味千拉麵 ( DEC-2008 )

祝大家新年快樂   每日都開開心心  健健康康

尋晚無煮飯呀    所以去食味千拉麵   依家味千啲食物縮哂水呀   除咗餃子外   其他樣樣都細碟咗呢 ~

雖然細碟  但食食下又幾飽喎 ~

里奧大人呢排咀腫   所以又去許留山食特種龜零膏   我又食兩啖   食完見暈   我暈就大鑊喇   依家唔係昔日嘅葫蘆身型   里奧大人根本絕對無可能扶得起我   所以我決定 2009 年開始減下肥   但又唔可以減得太犀利   因為我要有肉地先靚女㗎 ~

~~~~

今朝番工居然車等人   車程又順   所以勁早出到去 ~

難得咁早   所以去遠啲嘅地方食早餐   沙爹牛肉米餐 勁正呀   因為我好鍾意用有耳嘅杯飲奶茶㗎 ~

番到菇場忙到爆   但好開心喎   因為除夕   4 點可以收工喇 

同里奧大人去茶餐廳食 Lunch   佢話食過好好味   所以去試下 ~

黑椒蜜糖雞翼 + 菜心 + 豬腳薑醋 (外賣) + 聖誕禮物 ( DEC-2008 )

里奧大人要剪頭髮   所以有過份充裕嘅時間比我 Ready 晚餐   反正有時間就行下惠康   買咗 6 盒粟米湯   1 盒 $4.8 咋   平時好似要 $7.x 㗎   再經過買燒味嘅地方   拎起盒豬腳薑嚟聞   好香呀   所以買埋佢啦   之後再去街市買菜就番屋企喇 ~

是日懶餐 - 黑椒蜜糖雞翼 + 菜心

黑椒蜜糖雞翼 - 本來想焗   但唔知焗幾耐   所以都係煎算數喇 ~

菜心 - 超大條超甜   但美中不足係有渣 ~

豬腳薑醋 - 聞落去好香   諗住好好味  但啲醋好酸  唔掂呀 ~

依家啲手提電話真係用 2 年就玩完   所以我都要換電話喇   我好 "鏡錫" 部電話㗎   不過舊電唔聽話咋   但又唔想買舊新電喎   反正聖誕多 Further Sale  所以順便叫里奧買埋比我囉   佢橫掂買開電腦   唔爭在買埋電話比我啦 ~

之前用咗白色電話   所以今次用紅色   無咁悶呢 ~

我其實鍾意 LG 同 Sony Ericsson 嘅電話款   但有啲係無 3G   有啲又太貴   所以都係揀番 Nokia   因為用慣 Nokia 嘛 ~

本來想陪里奧大人徑步   但已經 10 點 10 分   所以索性叫里奧大人都唔好跑步   早啲瞓好過 ~

~~~~

今朝落雨   所以天氣開始又凍咗啲喇   咁搞法真係好易病 ~

早餐食芝腿治烘底 + 奶茶   佢哋落單無幫我走牛油   不過有牛油真係香好多   但就肥好多囉   所以係唔會要牛油嘅 ~

里奧大人上咗大陸   晏晝自己買車仔麵番菇場食   今日無咩人喺菇場食飯   所以靜到有啲耳鳴呀 ~

小菜館 ( DEC-2008 )

尋日個心口有啲痛   唔知係咪做嘢緊張得滯   真係要學吓放鬆慢慢做先得

尋日里奧大人突然被急召北上   唔知幾時番   所以我索性唔煮飯   抖下先 ~

幸好同里奧大人差唔多時間番到屋企   可以一齊去食晚飯   今次去遠屋企少少嘅地方   試下其中一間嘅小菜館   叫咗涼瓜燜排骨 + 古法蒸桂花魚 + 生炒牛肉飯 ($109)   估唔到啲份量都幾大   涼瓜燜排骨比例一比一   桂花魚好新鮮   冬菇都好入味   但個豉油唔掂   無味嘅   里奧大人話碟炒飯好好食   講咗成百次   話啲飯係一粒粒喎   唔係腍劈劈咁喎   即係暗示我平時炒飯係唔掂   腍劈劈咁話囉   雖然無直接講   但讚咗成百次都知咩事啦 ~

由於啲份量真係太大   食到我同里奧大人眼癱癱   一定要兜大圈消化一下先番屋企   突然好想食金莎   想買又唔買咁   里奧大人話想食就買囉   仲話請我食添呀   所以我真係好開心   番到屋企勁口渴   所以呢間小菜館都未必會再去   太多味精喇 ~

是日甜品 - 非食不可嘅不倫不類芒果啫喱糖   因為整咗幾日   再唔食就掉㗎喇   不過最後我都係

食咗 1 粒咁多   所以基本上會係掉咗去居多 ~

尋晚同里奧大人講晏晝心口痛   之後問里奧大人   如果我死咗咁你會點   會唔會再婚 ?!   里奧大人話佢唔會喎   聽住先啦   再問多次如果我死咗你會點   里奧大人好不屑咁話嘥哂啲錢睇中醫   衰到佢吖   呢啲真係真心話喇 ~

~~~~

今朝發惡夢   咁啱鬧鐘響   所以醒咗   發夢見到成個雪檳都係片裝芝士   望下 Expiry Date 已經係半年前   仲要係全部芝士都係過期   一路掉一路驚...嚇到我呢   個夢好真實   因為我成日買買買   完又唔用   到過期就掉   試過一次過掉咗 8 包過期嘅出前一丁   真係心都痛埋   加上之前我掉咗啲買咗但無食到嘅甜麵豉 紅蔥頭 火龍果   覺得自己真係好嘥嘢   所以發埋啲咁嘅夢...新年願望係戒狂買嘢   只可以用咁多買咁多 ~

起身煲熱啲中藥   點知尋晚扭得太實個保溫壺   開極都開唔到   里奧大人今朝要見客   可以瞓耐啲   我真係無辦法開到個蓋   所以好溫柔咁叫醒里奧大人幫手開   好在開到咋   唔係都唔知點算好呀 ~

諗住星期六可以同里奧大人輕輕鬆鬆食早餐   點知里奧大人要見客   得我孤零零一個人食早餐   我星期六多數食飽啲   因為平時 12 點半食 Lunch   星期六要成 2 點先番到屋企食 Lunch   所以今朝食咗餐蛋出前一丁 + 熱朱朱力 ($18)   其實我係叫熱 Horlick   點知佢聽錯咗係熱朱古力   激死 ~

番到公司慢慢做嘢   因為有強烈嘅 Holiday Mood ~

粟米龍脷柳 + 香草牛油粟米 + 豉油王蔥粒炒飯 + 芝麻糊 ( DEC-2008 )

當諗唔到食咩嘅時候    就特別零舍想食辣嘢   所以就去食酸辣米線喇   如果屋企附近有埋麻辣米線就更加正喇 ~

行行下無啦啦落雨   所以覺得好凍咁呢 ~

次次諗住去百佳買少少嘢  但就覺得好似比人落咗降頭咁   咩都買一餐咁   今次仲着數   因為買滿 $100 有 9 折   所以一路買一路計數好忙   好在喺超市買嘅嘢都多數有用啫   唔係就好嘥嘢㗎喇 ~

是日晚餐 - 粟米龍脷柳 + 香草牛油粟米 + 豉油王蔥粒炒飯

粟米龍脷柳 - 臨近歲晚   想清哂雪櫃啲食物   所以又整龍脷柳喇 ~

香草牛油粟米 - 之前煲湯淨嘅    所以炒埋佢   多碟餸就無咁寡呢 ~

豉油王蔥粒炒飯 - 其實單單用豉油 + 蔥花炒飯都幾好味喎 ~

假期唔想做平時會做嘅嘢   所以食下芝麻糊同唔徑步喇 ~

~~~~

今朝覺得有啲熱同有啲焗咁   唔知係咪吽雨呢 ~

本來想去遠啲食早餐   但諗諗下都係唔好   費事落雨仲麻煩 ~

所以都係喺公司對面食芝士火腿菠蘿包 + 凍奶茶    食完好飽好想瞓呀 ~

番到菇場仲屎火   唔知點解提唔起勁做嘢    因為星期三應該可以放早 ~

1 月 1 日又放假   就勁有 Holiday Mood 呀 ~

晏晝同里奧大人去美心食六寶飯   好耐無食燒鴨   覺得好好味   不過最好味都係啲酸梅醬   食咗 3 包呀   幾驚比人鬧拎得多呀 ~

肉醬意粉 + 磨菇粟米湯 ( DEC-2008 )

   

尋日仲有 Holiday Mood   個人仲係懶洋洋咁   好在幾日前已經諗好食咩嘢   如果唔係又會係無 Mood 煮出街食

放工即走喇   落車就去惠康買嘢   買咗免治豬肉 + 4 罐細磨菇粒 + 1 大包珍珠米 + 1 支芝士粉 + 1 個細洋蔥 ($84)   本來想等里奧大人一齊先買米   但難得惠康有珍珠米   所以拼老命嚟拎都要買   加埋自己個袋又超級重   真係辛苦到死喇 ~

是日晚餐 - 肉醬意粉 + 磨菇粟米湯

肉醬意粉 - 將免治豬肉醃一陣   再切洋蔥粒   我多數先爆香洋蔥後加免治豬肉   再加一罐細蕃茄膏 / 茄汁 / 喼汁 / 水同意粉兜勻   之後放落焗爐盆再加芝士粉放入焗爐   焗到聞到芝士味就搞掂 ~

其實今餐煮肉醬意粉最大目的係用埋樽芝士粉   因為已然過咗期 10 日   但聞落仲有好香芝士味   唔想掉咗去   所以就用嚟煮意粉喇   好彩終於都用得哂 ~

磨菇粟米湯 - 將罐細磨菇粒切片 (因為買唔到切片磨菇粒)   磨菇同埋粟米湯一齊滾   最後落蛋花即成   簡單又好味又飽肚 ~

食完飯就同里奧人去買相機   本來想唔去㗎   但里奧大人係都要我陪   所以碗都唔洗就一齊出去買嘢喇   當散下步咁囉   買咗差唔多成個鐘   番到屋企仲要洗碗   無哂啲時間呀 ~

~~~~

今朝食芝蛋治烘底 + 熱朱朱力 ($15)   呢排飲慣咖啡   再飲番朱古力有啲反胃感覺 ~

諗住番到公司無咩嘢做   點知忙到死   真係估唔到估唔到 ~

晏晝帶飯   意粉一樣咁好味   好彩我同里奧大人都無肚屙 ~

韭菜豬肉水餃 + 徑步 ( DEC-2008 )

今朝晏咗起身   所以無番教會   同里奧大人落樓下食早餐算喇 ~  

晏晝食車仔麵   好耐無食   所以覺得好好味咁   特別係雞翼尖呀   好入味呀 ~

習慣咗食完嘢要行一陣   所以點都要喺屋企附近兜個圈先番屋企 ~

是日懶餐 - 韭菜豬肉水餃

韭菜豬肉水餃 - 今次買瘦肉番嚟自己整肉碎   但唔係咁好   所以好多時都一大嚿肉   不過都好好食嘅 ~

食完抖陣   又徑步喇 ~

薑蔥麻油雞 + 青紅蘿蔔粟米豬骨湯 + 徑步 ( DEC-2008 )

假期食 Tea 食到有啲悶   所以同里奧大人食 腸粉 燒賣 粉果 魚蛋 魚肉翅 珍珠奶茶   飽到震呀 ~

番到屋企再食埋元朗特產恆香老婆餅   不過依家嘅恆香無咁好味 lu   我覺得大同好味啲 ~

我估自己打 Keyboard 打得多   依家兩隻手指公附近嘅位都好痛   所以煮嘅餸只可以蒸   因為唔想用力呀 ~

是日懶餐 - 薑蔥麻油雞 + 青紅蘿蔔粟米豬骨湯

薑蔥麻油雞 -  加埋辣麻油正好多㗎 ~

青紅蘿蔔粟米豬骨湯 - 清潤湯水   希望一星期會有一次飲啦 ~

實在覺得呢幾個月身體唔多好   所以同里奧大人一齊徑步   希望做運動身體好啲啦 ~

~~~~

今朝同媽咪 朱朱食早餐   今次真係好攰   因為尋晚瞓得唔好   今時唔同往日   一晚瞓得唔好嘅話   要好耐先可以復原呢 ~

番到菇場簡直係唔願做呀   只係掛住上網同望住個鐘   但越望啲時間就過得越耐咁呀 ~

打牌 (外賣篇) ( DEC-2008 )

尋日約咗里奧大人朋友阿勝同翠兒兩公婆 12 點半嚟我屋企打牌   所以校定鬧鐘起身   因為要再仔細打掃同執靚間屋   原本校咗 10 點半鬧鐘   但里奧大人 9 點半就醒咗   所以出廳睇書   享受一人世界   而我就好努力咁瞓到 10 點半   之後梳洗就同里奧大人去太興食早餐   Share 芝士煙肉脆包配即磨咖啡 + 雞扒火腿多士配檸茶 ($41)   諗住食個包餐無咁飽   點知原來好鬼漏 ~

食完番屋企執屋 掃地 沖涼   搞都差唔多 12 點半   時間啱啱好   之後同佢哋去餐廳食 Lunch   我食咗紫菜四寶湯粉絲配可樂   後就上我屋企打牌喇 ~

好開心可以一連兩日都有我好喜歡嘅活動   又係好似尋日咁   食完 Lunch 打牌再叫下午茶   食吉列可斑沙律 + 司華力腸沙律 + 西多士 + 沙爹牛肉飽 ($76)   食完又再打   之後叫外賣   酸辣無骨鳳爪 + 串燒沙爹雞肉 + 清炒雜菜 + 鹹魚雞粒炒飯 + 泰式炒河 + 2 杯椰汁紅豆冰 + 2 杯青檸梳打 ($200) 方便快捷 ~

填飽肚有氣力又再打   打到 10 點半就完 lu   打咗 16 圈   差唔多 8 個鐘   好滿足喇 ~

今次係我同里奧做大嬴家   大家都嬴咗百幾蚊   好開心呀 ~

連續兩日咁打   一停落嚟真係有啲攰   所以即刻沖涼上床瞓覺喇 ~

~~~~

今朝真係太好喇   因為好少人排隊搭車   而車程又快   比平時早成 20 分鐘   所以我今朝真係可以好他條食早餐   難得咁早   難得美心無人排隊   所以就去美心食吉列魚柳配腸仔 + 多士配即磨咖啡 ($21)   慢慢嘆   又有聖誕音樂播放   真係好正呀   我估好多人都去哂旅行   因為條街都好少人 ~

番到公司要重拾心情做嘢 lu   橫掂 CC 無番工   無得 MSN ~

晏晝食菜肉餃生菜米線 ($13)   清清哋 ~

富山 + 棉棉冰 + 彩虹 ( DEC-2008 )

尋日晏晝去家姐元朗屋企   但家姐話要食棉棉冰   之後去埋街市先去佢屋企喎 ~

因為住村屋   所以入到屋企一望無際對住個大草原   勁正呀 ~

最正係住 2 樓連天台   飯廳同廚房都喺天台   所以間屋就變相大好多呢   最正係有 Bar 枱同有套房嘛 ~

住村屋好處係地方夠大夠實用   價錢平又空氣好  但就唔多啱我   因為我覺得無 "實Q" 好唔安全   加上我習慣一落街有嘢食有嘢買   住村屋要下下搭車或者楂車   好唔方便呀 ~

坐咗一陣就走喇    因為約咗里奧大人喺大埔食飯呢 ~

估唔到入元朗有筍嘢   就係 Vinda 廁紙喇   $25/1 條咋   所以掃 4 條走   因為大埔無得買呢款廁紙架 ~

落車嘅時候   家姐話啲人望住我哋啲廁紙喎   到見到里奧大人嘅時候   里奧大人話以為啲廁紙喺附近買嘅   我話特登喺元朗拎番嚟㗎   佢即刻 O 哂咀唔知講咩好呀 ~

呢餐唔食得熱氣嘢   唔想食中菜   唔想食西餐   唔想食上海菜   所以又食番壽司喇 ~

食完我就同家姐去 Jusco 超市買嘢   初初諗住買少少   點知買下買下   買滿 4 個籃   6 百幾蚊落樓呀   我同家姐一買嘢就好難控制   一話抵就打孖嚟買   真係無咩必要唔好一齊行街買嘢咯   買完再同家姐  里奧大人一齊去食糖水   呢日真係好滿足呀 ~

~~~~

今朝同里奧大人去大家樂食早餐   感覺上好似 Relax 啲咁呀 ~

食完同里奧大人去街市買煲湯料   呢排手痛   所以一定要搵人幫手拎嘢呢 ~

打牌 (住家飯篇) ( DEC-2008 )

尋朝 10 點半一定要起身梳洗   因為要去家姐屋企食飯打牌再食飯呀   雖然係家姐   但都要買少少嘢嘅   所以買咗脆豬肉乾 + 肉鬆蛋卷 + 檸檬 + 八仙果比家姐

12 點半去到家姐屋企附近嘅海港酒家飲茶   食咗竹笙上素餃 + 奶皇包 + 鹹魚肉片飯 + 芝麻糊 + 藥膳雞腳 + 椰皇燉雪烚 + 蝦餃 + 炸雲吞 + 叉燒腸 + 濃湯芥蘭 + 例牌燒鵝 + 薄撐 + 濃湯鮮竹卷 ($260)   燒鵝正到不得了   諗住例牌 $50 會好少   但估唔到都幾多件   我都係第一次早餐就食燒鵝   勁呀   今餐家姐同里奧大人搶住請   但最後都係家姐爭嬴 ~

之後就上家姐屋企 lu   家姐送咗聖誕禮物比我同里奧大人   我嘅禮物係 PM 鹽同胡椒粉樽   而里奧大人係 Esprit 毛巾   家姐啲禮物好啱用   因為里奧大人正想買毛巾出 Trip 用   太好喇   2 點幾開始打牌喇   打到 4 點幾好鬼肚餓   所以叫工人買下午茶   油醬多 + 奶油多 + 西多士 + 麥樂雞   我已經好穩陣寫低   點知原來果間餐廳嘅多士係有厚同薄之分   工人唔識   所以買咗厚   諗住過吓口癮   點知食到好飽   食完再打   打到 8 點幾就食飯 lu ~

今次打咗 6 個鐘 12 圈...真係末夠喉   里奧大人慘咯   因為一家輸三家   不過我仲慘   我嬴得最多   嬴咗二百幾蚊   所以我要嘔番百五蚊比里奧大人   因為我曾經講過話我羸咗會 Share 比里奧大人 ~

又有住家飯食喇   青紅蘿蔔豬筒骨湯 + 白切雞 (沙薑辣椒紅蔥粒) + 美極煎蝦碌 + 蠔油冬菇豬手 + 蕃茄紅衫魚 + 炒菜心   原來呢餐飯要成五百幾蚊   真係估唔到   出街食都得喇   雖然同出面食係一樣價錢   但唔駛自己煮嘅無味精住家飯總好過出面食嘅味道飯嘅 ~

真係唔明我家姐點解由細到大都好鍾意八哥   但我覺得八哥真係好肉酸   最慘係家姐養到佢哋成隻豬咁   我要出盡九牛二虎之力先可以抱到佢   抱得耐都腰骨手腳都痛呀 ~

9 點幾食完飯同媽咪一齊走 lu  呢日真係好好好好好好好好好好好好開心呀 ~

大快活 + 平安夜報導晚會 ( DEC-2008 )

12 月 24 日平安夜好多公司都會食完到會就放 3 點或者放半日   里奧大人就好啦   可以放 3 點   但我無得放早   同平時一樣收 5 點半   其實番到公司已經無 Mood 做啦   仲要無得早   幾慘呀  ~

里奧大人無地方去   所以我就叫佢去媽咪屋企瞓陣   好過唔知去邊到等我嘛 ~

夜晚我哋約咗 Ivy 同 Jack 去大快活食晚飯   之後就一齊番平安夜報導晚會 ~

我好鍾意聽人講見證   因為當中真係感受到神嘅大能   自己仍經歷過神在當中嘅保守帶領   所以我次次聽親都會好感動呢 ~

習慣早瞓   所以報導會完畢就番屋企休息喇 ~

呢排里奧大人勁熱氣   熱到咀都腫埋   所以同佢去許留山食龜零膏   我就唔食得喇   因為我食親會頭暈   食糖不甩算喇 ~

~~~~

一覺瞓到 9 點半   係時候食早餐 lu   好少咁早起身   所以去太興食早餐喇 ~

食完去街市買雪梨蘋果   因為里奧大人指名要煲雪梨蘋果水 (材料 : 雪梨 蘋果 雪耳 南北杏 羅漢果 蜜棗)   話次次生痱滋同熱氣   一飲完就好番哂   所以要我煲喎 ~

同里奧大人食埋晏晝   佢就做功課   我就去家姐屋企坐下咁喇 ~

想去了 N 年的 Pizza Hut ( DEC-2008 )

眼見人家嘅公司開 X'mas Party 同放早真係幾無 Mood   有嘢都無 Mood 做   但低處未算低   因為 CC 都係無得放早   而佢嘅放工時間 仲係 6 點 15 分   咁我都安慰啲

放工即走喇   因為里奧大人已經喺屋企睇報紙   我唔會比佢咁嘆   所以即刻命令幫我煲中藥 ~

同里奧大人相處咗唔少日子   我覺得里奧大人都幾了解我   .我話晚餐想食其他嘢   里奧大人話去 Pizza Hut   好驚呀   我正想講話去 N 年都無去過嘅 Pizza Hut   問番里奧大人點解會去 Pizza Hut   話因為知我想咗好耐喎   都唔知係咪 ~

食咗至尊細薄批 + 三文魚鮮果沙律 + 魚圈拼墨魚塊 + 石板街黑牛 ($121)   我真係恨食好耐 Pizza 喇   啲餅邊脆卜卜   6 件我食咗 4 件呀   加埋其他嘢   食完之後有極重罪惡感   今次真係好抵   因為之前姑奶比咗張 Coupon ($75)   加埋有 9 折   $200 折埋減埋最後 $121 埋單   開心到爆呀 ~

食完 Pizza 就番屋企 Hea 下就去聽大埔浸信會音樂佈導晚會   詩班員真係好勁   唱得超好聽   所以啲時間過得好快 ~

番到屋企即刻沖涼   之後同里奧大人睇 Keroro 電影 DVD   一路睇里奧大人一路讚自己好聰明好醒   話好在無喺戲院睇喎   咁悶   無啲童真就真啦 ~

獨沽一味 (青紅蘿蔔粟米栗子豬骨湯渣) ( DEC-2008 )

尋朝 9 點要起身喇   因為阿 Jack 受浸呀

去到教會附近餐廳食早餐   食牛肉米線配煎蛋 + 熱好立克   而里奧大人食炸菜肉絲腸仔配煎蛋 + 多士 + 熱華田 ($41)   本來好想食牛肉腸   但食完個米線已經飽到呢   好立克都飲唔落呀   嘥哂   仲點食喎 ~

去到自己教會啲感覺真係唔同   好 Warm 唔似過客   但要等里奧大人下年底完成 MBA 課程先可以番自己教會祟拜   都幾耐下 ~

祟拜完之後要番屋企喇   因為里奧大人要趕功課   如果唔係 25 號 26 號 31 號都要番喺屋企做功課   要取消所有約會   我唔想 ~

落車去超市買咗 $24 豬骨   再買 Cream Cheese + 益力多   番到屋企放低嘢就去大家樂食下午茶   食油占厚多士配奶茶 + 燒鴨瀨配咖啡 + 叉燒瀨配檸樂   勁飽   所以奶茶要拎走   不過最後都唔記得飲 ~

之後里奧大人陪我去街市買重型物品   2 個紅蘿蔔 + 1 個青蘿蔔 +  3 條粟米 + 半磅栗子 ($30) + 1 份木瓜 ($12)   之後歸家 ~

是日晚餐 - 青紅蘿蔔粟米栗子豬骨湯渣

番到屋企即刻預備煲湯...青紅蘿蔔係咁劈..粟米栗子係咁拻...豬肉係咁飛水...之後煲兩個半鐘...搞掂 ~

之後忙煲藥   忙洗衫忙抹窗忙執廚櫃忙執 CD 櫃   攰到吖   6 點半先可以睇下報紙咋   睇到昂平 360 又無端端會停   好驚呀   幾時先會正正常常運作呀   因為我好想去坐下呀   其實我坐摩天輛   纜車都會好驚...我會雙手捉實條柱唔敢郁   所以次次落車對手都會作抽筋   以前都可以玩下機動遊戲嘅   但個人越嚟越成熟就越嚟越唔敢玩   今年同里奧大人去 Ocean Park   除咗玩 3 歲小朋友都可以玩嘅旋轉遷秋同摩天輛外 (坐遷秋驚飛咗出嚟   坐摩天輛驚跌咗落嚟   玩完已經嚇到半死)   所以後所有機動遊戲一律免問   仍唔準里奧大人玩   去 Ocean Park 純粹係影相   睇 Show   睇海豚海獅表演   睇水族館   所以里奧大人喺果日講咗九十幾次話係觀光團   下次唔會同我去喎   好巴閉咩 ~ 

開飯喇   應里奧大人強烈要求   今次就咁湯 + 食湯渣就當晚飯   唔飽食生果喎   清清哋咁話喎   唔係講笑   真係飲湯食渣都飽到上心口 ~

之後就忙洗碗忙熨衫忙拖地   攰到連敷 Mask 都無力呀 ~

~~~~

今朝食開早餐嘅餐廳無開   所以買咗炒米粉 + 燒賣 ($8) 番公司食   份早餐抵到笑   因為原來仲有條腸仔   之後再飲公司免費供應嘅 Nescafe 好滿足呢 ~

晏晝同媽咪 婆婆 工人去食元氣壽司   4 個人$153 找數又係抵   所以我請啦 ~

番到公司好無 Mood 呀   因為應該無得放早   家姐公司有 Party 同放 2 點半   里奧大人公司又有 Party   CC 公司又有 Party   不過我公司做冬就有 Party   但我覆診無去到   所以都叫做有 Party ~

但公司有好消息   就係 2008 年全年有長短週   一大喜訊呀 ~

酒樓 ( DEC-2008 )

尋晚等埋里奧大人一齊放工去睇電腦     唔駛煮飯   出街食飯呢 ~

好想飲胡椒豬肚湯   但唔係間間酒樓都有   所以只可以喺屋企樓下間酒樓食晚飯喇 ~

唔知係咪唔駛煮   無咩體力勞動嘅關係   加上得我連飲幾碗湯   所以好快就覺得好頂胃呀 ~

呢排咁凍   真係唔願郁   仲要係成日覺得好肚餓添喎   好在呢期啲提子又甜又抵   雖然糖份高   但話哂係生果吖   好過食薯片咁熱氣嘛 ~

~~~~

今朝又係早咗番到公司附近   我估啲人可能去旅行   又係幾吸引嘅   請 3 日可以連放 7 日喎   我都想呀 ~

明知自己無得放早   所以要食啲甜甜哋嘅早餐開心下   就係食芝腿菠蘿包 + 鴛鴦   好耐無飲鴛鴦   但覺得真係好鬼眼瞓   希望飲完可以額外提神啦 ~

番到菇場   係咁 Check Email   好希望收到 Admin Dept 嘅 "是日放 4 點通告" 呀 ~

里奧大人公司有到會 Party   所以我就同媽咪 朱朱食 Lunch 喇 ~   

蠔油薯仔燜雞翼 + 臘腸粒炒飯 + 蕃薯糖水加湯丸 ( DEC-2008 )

做一個家庭主婦真係唔容易    做女時唔覺   但為人妻之後就覺得家庭主婦真係好難做呢 ~

做女時   媽咪煮得唔好食   我會唔食   仲要衰衰咁彈 ~

依家為人妻   唔單止要諗食咩   仲要諗埋啱唔啱另一半食喎   好在里奧大人只係唔好辣   其他都食嘅   因為我識煮嘅有限   再彈三彈四就唔駛旨意有飯食㗎喇 ~

除咗海鮮   新鮮嘅魚同雞之外   其他都會學下嘅   因為唔學下   來來去去都係食嗰啲   里奧大人唔好意思開口話悶   我都食到悶啦   好在我都叫做有心機整嘢食   如果唔係就慘 lu ~

尋晚屋企有隔夜湯   所以諗一個餸就搞掂   突然好想整糖水   所以又整埋蕃薯糖水喇 ~

是日晚餐 -  蠔油薯仔燜雞翼 + 臘味粒炒飯 + 蕃薯糖水加湯丸

蠔油薯燜雞翼 - 唔知點解成日都黐底   啲雞翼整到甩皮甩骨咁   最煩係有排洗嘛 ~

臘味粒炒飯 - 前一晚食剩嘅臘腸臘鴨   加埋成個星期嘅冷飯   好環保呀 ~

蕃薯糖水加湯丸 - 今期黃心蕃薯唔甜   好在加埋湯丸   唔係無喱味道都幾難食 ~

沖埋涼睇陣電視就要瞓覺 lu    時間真係過得好快呢 ~

~~~~

今朝勁早番到公司附近   所以食吉列魚柳 + 奶茶   一路食一路睇下報紙   勁嘆呀   食完心情都好啲呀 ~

番到菇場有嘢做   但唔知點解無咩心機做   可能已經有 Holiday Mood 喇 ~

里奧大人上咗大陸    所以晏晝自己食   食好耐無食過嘅 7 仔撈麵 + 碗仔翅 + 另一檔嘅燒賣   食完超飽呀 ~

家傳滬曉 @ 官塘 ( DEC-2008 )

   

尋日晏晝即走   因為趕住同媽咪飲茶   之後去覆診

去酒樓飲茶   食咗咸肉糉 + 豬腳薑 + 羅漢齋粉包 + 排骨腸粉 + 鴛鴦燒賣 + 炒米粉 ($84)   做冬當然係我請啦   食飽之後就走人 lu ~

唔知點解次次飲完茶都會肚屙   我估應該係啲嘢食比較油膩   所以先會咁 ~

好樣衰呀   去到醫院等覆診期間就去洗手間   點知一出洗手間就有兩位派宣傳單張嘅阿姐向我走埋嚟   笑笑問我係咪有 BB   我估佢哋可能係 Sell 陪月   去到邊都有人覺得我有 BB   唔通我真係咁似~

今次等咗 1 個鐘頭就到我   又唔駛食藥   只係要驗血   因為醫生話我塊臉好青喎   梗係青啦   因為眼瞓到不得了呀   我最怕抽血   因為十次有九次都係好痛   我最記得第一次去抽血   抽完都唔知   等我以為抽血係唔痛嘅   原來唔係㗎   有次個新丁拮住我隻手好耐 (因為另一個護士已經拮第二個)   然後好驚咁同隔離個護士講話唔得喇唔得喇   嚇到我吖   又唔敢望喎   幾驚係流血不止呀   原來係新丁搵唔到血管   所以另一個護士叫我拮另一隻手   搵唔到就即刻睇另一隻嘛   拮咗先話搵唔到   又唔知道自己手勢唔好   搞到我好痛喎...諗起都痛呀 ~

覆診完就番媽咪屋企 Hea 咗陣   飲下湯   6 點半就出發去 APM 家傳滬曉 lu   點知家姐話無訂枱好難有位   所以家姐即打比家傳滬曉   話 Walk-in 仲有少量位剩   果 10 分鐘內到都無問題嘅   搞到我即刻開行 Turbo 飛去攞位   好在都有位   但 8 點 15 分要交枱   好過無啦   之後等埋家姐同里奧大人就 Order 小籠包 + 饅頭宮保雞丁 + 家鄉燻魚 + 鐵板蔥爆牛肉跟薄餅 + 五香牛肉麵 + 麻辣雞絲粉皮 + 高力芒果奶黃 ($380)   尋晚最正係小籠包   因為好多肉汁好好食   其他都 OK   可能之前食過   無咩特別   里奧大人仲自備牛扒同漢堡包   好在無比人鬧咋 ~

同自己屋企人食飯最最最開心   所以食物質素係其次   因為我次次都係講多過食   不過啲嘢都係油膩   因為食到一半又搞肚痛   辛苦到呢 ~

尋晚又發顛   因為係都要陪埋里奧大人睇完電視先瞓   所以又十二點幾瞓   又唔夠瞓啦 ~

~~~~

今朝勁開心   因為同里奧大人食早餐   去赤丸食腸仔蛋出前一丁 + 熱華田   里奧大人跟風同我一樣 ($40)   本來想食烏冬   但個胃唔舒服   食烏冬好脹胃   所以食丁   唔係係咪太耐無食丁   所以覺得好好味 ~

對眼好澀   又有 Holiday Mood   所以罷工 ~

做冬 @ 醉福樓 ( DEC-2008 )

尋日放工即走 lu   因為趕住番屋企食晏同攻打四方城呀

又要等 20 分鐘車   真係等到人都顛   次次星期六都係咁 ~

番到屋企附近就約埋里奧大人同佢姐夫 晴晴一齊去餐廳仔食經濟實惠下午茶   我食咗醒胃嘅廈門炒米 + 可樂 ($18)   再約埋奶奶 姑奶齊齊上屋企打牌 lu ~

由於屋企係用長方型餐枱做麻雀枱   所以里奧大人同姐夫就坐長嗰邊 (高大型專用)   而我同姑奶就坐短嗰邊 (嬌小玲瓏型專用)   好在我坐里奧大人上家   唔係會比佢由頭 "諸" 到尾   今次好開心   因

為食咗一舖小三元   諗住會旺啲啦   點知都要輸 100 大元   仲要係輸比里奧大人添   講開其實里奧大人同我打牌都好慘   因為次次我出沖都會口數   到最後如果里奧大人嬴咗我就唔會比   仲要佢比番我輸嗰啲比我   如果里奧大人輸呢   我都係唔會比   因為輸果個係我   我嘅錢即係佢嘅錢   比嚟比去好煩   所以今次里奧大人又要比番 100 大元我喇   話時話   其實我可能有賺添呀 ~

之後同埋其他姑奶一齊去醉福樓做冬 lu   食家常小菜   20人埋單 $1,200   抵到爛   但啲食物同服務質數就真係差到不得了   所以我最憎正日做節 ~

番到屋企真係要認真執嘢喇   因為 26 號朋友上我屋企開枱   唔想失禮人呀 ~

差唔多 10 點就比自己休息   里奧大人又話想 Relax 喎   所以一齊睇 "變形金剛" DVD   其實自從里奧大人讀 MBA 之後   真係好耐無試過一齊睇 DVD   真係好難得 ~

睇到 11 點幾突然好眼瞓   所以唔睇喇   一齊瞓覺 ~

臘味飯 + 南瓜粟米栗子豬𦟌湯 ( DEC-2008 )

今朝同里奧大人食完早餐就番教會喇   次次番完教會都會同里奧大人行街市買餸   有傾有講有人幫妳拎埋   妳話幾好呢 ~

之後見到亞婆豆腐花無人排隊   所以又整碗喇   亞婆豆腐花真係勁滑㗎   五蚊碗又抵   仲有啲腐乳都係好滑㗎 ~

唔鬧交嘅話   我絕對鍾意星期日同假期    因為全日有自己心愛嘅人喺身邊陪住   我年紀大喇   只響往平淡嘅生活   行下食下就滿足㗎喇   平淡是福呢 ~

番到屋企里奧大人話要休息下喎   我就睇報紙過日晨   不過星期日啲報紙無咩嘢睇   所以好快就睇哂 ~

又到時候食晏   但好熱唔想行咁遠   所以去屋企樓下餐廳食嘢算喇 ~

是日懶餐 - 臘味飯 + 南瓜粟米栗子豬𦟌湯

臘味飯 - 2 條臘腸 + 1 隻臘鴨肶   當半米半飯時   就將臘腸切開半條再棟高   臘鴨肶成隻入飯面蒸   臘味加油飯勁正呀 ~

南瓜粟米栗子豬𦟌湯 - 1 個細中國南瓜 + 3 條粟米 + 半磅栗子 + $20 豬𦟌   煲 2.5 個鐘   超甜呀 ~

~~~~

休息咗成個星期   都唔慣咁早食早餐   所有要食啲比較易入口嘅嘢   就係芝蛋治 + 奶茶   始終都係覺茶餐廳嘅奶茶係最好飲   特別提神咁㗎 ~

番到菇場勁忙   咁都好   好過無嘢做洽眼瞓呢 ~

同里奧大人食 Lunch   因為想睇電腦   所以去公司附近食算喇   明知唔好食   但費事嘥時間周圍行呀 ~

爺爺壽宴 ( DEC-2008 )

晏晝家姐入大埔同我 里奧大人食 Lunch   家姐勁想食帶子壽司   所以就去元氣 ~

3 個人食嘢真係好好多   多啲款嘛 ~

食完同家姐行 Jusco 超市   家姐依家住村屋   所以想買滿 $300 就送貨   方便好多呀 ~

買完又去藥房買嘢   估唔到有驚喜   掃咗 8 盒香薰補充劑   平百佳 $9 呀   根本無可能忍到手 ~

之後家姐上嚟屋企坐陣就走喇   上車之後打嚟話攝咗 500 蚊喺洗手間嘅鬚刨盒底喎   因為比番超市同埋 Lunch 錢   真係黐線   食 Lunch 都計嘅話就唔係姊妹啦   真係頂佢唔順呢 ~

夜晚要去兒生女嘅爺爺壽宴   所以唔駛煮飯呢 ~

西冷牛扒 + 西蘭花炒斑片 @ 大家樂 ( DEC-2008 )

今次真係自打咀巴添   尋日先話自己係一個賢妻   點辛苦都煮飯   但尋晚真係好攰唔係咁舒服   所以都係出街食   無得做賢妻喇 ~

雖然唔駛煮飯   但要煲藥呢   仲論盡到以為校咗鬧鐘   無睇鐘由佢煲   點知心血來潮睇吓煲藥   點知已經煲到無哂水   好在睇吓   唔係煲都爆埋 ~

原來唔駛煮飯等里奧大人番屋企都幾悶下   因為喺大陸番嚟香港啲時間係好難預計   所以只有等   個人又唔想郁   所以又灘喺梳化整理 Recipe   因為成屋都係 Recipe   加加埋埋成尺厚   但唔明點解自己煮嚟煮去都係嗰啲囉   我真係要好好作出檢討及加以反醒呀 ~

終於等到里奧大人電話   之後就出發去大家樂食晚飯 lu   其實唔想去大家樂   但咁啱收到之前換嘅大家樂 Cash Coupon $20   所以先去   如果唔係攝下攝下就唔記得用㗎喇 ~

同里奧大人 Share 西冷牛扒餐 (酥皮湯 + 焗薯) + 西蘭花炒斑片套餐 (白飯 + 例湯 + $4.5 轉花旗參蜜) ($59)   因為聽日我唔會帶飯   所以一定要食哂去   真係食到反胃 ~

番到屋企 9 點幾   所以即刻再翻煲藥   之後沖涼再敷 Mask   天氣涷敷 Mask 都幾攞命   唔敷又唔得   做靚太真煩   哈哈 ~

本來想瞓   但睇 Cable 嘅 Tattoo 節目又幾好睇   紋身好痛   但真係唔明啲人仲紋到成身都係   啲人都幾抵得痛下 ~

今朝搭車突然好肚餓   所以喺車度諗好咗早餐食吞拿魚治烘底 + 熱朱朱奶 ($15)   見到份三文治突然有啲想嘔嘅感覺   不過最後都食哂件三文治同飲咗半杯朱古力奶   番到公司第一件事係狂搽平安膏   為實在太想嘔又頭痛   睇嚟都係作感冒   好在晏晝覆診   覆完可以去媽咪屋企抖抖 ~

~~~~

今晚會同媽咪 家姐 里奧大人做冬   所以就算唔舒服都好開心呀   因為屋企人係我嘅良藥 ~

晏晝會同媽咪飲茶   之後就覆診 lu ~

做冬 @ 媽咪屋企 ( DEC-2008 )

今日提早同媽咪做冬   咁啱朝早我要去覆診   所以覆診完就同埋媽咪去稻香飲茶   再陪媽咪買衫  ~

之後我就去抽血   搞掂就去媽咪屋企 lu ~

成日頻頻樸樸真係有啲攰   好彩有餐住家飯食下啫 ~

昂坪 360 ( DEC-2008 )

喺屋企實在太悶   所以里奧大人就請咗一日假陪我   而我就陪佢去昂坪 360 啦 ~

10 點起身去太興食早餐   之後番屋企梳洗   差唔多 12 點先出發   估唔到原來屋企樓下嘅機場巴士會到昂坪 360   咁就可以慳番唔少時間左轉轉右轉轉呢 ~

可能係平日關係   所以唔係好多人 ~

其實坐 360 都好舒服   可能天氣清涼啦   但個天濛濛咁就大煞風景囉 ~

去到市集   完全覺得唔掂呀   無嘢睇嘅   最吸引我嘅只係買大澳特產嘅店舖   買咗蝦干同桂花   再加一個雞屎滕   我想食好耐㗎喇   難得有得買   所以買番個嚟食   又幾好味喎   可能我實在太鍾意食啲煙韌嘢啦 ~

之後睇埋大佛就去食嘢   無咩好選擇   所以去 Euro go-go  食肉醬意粉 + 蒜蓉包 + Ice Mocha   我發覺自己晏晝飲親咖啡會越飲越眼瞓    所以飲完覺得仲辛苦過唔飲   但又想過下口癮   好煩呢 ~

食完再行下影相   因為無人   可以 Set 腳架任影合照   好難得呢 ~

影影影   影到無嘢好影就走喇 ~

難得入到東涌   所以行下個 Shopping Mall   因為深信 Outlet 會有好多平嘢執 ~

估唔到今次里奧大人有收穫   買咗 1 件厚褸 + 1 件薄褸    不過如果啲 Outlet 有多啲碼就好喇    咁樣可以有更多收穫 ~

行到真係好攰   所以去 Food Court 食嘢 ~

菜菜仔婚宴 @ 金煌庭 ( DEC-2008 )

尋朝里奧大人又要 6 點 45 分起身   因為好朋友菜菜仔結婚要做兄弟呀 ~

我瞓到 9 點半就瞓唔着 lu   所以起身拖地   做少少家務咁   之後就同媽味家姐去 APM 和民食嘢   11 點 10 分去到 APM   原來好多商店都係啱啱開咋   好在 Biotherm 開咗啫   所以拿拿聲去買 Aqua Soure X'mas Gift 比媽咪   今次好抵   $315 嘅禮物可以 3 個人分   因為我要咗 Mask + 洗臉霜 + 收縮水   家姐要咗潤唇膏   媽咪要主角 Aqua Source   一舉三得   最搞笑係人家啱啱開舖   電腦都未 Run 到   要用手寫單   可能佢哋心諗   駛唔駛買得咁急呀   實可以食完先買嘅   但驚食完唔記得就唔好啦   做嘢穩陣啲好嘅 ~

去和民食咗軟殼蟹沙律 + 串燒盛合 + 和風 Pizza + 二色飯團 + 辛辣蕃茄年糕 ($199)   今餐一定要我請   因為我有 9 折   一早可以見到屋企人真係食咩都好食過人   之後就一齊行一陣   然後我就去鰂魚涌金煌庭 Join 里奧大人 lu ~

里奧大人同媚媚去咗 Oliver's 傾下功課   我又唔係咁識路   所以家姐陪我搭車過去   因為家姐喺嗰邊番工   好熟啲路   太好喇   其實家姐好眼瞓㗎   所以搞到我都唔好意思同好心痛添 ~

去到佢哋傾咗陣功課   我就一路嘆 Mocha 玩咗陣 NDS   之後佢哋傾完功課就一齊傾偈 lu   佢哋個樣勁攰   又成日講好攰好眼瞓   咁又係嘅   星期日又點會咁早起身   但好朋友結婚   幾早起身都要幫手啦 ~

其實幫手做兄弟姊妹   最悶係晏晝到酒樓嘅時候   因為係無咩嘢可以幫到手   所以去到酒樓都係傾下偈喺度等開席   今次好好喎   因為真係 8 點 20 分開席   比我想像中好好多   菜菜仔真係好擺心機喺婚宴度   又特登拍幾段片喺婚宴度播比賓客睇   真係好正好感動   一啲都唔悶   啲時間仲過得好快添 ~

差唔多 11 點結束   多謝媚媚車我哋到火車站   令我哋慳番唔少時間   不過我番到屋企都成 12 點幾   好眼瞓呀 ~

再此希望菜菜仔婚姻愉快...菜菜子店鋪分佈港九新界 ~

~~~~

頭重重又好眼瞓呀   所以又要飲咖啡提神   今朝食咗芝腿治烘底 + 咖啡 ($15)   番到公司有啲嘢做   咁都好   唔係真係會瞓着 ~

晏晝同新同事 3B 去食牛筋米 ($18)   終於又有新朋友喇 ~

住家飯 @ 媽咪屋企 ( DEC-2008 )

里奧大人要喺韶關開會同過夜   所以就去媽咪屋企食飯同瞓覺   嘆下先 ~

放工即走喇   一番到去見到深愛嘅朱朱係咁撲係咁撲   真係開心到暈呀 ~

之後家姐又番埋屋企   真係好開心呢   又有住家飯食   又可以傾下偈   真係不知幾好呀 ~

今餐有淮山茨實花膠豬骨湯 + 梅菜蒸鯇魚 + 炒菜心 + 甜麵豉蒸排骨 + 花膠燜雞腳排骨 + 叉燒   真係食餸都飽   最嘆係食完唔駛做   仲有生果食   之後一齊睇電視   真係好鬼嘆呀 ~

雖然唔駛做   但都好鬼攰   所以 10 點 45 分就瞓喇 ~

~~~~

今朝雖然 7 點要起身   但都好開心   因為係同媽咪 家姐 深愛嘅朱朱食早餐   講真 7 點幾真係未餓   叫咗個麵餐 (火腿麵 + 炸雞翼 + 熱啡)   好在同媽咪 Share 雞翼   再同深愛嘅朱朱 Share 火腿   唔係真係飽到喉嚨呀 ~

之後再番屋企沖涼同坐陣就番工 lu   晏晝帶飯   正呀 ~

今日好開心   因為里奧大人番香港   唔駛我咁擔心嘛   不過里奧大人就辛苦喇   因為要搭 7 個鐘頭車到深圳   之後打的士去深圳火車站   再搭火車轉巴士先可以番到屋企   坐成 8 個鐘頭車...聽見到辛苦呀   真係心痛死我喇 ~

有病在家休息 (休 Blog 一星期) ( DEC-2008 )

Hello 各位 Blog 友   唔好意思呀   覆唔到妳哋回應呀 ~

我身體不適   要在家中休養   我要休 Blog 一星期喇 ~

   

醫生寫紙比我休息到 19-12-2008    我哋 22-12-2008 再見啦 ~ 

謝謝各位關心 ~

照燒汁牛仔骨 + 菜心 + 隔隔夜湯 ( DEC-2008 )

尋日病假   所以可以瞓晏啲    不過瞓得唔好  因為成日心掛掛打番公司請假呀 ~

11 點起身   唔想瞓咁多   之後就落街食早餐再去街市買菜喇 ~

今次真係有啲攰   但見到有太陽  又有風   所以忍唔住洗衫呀 ~

一心諗住晏啲食早餐  之後喺屋企休息   點知家姐 2 點幾突然打電話嚟   話 Jusco 超市有 9 折   叫我快啲入出前一丁  折實 $3.3/包   唔入簡直對唔住自己   所以就拿拿聲換衫同人搶呀 ~

去到居然無五香牛肉味嘅丁   極度失望呀    但去到唔買嘢又唔心息   所以買咗啲杯麵  雞蛋  年糕  七味粉  魚露  蒟蒻等等   因為有 9 折真係平好多呢 ~

臨走前再問 Staff   出前一丁幾時有貨   佢哋話 5-6 點有貨   咁我一陣再嚟過 ~

6 點準時到 Jusco  點知個經理話對唔住喇   無貨呀 ~

一場嚟到   又見無咩人排隊    所以買包 5 Kgs 櫻城牌珍珠米   折實 $44 咋   咁都好   有啲平嘢執下 ~

雖然我唔舒服   但我都會煮飯嘅 ~

是日懶餐 -   照燒汁牛仔骨 + 菜心 + 隔隔夜湯

照燒汁牛仔骨  + 隔隔夜湯 - 本來係星期一食   但病咗無整到   所以拿拿聲整嚟食 ~

菜心 - 見幾大棵   所以買 1 斤嚟食   食多啲菜好呀 ~

~~~~

今朝番工喇    唔想食得咁油膩   所以食芝腿治烘底 + 奶茶 ($16) ~

番到菇場勁勁勁勁忙   但對住啲數字有啲暈陀陀呀 ~

晏晝同里奧大人食粉麵   番公司途中毛毛雨    又要急急腳行番公司   真係咩都消化哂 lu ~

住家飯 ( DEC-2008 )

尋日本來想煮啲輕便餸   點知里奧大人打嚟話兒甥女之前割盲腸   尋日啱啱出院   所以就叫我夜晚唔煮飯去探兒甥女   順便食餐住家飯喎   都好嘅   橫掂呢排無咩湯水比里奧大人飲 ~

放工就即刻番屋企煲一次中藥...之後再等里奧大人一齊打的去兒甥女屋企...去到原來都好多人㗎    我好開心   因為個個見到我都話我臉色好咗紅潤咗   希望啲中藥真係有幫助啦...今次晚餐餸菜係粉葛湯 + 蒸魚 + 炒菜心 + 脆肉瓜炒蝦仁 + 酸甜排骨 + 豉油雞 + 叉燒   都唔錯嘅 ~

由於我仲要煲藥   而里奧大人又要趕住做公司嘢   所以 8 點半就要走 lu ~

番到屋企好似打仗咁   我忙煲藥又忙執衫   里奧大人忙執衫又忙覆 Email   真係見佢個樣都唔知有無 10 秒呀   陰公   里奧大人要上紹關開大會呀   本來好好㗎   因為呢個 Trip 係 3 日 2 夜 (1 日半係開會   其餘時間去觀光)   但里奧大人星期六要陪我北上睇中醫   所以星期五下晝一開完會就自己搭車番香港   無得去玩呀   好可惜呢   問里奧大人可唔可惜   佢就用勁哀傷嘅眼神同勁無奈嘅語氣話 "老婆緊要啲嘅" ~

~~~~

今朝里奧大人 6 點 15 分就要起身梳洗   6 點 45 分要出發喇   而我又係一樣 6 點 15 分起咗身囉   到里奧大人出咗門口先瞓番   但瞓多半個鐘就要起身番工呢   好攰呀 ~

今朝食即沖麥片   因為發覺開始有買咗唔想食嘅徵兆...所以一定要食   但 3 合 1 嘅麥片好甜呀...之前仲特登買 3 盒添   最慘係唔飽嘛   11 點就要食朱古力   咁樣搞法咪仲肥死   我決定下次一次過沖兩包飽肚啲 ~

晏晝食渴望已久嘅豬扒生菜米線 ($13)   真係好好食   我計埋呢次已經係第 3 次食   唔知幾時食厭呢 ~

今晚會番媽咪屋企食飯同瞓覺 lu   又可以見到深愛嘅朱朱 lu ~

君滬鍋貼大王 @ 大埔 ( DEC-2008 )

尋晚唔想煮飯   所以同里奧大人去君滬鍋貼大王開餐喇 ~

食咗 6 隻鍋貼 + 腸粉 + 上海粗炒 + 菜心 + 豆漿   鍋貼唔好食   因為啲皮好厚   又太大嚿肉   口感唔掂呀   反而最好食係腸粉   好滑呢 ~

食完行番屋企   順便買奇異金果   我食奇異果會喉嚨痕   但奇異金果又唔喎   唔知點解 ~

~~~~

今朝早餐食吉列魚柳腸仔蛋多士 + 奶茶 ($21) ~

番到菇場忙到未停過手   忙到成隻嘢咁   好在晏晝可以同里奧大人一齊食 Lunch   咁都開心啲 ~

冬菇臘腸鯪魚餅 + 蕃茄薯仔魚湯 ( DEC-2008 )

番到屋企擺好哂嘢抖一陣   就去大家樂食 Tea 喇 ~

之後一齊買餸   再去東海堂買 Cake   因為之前儲咗 8 個 Coupon   所以買一送一   抵好多呀 ~

是日晚餐 - 冬菇臘腸鯪魚餅 + 蕃茄薯仔紅衫魚湯

菇臘腸鯪魚餅  -  硬係覺得就咁煎鯪魚餅會好腥   所以都係加埋冬菇粒同臘腸粒一齊煎   真係好味好多呢 ~

蕃茄薯仔紅衫魚湯 - 太耐無飲湯   覺得份外超甜呀 ~

~~~~

星期一番工要食飽啲   咁樣會精神啲   所以食芝蛋治烘底 + 奶茶 ($16) ~

番到菇場忙到爆   連上網都無咩時間呀 ~

突然好想食腸粉   所以同里奧大人去茶餐廳食喇   食鴛鴦腸 (叉燒 / 牛肉) + 薯仔燜排骨飯    晏晝都係唔好食飯   因為真係會飯起攻心呀 ~

婆婆生日飯 @ 紅磡美心酒樓 ( DEC-2008 )

同里奧大人一齊放工去尖沙咀   因為里奧大人想去睇星矢呢 ~

去到尖沙咀首先係醫肚   去海防道街市嘅德發食牛丸河  + 新嘢 (即係麵包頭塗牛油 + 花生醬)   再加多杯凍檸樂   勁滿足呀 ~

去到睇星矢   唔係好多嘢睇啫  不過最正係 1:1 嘅星矢   雖然我唔 Like 星矢   但我都覺得好正呀 ~

睇完又行下海港城   但我朝早太早起身   好鬼攰   所以又去坐下食下嘢咁喇 ~

想坐耐啲   所以去 Triple's o 喇   同里奧大人 Share 食 BC Burger 套餐   今次真係勁飽喇 ~

食完行多陣就出發去紅磡   去到酒樓就同媽咪 家姐   里奧大人打咗一陣麻將就開飯喇 ~

細個嘅時候   成日覺得同阿姨 舅父一枱會好悶   但依家又唔覺喎   因為依家自己都係大人   所以有共同話題呢 ~

今次好喇   11 點幾可以番到屋企 ~

~~~~

今朝同里奧大人食完早餐就番教會 lu ~

里奧大人好好呀   因為買咗幾條裙同 1 對鞋比我呀    其實一早就應該咁做啦 ~