新興發粥店 @ 紅磡 ( 17-OCT-2024 )

白粥 ($12) - 我今日中午食咗艇仔粥   所以今晚食白粥

炒麵 ($14) - Share 食但一定唔可以落辣醬同芝麻

艇仔粥 ($21) - 里奧大人食嘅

脆炸兩 ($14) - 我唔敢食啦   里奧大人話油炸鬼好脆

( 17-OCT-2024  THU )

尋晚如果唔係咳   基本上都係瞓得好嘅   但一咳就係咁流眼水   所以今朝對眼係腫咗呀   好似喊完咁 ~

仍然失聲   所以里奧大人整咗念慈奄比我拎番公司飲呢 ~

同里奧大人出去食早餐   我要 Whatsapp 比里奧大人幫我叫早餐呀 ~ 

菇場唔忙啦   但對眼好紅   同埋好多綠色眼屎   好恐怖囉   上網睇係細菌入眼   好在今晚睇醫生咋 ~

100 PLUS 由朝擺到晚   最後都無係飲過

Lunch Time 出去食皮蛋艇仔粥   食完都番菇場休息喇   其實番到菇場係仲唔舒服   但真係好攰   唔想周圍行囉 ~

失聲又係咁咳   真係好鬼麻煩   阿蟲叫我做嘢   我都係寫紙仔覆佢咋 ~

屋企附近又無咩西醫   要行都好遠先有   里奧大人上網搵咗間   睇到對醫生嘅 Comment 都幾好   所以就決定睇呢間 ~

之後里奧大人叫我打比佢   我即 Whatsapp 話我都話失聲咯   點打比你呀 ?!   頭先中午又叫我打比佢   真係有啲火   開到聲就唔駛 Whatsapp 問來問去啦 ~

係咁咳   咳完又要呻鼻涕   真係全公司都知我病   同埋佢哋見我眼腫   叫我請病假啦   我話咪搞   上星期一病星期三又 Off   再請就唔好啦 ~

放工即去睇醫生   點知遲咗 1 個站落車   又要行番轉頭   好在啱啱 6 點鐘到咋 ~

里奧大人今晚一定要陪我睇醫生   因為我開唔到聲   我寫好哂病徵比佢睇   叫佢同醫生講   哈哈 ~

醫生話我肺無問題   即係唔係肺炎   喉嚨就腫咗   同埋喉嚨啲菌上咗眼睛   所以眼紅眼腫   要滴有抗生素嘅眼藥水  ~

但開番聲就要等耐啲喇   始終喉嚨好深要啲時間呢   之後里奧大人同醫生講因為佢食咗辣嘢   醫生笑住話因為咁樣而刺激到   變咗失聲呢 ~

都估到里奧大人點都要講我食辣嘢㗎喇   佢好似啲細路仔咁   係到要篤人出嚟   哈哈 ~

今次藥費好平   我覺得係良心價   不過最希望係啲藥有效呢 ~

里奧大人話食粥   我都知道佢實話食粥㗎喇   因為我上次食唔到嘛   之後我話今日已經食咗   不過醫生叫我食啲腍同軟嘅嘢   咁再食粥都無問題嘅 ~

食完就行番屋企   行咗半個鐘都有   之得搭車啦   哈哈 ~

番到屋企即沖涼   抖陣再食藥 ~

睇陣電視   今晚 8 點 45 分都瞓覺喇 ~