紅蟻泰國菜館 @ 牛頭角 ( 1-NOV-2015 )

串燒沙爹半打 ( 雞/豬 ) ( $55 ) - 都燒得好香架   沙爹醬都好味   但雞肉就有 d 羶味囉     

蒜蓉包 ( $20 ) - 熱辣辣又香脆   但無咩蒜蓉味   如果唔係更加好味呢   

木瓜沙律 ( 蝦米 ) ( $42 ) - 里奧大人要小辣   但對於我地黎講都好鬼死辣呀   不過我又覺得好食   因為夠凍又酸酸地   我終於可以食到好味嘅木瓜沙律   所以好開心呢  

泰式炸春卷 5 件 ( $50 ) - 我話唔夠   所以叫多呢碟春卷   阿奧驚熱氣   所以唔敢食咁多   我食咗好似 3 條半呀   食完又爆瘡 @@   

三色冰 ( $20 ) - 本身阿奧飲架   之後佢話 d 沙律好辣   所以要飲啤酒喎   咁呢杯又比我飲囉   佢叫咗小甜小冰   我覺得完全無味   記得以前 d 三色冰好似係用鮮椰汁架   所以係好好飲呢 

藍帶啤酒 ( $16) - 超鍾意呢隻杯仔   突然間令到我好掛住泰國添   阿奧呢一星期居然飲咗 3 晚啤酒   所以佢飲剩一杯   我叫佢唔好飲喇   我覺得飲得太多唔好囉     

( 1-NOV-2015  SUN )

今日要做司事   所以 9 點半要起身喇   即刷牙沖涼   再落去食埋早餐   番屋企抖陣又出發 lu ~

崇拜完畢就同里奧大人去允記買波鞋   里奧大人話真係低處未算低   因為佢買果對只係 $239 咋   仲要着得舒服過 $299 果對波鞋   感恩仲有碼添呀 ~

抖陣就去舖頭洗   順便約埋姑奶食 tea ~

搞掂哂都 3 點幾   又要打的 lu ~

抖陣就飲湯   之後開機洗衫   嗚   尋晚買果件黑色外套洗完之後嚴重甩色   好在今次成機都係黑色咋   不過里奧大人話佢條 Navy 西褲都變咗黑色喎   但佢話無問題   呢下佢最好   唔會怪我   如果佢染到我 d 衫其他顏色   我會呱呱嘈架 ~

家姐煲嘅青紅蘿蔔豬骨湯   好清甜   最正係有 1 條超甜粟   哈哈  

飲埋湯再熨埋一機衫都 6 點 15 分   又要出去食飯 lu   我發覺好多時星期日都滕黎滕去咁架   覺得好似啱啱同管理員打完招呼   隔陣又打咁   哈 ~ 

食完都 7 點半   又係好飽   同埋我同里奧大人着咗新鞋   所以想行鬆佢呀   行咗差唔多 50 分鐘就番屋企喇   因為行到出哂汗   想番屋企沖涼呢 ~

睇下電視打下機   今晚好眼瞓咁呀   所以我 10 點 45 分自己入房瞓先喇 ~