住家飯 @ 媽咪屋企 ( 7-MAR-2014 )

蒸多寶魚   加埋蝦乾同白飯魚一齊蒸

炸乳鴿 (外賣)

白切雞 (外賣)

炒菠菜

青紅蘿蔔無花果豬筒骨湯 - 今次我叫媽咪問家姐工人點煲呀   終於有正常嘅味道啦   勁開心

大樹菠蘿

( 7-MAR-2014  FRI )

終於 Happy Friday 喇   如果聽日 Off 就好啦 ~

今朝食魚柳包   咁我要大火嘛   點知出嚟嘅係燶嘅   黑色喎   點食呀   之後我聽到佢同師傅啲對話   仲好叫我教佢點大火   唔係呀嘛   咁我話要正常算喇   之後阿姐話呢啲包係唔知咩咩   所以好難大火   咁個師傅係咪一早就應該同我講唔可以大火   咁咪唔駛搞咁多嘢囉   我點知妳點整個包喎 ~

菇場忙咗陣呀   忙到 11 點   好似好快就到 Lunch Time 咁   唔錯唔錯 ~ 

Lunch Time 出去食牛腩河   之後再行陣就番菇場 lu ~   

里奧大人唔駛上大陸   不過我都會番媽咪屋企食飯   同埋月頭最緊要番媽咪屋企食飯添呀   因為要比家用媽咪嘛   唔想成日心掛掛 ~

家姐又係 7 點番到屋企   佢同事去完北歐旅行   比咗啲手信我添呀   勁開心   哈哈   有得食嘛 ~

之前已經想試辣椒朱古力㗎喇   估唔到終於有得試     

喺阿信屋買   $6.9 咋   所以買包比家姐食   

家姐最鍾意食 Panash 嘅丹麥酥   所以間唔中都買比佢   氹佢開心   哈哈

家姐又買番比我   如果住附近就好啦   唔駛拎嚟拎去

依家去媽咪屋企   除咗拎湯走之外   仲會拎埋生果   因為媽咪話啲生果靚就會買埋我同家姐嗰份   所以我次次番到屋企   個膀頭都好痛呢 ~   

差唔多 8 點 15 分就走喇   又比我喺巴士站見到家姐   家姐上次幾勁呀   佢一見我打比佢   佢即刻望住我個方向先聽電話   如果唔係就見唔到我㗎喇   今次就咁啱有人落車   我好開心咁叫家姐家姐   佢先知   人哋唔知以為我黐線   哈哈 ~

番到屋企即開機洗衫   之後就沖涼   里奧大人差唔多 9 點半先番到屋企呀 ~

睇完心計就瞓 lu   呢排天氣凍凍地   差唔多 11 點就會好眼瞓咁呢 ~

鮮蝦卷 + 菜心 ( 6-MAR-2014 )

( 6-MAR-2014  THU )

今朝里奧大人 10 點半要見客   所以又陪我食早餐呢 ~

菇場唔太忙   但好多濕濕碎碎嘅嘢要整   好在唔急啫 ~

Lunch Time 出去銀行搞嘢   差唔多 1 點先搞掂   之後再去阿信屋買桃哈多   $6.9/包咋   勁抵   再去買燒賣粉果就番菇場喇   晏少少就食埋條咖啡卷   咁就夠飽喇 ~

呢個咖啡卷好味呀   叮咗 20 秒之後   再灘凍先食   口感係煙煙韌韌   我最愛啦

家姐打嚟話媽咪星期六唔去食乳豬   話星期六最凍   唔敢出街   咁我都明   凍親好麻煩   但係咪應該打嚟同我講   我即取消或者改時間呢   因為係團購比較多限制家嘛   咁我放工即打比媽咪   話當然以一齊以佢身體狀況行先   我唔會鬧佢   但真係唔鍾意成日咁遲先講囉   唔係第一次係咁嘛   之後佢講番   呢 3 日都血糖低   比佢咁嚇一嚇   真係咩火都收哂   哈哈   之後佢話已經打咗比姑娘   睇下點做囉 ~         

去埋街市買餸   番到屋企即浸菜喇   之後就開機洗衫   抖陣就煮喇   今晚自己食先   依家唔帶 Lunch Box    多數食米粉或者麵呢 ~

非常之感恩呀   媽咪打嚟話打針只係用 6 度   佢真係好叻囉   由原來 16 到依家 6   不過當然唔駛打針就更好啦 ~

是日懶餐 - 鮮蝦卷 + 菜心 

鮮蝦卷 - 喺利豐買嘅   $22/半磅   我覺得佢好味過牛丸哥哥   因為佢真係有蝦   而牛丸哥哥就得豬肉咁囉 ~  

菜心 - 本來想買粟米   但 $13/2 條又覺得貴   同埋里奧大人話佢食完粟米   個胃唔係咁舒服   所以我最後都係買菜心算喇 ~    

食完抖陣就沖涼喇   里奧大人 8 點 40 分先放工   佢話食麵   但今朝已經食咗   叫佢轉食米粉   佢又唔想   咁我咪話佢囉   之後差唔多到屋企   把聲好慘咁話食米粉   咁我話煮麵啦   不過今個星期唔準再食麵囉 ~  

以前勁唔鍾意食桃哈多   覺得佢非常非常之甜   但有次我心情好低落   食哂成包   之後心情真係好咗好多呀   自此之後就愛上咗佢喇   同埋我好鍾意佢個包裝  好得意呢

御泰坊 @ APM ( 5-MAR-2014 )

馬拉盞炒西蘭花蓮藕 - 好味道呀   好鍾意食馬拉盞嘅味道呢

泰式炸蝦餅配酸籽梅汁 - 又係好食   好彈牙

蒜蓉越南牛油雞翼 - 無咩味喎

軟殼蟹蘋果沙律配芒果醬 - 好似次次嚟都食  

泰式鮮蝦金邊粉 - 一路食一路傾   所以最後呢個金邊粉凍哂   變咗唔好食

( 5-MAR-2014  WED )

今朝又係凍凍地同潮濕   好似好耐無見陽光咁喇   快啲好天啦   個人無咁攰咁呢 ~

早餐又食番奶油多士 + 腿蛋   因為唔想食到咁飽 ~

番到菇場忙咗陣啦   對眼又濛又痛   所以最後都要滴眼藥水   等對眼無咁辛苦 ~

晏晝食包   家姐話好飽肚㗎喎   初初唔信   不過原來真係好飽肚   食完個粟米包   再食朱古力酥   但食到一半已經好飽   加上我又飲埋肉汁   所以更加飽 ~

粟米包 

朱古力卷

家姐叫我食粟米包要小心啲   因為會 "必" 哂啲粟米出嚟   果然無講大話   哈哈

放工即走喇   今晚約咗 CC 食飯   我成日以為約佢星期四食飯   因為之前約佢星期四嘛   不過佢唔得閒所以改星期三   咁好彩我星期二 Skype 佢問佢記唔記得星期四食飯   佢話唔係改咗星期三咩 ?!   好彩佢講咋   唔係我記錯星期四呢 ~

佢 6 點 15 分先放工   所以我去無印買咗啲零食   再去 Log-on 睇嘢   之後就走喇 ~

同 CC 一齊去睇 Hand Cream   咁佢話我 Boots 嗰支 Hand Cream 好香   咁我比埋佢啦   佢係都唔要   不過我話屋企真係好多 Hand Cream   幫我清緊啲貨仲好啦   咁佢先肯要   哈哈 ~

Book 咗 6 點 45 分喺御泰坊食飯   呢間泰菜間唔中都會食   因為佢啲水準幾穩定   又坐得舒服   所以幾鍾意去呢間   依家多咗好多款新食品   但我無試啦   因為好多都係辣   但 CC 唔食得辣   話一啲都唔辣得   食完個胃會痛喎   咁我話叫佢揀啦   揀唔辣真係好有難度   因為 Menu 90% 都係有隻辣椒嘛   哈哈 ~

食下傾下   真係唔覺唔覺都已經 9 點半   咁我哋都走喇   今餐係 CC 請我食嘅生日飯   佢次次都好早約我食生日飯   不過我次次都係遲過生日先食   但點都唔夠我勁啦   佢 8 月頭生日   我 10 月先請番佢   所以話今年 7 月要請佢食生日飯   唔想遲過 8 月呀 ~

佢搭巴士   我就搭地鐵番屋企   今晚里奧大人 7 點 15 分就已經放工   我唔去街就起碼 8 點 15 分先放工   邪囉 ~

沖埋涼   再睇一集 "The Mentalist"   差唔多 11 點幾就瞓喇   天氣凍凍哋   真係個人特別想瞓多啲咁㗎 ~         

喺無印買嘅零食   $10 一包都幾抵

越中意越南風味菜館 @ 北角 ( 4-MAR-2014 )

自選一人湯粉餐 - 香茅牛肉撈濛 - 牛肉就 "乸" 得太犀利喇   下次唔叫咯

自選一人湯粉餐 - 燒豬頸肉撈濛 - 豬頸肉唔乾   仲好入味   好味道呢

春卷 (3 條 x 2)

( 4-MAR-2014  TUE )

今朝又凍喎   不過仍都好潮濕   呢啲天氣令人好翳悶囉   同埋瞓極都唔夠咁 ~

早餐食芝腿治烘底   呢期嘅多士好似無咩點烘咁 ~

菇場忙呀   不過勁充實都唔錯   自從 Partner 走咗之後   雖然多嘢做咗   但我覺得好開心喎   因為唔駛再見到佢   因為佢工作態度真係好黑人憎   個人又自私到爆   見到佢真係好影響心情㗎 ~

Lunch Time 出去買豬扒五香肉丁米粉番菇場食   飽到呢   啲五香肉丁好似食極都有咁   下次真係唔再叫豬扒   啖啖肉好鬼滯咁囉 ~

又忙喇   好在 4 點幾搞掂哂   終於可以抖 lu ~

放工去睇中醫   今晚家姐幫我等位   好感恩無人睇呀   哈哈   一去到就有得睇真係勁開心㗎   之後就拎藥   差唔多 6 點 45 分就搞掂哂 ~

同家姐一齊去 Simply Life 買包   $25/Pack 有 3 個唔同款嘅包   其實真係抵啦   因為如果唔係特價嘅話   1 個 Muffin 都要 $17   家姐成日講到好好食咁   所以我都買 Pack 先   家姐之後話佢食唔哂   咁我話比埋我聽日 Lunch 囉   呵呵   佢話我就買到特價包   佢就買得貴喇   $50 得 2 個包   哈哈 ~   

我要去北角新都城百貨買 Hand Lotion 同 Face Lotion   不過同家姐講話要搭巴士   我唔想行呀   因為又未食嘢   又要拎住 8 包藥行成 25 分鐘   我唔想囉 ~

去到新都城即買 Cream   原來做咗會員有 85 折   咁又抵喎   呵呵 ~

買完就去食飯喇   家姐完全無諗過我會帶佢喺北角食嘢呀 ~

食完就坐 619 番屋企   番到屋企差唔多 9 點   真係算快呢   因為我仲可埋煲埋中藥 ~

里奧大人差唔多 10 點就番到屋企   之後佢即刻沖涼   再陪我睇 "The Mentalist"   睇完就瞓喇   都已經 11 點幾   呢排天氣潮濕   又多嘢做咗   所以都唔想太夜瞓 lu ~

呢個提子 Muffin 留番比里奧大人食   不過黐住哂啲朱古力碎   其實本身係無朱古力碎呢

Hand Lotion $58/支 & Face Lotion $78/支

蒜汁豬扒 + 臘潤腸炒蜜糖豆 ( 3-MAR-2014 )

( 3-MAR-2014  MON )

今朝要翻熱啲中藥同肉汁   真係用唔少時間洗嘢   如果唔駛洗嘢就好 lu ~

早餐去另一間試下   我無諗過啲蛋嘅份量都幾多   但我連續幾餐都食咗蛋   所以有啲驚 ~

菇場忙啦   忙到 Lunch Time   本來諗住買番嚟食   不過對眼好濛   所以都係出去食   唔想上網呀 ~

又食酸辣米線喇   今次超勁飽   所以要停一停喇 ~

諗住幫晴晴買頸巾同手襪   不過最後都搵唔到   但居然比我買咗條頸巾比自己   啲質地好 Soft 㗎   同埋超勁暖   又抵喎   $169 仲有 7 折   最鍾意喺季尾買嘢   實買到平嘢   呵呵 ~      

番到菇場做下私人嘢   搞掂哂就諗住抖下啦   星期一好鬼攰家嘛   點知無啦啦又有好多嘢做   之前里奧大人同家姐話忙   但都會眼瞓   我話忙緊點會眼瞓喎   估唔到原來真係忙都可以好眼瞓囉   我終於知道佢哋講咩喇 ~

放工都未做完   但唔係 Urgent   所以留番聽日做呢 ~

今晚唔駛買餸   勁開心   不過番到屋企都要即刻煲中藥同預備晚餐   再開機洗衫   之後就燉肉汁   咁我喺廚房整緊嘢   突然聽到好刺耳嘅響聲   我仲以為係時間計 Shot 咗添   之後出廳啦   原來係由個燉盅度發出嚟   之後我再開幾次都係有響聲   同埋有少少燶味咁   之後唔理佢啦   搞掂哂啲嘢就諗住拎啲肉汁出嚟煲啦   我先發覺我原來無加水就按制   唔怪得響啦   太論盡喇 ~

我 7 點自己食先喇   食完抖陣就沖涼 lu ~                   

是日晚餐 - 蒜汁豬扒 + 臘潤腸炒蜜糖豆  

蒜汁豬扒 - 啲豬扒 "鞋" 鬼到呢   我咬到個口好攰囉   里奧大人一咬已經話 Overcook   不過唔理㗎   我要佢照食囉 ~     

臘潤腸炒蜜糖豆 - 又撞鬼啦   今次到啲臘潤腸又係好鬼硬   唔知係咪厚切嚟煎呢   之前幾次薄切無咁硬㗎噃   里奧大人話呢餐食到好攰   哈哈哈哈 ~

睇埋 "The Mentalist"   差唔多 11 點 20 分就自己瞓先喇   今日真係好鬼攰呢 ~

今日晏晝喺 Stitch & Soul 買嘅頸巾   超鍾意呀   

黑椒汁煎三文魚扒 + 金銀蛋菠菜 + 鮮淮山蓮子圓肉糖水 ( 2-MAR-2014 )

( 2-MAR-2014  SUN )

今朝 10 點醒   但就唔會番教會喇   因為里奧大人好多嘢要做呢 ~

去大快活食早餐   食完之後就自己去街市買餸   番到屋企即預備晚餐   再燉埋肉汁就抖喇 ~

里奧大人食剩半隻   我話留番比我夜晚食啦   無理由咁嘥嘛   之後叫佢下次唔好再食囉   搵我嚟搞 

2 點又去大快活食 Tea   買埋個膠箱就番屋企 ~

里奧大人拚命做公司嘢   咁我又係睇下雜誌咁啦   差唔多 6 點就預備煮飯 lu ~    

是日晚餐 - 黑椒汁煎三文魚扒 + 金銀蛋菠菜 + 鮮淮山蓮子圓肉糖水  

黑椒汁煎三文魚扒 - 今次煎 2 塊   不過其實 1 塊都已經夠   因為真係好厚肉呢 ~     

金銀蛋菠菜 - 唔想就咁淥菜咁寡呀   加金銀蛋會好味好多囉 ~        

鮮淮山蓮子圓肉糖水 - 第 1 次買鮮淮山   $9/斤   不過佢係一條條切開咁賣   所以我拎果條只係 $7   諗住做餸   但好多食譜都係湯水   一係就炒雞柳或者蝦仁   咁我已經有魚   唔想咁多肉嘛   之後再認真睇食譜啦   原來可以煮糖水   咁都好喎   滋潤一下   哈哈 ~

8 點幾就搞掂哂   沖埋涼就休息 lu ~

聽日要番工   所以 11 點幾都要瞓   但其實又唔係好眼瞓囉 ~   

勝利大排檔 @ 九龍灣 ( 1-MAR-2014 )

豉椒炒鵝腸 - 我叫㗎   都 OK 啦

粟米斑塊

蜜椒頭抽豬扒 - 里奧大人都話開始食厭呢個餸啦   哈哈

馬拉啫啫生菜 - 完全唔掂   無味   同埋好多肥豬肉

( 1-MAR-2014  SAT )

今日 Off 呀   不過瞓到 9 點幾都自然醒咗   其實應該係要再早啲醒㗎   因為要去銀行搞嘢呀 ~

去 KFC 食早餐   因為好難得唔駛排隊買嘢   同埋有好多位坐呢 ~

里奧大人話尋晚係咁發夢   我心諗更係壓力大啦   所以成晚發   之後佢話係好笑嘅夢喎   佢笑醒咗添呀   佢話個夢好係佢去食嘢   見到有款朱古力食品   咁佢笑住咁問人係咪有朱古力嘅   嗰個人當然好開心答佢話係有朱古力啦   但里奧大人就答   我都唔鍾意食朱古力嘅 ~

咁另一個夢係佢想買件裇衫   又係笑住問人着咗係咪好 Slim 好似阿乜乜咁   個 Sales 話係呀  好 Slim 㗎   會好似阿乜乜咁   之後里奧大人就話我最憎阿乜乜   黐線㗎   如果現實生活真係咁樣問人同咁樣答人   實比人打都似   哈哈 ~     

我個夢仲搞嘢   話說上星期六同里奧大人行 Ikea   咁佢想買毛巾仔   但我話之前已經買咗 4 Pack 唔同色   真係唔需要再買囉   之後我個夢係我洗完衫   一手拎哂 4 款色   再拎住同里奧大人講   都話買咗 4 隻色啦   里奧大人話我記仇呀   哈哈   同埋呢個夢嘅我好真實呢   呵呵 ~

食完就去恆生   之後再去南洋   咁都差唔多 11 點半   咁我去尖沙咀拎藥   里奧大人就再去番恆生搞嘢就番屋企做嘢 lu ~

經過萬寧   原來 Enjoy 卡有 95 折   咁又入去睇啦   好感恩呀   因為滴露淋浴露係出位價   洗頭水又特價   因為我想買呢兩樣嘢好耐嘛 ~

我買買下都唔知幾點   後尾里奧大人打嚟   我先知道已經 1 點半 lu ~

番到屋企抖陣先   終於要開冷氣喇   因為我覺得好熱呀 ~

3 點出去食嘢   我勁想食車仔麵   所以一定要去食   哈哈   之後煲埋中藥就睇雜誌   真係唔多想郁呀 ~   

我嘅酸齋 + 豬紅 + 豬皮 + 蘿蔔 + 米粉 

里奧大人嘅酸齋 + 腸仔 + 魚腐 + 泰式魚蛋 + 泰式魚餅 + 生菜 + 粗麵 + 幼麵 - 我見到好驚啦   咁大碗   之後佢都話後悔叫咁多餸   因為好飽  

今次又有 3 袋嘢去舖頭洗   所以 6 點要出門口喇 ~

約埋水姑去大排檔食晚飯   食到 7 點半就走喇   因為要同佢去日本城買膠櫃桶   上埋佢屋企幫佢整埋都 9 點   去埋舖頭拎嘢就打的走人 lu ~

番到屋企都 10 點   沖埋涼睇陣電視就瞓喇 ~