公益金百萬行 @ 科學園 & 豉油雞 + 鍋貼 + 青紅蘿蔔蠔豉豬骨湯 ( 3-MAR-2013 )

媽咪整嘅

之前食剩嘅


媽咪煲嘅

家姐比我嘅有機蕃茄  

家姐同事比我嘅有機蘿蔔仔


肥嘟嘟超過癮呀   同豬腰芒差唔多大咋  

( 3-MAR-2013  SUN )

今朝勁喇   6 點半要起身   因為里奧大人公司參加咗公益金百萬行呀   沖完涼就落去太興食早餐   之後就出發喇 ~

呢個頂級午餐肉滑蛋公仔麵餐   已經加到 $29 喇

去到沙田轉的士去科學園   坐咗 $53 的士   無計啦   唔識去嘛   不過見到原來有 van 仔去科學園   但超多人排隊   無可能等囉 ~

8 點 45 分起點集合   都好多公司參加   我第一次去呢 d 百萬行架咋   做善事又當做運動都 唔錯丫   行都無問題   跑就唔好預我喇 ~

個天好暗架   有 d 凍添呀   感恩無落雨呢 ^^

靚靚膠褸 @.@

開始嘅時候都同里奧大人 d 同事一齊行   行下行下都唔見哂人咯   因為佢地行得好慢   一路行一路傾係慢 d 架喇   里奧大人話佢上司跑慣步   所以覺得 d 人係龜速   同埋話佢踏單車都唔會踏平路   覺得平路無料到   要上斜先啱玩喎   而另一個同事就參加毅行者   d 同事都好健康噃 ~ 

人未齊   影下花先

前面果棵就枯萎咗   但後面果棵又好茂盛噃

某大公司有好多人行架   風褸又好靚   又有幾個大會專手攝影師   去到終點於仲有禮物包添呀

行咗一半路喇

終點係大埔回歸塔   好有親切感呀   我地 10 點 20 分就到終點喇   對腳開始有 d 攰 lu ~

終點 - 里奧大人話估唔到我行到喎 @.@   因為我平時行兩行就話攰   我話可能之前行咗丹霞山   操 fit 咗呀 ^^

里奧大人公司安排咗去大尾篤 BBQ   佢地部門無人去   咁我地都預咗唔會去   所以一齊行番出去大埔超級城呢 ~

好多舖都未開   一早諗好探埋阿婆   不過電話無人聽   但我話真係好想同呀婆拜年   所以最後去食嘢   想坐呀 ~  

再打比阿婆都係無人聽   索性去問樓下看更   點知阿婆原來上年尾走咗   我地聽完呆咗啦   上年同佢拜年都仲好精神   看更話阿婆年尾話唔舒服   call 咗白車   住咗醫院 2 個星期就走咗喇   走得好安詳   咁我聽完都安心 d ~

行埋大埔廣場   里奧大人又買咗頂帽   真係無諗住買   反而買到啱心水嘅帽   實在太感恩喇   之後去三聯買書   再去埋街市買紅豆就坐車番屋企喇 ~ 

諗住去鴻點   不過無咩嘢啱食   最後去番大快活食 tea   食完我去超市買嘢   里奧大人就即番屋企瞓覺   佢瞓咗個幾鐘   我反而瞓唔到   咁開機洗衫同執下嘢啦   之後 6 點半就預備晚餐喇 ~ 

是日懶餐 - 豉油雞 + 鍋貼 + 青紅蘿蔔蠔豉豬骨湯

豉油雞 - 媽咪整架   尋晚叫家姐拎比我地食呢 ~

鍋貼 - 星期五果晚食剩架   好在無壞咋 ~

青紅蘿蔔蠔豉豬骨湯 - 又係媽咪煲完叫家姐拎黎架   今日真係無時間煲湯   所以叫里奧大人飲多 d ~

早食早休息   喉嚨有 d 痛呀   所以衫都唔熨   比自己抖下   11 點就瞓喇 ~

銘謝狀 - 任妳攞架
 

幸運曲奇