和民 @ 大埔 + 註冊日 ( SEP-2007 )

諗起里奧大人將要面臨節衣縮食嘅困窘生活   為的是要買扎花送比我   真係心甜到漏呀   真係估唔到里奧大人會咁睇重結婚週年呢個日子   所以尋日真係由朝開心到晚呀   同好感動呢 ~

其實之前想買張卡送比里奧大人   但諗起屋企有好多做裝飾既萬用卡   想用嗰啲嚟送比里奧大人   但諗下諗下覺得咁好似好 Cheap 咁唔好嘅   所以都係唔好送喇   驚里奧大人唱我成世呀 ~

尋晚同里奧大人去和民   因為我好鍾意果度柔和嘅燈光   同埋最緊要係無咁嘈   我哋食和民沙律 (全份) + 燒雞軟骨串 (醬燒) + 辛辣蕃茄年糕 + 蟹肉壽司卷 + Asahi (Medium Mug).   初初驚唔夠   想再叫其他野食   但食下食下就好飽   真係唔好睇碟年糕 Size 細細   好鬼飽肚㗎 ~

聽到隔離枱有對年老嘅母子同一個女仔一齊食飯有傾有講   佢哋一路食一路傾   望下佢哋啦   原來個女仔係個印傭嚟   初初仲以為係一家人添   聽佢哋講個工人仲啱啱結完婚番嚟   仲同工人講話唔見妳肥嘅 ?!    個工人話肥咗喇   有成 50 Kgs 喎   一聽到話 50 Kgs 好羨慕呀   如果係我就好喇   好懷念 50 呢個數字呀 ~

之後同里奧大人行咗陣   睇到有盞床頭燈好靚   $199 呀   好貴呢   Sales哥哥話貴買平用同埋比 Discount 我哋喎   咁買囉   橫掂想換床頭燈好耐   好開心呀   可以買到自己鍾意既嘢 ~

番到屋企第一件事就係查唇彩同扎花影相   第二係連人帶花係咁狂影   仲叫埋里奧大人一齊影   好無聊   好在里奧大人肯幫我影咋   影下睇下都搞成半個鐘呀 ~

之後同里奧大人講   話不如你將啲花擺落花樽度啦   意想不到   真係意想不到里奧大人溫柔的話好   但當然   最後都係我啦   因為我等咗一排都唔見里奧大人有咩舉動 ~

沖完涼之後都仲係覺得好飽咁   所以就熨衫嚟燃燒脂肪   同埋睇下新聞   同里奧大人一睇就睇到啲人做伸條脷嘅動作   一齊話係 Yoga 最高境界呀   因為好多年前睇過一本關於做 Yoga 嘅書   一睇就睇到呢個最高境界動作   嚇死人咩   最搞笑被訪者話做呢啲伸脷動作會減退縐紋   唔係嘛   吖大個口唔係應該啲紋仲勁咩   唔係點解啲女人唔敢大笑呀   .之後再叫里奧大人吖大個口比我睇下有無紋   係會有勁多紋㗎 (註: 因為里奧大人本身年紀老邁好多紋   再加上做埋呢個動作)   其實唔知有無人信做呢個動作會減退縐紋呢 ~

呢兩晚都成 11 點 45 分先瞓呀   因為掛住玩 NDS 太鼓玩到唔想停呀 ~

~~~~

今朝又係食番芝士火腿菠蘿包 + 涷央 $15 (原來涷熱飲同價)   不過今次啲芝士唔係咁溶   不過都好好食   原來菠蘿包走皮係無咁滯   不過加埋芝士火腿都好飽   唔知自己講咩呢 ~

番到公司老規矩啦   無嘢做   朝早太飽喇   所以晏晝食車仔麵   食咗菜肉餃 + 通菜 + 米粉 ($13) ~

今晚係我第一晚讀初級輔導班   希望夠精神啦   哈哈   聽日我 Off   但里奧大人約咗媚媚做功課呀   人哋難得 Off 家嘛 ~

對唔住呀里奧大人   呢幾晚都出街食   無煮到愛心晚餐   下星期啦   下星期整啲我覺得好嘅嘢比你嘆下啦 ~

很想念的元綠壽司 ( SEP-2007 )

尋晚放工真係好攰同作嘔作悶   我覺得係早餐未落格就要食午餐   同埋室內有過多悶氣嘅既關係   所以好唔舒服呀   公司又涷喎   行到街都覺得好涷呀   我又驚坐車會好涷   所以去咗超市兜一個圈   出番嚟真係有啲熱喎   但一上車又變番好涷呢   之得唔好懶   拎條披肩放喺袋度啦 ~

同里奧大人講   我真係唔係咁舒服唔想煮飯...里奧大人就話咁食壽司啦   因為我鍾意食   但中醫叫我唔好食咁多生嘢   所以我比自己一個月食兩次 ~

落車行左一陣 Jusco   買左兩本 $6.9 既 PM 單行薄   之後再買多本 Little Twin Stars 單行薄   仲抵 $5.9 咋   總之比我買到野我就好開心   咩唔舒服咩悶氣就會無哂㗎喇 ~

又係去元綠食   因為我覺得款式多個元氣   有拉麵呀 Pizza 小食之類   唔洗淨食壽司咁悶   其實不嬲食開元綠   食到做左會員   之後覺得元氣好食啲   又博老命去食到可以申請會員卡   點知做咗佢既會員之後到頭來食番元綠   搞野 ~

我哋食咗三文魚 / 素翅 /  炸天婦羅蟹柳既尋司 + 太卷 + 蠔情卷 + 三文魚手卷 + 冷辣辣麵 + 中華沙律 + 麵豉湯   嗰刻我都夠飽   但 9 點幾就有啲餓   整咗個杯麵食   其實係口痕居多   所以就叫里奧大人食一半先   佢哂啲料呀   成個杯麵得 3 塊比較大嘅魷魚片   佢一夾就夾左兩片呀   仲話好飽好飽咁   之後我就真係飽喇   齋食麵   脹死添呀 ~

之後叫里奧大人食生果   我發覺左好耐   就係里奧大人好興食剩兩三嚿就話好飽喇   妳食啦   我初初都會食    但之後就唔會食喇   因為要洗埋個盒   呢個肯定係里奧大人既詭計   咪當我傻呀 ~

~~~~

今朝早食咗個芝士火腿菠蘿包 + 熱咖啡 ($15)   我覺得自己好似啲男人咁   因為男人好鍾意朝早食菠蘿包   估唔到個包熱㗎   啲芝士仲係溶左果隻添   可惜個皮腍咗啦...索性唔食塊皮 lu   橫掂塊皮好鬼肥   我拻塊皮嗰陣時   突然間好掛住好掛住里奧大人呀   因為里奧大人係永遠唔食皮㗎   話熱氣喎   突然覺得自己好孤零零添 ~

今朝 CC 請左早上假   茄子又上咗廠   里奧大人又彩我都傻   公司又無野做   咁嘅時候我咪寫下 Blog 囉   好在自己識搵節目 ~

今朝我真係好開心好驚喜   因為里奧大人送花比得呀   咁啱個 Receptionist 行開咗   有個同事叫我收嘢   一望原來係扎好靚既花呀   再睇埋張卡啲字跡   係我嘅里奧大人送比我㗎   非常非常非常開心同好感動呀   再睇埋張卡啲內容   令我眼濕濕添呀 ~

今日我心情大好呀   多謝您呀里奧大人   我愛您 ~

蒜泥白切肉 + 蒸水蛋 + 節瓜鹹蛋瘦肉湯 ( SEP-2007 )

尋晚放工唔知點解好攰好攰   無無聊聊打比里奧大人講我放工喇   咁里奧大人就叫我煮啲清啲嘅嘢   因為有痱滋喎   我本來想話唔煮家嘛   講到咁   唔煮都唔得啦   又要唔熱氣既餸...咁即係得蒸啦 ~

我淨係諗左瑤柱絲蒸水蛋一樣咋   諗咗好耐   終於比我諗到節瓜鹹蛋瘦肉湯 + 蒜泥白切肉   因為我哋唔係食好多肉   所以$10 豬肉已經好足夠 lu   仲可以一豬兩味做埋蒜泥白切肉   醒呀   有湯有瓜有肉又有蛋   夠哂營養豐富啦 (我覺得) ~

拖着疲倦既身驅去買餸   買完餸就慢慢行番屋企   但時間唔等人   .因為里奧大人告知已經上車回家途中   所以番到屋企唔理咁多即刻洗手開工   第一係用鍋隔水蒸瑤柱   因無時間浸軟   第二係蒸嚿豬肉   因為要煮成半個鐘   第三係切節瓜鹹蛋剪豬肉粒嚟滾湯   呢個湯真係滾到好悶   不過勝在方便   所以我用切薯條紋既刀嚟切粒   無咁悶呀   第四係切蒜頭   第五係拻瑤柱絲   之後要出去迴避下   因為雙爐出火好慶呢 ~

等里奧大人番到嚟就蒸水蛋 lu   用史雲生清雞湯既 Recipe 嚟整   一盒細嘅清雞湯 + 4 隻蛋 + 個人喜好既瑤柱份量   加啲蔥花同豉油   再加少少熟油   搞掂   之後將嚿豬肉切薄片再平放喺碟度  用醬油膏加麻油加蒜泥溝埋一齊淋喺面   呢個菜式係睇亞蘇喺雜誌教人整嘅   終於得物有所用喇   個湯呢   無咩特別囉   整咗咁多年   至在有啖湯飲下咁啦   個蒸水蛋超好味呀   好滑好滑呀   多謝你呀史雲生 ~

尋晚異常感動   因為里奧大人真係好暴力咁搶咗我對手套嚟洗碗呀   但男人始終係男人   都係無手尾同唔夠細心   呢個電飯煲洗完又唔 "Cup"好去   啲碗碟又分開哂擺   有個大既盆放碗碟筷子家嘛   仲要比我睇到個煲蓋無洗到呀   仲駁咀話洗咗添   又唔將廚房個垃圾袋拎出嚟掉   抹手布又唔洗番乾淨   里奧大人真係單一方向諗嘢   就係 "只係洗碗"   之後又係要我執番好廚房啲嘢   不過唔駛洗碗真係舒服好多㗎   唔駛咁熱嘛   不過我都唔係他他條條坐喺度㗎   我喺度燙衫㗎   所以   一樣係咁辛苦 ~

尋晚 11 點就瞓喇   因為真係好攰 ~

~~~~

今朝早諗住食麥記嘅豬柳漢堡 + 熱咖啡 ($12)   但原來已經無咗喇   Cashier 話不如叫個餐仲抵   所以咪叫煙肉蛋漢堡餐配熱咖啡 $17.5 呀   心痛死我咯   因為我唔係咁好食薯餅   又熱氣又肥   嘥哂 ~

番到公司居然有野做   所以無時間睇 Blog 睇報紙   但 MSN 就絕對無問題   話咁快到 Lunch Time 喇   但未餓噃   抖咗 20 分鐘先有 Mood 想食   但今次真係好嘥   掉咗 1/3 呀   因為可能喺唔肚餓既情況下食飯   所以好想嘔   唔想再食落去呀   搞到呢家仲係悶悶滯滯咁   下次都係唔去食麥記喇 ~

黑椒牛仔骨 + 細心炒粒粒 + 清熱夏枯草 ( SEP-2007 )

尋晚老規矩準時放工   可以好好好休閒咁去買餸   因為之前已經醃好咗啲牛仔骨   咁睇亞蘇佢炒粒粒嚟蒸粉卷   所以突然間想炒粒粒...咁晚餐就煮炒粒粒 + 黑椒牛仔骨喇   買左大大隻既紅椒 + 黃椒 + 青椒 $13 好貴呀   之後再買 2 件五香豆腐乾   咁就番屋企 ~

番到屋企見到深愛既里奧大人   好開心呢   難得佢咁早番到屋企呢   心諗   咁又幾好喎   橫掂今晚炒粒粒   啲牛仔骨又醃好咗   好快食到飯啦   點知太高估自己喇   因為切粒粒真係要用頗多嘅時間   同我又加啲菜脯呀   免治豬肉咁呢 ~

當我切豆腐乾都好有心機笑哂口嚟切嘅   再切黃椒時仍都好用心機嘅   但到青椒嘅時候已經開始極度後悔做咩鬼整炒粒粒呀   之後切紅椒同菜脯時已經開始有啲憎佢哋   係咁劈係咁劈呀   不過好在最後都順利完成樣樣都切得好靚 ~

之後呢   又學人買樽黑胡椒粒番嚟   煮黑椒汁時辣啲惹味啲   點知又係要 "Dup" 餐死嘅   又嘥咗啲時間嚟整喇   又諗起啲汁加粒粒會靚啲   又再拎啲粒粒再切細啲   顛㗎   但點解影出嚟差唔多 Size 既 ?!   切粒粒啲咁嘅嘢都加加埋埋都搞咗我半個鐘呀   終於放下屠刀   開始煮牛仔骨喇   我 Like 慢慢火煎   之後放上碟再淋啲黑椒汁喺面   一個字正   之後炒粒粒   我將免治豬肉炒熟咗   再加豆腐乾同菜脯去炒   熟哂就再放 3 色椒去炒   再落蠔油同麻油黎調味   又係好正 ~

里奧大人見到都話我好有心機煮   好靚呀   哈哈   唔好食賣相都絕對呃到人嘅   但唔係講笑   真係好好味喎   可能兩樣餸我都好鍾意食啦 ~

由於有夏枯草嘅關係   所以我無滾湯   費事飲太多野要成晚去洗手間呀 ~

差唔多食完飯   里奧大人好主動話佢洗碗 ~

我真係由心裡面笑左出嚟   係苦笑   次次咪又係我洗   我多數用熱水洗碗   覺得乾淨啲   咁就叫里奧大人開爐啦唔   其實想睇下佢係咪真係有作洗碗嘅跡象   哈哈   佢真係就咁開完就算呀   無話等佢洗呀 ~

都話啦   講咗崶算   咁咪又係我洗囉   越洗越慶   係因為熱水啲蒸氣係咁蒸我塊面度   唔慶先奇   哈哈   洗完之後就入書房眼啤啤同里奧大人講 "又話你洗 ?!"   里奧大人就用哀怨既眼神話: 妳次次都唔想我洗㗎啦   驚我辛苦嘛   我今晚切生果比妳食吖   咁又係喎   我又真係次次都係咁喎 ~

喂喂喂   切生果 ?!   好似我已經將個哈蜜瓜切哂粒粒放咗喺雪櫃喇噃   你切咩呀 ~

尋晚好天又可以跑步喇   跑左半個鐘就番屋企 lu   沖涼之後就食生果睇下雜誌嘆下喇 ~

~~~~

唔知點解我成日瞓覺都會發夢嘅   咁慘啦   等如無瞓過   今朝仲要陰陰天又落雨...睡意仲勁 ~

今朝食早餐好唔開心   因為三文治餐加咗價呀   由 $13 加到 $14 呀   不過都無辦法啦   因為成日喺公司真係好悶   所以我都會喺出面食埋早餐先番公司嘅   今朝食吞拿魚三文治烘底 + 熱鴦 ($15)   好唔捨得呢 ~

Lunch 食悶悶隔夜飯囉   可能隔咗一夜啲牛仔骨梗加入味   好鬼辣呢   之後去百佳買左罐番茄膏以備屋企不時之需   比錢先知星期二無膠袋日呀   好在咁細罐好易拎啫 ~

今日無嘢做兼且 CC 勁忙   所以今日我勁悶   仲好眼瞓添呀   講出嚟好似好好咁呀無嘢做   箇中滋味   真係極不好受㗎   我仲係對住個鐘添   望住啲時間慢慢慢慢咁過   真係比死梗難受呀 ~

茄汁燴雞柳 + 磨豉醬炒脆肉瓜 + 番茄紅衫魚湯 ( SEP-2007 )

尋日鬧鐘響咗   但灘咗半個鐘先願起身   太攰喇   所以拿拿聲焗個福麵食就番教會喇   尋日喺係守主餐嘅關係   所以就比較遲少少先散會   之後同里奧大人去街市熟食檔飲茶   食咗蝦餃+雞扎+山竹牛肉+炸兩   好飽呀   之後再食阿婆豆腐花   顛咗呀   食咁多野 ~

食完就同里奧大人橫掃日本城 Jusco 百佳 街市   我發覺呢期嘅節目就係同里奧大人去超市同家品店買嘢   無計啦   近屋企嘛   因為里奧大人忙讀書又忙做功課   地方唔可以超過屋企範圍 100 公里   咪唯有行呢啲囉   不過我都好開心   .因為可以買嘢   .唔知點解無時無刻都想買嘢嘅呢   一個人嘅時候仲更加厲害   明知有嘅都會買   無就梗加唔洗講   呢期手痛唔可以拎咁多重野   唔係仲買得勁呀   因為我買野唔會 1 支支 1 件件咁買   一買就係 4 件咁買   不論大件細件   以前買廁紙都會買定 6-7 條   比里奧大人 朋友 屋企人問係咪顛   話住村屋就話啫   超市喺附近咁方便   洗鬼嘥地方擺同埋幫人清存貨咩...所以我先盡量買少啲咋   幾唔慣呀 ~

見里奧大人話熱氣   所以我就即刻煲夏枯草比佢飲   之後心癢癢   就試焗個牛油蛋糕   成功呀   仲好好味添   係我同里奧大人都覺得啫   我真係好怕開焗爐整野呀   因為我上 2 次整曲奇都唔得呀   搞到我情緒極之低落 + 無哂信心   所以好抗拒焗野   今次成功真係有莫名嘅興奮   自信心番哂嚟喇   哈哈 ~

尋晚煮茄汁燴雞扒 + 磨豉醬炒脆肉瓜 + 蕃茄紅衫魚湯   唔好睇好似好簡單咁   我用咗千萬倍心機嚟整   雞扒起皮切少件嚟醃   個汁用茄汁 + 喼汁 + 紅蔥頭蓉 + 蒜頭蓉 + 薑絲   要好細心處理㗎 ~

脆肉瓜就易啲   炒完焗下就得   個湯又係唔簡單㗎   因為我最怕整魚   仲要親手將條魚用鹽醃   煲湯之前又要煎一煎   番茄又難拻皮   其實係唔想洗多個煲既關係   好煩㗎   鬼叫自己想飲魚湯咩   不過唔知係咪無落薯仔索油   好似好多油呢 ~

條街仲係濕濕哋   無得跑步添   唯有做下家務郁下啦   之後仲敷埋 Mask   睇下報紙   食下生果   再睇埋阿蘇就瞓 lu   因為星期一唔夠精神番工係一件好慘嘅事...仲有就係 CC 放假   無得同佢 MSN 傾下偈   20 幾萬個慘呀   CC 對我嚟講真係好好好好好好重要㗎   當我開工的時候...哈哈 ~

~~~~

今朝食咗腿蛋治 + 熱鴦 ($14)   兩個字   悶 + 飽 ~

番到公司都好忙呀   忙寫 Blog 同埋同茄子 MSN 囉   係咪顛㗎   呢啲叫忙 ~

晏晝又係食番尋晚嘅餸   覺得好難食添   可能悶悶不樂   影響食慾呀   漫長嘅日子   叫我一個人點捱呀 ~

里奧大人呀   你仲要讀多年半 MBA   我好慘呢   又唔敢成日開口叫你陪   驚阻住你做功課   同朋友去街又驚你食埋出面啲嘢無益   同埋又覺得自己好似好衰咁   你咁辛苦讀書做功課   而我就咁辛苦同朋友 Shopping 買嘢唔係咁好   咁點好呀   咁啦   不如你每個星期比千零二千蚊零用錢我啦   等我可以買下野散下心平衡一下   大家體諒下咁啦   哈哈 ~

又係悶蛋...韭菜豬肉水餃 + 灼芥蘭 ( SEP-2007 )

星期六晏晝出去拎番部手機   熱鬼辣辣之後又無啦啦落過雲雨   好辛苦呢  好在今次唔算等得太耐咋   問 Counter 點解又壞   佢答話係因為又再 Upgrade 咗個再新啲嘅底板喎   都唔知係咪   里奧大人嗰部又無事  何必偏偏選中我   前年買咗部電話又係成鬼日壞   半年整咗 7 次呀   係咪 3G 仲未掂㗎 ~

番到屋企 3 點幾呀   餓到發顛   即刻同里奧大人去大家樂食 Tea ~

我覺得大家樂啲黃光好柔和   心情都靚啲   我食咗 Pizza + 蜜汁燒雞翼配可樂   里奧大人食阿伯餐   燒鴨湯瀨配可樂   好好味呢   之後番屋企楂架車仔去百佳掃貨   咁啱又做 $50 有 95 折   所以滿載而歸呀   其實最主要係難得里奧大人陪我買嘢嘛   無謂嘥左佢練咗好耐對強而有力嘅雙臂吖   哈哈 ~

行下買下番到屋企成 6 點   咁即係又係我最忙嘅時候   .番到去即刻醃好啲豬肉韭菜   洗菜   整下其他嘢   搞到差唔多 8 點先食飯...韭菜豬肉水餃 + 灼芥蘭   都好嘅   因為可以一路睇阿蘇一路食飯...不過今集有啲無聊   講有個人親眼睇過 4 次 UFO   我覺得佢似撞鬼多啲囉 ~

洗完碗   沖埋涼就真係休息   睇下報紙   睇下電視   之後瞓 lu ~

黑椒西冷牛扒 + 楊洲炒飯 (大家樂外賣) ( SEP-2007 )

尋晚又要去 Nokia 整電話   好煩呀   電話呀電話   唔該妳壞就壞得徹底啲啦   唔好時聽話時而唔聽話至得㗎 ~

等同整差唔多 1 個鐘   之後打比里奧大人   佢仲喺公司 OT   所以我就去 Laneige 買咗 Water Bank 同唇彩   旺角無時無刻都勁多人   真係無咩必要我都唔會去呀 ~

番到屋企差唔多 8 點 45 分   里奧大人話去大家樂喎   好啦   咁就叫咗西冷牛扒 (黑椒汁) 配雪糕香蕉船再加錢轉紅豆冰同楊洲炒飯喇   救命呀   離遠見到我杯紅豆冰有雪糕嘅   人家減緊肥家嘛   同埋食咗點食野呀   咁我又無諗過會有雪糕   所以我叫里奧大人食咗去   里奧大人仍係減肥進行中   好可憐呢   食到尾聲都係食唔哂啲飯   咁就去攞雪糕香蕉船   不過我食咗少少   因為真係好飽   咁里奧大人話唔好嘥又食埋   由於餐飯真係頂到上心口   所以要行下嚟幫助消化   咁就行左去 Jusco 睇下野   之後番屋企 lu ~

次次星期五都係唔想咁早瞓   可能第朝番半日   所以就搞下呢樣搞下嗰樣搞到 12 點半先瞓   對於我喺一個 11 點就瞓既人真係覺得好夜㗎喇 ~

~~~~

因為今朝要番工   所以同里奧大人食早餐   Share 食餐蛋出前一丁同火腿飽絲通粉配冰鎮奶茶   勁勁勁飽   好在今日要去番 Nokia 拎電話   At least 3 點先可以同里奧大人食晏   飽啲好嘅 ~

今朝好多野做呀   搞到我得好少時間睇 Blog 睇報紙   仲有好少時間同 CC MSN 呀   但心情好好喎   因為下晝唔洗番工嘛 ~