自家制叉燒 + 豉油皇炒飯 + 鯊魚骨姬松茸滋補湯 ( 11-NOV-2009 )

( 11-NOV-2009  WED )

今朝遲咗 5 分鐘出門口   見到巴士站打蛇餅   真係好驚又要塞車呀   好在車程都好順   唔係又要趕頭趕命食早餐都幾慘 ~

   
早餐食奶油多呀   好耐無食   但又唔覺特別好食喎 ~

番到菇場心情唔錯   焗杯圓肉杞子飲啦   飲咗一杯即胃痛   無哂心機呀 ~  
Lunch Time 買腸粉燒賣   其實買一樣都得   但又覺得好悶咁喎   幾經辛苦先食哂呀   因為腸粉真係幾滯咁 ~

前一晚醃定咗啲餸   今晚連街市都唔駛去   實在太開心喇 ~

 
是日晚餐 - 自家制叉燒 + 豉油皇炒飯 + 鯊魚骨姬松茸滋補湯

自家制叉燒 - 第 2 次整   但都係想要深色啲   好後悔無加到老抽醃呀   如果唔係應該會靚仔好多呢   同埋下次再整會買肥啲嘅梅頭肉或者柳梅   咁就應該更好味啲呢   靚肥叉   等我呀 ~  

豉油皇炒飯 - 蔥粒 + 薑粒 + 蛋 + 豉油炒   就咁已經好好味呢 ~   

鯊魚骨姬松茸滋補湯 - 呢個係湯包   所以叫里奧大人煲   我之前一日買定豬肉   粟米同紅蘿蔔   咁佢就唔駛煩啦   教佢煲嘅時候   佢話原來咁煩㗎   真係唔係你估呀   叫你煲南瓜粟米栗子仲煩呀   等你成日咁天真   以為煲湯將所有嘢掉哂落煲咁簡單吖嗱 ~

明新焗飯小廚 @ 大埔 ( 10-NOV-2009 )

啫啫雞煲 - 熱辣辣唔錯   啲雞走過油   脆卜卜好味   不過我覺得辣啲會更好 

涼瓜枝竹燜倉魚 - 拎上枱嚇瓜我啦   我最怕成條魚咁上㗎   仲要棟到好似標本咁添   真係好得人驚   我第一個感覺已經好唔想食   但出街為咗食魚家嘛   所以一路同自己講無嘢嘅   食魚有益   先至可以無咁驚咁食咋   下次會叫佢哋將條魚瞓得先上枱會好啲囉

( 10-NOV-2009  TUE )

今朝有啲熱咁呀   11 月仲熱   但坐巴士又好鬼凍   真係慘 ~

   
早餐都唔敢食丁丁呀   食完熱辣辣好辛苦   雖然有冷氣   但都覺得熱囉 ~

整咗一陣嘢已經 11 點   咁都好   仲有個半鐘就 Lunch Time   可以抖下 ~

   
買車仔麵番菇場食   雖然平   但其實份量唔多   唔係咁飽   但又唔想叫得太多餸喎   眼闊肚窄浪費食物呀 ~

終於等到放工   無啦啦好攰   又勁想食魚   所以同里奧大人出街食喇 ~

其實一路行都諗住不如自己買條魚番嚟仲好啦   不過我又唔識揀   仍都知道整完條魚之後   我會完全唔食   所以都係出街食好啲 ~

今晚買咗個好巨嘅蕃鬼荔枝呀   $10/磅   呢個 $24   足足兩磅幾   第一次見咁大個咋   所以即買呢   希望甜啦 ~

蝦醬蒸豬肉 + 菜心 + 豬腳薑醋 (外賣) ( 9-NOV-2009 )

( 9-NOV-2009  MON )

尋晚食飯食得好開心   興奮過頭瞓唔着呀   今日仲星期一添   好在又唔係話好眼瞓   不過精神就唔多集中咁囉 ~  

去麥當勞食早餐真係幾 Relax   不過我都唔會話好 Hea 咁食   因為唔想太遲番菇場呢 ~

番到菇場無耐就同 Partner 過隔離執嘢   整咗個幾鐘   熱到呢   之前凍嘅時候又唔執   掛住中眼瞓   依家熱番少少就嚟執   真係吖 ~

  
今日 Lunch Time 非常之開心啦   因為里奧大人要見工   所以見完就同我去 Pizza Hut 食 Lunch 呀   估唔到無乜人   唔錯唔錯呢 ~  

雞蓉忌廉湯 / 雜菜湯 / 蒜蓉包 / 香蒜肉絲意粉 / 豬扒蕃茄湯天使麵 / 凍檸檬茶

番到菇場嚟料啦   有啲攰   可能朝早體力勞動比較大   又出咗去食 Lunch ~

放工即走   好在諗定好食乜唔駛煩呀 ~

 
是日懶餐 - 蝦醬蒸豬肉 + 菜心 + 豬腳薑醋 (外賣)

蝦醬蒸豬肉 - 好耐無食   同埋真係最緊要可以做 Lunch Box 囉   見里奧大人食到 Jep Jep 聲    我覺得好開心呀   因為代表佢鍾意食   如果唔係佢會對住碗飯係咁撩係咁撩囉 ~

  
菜心 - 又大條又甜   唔買唔得呀 ~

     
豬腳薑醋 (外賣) - 百佳買㗎   但今次無咁深色   不過一樣咁好味喎 ~

  
整完哂所有嘢又同里奧大人落街散步   佢話想食甜嘢   所以買咗啲糕點番屋企食   無啦啦想食甜嘢   咁應該係啲餸比較鹹   因為平時佢好少會咁呢 ~

忠誠茶座 @ 大埔 ( 8-NOV-2009 )

蝦醬鮮魷炒通菜 - 居然無馬拉盞通菜   所以試下呢碟囉   味道唔錯噃

鹹魚泰式炒飯 (走豬肉) - 我無食到  睇個樣都 OK

咖哩角 - 個汁好好味   

咖哩炒蟹 - 我只係食咗啲汁   好味呀  不過如果辣啲仲正

辣椒膏炒青口 - 個汁又係好好味

炸蝦餅 - 最鍾意食炸蝦餅   不過如果我得同里奧大人就唔會叫   因為覺得食完都飽咁囉  

煎薄餅 - 都唔錯   唔係好油 

烤薄餅 - 見到隔離食   再問影子要唔要   佢話要   咁就即叫啦  呵呵 

石榴子冰 - 我飲咗兩啖   不過印象中都幾濃椰汁味   

( 8-NOV-2009 sun )

今朝喺教會附近食早餐呀   咁都好方便 ~   

崇拜完畢就去附近買靈修書同禮物比朋友   咁就用咗一個鐘時間 lu    之後番到屋企已經兩點    但唔餓   三點先去食 Tea ~

今日好熱呀   所以喺屋企唔想郁   只想睇下雜誌睇下電視   原來好舒服㗎   第時都係星期一至六做哂所有家務   留番星期日盡情抖抖呢 ~

今晚好開心   因為會同 流浪影子 & 小寶一齊食晚飯   呢次見面只係用留言方式相約   無通過電話   唔知對方嘅樣貌   所以里奧大人都替我擔心   驚我比人放飛機呀   哈哈 ~

早啲去到相約地點   咁唔駛咁趕   其實我好緊張㗎   因為去咗好多次洗手間   嚇到里奧大人以為我有病呀 ~

終於等到啦   相認嘅感覺真係好特別呀   好興奮好緊張又好似好親切感呀 ~

實在愧對影子   因為我唔知大埔有乜好食   只係覺得大尾督嘅忠誠茶座泰國菜算係有水準   見得下人   所以一齊坐小巴入去食嘢喇 ~

呢次飯局好開心呀   一路傾一路食   雖然唔知影子係咪都習慣咁樣   但都唔理喇   要珍惜每分每秒   因為好難得見面嘛 ~

話咁快就十點幾 lu   所以埋單走人   因為里奧大人聽朝要見工呀   如果唔係可以夜啲呢 ~

呢次一聚   唔知幾時又可以見呢   道別嘅時候都係有啲傷感唔捨得添 ~

 
今次又有手信 我最愛食嘅榴槤特產   里奧大人番屋到屋企睇啲手信   發覺係全部都係榴槤   話影子好有心呀   駛乜講   似你就慘啦   無心肝 ~

元綠壽司 @ 大埔 ( 7-NOV-2009 )

鮮帶子壽司 / 鱆紅魚壽司 / 石恆貝壽司 / 蟹籽沙律腐皮壽司 / 甘蝦壽司 / 三文魚壽司 / 素魚翅海蜇壽司 / 螺肉壽司 / 蟹籽壽司 / 醬燒三文魚腩

( 7-NOV-2009  SAT )

今朝無約媽咪食早餐啦   媽咪唔舒服   我驚惹到我呀   同埋又想比佢多啲休息咁啦 ~

唔好講笑   雖然番半日   但根本人在心不在   就算上網都無乜心機咁囉 ~

  
好在放工趕到搭車   唔係又要等多十五分鐘喇   其實仲未話好餓   不過又唔想話太晏先食喎   所以又食開胃啲嘅酸辣米線喇 ~

今晚同埋家姐一齊去元綠壽司   因為有 Coupon   食滿 $200 平 $100   所以叫埋家姐一齊食   我哋 3 個人原本要 $250   依家 $150 埋單真係好抵呀 ~

途經栗子檔   又忍唔住又買一磅嚟食   Share 食真係好開心呢 ~

番到屋企又食下雪糕   其實我鍾意人哋同我食飯   要食到有好飽嘅感覺   咁我就會好開心咁囉  ~

譚仔 (三哥) 雲南米線 @ 大埔 ( 4-NOV-2009 )

( 4-NOV-2009  WED )

今朝有太陽又有凍凍哋   呢啲天氣最舒服   我好鍾意㗎 ~

病開真係有條路   一唔夠瞓好易就嚟料呀   好在飲番杯美占熱檸檬舒服好多呢 ~ 

Lunch 穩陣啲食腐竹白果粥 + 叉燒包   個粥好有腐竹味呀   希望自己都可以煲到咁好味啦 ~

越坐越凍   又無 Panadol   非常之唔老嚟呀   好在差唔多放工   唔係都幾難捱 ~

  
都話唔老嚟啦   坐巴士上層最後   我又唔想坐地盤佬隔離喎   但坐最後嗰排又吊腳   出風位又喺腳度喎   凍到呢   最後都係坐番喺地盤佬隔離   無計 ~

  
今晚仍都係唔煮飯   唔舒服煮飯   煮出嚟連自己都覺得唔好食㗎   無謂浪費食物   所以同里奧大人去譚仔食米線   凍凍哋食麻辣真係好暖胃暖身呢 ~

  
今次又係食過橋米線   因為兩碗米線太多   一碗又唔夠食   叫過橋米線就份量啱啱好   去親譚仔都係食嗰啲影嗰啲   里奧大人衰衰咁喺度笑   話影嚟影去都係嗰啲   叫我 Copy & Paste 咪得囉   但我覺得雖然食嘅嘢係一樣   但心情唔同家嘛   所以覺得張相都唔同啲咁㗎   佢又唔明喎   真係吖 ~

稻香超級漁港 @ 大埔 ( 3-NOV-2009 )

豬骨鍋湯底 - 1 蚊雞抵啦   之前食過一次好多豬骨   今次得兩個豬骨筒   同埋覺得個湯底唔夠濃

墨魚滑 - 好滑㗎   所以次次都叫呢

珊瑚蚌 -  好爽呀   不過我鍾意食炒貴妃蚌多啲  

珍珠蚌 - 第 1 次叫嚟食   又係好爽

美國肥牛 - 雪到飛起哂   但食落唔錯喎   無想像中咁肥 

油麥菜 - 食菜真係好唔抵   但唔食又唔得   呢籃菜 $18   不過估唔到份量都唔少

涼拌海蜇 - 麻麻哋啦   期望太大喇   定係因為無點白醋呢   依家都係覺得海蜇頭好味啲   

忌廉 - $10/3 支   兩個人飲就真係唔夠囉   但叫 6 支又好似好唔健康咁   我飲咗一啖已經無咗半支   但飲一罐又覺得有排飲咁㗎噃   不過支裝真係好飲啲

杏仁糊 (免費) - 都 OK 啦   有杏仁味又唔太甜   食完濃味嘢食番啲甜品會好好多呢 

芝麻糊 (免費) - 里奧大人食㗎   都 OK 啦   唔係太甜就得㗎喇

Open Kitchen - 一覺得啲嘢食咁耐未到就望一望   無就即追 Waiter   唔錯㗎 

( 3-NOV-2009  TUE )

今朝凍咗好多好多呀   真係要着厚啲嘅外套先得呢   仲諗住脂肪可以禦寒唔駛着外套   但原來係唔得嘅   等我仲儲咁多添 ~

  
早餐想食吞拿魚治烘底   點知佢哋整錯咗餐蛋治烘底喎   好在有杯凍檸茶   咁就無咁漏呢 ~

番到菇場超忙呀   忙到抖唔到氣 ~  
晏晝其實無胃口   但又想食熱嘢暖胃   所以又食咖哩烏冬   唔想食要食   真係好難食 ~

仲諗住晏晝無咁忙   點知無啦啦仲要有 Urgent 嘢喎   但我 Partner 居然瞓着咗   都唔明點解可以瞓得着   除非我好唔舒服   如果唔係開工時間瞓覺好有壓力嘛   同埋覺得好邪   唔瞓就無人搵   一瞓就好多人搵妳咁囉 ~

 
終於放工啦   今晚都係要抖抖   唔會煮飯呢 ~

    
里奧大人話難得天氣咁凍   不如打邊爐喎   絕對好添啦   我正想食濃味嘢 ~

  
等食期間   望到對面枱一家大細打邊爐   佢哋成家居然生食黃金脆竹卷   好大條嗰啲腐竹卷喎   食到卜卜聲   嚇得我吖   之後又再淥一淥再食 ~

今次簽 DBS 卡有糖水送   所以揀咗杏仁糊同芝麻糊   無期望真係有啲驚喜 ~

食完同里奧大人行半個鐘先番屋企呀   因為真係好飽呢 ~