蠔油燜冬菇節瓜 + 燻蹄 ( 外賣 ) ( 3-NOV-2015 )

( 3-NOV-2015  TUE )

尋晚瞓得唔錯   感恩感恩 ~

早餐食熱狗餐   我以前成日覺得熱狗唔飽架   試過一次自己整   同里奧大人每人食兩條   仲要只係就咁茄汁同芥辣咋   但食完之後就超級飽   果次之後都驚驚地再食熱狗呀   哈 ~

菇場無咁忙   可以做下 d filing   又整下其他嘢   時間一樣過得好快呢 ~

諗住 lunch 食米粉   點知阿齋又問我食 d 咩   佢又話想食 d 咩   搞到我又想食酸辣紅薯粉囉   之後佢又話食埋酸辣   咁我多數買番黎食   可以慢慢嘆 ~

好嘢   hea 到等放工   今晚就咁去買燻蹄就得 lu ~

浸埋冬菇就熨衫   之後就煮節瓜   搞掂就熨埋幾張床單   其實只係熨扁等佢易入柜   不過熨到好鬼熱   終於都要開冷氣呀 ~   

里奧大人 7 點打黎話有排先放工   咁我即煮嘢喇   反正今晚煮福麵   咁快 d 食完快 d 去徑步 ~

是日懶餐 - 蠔油燜冬菇節瓜 + 燻蹄 ( 外賣 ) 

蠔油燜冬菇節瓜 - 實在唔想就咁節瓜咁悶   所以加 d 珍珠菇   今次整得好味呀   所以我好開心呢   哈 ~

燻蹄 ( 外賣 ) - 今次 d 燻蹄好鹹   所以食完超級口渴呀 ~

食完洗埋碗   再抖陣就去徑步   8 點出去徑步   感恩都徑咗 25 分鐘   因為我要煮麵比里奧大人食   所以唔可以徑咁耐嘛 ~

我成日叫佢去鑽石山打比我   不過佢想我徑耐 d   有時會喺九龍灣先打比我   咁佢番黎就一定唔有麵食   因為我要煲水同煮   起碼要 10 分鐘   同埋咁樣搞到我好趕   不過佢就係話唔想我咁緊張喎   我話今次去到鑽石山   要拎埋今日份報紙   喺鑽石山站顯示燈位置影相比我   咁我就信喇   嘩哈哈 ~

佢食嘢嘅時候   我都去沖涼喇   成身立痴痴好唔舒服嘛 ~

洗埋碗就叫佢拻橙比我食   呢樣係我唯一一定要佢做嘅嘢   因為我次次拻完橙   手指公嘅指甲同肉會比我整到流血   唔知係咪大力得滯呢 ~

今晚都幾攰   所以 11 點過 d 就去瞓喇 ~