肉醬扁意粉 + 蒸蘿蔔糕 ( 7-MAR-2013 )

( 7-MAR-2013  THU )

今朝勁想食飲凍咖啡   所以食米粉餐   食完熱米粉再飲凍咖啡   熱 + 凍 = 暖   唔算係一早起身就飲凍嘢呢 ~

阿姐拎完杯咖啡比我   就同我講話我皮膚好靚   之後佢又再講我皮膚真係好靚   問我係咪整容 ?!   我話更唔係整容啦   不過我覺得佢其實係想講 Facial   因為佢隻手係做搓臉手勢   我笑得好自然㗎   唔係膠臉㗎噃 ~

菇場靜英英   如果我坐最入就好啦   無人睇到我做咩嘛   真係番工都番得開心過人呀 ~

今日有 Lunch Box   唔係媽咪問我帶唔帶飯   我都唔醒起帶飯呢回事呀 ~

個頭有啲痛   即刻食粒 Panadol   之前試過忍痛唔食   點知到最後忍到夜晚 10 點幾   最終頂唔順要食 Panadol   自此之後唔會再咁笨啦   痛咗 2 個鐘仲痛就即食喇   食完真係唔痛㗎喎 ~

放工即走   去完超市買免治豬肉就番屋企喇 ~

媽咪整咗蘿蔔糕比我同家姐   所以我同工人喺屋企樓下交收   家姐就嚟我屋企拎   佢差唔多 7 點幾到   里奧大人就啱啱打嚟話 9 點先可以放工   叫我食先   好在今晚有家姐陪啫 ~

是日晚餐 - 肉醬扁意粉 + 蒸蘿蔔糕

肉醬扁意粉 - 媽咪尋晚比咗啲車厘茄   所以整肉醬意粉   太耐無整意粉   衰心急   不嬲如果我自己整新鮮蕃茄蓉   我係唔會落茄汁同糖嘅   但今次同一時間落埋茄汁同糖   家姐食第一啖話好甜   我已經知出事   之後里奧大人食第一啖又係話好甜   咁真係好甜啦   仲話我煮意粉咁耐以嚟最難食嘅一次呀   不過佢哋都好比面喇   食哂成碗喎   反而我無食   因為我飲埋啲隔夜湯   食埋湯渣已經好飽   避過一劫   不過聽日 Lunch Box 就要食啦   有難同當   哈哈哈哈 ~

蒸蘿蔔糕 - 媽咪整㗎   一 Pat 糊咁   即打比媽咪話以後唔駛再整比我   之後兩晚又唔煮飯   所以今晚蒸埋嚟食   食食下又 OK 喎   可能狂點豉油辣椒醬啦   我其實覺得蒸蘿蔔糕都 OK   反而覺得煎係好油咁   媽咪叫我可以慢火煎   我話一 Pat 糊點煎呀   太難度高喇   同埋同媽咪講   唔識整真係唔好整   因為真係嘥錢嘥心機嘥時間   同埋要我哋食真係好慘囉   好味就話啫 ~

之後忍唔住打比家姐   我話真係報應   因為頭先話媽咪整嘅蘿蔔糕係全世界最難食   點知里奧大人又講我煮意粉最難食係呢次   邪爆   所以我以後唔敢再話媽咪難食   只會話唔太啱我口味算喇 ~

今晚諗住再拖地同熨衫   不過見家姐嚟咗   陪佢打機啦   之後佢 9 點半走   我都即沖涼   里奧大人又啱啱番到屋企   我又陪下佢   又睇下電視   10 點半先沖涼   所以都唔熨衫喇   不過最後都成 11 點半先瞓   又夜瞓咗 lu ~

住家飯 @ 媽咪屋企 ( 6-MAR-2013 )

蒸撻沙 - 好厚肉呀

白切雞

荷蘭豆炒鮮魷土魷

炒菠菜

蓮藕豬肚豬骨湯

朱古力蝴蝶酥 @ 曲奇薈 - 上次我無去醫院探媽咪   咁家姐有蝴蝶酥   里奧大人就拎咗 2 塊孝敬我   因為我初一去契媽屋企拜年   話蝴蝶酥好好食   之後依家家姐一有蝴蝶酥就會拎比我食   我去旅行時   家姐仲放咗半盒蝴蝶酥比我添呀

( 6-MAR-2013  WED )

臨起身前發咗過令到自己非常之唔開心嘅夢   搞到我真係無哂心機   情緒好低落   里奧大人今朝又早起身上大陸喎   唔係我可以同佢講下   舒發一下呢 ~

早餐食碎蛋吞拿魚治   其實唔想食   不過難得無人   所以就食啦 ~

菇場靜呀   有啲想瞓添 ~

聽日開始飲中藥   都好嘅   飲完去洗杯   行下都唔錯   無咁悶 ~

晏晝去買酸辣米線番菇場食   因為我要食番一碗好味嘅酸辣米線呀   食咗 3 餐酸辣米線   夠哂喇 ~

2 點同 Partner 去隔離 Pack File   所以好快又過咗 1 個鐘啦   實在太好 ~

今晚去媽咪屋企食飯   家姐差唔多 6 點 45 分就番到黎   7 點開飯   呢啲開飯時間就最好   唔會太遲又唔會太早 ~  

之後比 Lucky Money 媽咪同家姐   家姐真係儲住㗎   媽咪就用埋啦 ~

今晚又拎湯又 Lunch Box   又雪糕批   又芒果同車厘茄   加埋都 8 磅   仲有鹹魚同豬扒無拎添咋   所以次次諗起臨走要拎嘢番屋企就好驚呢 ~ 

番到屋企即拖地   之後沖涼   里奧大人差唔多 9 點半就番到屋企   一齊睇下電視   之後佢繼續睇電視   但我 11 點就瞓喇   真係好攰 ~ 

煎餃子專門店 @ 九龍灣 ( 5-MAR-2013 )

酸辣米線 - 都 OK 喎

雜錦滷水飯 - 個飯好腍

煎原味餃子 - 都 OK 啦

煎韭菜餃子 - 我鍾意韭菜餃多啲

( 5-MAR-2013  TUE )

尋晚醒一醒   之後都好好瞓   但後尾係咁發夢   所以最後係好似無瞓過咁 ~

無咩胃口   早餐食奶油多算喇   都懶得諗 ~

抽到春茗中獎嘅高層   每人派封 $100 利是   幾咁豪呀    8 卦話佢講話自己要 $2,000   其他會分甘同味   高層果然出手闊綽呀下 ~

晏晝同 8 卦出去食   佢係都要補番我餐生日飯   真係好有心呢   不過我揀呢間米線就唔好食囉 ~

咩事呀   我同 8 卦都超級眼瞓   我話啲米線有古怪   佢話米線有七步迷魂散   黐鬼線   哈哈 ~

心血來潮 Book 星期五睇中醫   點知原來醫師聽日飛北京   所以我即約今晚呀   好在 Book 到咋 ~

放工去荃灣睇中醫   6 點 20 分到中醫度喇   睇完就去剪髮表妹度傾下偈   傾咗 15 分鐘就走喇   諗住再去探另一個朋友   點知佢已經收咗舖   咁我都坐小巴番九龍灣喇   好在無咩人等車   咁即係星期一真係最多人啦   咁第時一定唔會揀星期一去睇中醫呢 ~

里奧大人同我差唔多時間到九龍灣   我勁想食餃子   所以就去煎餃子專門店食嘢喇 ~

番到屋企開機衫就沖涼   之後 Hea 喇   雖然好飽   但真係好攰   好唔想郁   10 點半就瞓覺添呀 ~ 

Green Monday 菜脯炒蛋 + 炸菜絲炒麵 + 腐乳唐生菜 ( 4-MAR-2013 )

( 4-MAR-2013  MON )

星期一喇   又新開始   今朝雖然有太陽   但都凍噃   同埋好乾燥   不過咁都好   好過灰灰暗暗又落雨嘛 ~

今日係 Green Monday   但上次 Green Monday 好似食極唔飽   所以夜晚食到好鬼飽   個金字塔倒轉咗   咁唔得呢   所以今次早餐食芝蛋治烘底   要飽啲呀 ~

菇場又係靜   好多同事上咗大陸   所以更加更加靜 ~

晏晝出去食白粥同炒米粉   勁有病 Feel   之後再去一田買蛋糕就番菇場喇 ~

今晚唔駛買餸   實在太舒服喇   里奧大人 4 點半見客   所以 6 點半已經番到屋企   好耐無試過咁喇   可以一齊食飯   我好開心呀 ~  

是日懶餐 - 菜脯炒蛋 + 炸菜絲炒麵 + 腐乳唐生菜

菜脯炒蛋 - 真係諗唔到整咩先整炒蛋   咁菜脯又惹味   等里奧大人無咁 Dry ~ 

炸菜絲炒麵 - 全蛋麵同韭菜都懶去買呀   就咁用 3 個蝦子麵   順便清埋去   加咗炸菜絲   不過完全係唔覺有佢嘅存在   所以都係要配甜醬辣醬食呢 ~

腐乳唐生菜 - 尋日喺超市買   因為星期一真係好懶去買餸呢  ~

6 點半開飯   7 點半食完   8 點沖涼   啲時間實在太好用喇   如果晚晚係咁就好啦 ~

沖完涼要熨 2 機衫   不過又唔係好攰   之後睇電視又做下運動   太耐無運動同埋睇聖經   不過今晚太攰   做完運動就瞓喇   都無睇聖經   太懶喇 ~

公益金百萬行 @ 科學園 & 豉油雞 + 鍋貼 + 青紅蘿蔔蠔豉豬骨湯 ( 3-MAR-2013 )

媽咪整嘅

媽咪煲嘅

家姐比我嘅有機蕃茄  

家姐同事比我嘅有機蘿蔔仔


肥嘟嘟超過癮呀   同豬腰芒差唔多大咋  

( 3-MAR-2013  SUN )

今朝勁喇   6 點半要起身   因為里奧大人公司參加咗公益金百萬行呀   沖完涼就落去太興食早餐   之後就出發喇 ~

呢個頂級午餐肉滑蛋公仔麵餐   已經加到 $29 喇

去到沙田轉的士去科學園   坐咗 $53 的士   無計啦   唔識去嘛   不過見到原來有小巴去科學園   但超多人排隊   無可能等囉 ~

8 點 45 分起點集合   都好多公司參加   我第一次去呢啲百萬行咋   做善事又當做運動都唔錯   行都無問題   跑就唔好預我喇 ~

開始嘅時候都同里奧大人啲同事一齊行   行下行下都唔見哂人咯   因為佢哋行得好慢   一路行一路傾係慢啲㗎喇   里奧大人話佢上司跑慣步   所以覺得啲人係龜速   同埋話佢踏單車都唔會踏平路   覺得平路無料到   要上斜先啱玩喎   而另一個同事就參加毅行者   佢啲同事都好健康噃 ~ 

某大公司有好多人行   風褸又好靚   又有幾個大會專手攝影師   去到終點於仲有禮物包添呀

終點係大埔回歸塔   好有親切感呀   我哋 10 點 20 分就到終點喇   對腳開始有啲攰 lu ~

終點 - 里奧大人話估唔到我行到喎   因為我平時行兩行就話攰   我話可能之前行咗丹霞山   操 Fit 咗呀   哈哈

里奧大人公司安排咗去大尾篤 BBQ   佢哋部門無人去   咁我哋都預咗唔會去   所以一齊行番出去大埔超級城呢 ~

好多舖都未開   一早諗好探埋阿婆   不過電話無人聽   但我話真係好想同阿婆拜年   所以最後去食嘢   想坐呀 ~

再打比阿婆都係無人聽   索性去問樓下看更   點知阿婆原來上年尾走咗   我哋聽完呆咗啦   上年同佢拜年都仲好精神   看更話阿婆年尾話唔舒服   Call 咗白車   住咗醫院 2 個星期就走咗喇   走得好安詳   咁我聽完都安心啲 ~

行埋大埔廣場   里奧大人又買咗頂帽   真係無諗住買   反而買到啱心水嘅帽   實在太感恩喇   之後去三聯買書   再去埋街市買紅豆就坐車番屋企喇 ~ 

諗住去鴻點   不過無咩嘢啱食   最後去番大快活食 Tea   食完我去超市買嘢   里奧大人就即番屋企瞓覺   佢瞓咗個幾鐘   我反而瞓唔到   咁開機洗衫同執下嘢啦   之後 6 點半就預備晚餐喇 ~ 

是日懶餐 - 豉油雞 + 鍋貼 + 青紅蘿蔔蠔豉豬骨湯

豉油雞 - 媽咪整㗎   尋晚叫家姐拎比我哋食呢 ~

鍋貼 - 星期五嗰晚食剩   好在無壞咋 ~

青紅蘿蔔蠔豉豬骨湯 - 又係媽咪煲完叫家姐拎嚟   今日真係無時間煲湯   所以叫里奧大人飲多啲 ~

早食早休息   喉嚨有啲痛呀   所以衫都唔熨   比自己抖下   11 點就瞓喇 ~

銘謝狀 - 任妳攞

公司春茗 ( 2-MAR-2013 )

( 2-MAR-2013  SAT )

今朝同 8 卦食早餐   走嘅時候啲雨都幾密   又大風   8 卦話好似打風咁呀   真係幾似㗎 ~  

菇場忙呀   忙咗 2 個鐘   之後等放工 ~

去完萬寧買嘢先番屋企   抖陣就同里奧大人行遠啲食 Tea   食完又行下德福   去埋三聯買書就番屋企喇 ~

番到屋企已經 4 點半  今晚公司春茗   我約同事 5 點半喺九龍灣地鐵站等   一齊去佐敦   掛住傾偈   落錯車   好在無出閘咋 ~

去到酒店都係 6 點 10 分   但春茗 6 點 45 分先開始   咁就同啲同事傾下偈啦   無咁悶嘛 ~

玩咗 3 個枱獎先食嘢   之後一路食一路玩遊戲   今年蛇年   所以英文字有 SNAKE 就可以玩大獎遊戲   我抽到 A 字   細老闆抽到 N 字   上年我係大獎   細老闆係 2 獎   所以啲同事話又係我哋 2 個呀   最後我同細老闆同另一高層抽到唔同嘅蛇   所以可以玩大獎遊戲   最後係玩捉鉛筆遊戲   我玩到第 4 板就輸咗   但細老闆話佢其實玩到第 2 支時係跌咗 1 支   所以應該係已經輸咗無得再玩   佢講咗幾次   咁 MC 就問大老闆算唔算輸   咁大老闆話算輸喎   所以我就同另一高層玩大獎遊戲   好感恩我抽到 2 獎呀   因為我覺得如果唔係細老闆話自己輸   其實真係無人知囉   所以我真係好多謝細老闆呢 ~

差唔多 10 點幾就走喇   我又同埋同事一齊搭地鐵   有個伴都幾好   因為我認唔到路呀 ~

番到屋企已經 11 點   沖埋涼已經 11 點幾   要瞓喇   聽日要 6 點半起身呀 ~ 

2 獎係 $2,000   感恩感恩

鹿鳴春飯店 @ 尖沙咀 ( 1-MAR-2013 )

烤北京填鴨 (一食 $300) - 唔錯啦   最緊要無羶味

薄餅 - 好過平時蒸籠嗰啲   因為好快乾爭爭   但喺呢度   食一塊薄餅都已經幾飽肚


青瓜 / 大蔥 - 青瓜再幼身啲就更加好

全場嘅鴨都係呢位伯伯片皮   一片就片 2 隻  

賽螃蟹 - OK 啦   都唔少蟹肉嘅   我麻麻哋鍾意食呢個餸


醬爆雞丁 ($88) - 好香南乳味   諗住配銀絲卷一齊食   但 15 分鐘之後先黎銀絲卷囉 


鍋貼 ($60) - 完全唔記得叫咗呢碟添呀   最尾先嚟   都食飽哂啦   我食咗 2 隻無特別   最後我要打包番屋企呢     

銀絲卷 ($12) - 炸到熱辣辣   不過我對包包無咩興趣   咁我逐層拻嚟慢慢食   原來係一絲絲嘅   我真係依家先知咋   豬豬  


拔絲香蕉 (細 $52) - 專人幫妳倒落冰水度㗎

好食呀   我食咗 4 件   飽到上頭殼頂

酸菜 - 好味呀   個個都鍾意食

花生 - 口感幾得意

( 1-MAR-2013  FRI )

又 Happy Friday 喇   如果有陽光幾咁好呢 ~

早餐又食碎蛋吞拿魚治   真係好好味呀   下次食半份算喇   食一份真係好飽咁 ~

菇場忙咗陣   之後開始 Hea 喇 ~

Lunch Time 出去食魚皮餃河粉   之後去萬寧買嘢   再去銀行入埋票就番菇場   有啲熱呀 ~

今晚約咗家姐同糟糟籮籮 2 姐妹去尖沙咀食飯   Book 咗 8 點半   糟糟要帶隻狗仔睇醫生   起碼 7 點半先到尖沙咀   所以我放工都坐巴士去尖沙咀 ~ 

差唔多 6 點 15 分到尖沙咀   去永安行咗陣   家姐 6 點半到尖沙咀地鐵站   好怕喺尖沙咀地鐵站等人   太多出口喇 ~ 

由 P 行去 H 都差唔多 10 分鐘   攰鬼到我呢   又焗   所以真係好鬼驚喺地鐵站等人 ~

之後又再行番 N3 出口   去 K-11 行下先   同家姐行 Market Place   佢真係好鍾意食包   一見麵包雙眼就發光   最後我買咗包啫喱糖比媽咪就走喇 ~

見糟糟未到   又想買生果   又去番 Market Place   再買多盒幸運餅   我第一次食呢隻餅係喺杜拜食㗎   我仲話係咪杜拜特產   點知啲團友話香港有得買啦   我真係唔知   之後番香港搵都無   今次都係我第一次見咋   所以好鬼開心   買完即開嚟同家姐一齊食呀 ~

糟糟差唔多 8 點到   我哋又行番去海防道買嘢   再去埋馬莎買嘢就去鹿鳴春 lu ~

去到等咗陣就有位喇   位底唔高   所以好鬼好鬼好鬼嘈   食物都 OK   今晚係家姐同糟糟請㗎   因為係我同籮籮嘅生日飯 ~

糟糟車我哋番屋企係快好多㗎   里奧大人今日唔駛上大陸   8 點放工   又係早番過我呢 ~