中秋做節 @ 彩晶軒 (官塘 ) ( 7-OCT-2012 )

京廣大蔥片醬包鴨子 (兩食) - 求其搵片皮鴨   第一次見咋


每塊都有張紙隔住   唔駛黐埋一堆   都幾細心

最離奇係食片皮鴨有 4 種醬料   但蘸 XO 醬同辣醬都 OK   反而好似無咁漏   但沙律醬就超級怪囉  


紅椒夾片皮鴨都係第一次

炒鴨鬆 - 太濕太油喇

生菜包

翡翠腰果素雞炒蝦腰 - 見識灶   唔知蝦腰就係蝦   無味道嘅


甜豆金果炒鮮淮山 - 無厘味道嘅   齋同清淡都可以好好味道家嘛

黃鶴樓煙花楊州炒飯 - 成日改埋啲水蛇春咁長嘅名   又唔係整得特別過人


生味拚盤 - 菠蘿超酸   不過都幾好   因為片皮鴨好漏 

( 7-OCT-2012  SUN )

10 點起身   去 KFC 食早餐   食完就番屋企梳洗   之後番教會喇 ~

里奧大人做公司嘢   今晚同埋媽咪 家姐補做中秋做節   所以唔駛煮飯   又唔想做家務   Hea 到 3 點食 Tea   食完行陣先番屋企 ~

本來家姐話車我哋去酒樓   不過里奧大人 5 點鐘做完嘢   話想去官塘廣場行陣   所以我哋都自己去喇 ~ 

感恩買到濾鏡   買完就去酒樓喇   Book 咗 6 點半   佢咃 6 點已經到咗   我話早啲去好啲   因為限時兩個鐘   揀得菜黎都要半個鐘   食個半鐘都 OK 嘅 ~

呢間飲茶食點心就 OK   但晚飯就真係麻麻喇   應該唔會再嚟晚飯   同埋服務又唔掂   遊雲咁嘅 ~    

家姐車我哋番屋企   實在太飽   所以抖 1 個鐘又同里奧大人做體操   出咗一身汗再沖涼再嘆冷氣   爽爆呀 ~

蜜糖焗雞翼 + 蘋果雪梨肉眼湯 ( 6-OCT-2012 )

( 6-OCT-2012  SAT )

要清假   所以連請兩個星期六   半日半日咁拻都唔錯   好似番 5 日工咁   但之後番番星期六就唔係咁想啦 ~

10 點起身   去 Delifrance 食早餐   星期六嘅 10 點同星期日嘅 10 點真係差好遠   星期日好鬼多人   同埋好嘈   唔得 Relax 呀 ~

食完番屋企   個肚仲係唔舒服   所以即刻去番睇開個醫生度睇   佢講嘅嘢同之前個醫生講嘅完全唔一樣嘅   不過呢個係好有經驗嘅醫生   但嗰日佢無開就無計啦   迫住睇第個囉 ~

睇完就同里奧大人去舖頭   感恩來回都有車   一來一回都係 45 分鐘   勁快呀 ~

家姐車個光波爐比我   又去埋媽咪屋企拎埋啲雞翼 雞扒 牛扒 牛仔骨比我   有里奧大人幫手拎   咁唔駛我一個人拎咁辛苦   正呀 ~   

熨完衫都差唔多 2 點半   去食 Tea 喇   無無聊聊睇餐牌   再認真啲睇   原來好鬼多錯字   笑到肚痛 ~

太 "極" / 利"寶"納 / 飽餐 ?! / 雜尾飽 / 焗"萄"國雞球

里奧大人做公司嘢   我就煲湯   再睇下電視   食下月餅   我覺得美心月餅最好味   食完抖陣就煮飯喇 ~  

是日晚餐 - 蜜糖焗雞翼 + 蘋果雪梨肉眼湯

蜜糖焗雞翼 - 用光波爐焗㗎   跟佢食譜嘅時間指示   8 分鐘 + 5 分鐘   無落老抽個顏色差好遠   同埋皮唔夠脆   之後家姐話佢同事會喺雞翼皮掃油先再去焗   咁啲皮就脆㗎喇   下次試下咁先 ~ 

蘋果雪梨肉眼湯 - 要潤一潤喇   5 個雪梨 + 1 個蘋果 + $30 肉眼   初初我諗住買瘦肉   不過超市無瘦肉   豬肉檔呀姐話肉眼正呀   咁我就要啦   隔離兩個師奶猛咁話肉眼仲甜喎   買餸煲湯最緊要信啲師奶講嘢   夠經驗嘛 ~

叉燒炒麵 + 金銀蒜節瓜 ( 5-OCT-2012 )

( 5-OCT-2012  FRI )

今朝去超市幫菇場入貨   最鍾意幫菇場入貨   唔駛睇價錢係咁買買買   真係爽手好多   如果我自己買嘢   會睇下邊樣抵   買幾多先平   用唔少時間㗎 ~  

買完去 KFC 食早餐   9 點幾無咩人   靜靜地好舒服呀 ~

一入菇場就耳鳴   隻耳突然痛咗一下   靜到咁   真係好難形容 ~

今日又有 Lunch Box   經過公家 pantry   有人倒瀉哂啲炒飯但又唔執番去掉   超勁無公德心囉 ~

放工去大成街街市   對我嚟講好有新鮮感   地方都好大   又整齊   最正係有冷氣   同埋我一落樓下就有小巴番屋企   真係好感恩呢 ~

里奧大人差唔多 8 點就番到屋企   又可以一齊食飯   雖然兩公婆同一屋簷下   但真係唔係成日可以一齊食晚飯   因為佢夜番就會我自己食先   如果佢 8 點前番都會等埋佢嘅   8 點後就唔好搞 lu ~

是日懶餐 - 叉燒炒麵 + 金銀蒜節瓜

叉燒炒麵 - 諗唔到煮咩   所以又叉燒炒麵   最緊要里奧大人鍾意食   因為食唔哂就佢包底 ~

金銀蒜節瓜 - 之前買咗份節瓜   2 條用嚟滾咗湯   仲有呢 2 條就清蒸算喇   唔舒服唔想搞咁多嘢   同埋最大問題係我諗唔到點煮好 ~   

住家飯 @ 媽咪屋企 ( 4-OCT-2012 )

糖醋骨


煎鯧魚

白切雞

炒豆角

雪耳木瓜瘦肉湯

皺皮瓜

( 4-OCT-2012  THU )

好似好快又星期四咁   今日又係好清涼   呢啲天氣真係超級正呀 ~

今朝又食奶油多   心情好食啲甜嘢   心情就更好呢 ~

又係有好多同事同清假   所以菇場無咩人氣   好在都有啲 Keyboard 聲聽下啫 ~  

今日有 Lunch Box   食完又瞓唔到   但之後又眼瞓   好在阿 Head 又早走   咁我可以放大個屏幕上網   感覺好 Relax 咁   所以好快又到放工喇 ~

里奧大人唔駛上大陸   但我都會去媽咪屋企食飯   之後佢 7 點打嚟話放工   真係邪到不能再邪   次次都係咁 ~

之前同家姐一齊團購咗個德國寶光波爐   家姐幫我拎埋   原來好鬼大個盒   差唔多成 2 個細喼咁闊   本來諗住拎番屋企   不過家姐話星期日揸車先拎走仲好   咁又係  可以 叫里奧大人幫手拎 ~

9 點同家姐一齊走喇   番到屋企見到里奧大人已經食飽睇電視   問佢食咩又話我估到   講真我真係估唔到喎   所以無理佢   之後開機洗衫   見到爐邊有啲污糟   我心諗我次次煮完飯都會抹乾淨   咁我尋晚又唔多舒服咁煮飯   梗係唔記得抹   點知我再望到地下有 2 條麵碎   咁我知咩事啦   係里奧大人留下嘅手尾 ~

咕嚕肉 + 節瓜紅衫魚湯 ( 3-OCT-2012 )

( 3-OCT-2012  WED )

尋晚個肚成晚抽住痛   典嚟典去   好似無瞓過咁   真係勁唔想番工 ~

今朝趕呀   差唔多 8 點 50 分先到餐廳   所以食多士唔駛咬咁耐   但估唔到烘多士係最耐 ~

菇場有幾個同事請假   靜到呢   我又唔夠瞓   真係差啲瞓着呀 ~

本來請 8 卦出去食生日飯   不過佢同我都唔太舒服   去食粥算喇   下星期先再請佢呢 ~

個肚仲扯住痛   都係睇醫生   睇開嗰個又無開   所以睇另一個   $280 好貴呀   平時我睇 $250 都覺得貴家嘛 ~

去完惠康買嘢就番屋企喇   預備晚餐之後就拖地   抖陣就煮飯喇   煮好哂里奧大人打嚟話收工   咁我等埋佢食啦 ~

是日晚餐 - 咕嚕肉 + 節瓜紅衫魚湯

咕嚕肉 - 經驗話比我知   唔舒服真係唔好煮   我諗住半煎炸嘅   但出嚟效果就係豬肉一塊   真係浪費哂啲油同鷹粟粉   好在個汁好味咋   唔係就真係連自己都唔想食呢 ~ 

節瓜紅衫魚湯 - 呢個湯真係好唔錯   有瓜有魚有湯   不過我最驚係洗條魚   試過洗魚比支鯕吉到流血好痛呀   所以次次都叫魚佬切咗啲鱗同鯕   不過依家唔敢叫啦   $20 份唔敢要求咁多呀 ~

源發粉麵茶餐廳 @ 九龍灣 ( 2-OCT-2012 )

( 2-OCT-2012  TUE )

尋晚瞓得唔係咁好   瞓到差唔多 11 點先起身   我本來話蒸燒賣做早餐   不過里奧大人話唔想我咁辛苦   所以去大快活食早餐   里奧大人拎份早餐比我   好開心笑住問我凍咖啡妳啱㗎可 ?!

啲語氣好似買咗杯凍咖啡比我   等我好 Superise 嗰隻   咁我話無問題   但點解會係凍咖啡嘅 ?!   條友仔話唔知叫錯定比錯   我話咁你嘟咗幾多錢先 ?!   佢笑笑口話唔知   咁肯定係佢講錯啦   唔 Check 單   人哋睇單做嘢嘛   無理由比錯囉 ~

食完早餐我自己去買餸   番到屋企開機洗衫   本來想熨埋衫   不過個肚扯住痛   所以都係抖下喇   估唔到仲瞓埋添   無啦啦瞓到   代表我真係好辛苦呢 ~

瞓完無咁痛   出去食米線   之後去整皮鞋   要等 45 分鐘   所以去馬莎睇有無平嘢執   好感恩裇衫又平呀   里奧大人又買咗 3 件   我就買咗 Body Lotion 同麥片   埋單 $701   Cashier 話買夠 $800 有 $100 coupon    所以再買多幾支 Cream   $830 埋單   好開心啦有 $100 Coupon   整鬼佢   原來要買滿 $500 先用得   點解咁失策無問張 Coupon 係點用   同埋 Cashier 無講清楚   如果知道要買滿幾多先有   我唔會買囉   不過里奧大人又話 $100 Coupon 都買到喎   咁都好啲 ~

拎埋鞋就番屋企喇   不過我仲係唔舒服   所以最後決定唔煮喇 ~

7 點幾出去食粉   再行陣商場就番屋企休息喇   聽日要番工   真係唔可以太夜瞓呢 ~

山頂 + 南記粉麵 @ 銅鑼灣 ( 1-OCT-2012 )

豬腩肉春卷小鍋米線 (小辣) - 唔知係咪因為生意多咗   所以水準維持唔到呢   好在我主打係食佢哋嘅辣椒醬啫  

韭菜 - 其實我同里奧大人講話要韭菜花   不過佢話無韭菜花   得韭菜   咁我都鍾意食韭菜嘅   不過唔鍾意咁樣一兜滿滿咁囉   反而擺喺碟又無問題喎 

( 1-OCT-2012  MON )

今朝 10 點就自然醒喇   食完早餐就番屋企沖涼   之後就出發去長洲喇 ~

搭 619 再轉 603   去到碼頭見到去南丫島啲人打哂蛇餅   直頭唔見龍尾   超級勁多人   咁都預咗長洲都係咁   如我所料   又係打蛇餅   得愉景灣無人排   不過我又唔想去   咁啱比我望到 15 號巴士去山頂   所以就轉去山頂喇 ~

今次第一次搭巴士上山頂   我覺得好快到喎   因為次次等 Cable Car 都好耐   雖則快就快   但架巴士嘈到呢   可能外遊感覺興奮啦   好似酒樓咁嘈   頭都痛 ~

其實去山頂無咩嘢做㗎   周圍行下咁   食埋 Burger King 就去山頂廣場行一個圈   去埋雙妹嘜買雪花膏就走喇 ~

華堡餐 - 小華堡餐就 $43   華堡餐就 $49   記得上次食小華堡唔夠飽   所以今次叫華堡   一見個包已經好後悔   因為個包 Size 同我塊臉一樣咁大   食完飽到上腦   下次一定唔食呀

天椒煙肉芝士華堡餐 - 里奧大人話麻麻咃   到依家佢都係好懷念喺馬來西亞食嘅 Ramly Burger

搭 15B 去銅鑼灣   又係好快到   好似轉幾個灣就到咁   下次真係要搭巴士呢 ~

銅鑼灣封哂路   我仲以為係因為夜晚放煙花封路   原來唔係   係 "法輪大法" 遊行   第一次見咋   個個停低睇 ~ 

超勁多人打鑼打鼓   好有氣勢咁 / 警察指揮交通

經過 Hysan Place   見到 GAP   大大個牌寫住 $199   我覺得抵   所以叫里奧大人入去睇下   原來每人入去都有得抽獎   我好好彩呀   抽到全單 40% Off   里奧大人就 30 % Off   差唔多半價   好感恩呀 ~

里奧大人度裇衫嘅時候   有位 ABC Sales 嚟幫手   估唔到講英文   都幾搞笑   因為依家好多反而會講國語嘛   咁里奧大人拎住 Backpack 度衫   咁點度吖   咁我當然幫佢拎啦   點知我一拎就聽到打爛嘢嘅聲   原來係里奧大人部相機跌咗落地   鏡頭直插落地呀   唔駛睇都知濾鏡爆咗   嚇到個 Sales 目定口呆   我覺得佢個樣好好笑   其實我真係唔知里奧大人比埋相機我嘛   我以為得 Backpack 咋   5 個月內跌爆 2 次濾鏡   係咪咁好彩呀 ~

我無咩嘢想買   里奧大人就樣樣都啱   佢每次拎 5-6 條去試   之後又行下睇下   我見到啱佢又叫佢試埋   40% Off 真係好抵   試咗 5 轉   滿載而歸啦佢   買咗 3 條褲 + 2 件線衫 + 3 件裇衫 + 1 件抓毛衫 + 1 件單西 + 1 件乾濕褸   Total 差唔多 $5,400   不過折咗只係 $3,200   有啲仲係折上折   最感恩樣樣都係佢想買嘅   一次過買哂就唔駛煩喇 ~

之後再去誠品   不過拎住兩大袋真係比較呢 Hea   同埋最大問題係太嘈啦   我真係想買書睇書架   但咁嘅環境真係唔願多留一秒   所以即閃 ~

原來都幾多人去 GAP 買衫   有對情侶拎住個 GAP 紙袋   個女人見到我哋兩大袋   裝下我哋個袋買咗噂咩   之後同個男人講好似唔駛錢咁   好搞笑   講真   質地好加上又有折   同埋真係啱用先買啫 ~

去到銅鑼灣   里奧大人實去南記   不過我真係好飽   所以就咁食碟菜就夠喇   依家南記超多印印   起碼 1/3 係囉   以前無咁多㗎 ~

好感恩 619 又有孖位坐   番到屋企抖一個鐘又一齊做體操   沖埋涼   睇下電視又已經 12 點   假期時間真係過得超級快