壞哂佢呀   估唔到佢講呢句喎 ~

今晚打咗好耐機呀   差唔多 11 點 15 分先瞓 ~

Ebeneezer's Kebabs & Pizzeria @ 紅磡 ( 18-NOV-2023 )

Supereme 至尊薄餅 ($115/10") - 餅底好脆呀

 但好少餡料咁   仲諗住 Supereme 係勁嘢嘛   哈哈

老闆話呢啲調味料係 For Pizza

Roast Chicken Salad 燒雞肉沙律 ($70) - 估唔到份量都幾多

老闆再話呢啲係 For Salad

我加咗辣嘅沙律醬   咁成個沙律就無咁乾喇 

芒果奶昔 ($35) - 都好香芒果味   

( 18-NOV-2023  SAT )

尋晚起身去廁所   之後里奧大人叫我開風   佢話有啲熱   但我又唔覺熱喎 ~

今朝叫里奧大人買早餐   佢又問一個餐夠唔夠 ?!   我話夠㗎喇   佢又會話今日晏放工喎   我話真係夠呀   有時講嘢佢就下下唔記得   但有時又成日記得 ~

越來越大棵

       

菇場唔忙啦   咁我 "dup" 低頭整緊嘢   小說好大聲向住我話: 妳着短袖 ?!   真係比佢嚇鬼死 ~

放工同里奧大人再去 AEON 買底衫   順便喺黃埔附近食午餐 ~

準備開餐

香煎沙嗲牛肉包 3 件 ($32) - 里奧大人話想試   咁就實叫比佢食啦

我哋坐二人枱   點心幾乎同時間上   不過張枱太細囉

鮮蝦炸雲吞 3 件 ($26) - 呢個辣鮮炸起   再加埋甜酸醬真係超級好食呀

鮮蝦腐皮卷 ($27) - 以前最唔鍾意食   依家飲茶就會叫嚟食呢

香茜牛肉腸 ($28) - 無理油蝦腸啦   樣樣都蝦咩   哈哈

嚐鮮蝦餃皇 4 件 ($34) - 我一定要食蝦餃

海皇鮮蝦春卷3件 ($34) - 手機點單   我明明諗住取消但唔記得   里奧大人話無所謂啦   我話我點會食咁多炸嘢   同埋我頭先話食炸雲吞就唔食春卷家嘛   食埋呢碟春卷之後   真係好滯呀   同埋好唔想再食炸嘢   哈哈

好鍾意個電話

食完即去買 AEON 底衫   今次再買 8 件應該可以有排着了   之後再去 Cantevole 買麵包   最後去超市買埋糖水都番屋企 lu ~

里奧大人話呢個朱古力包硬崩崩   咁我話下次焗熱先食

抖多個幾鐘就番崇拜   所以食埋晚餐先番屋企 ~

里奧大人話帶我去食嘢   佢真係帶我据扒   但我話今晚唔想食呀    之後佢話記得我講話星期六要食扒   我咪話囉   我都估到帶我食咩啦   因為次次都係我帶佢搵食   佢都唔會周圍去搵食嘅 ~

我想食印度嘢呀   所以就去 Ebeneezer's 喇 ~

諗住食 Kebab   但里奧大人話有 Pizza   所以我唔食 Kebab 喇   唔想食包包食飽 ~

印度老闆好熱情   又問我哋覺得好唔好食   其實最怕問呢啲問題   哈哈 ~

番到屋企都開機洗衫   搞掂就沖涼 ~

里奧大人做功課   我就熨 3 機衫   有時熨得唔係咁直   我同里奧大人話依家要求降到好低   就係唔皺已經算係直   哈哈哈哈 ~

睇陣 Youtube 再打陣機   11 點先瞓 ~