大家樂 @ 九龍灣 ( 8-NOV-2015 )

( 8-NOV-2015  SUN )

今朝 10 點起身   叫里奧大人買早餐番屋企食   我唔想出街呀 ~

好喇   食完就執定去旅行啲嘢 lu   之後又抹下櫃   抖陣就沖涼 lu ~

2 點半落去食 Tea   里奧大人想我行下呀   咁就去行下啦   哈哈 ~   

生牛肉湯濛

牛腩片湯濛

食完就去買護膝   再去埋 Taste 買保利奶比媽咪   今次抵呀   $55/2 Pack   所以買咗 6 Pack 比媽咪   之後里奧大人又買咗豪花園 2 Pack   又係抵   因為買 1 Pack 送 1 支   哈哈 ~

買咗 3 隻護膝   我奇怪點解里奧大人買 3 對咁多   仲以為佢想一對留番做 Spare   後尾先知原來一盒係 1 隻咋   哈哈     

里奧大人話藍色蓋嘅啤酒味道   似喺新加坡同冰姑飲嗰隻味道呀   係就好喇   終於飲到   哈哈  

無啦啦條腰勁勁勁勁痛呀   次次都係咁   嗚嗚嗚嗚   所以叫里奧大人幫我按摩   再用按摩機按鬆去   好似好啲咁囉 ~

要補血呀我   今日三餐都一定要食牛   勁想打邊爐   所以 6 點幾就出發去大家樂喇 ~

食完即番屋企   抖陣就沖涼   之後又按摩條腰喇   個肚又無啦啦聚住咁   勁辛苦   不過又唔想玩   所以喺電視度睇 Youtube   睇飲食節目最開心   係咁睇 "愛玩客"   無得去嘅地方   睇下都好   呵呵 ~

條腰太痛   頂唔順呀   所以今晚 10 點自己都瞓先喇 ~  

壽司 (外賣) ( 7-NOV-2015 )

( 7-NOV-2015  SAT )

今朝 8 點 20 分起身   沖涼洗頭   8 點 45 分出門口   諗住打的無人   點知要排隊   好在排第 6 個咋   不過買埋早餐番菇場都 9 點 15 分 lu    遲到呢 ~

我買咗 7 粒燒賣   叫 8 卦食 4 粒   最後我只係食到 2 粒   又嘥咗添  

無胃口   感恩個肚唔太痛   唔太痛就還債啦   做到放工都未做完 ~

我塊臉又青   眼圈又黑   咀唇又白   好在我夠肉地   唔係人哋以為我吸毒呀   所以啲同事都同我講話我樣都好辛苦   唉   唔辛苦點得世間財呀   哈哈 ~

放工即走   我唔想食嘢呀   沖埋個超熱水涼就入房瞓 lu ~

4 點幾起身   里奧大人又煮丁丁   之後我食咗幾啖   佢見到我食嘢   佢好開心㗎   係咁叫我食多啲食多啲   如果我好人好姐   佢就會話我大食   所以間唔中覺得自己大食得滯   就要扮下病   等佢唔駛成日話我   哈哈 ~

7 點突然好餓呀   所以叫里奧大人買壽司   佢話元氣好味啲   所以去元氣買喎 ~

等咗 45 分鐘都未番   仲以為外賣咁耐   原來里奧大人話有個鬼佬問佢稻香點去   佢又帶住個老人家   所以里奧大人帶埋佢哋去囉   原來如此 ~

食完就休息   睇陣電視就沖涼   11 點瞓覺喇 ~

叙苑茶餐廳 @ 九龍灣 ( 5-NOV-2015 ) + ( 6-NOV-2015 )

( 5-NOV-2015  THU )

今朝里奧大人上大陸   佢鬧鐘響咗我都唔知   又幾好瞓喎   呵呵 ~

早餐食奄列   成日唔記得叫走豆   嘥哂啲 嘢添 ~

菇場超忙啦   做呀做   做呀做 ~

肚谷谷又攰   好在尋晚買多咗個麥包比里奧大人   佢唔要就比我做 Lunch 啦 ~

仍然做呀做   終於每月一到   感恩唔太辛苦   又無話扯住超痛同嘔   希望一陣都係咁啦 ~

放工即走去睇醫生   之後食埋嘢就番屋企喇   叫里奧大人自己喺上水食完嘢先番屋企   唔駛餓壞呢 ~

沖埋涼就休息   好景不常   9 點又嘔   好在個肚唔係話劇痛咋 ~

里奧大人啱啱番到屋企   真係望咗佢兩眼   我就入房瞓覺喇 ~

( 6-NOV-2015  FRI )

9 點唔夠就起身打番去菇場請假   之後又瞓下停下 ~

又唔係話超劇痛   感恩   但就超勁攰囉 ~

瞓下又醒下   嘔下又沖下涼   完全頭暈暈唔知發生咩事   哈哈 ~

瞓到 4 點幾就出廳喇   唔係一陣腰骨痛 ~

里奧大人 7 點唔夠放工   我本來想食嘢   後尾都係唔想食   佢自己就煮五香肉丁辛辣麵   好在我聞到都覺得香   唔係就會鬧死佢   哈哈 ~

沖埋涼   10 點瞓喇   因為聽日要番工呢 ~

嘉華大酒樓 @ 官塘 ( 4-NOV-2015 )

招牌小炒皇 - 食到唔知食咩   所以是但叫個有菜有肉嘅算喇  

秘製好味骨 - 賣相恐怖   仲以為糖醋汁   原來係千島醬   

荔芋油鴨煲

我同家姐講話對眼鏡 Icon 勁似胸圍   家姐話經過我把口都無好嘢喎   大佬   咁係似吖嘛 

( 4-NOV-2015  WED )

尋晚無開冷氣瞓   不過里奧大人話我碌嚟碌去   應該係熱   所以最後都開番冷氣瞓   呵呵 ~

早餐食米粉餐   因為 Lunch 食麥皮   咁早餐一定要夠飽呢 ~

菇場忙下停下   我都可以休息下   對眼好攰呀   三年前散光係 50   依家已經 150 喇 ~

Lunch Time 仲未餓   所以差唔多 1 點先食麥皮   今次食 1/3 杯   真係啱啱好   麥皮呢家嘢   唔可以食咁多   因為見到個樣已經唔開胃   哈哈哈哈 ~

好嘢   今日無咁忙   可以順利準時放工 ~

今晚同媽咪家姐食飯   所以我都上媽咪屋企坐陣先 lu ~

去 759 買咗包粟米條   因為我真係覺得喺嘉華食到好悶呀   哈哈 ~

最後都無食   咁益家姐啦 

媽咪買嘅生果   我同家姐可以食一個星期   

家姐 7 點幾先嚟到   佢又話好餓   之後就食埋生果就食到好飽   頂到上喉嚨   嚇到工人叫佢唔好再食   哈哈 ~

食完就上媽咪屋企坐   9 點就走人喇   又拎咗一大堆生果   家姐仲要分開兩個環保袋拎   係咁試下點拎先無咁攰   麻鬼煩 ~

里奧大人今晚 7 點半放工   佢買壽司番屋企食   真係只夾 8 件咋喎   唔怪得佢話我成日夾 12 件比佢   佢食到好辛苦啦   哈哈 ~

番到屋企   佢話我真好彩   因為佢正想沖涼   如果佢沖涼   我就無門口入啦   佢鎖門家嘛   我咪話囉   仲話我好彩   沖涼就同我講嘛   唔通要我企喺門口出門得你咩 ~

睇陣電視   11 點幾就瞓喇 ~

蠔油燜冬菇節瓜 + 燻蹄 (外賣) ( 3-NOV-2015 )

( 3-NOV-2015  TUE )

尋晚瞓得唔錯   感恩感恩 ~

早餐食熱狗餐   我以前成日覺得熱狗唔飽㗎   試過一次自己整   同里奧大人每人食 2 隻熱狗   仲要只係就咁茄汁同芥辣咋   但食完之後就超級飽   嗰次之後都驚驚哋再食熱狗呀   哈哈 ~

菇場無咁忙   可以做下啲 Filing   又整下其他嘢   時間一樣過得好快呢 ~

諗住 Lunch 食米粉   點知阿齋又問我食啲咩   佢又話想食啲咩   搞到我又想食酸辣紅薯粉囉   之後佢又話食埋酸辣   咁我多數買番嚟食   可以慢慢嘆 ~

又係 Hea 到等放工   今晚就咁去買燻蹄就得 lu ~

浸埋冬菇就熨衫   之後就煮節瓜   搞掂就熨埋幾張床單   其實只係熨扁等佢易入櫃   不過熨到好鬼熱   終於都要開冷氣呀 ~   

里奧大人 7 點打嚟話有排先放工   咁我即煮嘢喇   反正今晚煮福麵   咁快啲食完快啲去徑步 ~

是日懶餐 - 蠔油燜冬菇節瓜 + 燻蹄 (外賣)

蠔油燜冬菇節瓜 - 實在唔想就咁節瓜咁悶   所以加啲珍珠菇   今次整得好味呀   所以我好開心呢   哈哈 ~

燻蹄 (外賣) - 今次啲燻蹄好鹹   所以食完超級口渴呀 ~

食完洗埋碗   再抖陣就去徑步   8 點出去徑步   感恩都徑咗 25 分鐘   因為我要煮麵比里奧大人食   所以唔可以徑咁耐嘛 ~

我成日叫佢去鑽石山打比我   不過佢想我徑耐啲   有時會喺九龍灣先打比我   咁佢番嚟就一定唔有麵食   因為我要煲水同煮   起碼要 10 分鐘   同埋咁樣搞到我好趕   不過佢就係話唔想我咁緊張喎   我話今次去到鑽石山   要拎埋今日份報紙   喺鑽石山站顯示燈位置影相比我   咁我就信喇   哈哈 ~

佢食嘢嘅時候   我都去沖涼喇   成身立黐黐好唔舒服嘛 ~

洗埋碗就叫佢拻橙比我食   呢樣係我唯一一定要佢做嘅嘢   因為我次次拻完橙   手指公嘅指甲同肉會比我整到流血   唔知係咪大力得滯呢 ~

今晚都幾攰   所以 11 點過啲就去瞓喇 ~

燒汁焗雞翼 + 魚片炒銀針粉 + 菜心 ( 2-NOV-2015 )

( 2-NOV-2015  MON )

尋晚瞓得唔係咁好   仲諗住有睡意個人會瞓得好添   好在起身都 OK 精神呢 ~

今朝去到茶餐廳都 8 點半喇   好在唔太餓   食奶醬多可以快啲食完就睇陣報紙呢   呵呵 ~

菇場忙呀   咁都好   唔會中眼瞓   呵呵 ~

Lunch Time 出去買紅薯粉番菇場慢慢食   食完夠鐘又要開工喇 ~

知道自己食得好飽   所以就去擺番啲文件入 File 再入箱   夠哂體力勞動   仲有啲想出汗添呀 ~

放工去街市買餸   之後就番屋企喇 ~

里奧大人 7 點唔夠打嚟話放工   平時喺街度唔覺電話鈴聲咁響   但屋企咁靜   無啦啦電話響   次次都嚇咗一跳㗎   真係遲早驚有心臟病 ~   

嚇咗一嚇成個人醒哂   所以即刻去焗雞翼   因為我真係完全唔記得焗佢添 ~

是日晚餐 - 燒汁焗雞翼 + 魚片炒銀針粉 + 菜心

燒汁焗雞翼 - 懶呀   就咁用牛肉燒汁醃就算喇   最搞嘢係里奧大人問我係咪加咗 Wasabi ~        

魚片炒銀針粉 - 加埋買咗 N 年嘅紫洋蔥   本來諗住加蒜芹   但屋企仲剩兩個紫洋蔥   所以求其加埋佢喇   依家仲剩 1 個   應該洋蔥豬扒㗎喇   哈哈 ~ 

菜心 - 我一邊炒粉一邊淥菜   但驚啲粉黐底   所以係咁炒係咁炒   唔鬼記得淥緊菜   所以啲菜真係超級林甜喇   最驚啲好林嘅菜   我第一時間食哂啲菜先   唔係我知我越遲食就越想會掉咗佢囉 ~   

洗埋碗   抖陣   9 點用里奧大人一齊出去徑步喇   今晚有啲暈又有啲攰   所以都係行平路算喇   行咗半個鐘即走   好在有啲汗   咁先似做運動嘛   哈哈 ~

沖埋涼就抖喇   睇埋電視   11 點 45 分先瞓呀   希望聽朝起身有精神啦 ~

紅蟻泰國菜館 @ 牛頭角 ( 1-NOV-2015 )

串燒沙爹半打 (雞/豬) ($55) - 都燒得好香   沙爹醬都好味   但雞肉就有啲羶味囉     

蒜蓉包 ($20) - 熱辣辣又香脆   但無咩蒜蓉味   如果唔係更加好味呢   

木瓜沙律 (蝦米) ($42) - 里奧大人要小辣   但對於我哋嚟講都好鬼死辣呀   不過我又覺得好食   因為夠凍又酸酸哋   我終於可以食到好味嘅木瓜沙律   所以好開心呢  

泰式炸春卷 5 件 ($50) - 我話唔夠   所以叫多呢碟春卷   阿奧驚熱氣   所以唔敢食咁多   我食咗好似 3 條半呀   食完又爆瘡   

三色冰 ($20) - 本身阿奧飲㗎   之後佢話啲沙律好辣   所以要飲啤酒喎   咁呢杯又比我飲囉   佢叫咗小甜小冰   我覺得完全無味   記得以前啲三色冰好似係用鮮椰汁㗎   所以係好好飲呢 

藍帶啤酒 ($16) - 超鍾意呢隻杯仔   突然間令到我好掛住泰國添   阿奧呢一星期居然飲咗 3 晚啤酒   所以佢飲剩一杯   我叫佢唔好飲喇   我覺得飲得太多唔好囉     

( 1-NOV-2015  SUN )

今日有事奉   所以 9 點半要起身喇   即刷牙沖涼   再落去食埋早餐   番屋企抖陣又出發 lu ~

崇拜完畢就同里奧大人去允記買波鞋   里奧大人話真係低處未算低   因為佢買果對只係 $239 咋   仲要着得舒服過 $299 嗰對波鞋   感恩仲有碼添呀 ~

抖陣就去舖頭洗   順便約埋水姑食 Tea ~

搞掂哂都 3 點幾   又要打的 lu ~

抖陣就飲湯   之後開機洗衫   尋晚買果件黑色外套洗完之後嚴重甩色   好在今次成機都係黑色咋   不過里奧大人話佢條 Navy 西褲都變咗黑色喎   但佢話無問題   呢下佢最好   唔會怪我   如果佢染到我啲衫其他顏色   我會呱呱嘈㗎 ~

家姐煲嘅青紅蘿蔔豬骨湯   好清甜   最正係有 1 條超甜粟   哈哈  

飲埋湯再熨埋一機衫都 6 點 15 分   又要出去食飯 lu   我發覺好多時星期日都滕嚟滕去咁㗎   覺得好似啱啱同管理員打完招呼   隔陣又打咁   哈哈 ~ 

食完都 7 點半   又係好飽   同埋我同里奧大人着咗新鞋   所以想行鬆佢呀   行咗差唔多 50 分鐘就番屋企喇   因為行到出哂汗   想番屋企沖涼呢 ~

睇下電視打下機   今晚好眼瞓咁呀   所以我 10 點 45 分自己入房瞓先喇 ~