綱記車仔麵 @ 紅磡 ( 5-OCT-2024 )

麻辣鴨腎 & 豬腸粗麵 ($40) - 辣汁唔錯

魷魚 &豬潤 & 麻辣牛肚粗麵 ($40) - 份量都唔少

甜酸齋分開上又好喎

( 5-OCT-2024  SAT )

今朝瞓到 9 點半先起身呀   不過我話喺屋企煮早餐食呢 ~

我特登煮丁丁比里奧大人食   等佢開心下   哈哈   咁我會蒸熱啲五香肉丁   佢會覺得我辛苦   我話蒸熱之嘛   同埋我接受唔到凍冰冰嘅肉囉   出去茶記食就話迫住咁食啫   自己煮就一定唔會咁 ~

食完抖陣就洗嘢   搞掂就開機洗自己張冷氣被   里奧大人就熨衫 ~

再執下呢樣嗰樣又已經 12 點 45 分   沖埋涼再抖下就要出去   里奧大人就自己買午餐番屋企食喇 ~

今日我同石頭去食午餐   最搞笑佢約 1 點 45 分   但話 1 點放工所以 1 點半會出現   點知佢 1 點 55 分先出現啦   因為開 OT 到 1 點半呀   我話下次唔好講自己準時放工   好邪㗎   哈哈 ~

一見面就話終於可以一齊食飯喇   其實佢約咗我幾次   但好多時我約咗里奧大人   同埋星期六去家姐屋企會比較遲番   本來今次都食唔到㗎   咁啱家姐唔得閒咋   因為本身真係同佢食埋午餐先番屋企囉 ~

其實間唔中都有 Whatsapp 傾偈   但見面就更多嘢講   所以今日食得一個鐘係唔多夠時間   哈哈 ~

石頭又係鍾意食泡菜

石鍋牛肉拌飯 ($60) - 呢個都好味   石頭又係鍾意食牛肉   同我一樣   呵呵

韓式炒雜菜粉絲飯 ($60) - 石頭想食就叫啦   不過我哋都話有飯好怪

食完就一齊去 LA 事奉   咁我幫個小朋友按住幅畫   佢話唔駛   我話無問題啦   佢話我樂於助人   我都忍唔住笑咗出聲 ~

好多用具   其實我都唔識點用   所以我覺得自己係玩埋一份咁   哈哈

事奉完就去萬寧買目清素   不過無貨   但今日有 9 折   所以我會比咗錢先   之後有貨先拎 ~

去埋上海店買嘢   番屋企放低嘢就去里奧大人公司幫手喇 ~

搞掂就同里奧大人番崇拜   今晚有問答遊戲   我 5 題答啱 3 題   當答第 3 題嘅時候   第 1 位係 1,976 分   我同里奧大人講話我只係 972 分咋   但估唔到遊戲完畢   我係第 1 位係呀   我同里奧大人都呆咗呀   因為我用別名嘛   咁肯定係我啦   哈哈 ~

呢隻蒟蒻都好食㗎   但多數做特價先買嚟食

今晚想食車仔麵   我同里奧大人講依家帶飯   所以出去就好想食湯粉麵呀 ~

里奧大人食完要番公司整嘢   我就番屋企喇   因為要開機洗衫   搞掂就沖涼 ~

諗住食冰皮月餅   但里奧大人 9 點半先番到屋企   咁唔食 lu ~

打下機又睇下 Youtube   今晚 10 點 45 分先瞓覺 ~