肉醬扁意粉 + 蒸蘿蔔糕 ( 7-MAR-2013 )

( 7-MAR-2013  THU )

今朝勁想食飲凍咖啡   所以食米粉餐   食完熱米粉再飲凍咖啡   熱 + 凍 = 暖   唔算係一早起身就飲凍嘢呢 ~

阿姐拎完杯咖啡比我   就同我講話我皮膚好靚   之後佢又再講我皮膚真係好靚   問我係咪整容   我話更唔係整容啦   不過我覺得佢其實係想講 facial   因為佢隻手係做搓臉手勢   我笑得好自然架   唔係膠臉架噃 ~

菇場靜英英   如果我坐最入就好啦   無人睇到我做咩嘛   真係番工都番得開心過人呀 ~

晏晝有 lunch box   唔係媽咪問我帶唔帶飯   我都唔醒起帶飯呢回事呀 ~

個頭有 d 痛   即刻食粒 Panadol   之前試過忍痛唔食   點知到最後忍到夜晚 10 點幾   最終頂唔順要食 Panadol   自此之後唔會再咁笨啦   痛咗 2 個鐘仲痛就即食喇   食完真係唔痛架喎 ~

放工即走   去完超市買免治豬肉就番屋企喇 ~

媽咪整咗蘿蔔糕比我同家姐   所以我同工人喺屋企樓下交收   家姐就黎我屋企拎   佢差唔多 7 點幾到   里奧大人就啱啱打黎話 9 點先可以放工   叫我食先   好在今晚有家姐陪啫 ~

是日晚餐 - 肉醬扁意粉 + 蒸蘿蔔糕

肉醬扁意粉 - 媽咪尋晚比咗 d 車厘茄   所以整肉醬意粉   太耐無整意粉   衰心急   不嬲如果我自己整新鮮蕃茄蓉   我係唔會落茄汁同糖嘅   但今次同一時間落埋茄汁同糖   家姐食第一啖話好甜   我已經知出事   之後里奧大人食第一啖又係話好甜   咁真係好甜啦   仲話我煮意粉咁耐以黎最難食嘅一次呀   不過佢地都好比面架喇   食哂成碗喎   反而我無食   因為我飲埋 d 隔夜湯   食埋湯渣已經好飽   避過一劫   不過聽日 lunch box 就要食啦   有難同當   嘩哈哈哈哈 ~

蒸蘿蔔糕 - 媽咪整架   一 pat 糊咁   即打比媽咪話以後唔駛再整比我   之後兩晚又唔煮飯   所以今晚蒸埋黎食   食食下又 ok 喎   可能狂點豉油辣椒醬啦   我其實覺得蒸蘿蔔糕都 ok   反而覺得煎係好油咁   媽咪叫我可以慢火煎架   我話一 pat 糊點煎呀   太難度高喇   同埋同媽咪講   唔識整真係唔好整   因為真係嘥錢嘥心機嘥時間   同埋要我地食真係好慘囉   好味就話啫 ~

之後忍唔住打比家姐   我話真係報應   因為頭先話媽咪整嘅蘿蔔糕係全世界最難食   點知里奧大人又講我煮意粉最難食係呢次   邪爆   所以我以後唔敢再話媽咪難食   只會話唔太啱我口味算喇 ~

今晚諗住再拖地同熨衫   不過見家姐黎咗   陪佢打機啦   之後佢 9 點半走   我都即沖涼   里奧大人又啱啱番到屋企   我又陪下佢   又睇下電視   10 點半先沖涼   所以都唔熨衫喇   不過最後都成 11 點半先瞓   又夜瞓咗 lu ~