Green Monday 菜甫炒蛋 + 炸菜絲炒麵 + 腐乳唐生菜 ( 4-MAR-2013 )

( 4-MAR-2013  MON )

星期一喇   又新開始   今朝雖然有太陽   但都凍噃   同埋好乾燥   不過咁都好   好過灰灰暗暗又落雨嘛 ~

今日係 Green Monday   但上次 Green Monday 好似食極唔飽   所以夜晚食到好鬼飽   個金字塔倒轉咗   咁唔得呢   所以今次早餐食芝蛋治烘底   要飽 d 呀 ~

菇場又係靜   好多同事上咗大陸   所以更加更加靜 ~

晏晝出去食白粥同炒米粉   勁有病 feel   之後再去一田買蛋糕就番菇場喇 ~

今晚唔駛買餸   實在太舒服喇   里奧大人 4 點半見客   所以 6 點半已經番到屋企   好耐無試過咁喇   可以一齊食飯   我好開心呀 ~  

放工等車時影架   好靚呀

買比里奧大人嘅蛋糕  

是日懶餐 - 菜甫炒蛋 + 炸菜絲炒麵 + 腐乳唐生菜

菜甫炒蛋 - 真係諗唔到整咩先整炒蛋   咁菜甫又惹味   等里奧大人無咁 dry ~ 

炸菜絲炒麵 - 全蛋麵同韭菜都懶去買呀   就咁用 3 個蝦子麵   順便清埋去   加咗 d 炸菜絲   不過完全係唔覺有佢嘅存在   所以都係要配甜醬辣醬食呢 ~

腐乳唐生菜 - 尋日喺超市買架   因為星期一真係好懶去買餸呢  ~

6 點半開飯   7 點半食完   8 點沖涼   d 時間實在太好用喇   如果晚晚係咁就好啦 ~

沖完涼要熨 2 機衫   不過又唔係好攰   之後睇電視又做下運動   太耐無運動同埋睇聖經   不過今晚太攰   做完運動就瞓喇   都無睇聖經   太懶喇 ~