春田餐廳 @ 紅磡 ( 27-JUL-2024 )

晚市套餐組合 ($198)

川味口水雞半隻 - 今次就好味喇   炸蒜好香同埋個汁有啲辣嘅味道

鳳梨咕嚕雞球 - 食咗幾次   今次先炸得脆咋   所以又覺得好味   但份量真係好少

+$38 蒜蓉炒菜心

紅豆涼粉 x 2

( 27-JUL-2024  SAT )

尋晚去咗 2 次廁所   但都好快瞓得番   感恩今朝起身都精神 ~

早餐食吞拿魚包   好味道呀   但平時就唔食㗎喇   因為食完都好飽下   同埋今日晏食午餐先食佢呢 ~

靈修半個鐘就番工   好在今朝 8 點 56 分番到菇場   因為之後個天突然黑哂   同埋落好大雨呀   BG 同船頭話行 2 分鐘咋   但成個身已經濕哂 ~

咁老闆又未番   我哋成班女人喺度傾偈   隔離公司有個女仔應該有嚴重潔癖   佢每次洗手起碼 5 分鐘   有時我開門見佢洗緊手   以為佢去完洗手啦   但到我去完   佢都仲洗緊   之後我走   佢先入去廁所   之後阿爽話好耐無見佢   就問隔離公司啲同事   玩水個女仔係咪無做 ?!   我哋話佢咁叫人好搞笑啦   之後話仲有個洗手都洗好耐   但佢都只係第 2 位   玩水女永遠都係第 1 位   哈哈 ~

今日個個都唔會忙啦   咁家姐又叫我打比佢   都估到係有筍嘢㗎喇   估唔到真係Asahi 罐裝咖啡好平   哈哈 ~

之後又咩都傾下   工人話我頭髮出面乾但入面好柔滑   但佢係同家姐講話我有兩樣頭髮   形容得好搞笑   又話之前工人無啦啦話個心好痛   嚇到家姐即刻問佢有咩嘢唔舒服 ?!   工人話 Berry 唔彩佢   佢個心好痛呀   真係比佢笑死   都唔知喺邊度學番嚟 ~

放工即走   里奧大人話去韓兄弟食午餐   我之前講咗一次話想去韓兄弟食午餐   所以里奧大人就成日話去食呢 ~

我鍾意食芽菜   但里奧大人唔鍾意食   咁我就可以食哂喇

海帶湯都好味呀   因為係熱呢

砂鍋牛肉飯+湯 ($58) - 呢個飯都好味   同埋我鍾意食飯焦

韓兄弟半半 (豬肉飯) ($65) - 里奧大人上次同同事食完呢個半半   之後成日話好味道喎   個湯麵辣辣哋   下次到我要食喇   哈哈

同里奧大人行陣就番屋企   佢就瞓咗接近 2 個鐘   我就唔瞓喇   之後特登出去幫家姐買奶仔同餅乾   咁買完就唔駛成日記住嘛 ~

1 包 $18 但 2 包就 $32   所以里奧大人好豪氣話買 2 包   因為係我比錢   哈哈

同水姑一齊番崇拜   之後一齊食晚飯 ~

今晚有自家製曲奇   不過我無食呀

食完就送佢搭車   里奧大人要番公司拎嘢   我就番屋企先喇 ~

水姑又買咗生果 芝麻粉同江瑤柱比我哋

開埋機洗衫就沖涼休息   睇多陣 Youtube   今晚 10 點 20 分都瞓覺 lu ~

焗三文魚柳 + 節瓜湯 ( 26-JUL-2024 )

又係買完唔想食   所以拎幾片出嚟   等里奧大人幫手食   哈哈

( 26-JUL-2024  FRI )

感恩一覺瞓天光   鬧鐘響仲以為 7 點 40 分添   因為起身時濛濛瀧瀧咁   同埋又唔知點解鬧鐘唔同咗鈴聲囉 ~

早餐食芝麻餐包夾芝士   以前真係病先食芝麻餐包㗎   因為可以留得耐啲嘛 ~

菇場忙下停下   之後又同家姐傾咗 15 分鐘電話   次次都係講完一大輪嘢先講正題   有時講講下都唔記得打嚟想講咩添㗎   比佢笑死 ~

Lunch Time 出去食鯪魚球上海麵   咁見無落雨又周圍行下   買埋炸魚皮同五花茶就番菇場 lu ~

我鍾意將啲鯪魚球整到細細粒咁食

呢包係大包嘅魚皮   之後發覺原來有細包   不過指住咗大包就買大包啦

又係忙下停下   咁我副防藍光眼鏡好重嘛   我將對眼鏡戴落啲   好似啲老人家咁呢   咁啱我又拎住手機同家姐 Whatsapp   阿爽走埋嚟一路笑一路講話我個姿勢   好似啲阿婆織冷衫咁   哈哈 ~ 

我呢排留意到每次 Uber 同小說講嘢   阿怪一定走出去   我咁啱要去廁所   但唔見佢㗎喎   尋日又係咁   今日出咗去半個鐘添呀   真係離哂大譜   仲成日講到自己好忙先衰格 ~

放工即走   番到屋企即預備晚餐   今晚淥丁麵   所以差唔多 7 點先食得 ~

是日晚餐 - 焗三文魚柳 + 節瓜湯

焗三文魚柳 - 係時候要清下冰格   但其實我都鍾意食三文魚   依家唔敢買冰鮮魚呀   咁唯有食三文魚頂住先啦 ~

節瓜湯 - 3 個細節瓜再加啲火腿   估唔到又幾好味   唔會過鹹 ~

洗埋碗就沖涼   之後就食榴槤蕃薯做甜品 ~

睇下 Youtube   10 點 25 分都瞓覺 lu ~

焗墨魚卷 + 蒸節瓜粒 ( 25-JUL-2024 )

( 25-JUL-2024  THU )

感恩一覺瞓天光呀   希望呢個狀況持續落去啦 ~

今朝都係同里奧大人出去食早餐   依家唔駛講去邊間   里奧大人都已經知道係去邊間   哈哈 ~

菇場唔忙又 Skype   諗起以前唔識打中文字   就係因為菇場悶得滯   要 MSN 傾偈   所以扛中文字就係咁練番來的   以前成日問家姐點打 ?!   依家到佢問番我點打 ?!   同埋我 Keyboard 無中文碼   所以佢覺得我好勁   我話打得多咪記得囉 ~

Lunch Time 出去行陣   諗住兜個大圈就算   但行下行下又買下嘢都已經 12 點 15 分   咁買埋腸粉燒賣都番菇場 lu ~

食食下聽到 Ivy 一個極差嘅消息   當堂無哂心機 ~

諗住唔忙   點知又係 4 點幾先開始忙   好在半個鐘搞掂   之後 5 點 20 分阿蟲先叫我做嘢   不過我都仍然做到 5 點 29 分嘅   因為要做哂嘅起碼要半個鐘   我留番聽日做 lu ~

里奧大人真係好搞笑   我上次話個兩送飯好味   佢就成日話買兩餸飯番屋企食   等我唔駛煮   但我唔係成日想食家嘛   睇嚟要再食一次   咁佢先會罷手   哈哈 ~

買埋雞骨草就番屋企   今晚只係蒸同焗   所以覺得非法簡單 ~

今晚焗到脆卜卜   咁我夜晚無啦啦有啲喉嚨痛   我仲以為自己作感   後尾醒起應該食咗墨魚卷太熱氣喇

是日晚餐 - 焗墨魚卷 + 蒸節瓜粒

焗墨魚卷 - 里奧大人猛話好味   我話呢啲只係急凍嘢咋   不過蘸泰式甜辣醬係好味嘅   佢今晚好快食完碗飯   所以佢真係好鍾意食呢個餸   哈哈 ~   

蒸節瓜粒- 唔想蒜蓉蒸   所以將幾片巴馬火腿肉切片   當雲腿咁食法都唔錯 ~

洗埋碗就開機洗衫   之後沖涼休息   里奧大人就熨衫   佢唯一一樣會主動做嘅家務   咁都好㗎   家務係要一齊分擔家嘛 ~

呢張小新防水地毯   好肯定里奧大人想比驚喜我   但佢拎嘅時候比我見到   我"呀"咗一聲   佢即刻係度笑   依家佢幫我買嘅嘢   都多數係小新㗎

今晚幫家姐 Delete 手機啲相   估唔到 15 分鐘搞掂   我自己都有好多相   所以都要搵晚 Delete   我最多就係 Berry 啲相囉   揀相其實先係最耐   哈哈 ~

食埋生果就睇下 Youtube 又打下機   一打就打咗半個鐘   次次都係咁   當唔想打就係咁賞勵時間   咁所以輸咗又繼續玩囉 ~

好在都眼瞓   所以 10 點半都瞓覺 lu ~

招牌鍋貼套餐 + 招牌鍋貼 & 麵線套餐 (外賣) ( 24-JUL-2024 )

( 24-JUL-2024  WED )

今朝瞓到 6 點 54 分去廁所   感恩之後都瞓得番呢 ~

同里奧大人出去食早餐   佢一定話好   始終之前身體好弱   唔想成日整早餐   雖然焗麵包好簡單   但都係想比自己休息下呢 ~

菇場唔忙   咁就 Skype 喇 ~

Lunch Time 唔想出去呀   同埋佢哋又話落雨   咁就更加唔出啦   同埋今日想食 Flakes + 鈣思寶呢 ~

同阿齋傾開偈   我話上次餵 Berry 食嘢比佢咬到我流血   之後我話係我問題   好在家姐無鬧 Berry   之後佢話如果家姐鬧 Berry   佢就會代 Berry 鬧我   哈哈哈哈 ~

依家家姐都會問阿齋食咩牌子好   因為阿齋養得隻狗仔好好   又識教佢喎   我咪話囉   Berry 之前番過學㗎   不過我哋比嘢比 Berry 食   真係完全唔記得叫佢比 Hand Hand   反而姐夫又會叫佢比 Hand Hand   所以其實由姐夫教 Berry 好過   哈哈 ~

唔忙都係 Skype 啦   之後 4 點開始忙   真係做到 5 點 29 分先搞掂呀   可以準時放工 ~

今晚同里奧大人食完晚餐要去搞啲嘢   我話呢兩晚唔係咁熱   但里奧大人話熱到出哂汗呀   可能今日 Lunch Time 無出去   加上菇場冷氣勁凍   夜晚都唔覺熱咁囉 ~

番到屋企即開機洗衫   之後沖涼休息 ~

里奧大人居然主動食龍眼   咁佢真係好熱喎   因為好少未沖涼就食生果呢 ~

睇下 Youtube   諗住 10 點左右都眼瞓   但一啲都唔覺眼瞓   可能頭先飲咗綠茶   好在 10 點 45 分眼瞓咋   始終聽日要番工   唔想夜瞓囉 ~

蜜汁焗金沙骨 + 菜心苗 + 炸魚皮 (外賣) ( 23-JUL-2024 )

( 23-JUL-2024  TUE )

感恩一覺瞓天光呀   瞓得好條腰都唔會痛呢 ~

早餐仍然食提子吐司   但搽花生醬 ~

食完就靈修 10 分鐘就番工   呢排又少咗靈修添 ~

菇場忙下停下   日日係咁都唔錯 ~

Lunch Time 出去食牛筋米   食完就去買菜同龍眼   最後買埋炸魚皮就番菇場喇 ~

又係忙下停下   再望個鐘已經 4 點   今日時間過得好快呀 ~

放工即走   番到屋企要即預備晚餐喇 ~

呢包炸魚皮要 $27   都幾好味   同埋我鍾意呢個包裝呀   咁拎無咁易整碎啲魚皮呢

是日晚餐 - 蜜汁焗金沙骨 + 菜心苗 + 炸魚皮 (外賣)

蜜汁焗金沙骨 - 我覺得好好味呀   因為我要食飯   估唔到連里奧大人都話好味   真係要多謝李錦記叉燒醬   哈哈哈哈 ~

菜心苗 - 今次啲菜無咁甜   好在只買 1 斤 ~ 

炸魚皮 (外賣) - 我見到阿爽食炸魚皮   搞到我都要買番包嚟食呀   不過食唔哂   要留番聽晚再食 ~

食完飯就家姐打嚟   真係時間啱啱好喎   佢特登打嚟話 HKTV Mall 無改到送貨地址   要喺我屋企附近拎   我話無問題喎   見到面比就得啦   之後佢話訂咗 1 箱廁紙同 Berry 女零食   佢話好在即刻改番送貨地址   但就要改埋時間   不過無改到我手機號碼   所以叫我留意訊息 ~

頭先佢講個過程嘅時候   我叫佢講重點先   即係改唔改到地址 ?!   佢就好驚訝話妳係咪食緊飯呀 ?!   我話唔係   我驚一陣傾傾下又講咗第樣嘢啫 ~

洗埋碗就開機洗衫   之後沖涼休息   里奧大人就熨衫   佢話今晚熨一機衫好過聽晚一次熨兩機衫   哈哈 ~

睇陣福寶   今晚 10 點 07 分去瞓覺添呀   勁早呢 ~

鮮淮山蒸排骨 + 菜心苗 ( 22-JUL-2024 )

( 22-JUL-2024  MON )

尋晚瞓到半夜又好似熱熱哋   但唔蓋被又覺得凍凍哋   但感恩都算瞓得唔錯呢 ~

早餐食提子吐司   唔搽嘢都好味㗎   因為個包本身都甜甜哋 ~

菇場忙呀   好在 10 點幾就搞掂 ~

Lunch Time 即出去食牛筋米喇   頭先 11 點嘅時候   個肚已經打哂鼓   勁驚同事經過聽到呀 ~

食完去錢大媽買鮮淮山   但唔靚   咁一場嚟到就買包榴槤蕃薯啦   見有時間就去買薑同埋去萬寧買 Cream   之後忍唔住再去一田買淮山   最後買埋話梅薑就即番菇場喇   因為流咗好多汗   唔想再停留喺條街度呀 ~

有機月子姜   $25/包都抵

L'Oreal Paris 活力緊緻修緊日霜 50g ($199 出位價買一送一)   覺得好抵所以買

日本北海道長芋 ($17.5)

我話一磅分 2 袋   之後職員話 2 包半磅   其實我都覺得佢咁講係清楚好多   哈哈

里奧大人食泡菜杯麵加罐頭鮑魚   佢話啲鮑魚好細粒   所以唔明點解水姑買咁多囉

忙咗一個鐘就可以抖下   之後就 Skype 到放工 ~

放工即走   番到屋企預備晚餐再焗蕃薯   咁食完飯就可以食埋蕃薯當甜品 ~

是日晚餐 - 鮮淮山蒸排骨 + 菜心苗

鮮淮山蒸排骨 - 差唔多蒸熟嘅時候先醒起無落豆豉   好在尋日醃嘅時候落咗蒜蓉辣椒咋   唔係肯定無味   哈哈   不過今次煮到啲排骨好 "鞋"   里奧大人成日話唔關我事   係肉本身嘅問題   佢點都唔會話我㗎   但下次都係買新鮮排骨算喇 ~   

菜心苗 - 依家多數煮半斤菜   諗起以前食到一斤真係好勁 ~    

洗埋碗就食榴槤蕃薯   因為我想襯熱食呀 ~

我鍾意食焗蕃薯   如果煮蕃薯糖水要用黃心蕃薯   咁里奧大人先鍾意食   但依家天氣咁熱   我唔想食熱嘅蕃薯糖水呀

食完就開機洗衫   今日里奧大人打嚟話夠一機衫要開機洗   因為我哋分深淺色嚟洗嘅   但上次里奧大人洗一機衫係放得好少衫   其實係可以洗多 4-5 件囉   雖然我都會預留空間   不過無諗過里奧大人洗咁少就話一機囉   所以我叫佢唔好幫手開機洗衫   幫我熨 2 機衫就可以㗎喇 ~

沖埋涼就休息一下   之後同里奧大人一齊睇個關於基督教討論嘅 Youtube   估唔到幾好睇同埋形式好輕鬆   咁樣易入腦啲嘛   哈哈 ~

睇完再睇下其他嘢   今晚 10 點 20 分都瞓覺喇 ~

牛油煎帶子 + 日式冷烏冬 ( 21-JUL-2024 )

( 21-JUL-2024  SUN )

9 點半自然醒   我好自然咁望下屋企手機嘅時間   見到係 12:43pm   我嚇到成個人醒哂呀   因為瞓到咁晏   夜晚瞓唔到嘛 ~

一開手機就見到家姐 Whatsapp 問妳隻手指。。。。。。   所以早餐都未食就要影張相比佢睇先   之後問我今日係咪休息 ?!   我話我今日一定係休息啦   哈哈   其實我去里奧大人公司幫手都係睇自己精神狀況嘅   無話一定要去嘛   佢真係好搞笑 ~

早餐食加蛋糕   係家姐工人喺澳門買比家姐食㗎   佢仲買樽腰果糖番嚟大家食   家姐話佢好鬼有錢   哈哈 ~

食完就沖涼   之後去里奧大人公司坐下 ~

我同里奧大人講話嚇死   佢話瞓到咪瞓囉   唔駛驚瞓到咁晏喎   可能佢知我平時番工又要煮飯會辛苦   不過呢個月真係好攰   我都好少成日講話攰嘛 ~

衰女   尋日成日喱埋唔理我

番完崇拜就去買午餐   今日瞓夠但反而暈暈哋   唔知係咪頭先出咗一身汗   依家啲天氣   慢行都出好多汗呀   所以沖完涼好似無沖咁 ~

食完飯又好似好啲   可能早餐食得太少又出汗呀   哈哈 ~

里奧大人去開會   我就去街市買菜同凍肉   之後去樓上買雞翼   原來今日又有試食呀   所以我又排隊   好似排咗 20 分鐘呀   不過咁又唔錯   因為可以嘆下冷氣   同埋好在頭先買咗好少嘢咋   唔係就唔排隊等 lu ~

試食都擺到咁細緻

底部係糯米飯   左手邊係八爪魚芥辣絲

100% 鮮芒果雪條

家姐話我賺咗 $29   我話係忽然驚喜價 $29 係 5 支喎   我再話好似尋日我見到盒桃 $88 咁囉 

番到屋企即開冷氣   抖陣就開機洗衫   之後沖涼洗頭   依家出一出街   真係起碼要沖 3 次涼先搞得掂 ~

我之前已經想買   但又驚唔好食   所以頭先試咗覺得幾好味就買 10 條喇

做咗 1 個鐘頭家務咋   其實想再執下嘢   但最衰整親手指   唔敢咁大動作抹嘢   一陣傷口又爆開就麻煩 ~

差唔多 5 點就預備晚餐   解凍咗啲帶子   之後係咁用廚房紙索乾   都用咗唔少時間   好在早預備咋   里奧大人 5 點 45 分番到屋企 ~

加冰浸住啲烏冬

是日晚餐 - 牛油煎帶子 + 日式冷烏冬

牛油煎帶子 - 今次好有心機煎   連里奧大人都話好昋呀   所以今次就好好食喇   係食到煎咗嘅口感   哈哈 ~

日式冷烏冬 - 凍冰冰嘅烏冬   食落口感真係正好多   之前只係放涼再擺雪櫃   有啲係黐埋一堆   咁今日有時間就整好啲呢 ~

食完抖陣就洗碗   沖埋涼就食生果喇 ~

家姐尋晚打嚟話啲無花果底部都有啲腍   所以叫我快啲食   我仲諗住擺幾日添   估唔到今次買到又大又甜又平嘅無花果呀

里奧大人 8 點半瞓喇   呢個星期佢無休息過   加上今日早起又要開會   所以肯定好攰 ~

我就睇下 Youtube   今晚都係 10 點半就瞓 lu ~