馬拉盞炒西蘭花蓮藕 - 好味道呀 好鍾意食馬拉盞嘅味道呢
泰式炸蝦餅配酸籽梅汁 - 又係好食 好彈牙架
蒜蓉越南牛油雞翼 - 無咩味喎
軟殼蟹蘋果沙律配芒果醬 - 好似次次黎都食 哈
泰式鮮蝦金邊粉 - 一路食一路傾 所以最後呢個金邊粉凍哂 變咗唔好食
( 5-MAR-2014 WED )
今朝又係凍凍地同潮濕 好似好耐無見陽光咁喇 快 d 好天啦 個人無咁攰咁呢 ~
早餐又食番奶油多士 + 腿蛋 因為唔想食到咁飽 ~
番到菇場忙咗陣啦 對眼又濛又痛 所以最後都要滴眼藥水 等對眼無咁辛苦 ~
晏晝食包 家姐話好飽肚架喎 初初唔信架 不過原來真係好飽肚 食完個粟米包 再食朱古力酥 但食到一半已經好飽 加上我又飲埋肉汁 所以更加飽 ~
粟米包
朱古力卷
家姐叫我食粟米包要小心 d 因為會 "必" 哂 d 粟米出黎呀 果然無講大話 哈
放工即走喇 今晚約咗 CC 食飯 我成日以為約佢星期四食飯 因為之前約佢星期四嘛 不過佢唔得閒所以改星期三 咁好彩我星期二 skype 佢問佢記唔記得星期四食飯 佢話唔係改咗星期三咩 ?! 嘩 好彩佢講咋 唔係我記錯星期四呢 ~
佢 6 點 15 分先放工 所以我去無印買咗 d 零食 再去 Log-on 睇嘢 之後就走喇 ~
同 CC 一齊去睇 Hand Cream 咁佢話我 Boots 果支 Hand Cream 好香 咁我比埋佢啦 佢係都唔要 不過我話屋企真係好多 Hand Cream 幫我清緊 d 貨仲好啦 咁佢先肯要 哈 ~
Book 咗 6 點 45 分喺御泰坊食飯 呢間泰菜間唔中都會食 因為佢 d 水準好穩定 又坐得舒服 所以幾鍾意去呢間 依家多咗好多款新食品 但我無試啦 因為好多都係辣 但 CC 唔食得辣 話一 d 都唔辣得 食完個胃會痛喎 咁我話叫佢揀啦 揀唔辣真係好有難度 因為 Menu 90% 都係有隻辣椒嘛 哈 ~
食下傾下 真係唔覺唔覺都已經 9 點半 咁我地都走喇 今餐係 CC 請我食嘅生日飯 佢次次都好早約我食生日飯架 不過我次次都係遲過生日先食 但點都唔夠我勁啦 佢 8 月頭生日 我 10 月先請番佢 所以話今年 7 月要請佢食生日飯 唔想試過 8 月呀 ~
佢搭巴士 我就搭地鐵番屋企 今晚里奧大人 7 點 15 分就已經放工 我唔去街就起碼 8 點 15 分先放工 邪 ~
沖埋涼 再睇一集 "The Mentalist" 差唔多 11 點幾就瞓喇 天氣凍凍地 真係個人特別想瞓多 d 咁架 ~
喺無印買嘅零食 $10 一包都幾抵
沒有留言:
發佈留言