豉椒炒蜆蒸米粉底 ($100) - 其實好大碟㗎 不過我影得差同埋顏色偏白 其實所有餸都影到偏白囉 里奧大人話嘥咗呀 啲餸咁好味影成咁 哈哈 第一次聽佢咁講
堂妹夫好鍾意食煎米粉 但家姐話唔好煎咁多 驚食唔哂
豉油皇虎蝦 ($350) - 呢個超級好味 每人起碼食咗 3 隻 我食完之後都覺得飽飽哋
手撕雞粉皮 - 糟糟同堂妹佢哋講 話家姐邊手撕邊食 話試味喎 講到家姐好似食咗好多咁 哈哈
蘿蔔清湯腩 ($470) - 呢個好味 糟糟前一晚整定 所以佢連埋個港女煲拎嚟 咁真係好重 唔怪得要家姐幫手拎啦
荷葉飯 - 連個籠都拎埋嚟 我初初以為係蒸鏝頭 哈哈
今次啲料仲多過上次 堂妹鍾意食鵝肝腸 但加拿大無得買囉
東星斑 - ($500) - 每條食剩 1/3 呀 咁我食啦 家姐又係咁叫我食 如果我唔食又以為唔鍾意食㗎喇 本身有煎蓮藕餅 好在最後無煮 唔係又要打包
薑汁炒芥蘭 - 食剩少少 無計啦 食主菜食飽 哈哈
腰果露 - 表弟居然話食多碗 之後佢仲話好好味
糟糟整嘅姑姐嘅素食晚餐
素生菜包 (蘿蔔+粟米+冬菇+沙葛)
素香茄子 (冰豆腐+茄子)
素雞絲粉皮
素炒飯 (冬菇+芥蘭+脆肉瓜+芋頭)
日本香印提子 ($150) 另外仲有 2 個梨 好似 $165/2 個 但真係好甜好多汁 最衰無影到相
今晚開兩張枱食飯都傾到偈 真開心
家姐屋企都有雞碗 仲有大中細碗匙更 咁可以每樣 2 件比堂妹 佢哋好開心呀 因為有啲 Size 喺加拿係買唔到呢
( 10-OCT-2024 THU )
今朝瞓到 10 點半 梳洗之後就去食早餐 lu ~
呢排好多嘢搞 好在今日放假 可以喺屋企慢慢搞 ~
早餐仍然未落格 但想食少少嘢 所以叫里奧大人食個半蛋糕仔 我食半個就可以了 ~
2 點左右出發去油塘 叔叔嬸嬸佢哋 3 點鬆啲就到 我哋要分開的士上去 我就同叔叔 嬸嬸 姑姐一部 里奧大人就同堂妹 堂妹夫 表弟上另一部 ~
家姐要幫糟糟拎嘢去佢屋企 所以今日嚟唔到 叔叔佢哋之前會燒嘢 因為家姐會買埋 但佢哋知我信教 所以就話唔燒嘢喇 叔叔話有心就可以啦 其實又係真 生前對父母好 好過死後燒乜燒物 ~
望住爸爸媽咪張相 今日真係忍唔住喊咗好耐 心諗如果爸爸媽咪在世就好啦 難得叔叔嬸嬸退休有時間番香港 估唔到堂妹都係咁喊呀 佢十幾歲都嚟過拜爸爸 佢哋次次回港 都會預留時間去拜祭 真係有心過我呀 ~
燒埋支煙就走喇 表弟同堂妹夫自己行去同爸爸媽咪拜 3 拜 ~
因為堂妹夫係鬼仔 但堂妹就話佢係知道呢度係拜祭嘅地方 佢仲比張紙巾比我 再叫我比張喊濕咗嘅紙巾比佢 我當然唔比啦 雖然佢話唔 Care ~
填場其實真係一個風涼水冷嘅地方 有陣風吹埋嚟真係好舒服 之後佢哋真係周圍睇下 因為佢哋好好奇呀 哈哈 ~
4 點 15 分走人 我話喺大門口影張合照啦 估唔到佢哋對里奧大人嘅自拍神棍好有興趣 叔叔堂妹同姑姐每人要一個 希望喺佢哋臨走時收到貨啦 ~
等的士都等咗好耐 好在大家都有偈傾咋 哈哈 ~
今日天氣好清涼 感恩感恩
叔叔話等啲後生行下 同埋飲下嘢 因為今日都好熱 咁我哋就搭的士落大本型 我話有間糖水店 所以就入去食嘢喇 ~
里奧大人佢哋等咗好耐的士呀 所以 5 點先到 ~
芒果雪泥芋圓 ($36) - 我同里奧大人 Share 食嘅 芋圓都煙韌同埋有餡 第一次食到咁咋
宇治牛乳芋圓 ($36) - 堂妹兩公婆 Share 食嘅 佢哋話留肚食晚餐 哈哈
仙草特盛 (熱 $38) - 姑姐同表弟 Share 估唔到表弟鍾意食熱嘢 叔叔食薏米腐竹雞蛋 (熱 $24) 嬸嬸就食紅豆西米撈 ($26) 不過我無影相
食完又行陣商場 嬸嬸佢哋買咗啲話梅 堂妹話點解叫鹹濕嘢 ?! 我話我都唔知點解 哈哈 ~
之後去到天上野 堂妹兩公婆見到雞碗就好開心 佢哋話就係想買呢個 Size 我叫佢哋買啦 當做我送比佢哋嘅結婚禮物 當時疫情 想去都去唔到呢 ~
買完就一齊搭地鐵去家姐屋企 我同佢哋講 Berry 只係聲大 一見人多就會呢埋囉 ~
一入廚房就見到糟糟 感覺好特別 哈哈 但真係好感激佢嚟煮飯比我哋食呢 ~
糟糟係逐樣逐樣煮 工人都只係企喺佢後面 無嘢可以幫手 就算切粒粒都係糟糟親手切㗎 ~
糟糟密密煮 辛苦佢了
姑姐食齋 所以糟糟就煮比姑姐先 今晚差唔多 7 點就開餐喇 我覺得喺屋企食真係舒服好多 ~
本身去會所食 不過拎嚟拎去好麻煩 家姐屋企原來又可以坐到 12 人 咁不如喺佢屋企食好過 大家又可以同 Berry 玩 ~
糟糟一出嚟 就同堂妹夫話我哋係青梅竹馬嘅朋友 但唔 Sure 其實同佢又係識咗好鬼耐 所以佢同我屋企人又係咩鬼都講 ~
講起狗仔 堂妹都記得豬豬 嗰時佢都成日抱住豬豬㗎 咁我問佢記唔記得豬豬係咩樣 ?! 佢話係 Pomeranian 之後仲喺家姐電視枱拎咗豬豬張相比我哋睇 哈哈 ~
好耐以前堂妹嚟過 2 次 佢同糟糟講話我送過 Swatch 錶同 Canon 相機比佢 我話我都唔記得 咁再之前托嬸嬸比個紅色格仔袋比佢 佢話依家仲用緊 佢哋真係好珍惜我哋比佢嘅嘢 叔叔真係教得好好呢 ~
叔叔話帶咗堂妹去我同家姐小學嘅學校 之後話爸爸成日望住我哋唔願走 呢樣真係唔知 哈哈 ~
姐夫話家姐幫個妹幫到呢 里奧大人又係咁講 咁我都承認 其實佢唔錫我就驚啦 ~
咁我入房拎禮物比堂妹 家姐細細聲話比咗封利是比糟糟 我話係咪 $500 ?! 佢話唔係 我再話 $1,000 ?! 佢都擰頭 之後話比咗 $3,000 呀 仲要我唔好同里奧大人同姐夫講 我話又會比咁多嘅 家姐就只喺度笑 不過係糟糟就無所謂啦 因為佢對家姐都好好呢 ~
家姐同糟糟依家成日見面 仲多過我見家姐 不過佢哋成日有嘢要搞 真係約佢哋就好鬼難囉 唔係我都唔駛晨咁早搵家姐啦 ~
糟糟 8 點左右要走喇 仲話叫我哋下年去佢屋企食飯 原來佢同叔叔嬸嬸已經第 3 次見 咁第時夜晚食飯真係靠佢喇 呵呵 ~
Berry 今晚全程坐喺枱底 仲望住表妹夫嗰邊 我同里奧大人都覺我表妹夫好靚仔 但我唔敢望佢咁多 唔係佢驚咗我 哈哈
里奧大人踩 Berry 呀 咁當然輕輕力啦
堂妹夫比零食佢食 佢慢慢行過去食
到堂妹餵佢食零食喇 堂妹都領養咗 2 隻狗仔 1 隻係 50 磅 1 隻係 70 磅 我記得有隻係 5 歲
Berry 肯食 堂妹仲開心過佢 哈哈
點都要望住後生嗰邊 哈哈
表弟係咁摸佢 仲細細聲叫堂妹睇添呀 平時 Berry 見人多實會呢埋梳化底 今晚真係好乖女呀
食下傾下 好快就到 9 點半 係時候走人喇 ~
臨走前 家姐派利是比所有人 仲派埋比我同里奧大人 真係比佢激死 ~
糟糟公司設計嘅利是封 家姐話佢有份諗喎 我哋咪話揀紫色囉
家姐 Call 車比佢哋番酒店 我哋一齊送埋佢哋上車就即搭車走喇 感恩趕到班車呢 ~
估唔到里奧大人對糟糟手勢讚不絕口 仲講咗好多次好食同埋多變化 咁就好啦 大家都食得開心 哈哈 ~
番到屋企即沖涼 再睇陣新聞 差唔多 12 點幾先瞓呀 ~
沒有留言:
發佈留言