糯米飯 ( 7-MAR-2016 ) (禁)

( 7-MAR-2016  MON )

尋晚瞓得唔好   醒咗幾次   但今朝起身又無話特別攰喎   呵呵 ~

今日又會為媽咪健康而禁食祈禱   不過我只係唔食紅肉   但我盡量想食素啦   對自己都健康啲呢 ~

菇場忙呀   之後停下又忙下囉 ~

Lunch Time 仲未餓   所有行咗陣先買麵包番菇場食喇 ~

家姐之後打嚟話媽咪又入院   因為復康姑娘話媽咪聞 2 度都辛苦   所以叫佢即入院呢 ~

又係忙下停下   放工去探媽咪   里奧大人講咗幾次叫我唔好頂咀   我話佢唔激我嘅話   應該相安無事嘅   哈哈 ~

去到醫院都 6 點 20 分   好感恩見到阿 Sir   咁即問媽咪情況點   佢話媽咪入嚟嘅時候係聞 4 度   依家 2 度   同埋血氧都去番 97   又話媽咪手腳有水腫   我問點解會有水腫 ?!   佢都無咩點食嘢   佢即刻問媽咪平時食咩 ?!   我話佢最鍾意出街食   之後佢話唔可以再食鹹同埋老火湯   同埋一定要清淡   我咪話囉   我講無用   佢哋唔聽   咁阿 Sir 即刻想起身出嚟同我入病房咁   之後我話屋企人未到呀   佢即問家姐幾點嚟 ?!   但我話家姐起碼 7 點幾囉 ~

之後再解釋話因為食鹹嘢排唔到出嚟   所以手腳腫   啲水同血又走唔到   就導致心臟好難 Pump 氣就會氣喘   再咁食鹹嘢只會出出入入醫院 ~

咁我入去探媽咪啦   阿 Sir 教媽咪合埋口深呼吸   之後再叫佢坐直   阿 Sir 直頭問都唔問   就咁直接整高張床   平時媽咪實話唔坐㗎   所以我咪成日同家姐同工人講囉   人哋覺得好先會叫妳咁做   唔係人咃鬼理妳咩 ~

阿 Sir 扶完媽咪之後就好認真同媽咪工人講   話以後唔好再食鹹嘢   一定要清淡   個心臟已經唔好   妳再咁食法   個心好快會比妳搞 "彎" 哂 ~

咁媽咪話餓啦   原來工人滾咗白菜豆腐湯   同埋蒸咗一片臘腸同飯   咁我一定唔比媽咪食臘腸啦   佢話食一片   我慶到發哂顛咁鬧佢   隔離床兩個人靜哂   之後佢仲要話半片   我更鬧得佢勁   條命緊要定味道緊要呀?!   之後我直頭問佢係咪想死呀 ?!   係就唔好入醫院喇唔該   其實我唔想用咁負面嘅字   但佢真係次次都令我咁火滾 ~

因為媽咪可能肺炎   驚佢有流感   所以要抽鼻涕去化驗   咁阿 Sir 抽完之後   就喺櫃桶拎個口罩比我   我聽到佢話戴番口罩   咁我戴帶番啦   之後佢笑住話:唔係叫妳戴帶   哈哈哈哈   我覺得超級勁樣衰呀   因為佢戴咗口罩   我唔係聽得咁清楚   同埋其實嗰刻我覺得佢好好人啦   比個口罩我戴   哈哈 ~

家姐 7 點幾到   我就問佢尋日同媽咪食咗咩   佢話牛腩麵   但已經浸咗水   同埋只食咗牛筋   我咪話囉   呢啲入哂味   根本浸咗都會有味   同埋依家就係食咗鹹嘢就入院   妳唔好話唔係鹹囉   我想講話對媽咪好唔係咁   妳咁做只會害死佢 ~

里奧大人 7 點半放工   咁我都走喇   尋晚拎咗糯米飯嘛   所以今晚食埋去呢 ~

估唔到落毛毛雨   仲好密添   我無帶遮家嘛   嗚嗚 ~

叫里奧大人煲定熱水   咁我番到屋企即蒸飯   之後開機洗衫 ~

8 點半先食飯   食完再洗碗   沖埋涼就熨衫   10 點半終於可以休息睇電視 ~

睇完都 11 點幾   要瞓 lu ~

喜雙逢酒樓 @ 大埔 ( 6-MAR-2016 )

鴻運乳豬全體 - 新鮮熱辣脆卜卜   咁我坐老人枱嘛   所以佢哋食好少   我食咗好似 6 件呀   食完就知死啦   因為之後食唔落其他嘢呀   哈哈   

上湯波士頓龍蝦伊麵 (3斤) - 食咗一啖仔龍蝦肉  

發財玉環瑤柱甫 -  我覺得啲節瓜切得好薄   我好鍾意食呢啲芡汁㗎

富貴花枝炒帶子 - 無食  

清蒸大沙巴龍躉 - 里奧大人姐夫夾咗比我食   之後里奧大人叫姐夫比個匙更佢   因為佢要夾 "臉豬 dun" 比我食   我十級感動呀   佢真係每次食魚   見到臉豬 dun"  有肉就實會夾比我㗎

紅燒竹笙雞絲生翅 - 食咗幾啖   因為聽完家姐個電話   我當堂無哂心機   

蠔皇鮑螺片扣鵝掌 - 無食  

喜雙逢脆皮乳鴿 (3 隻) - 無食  

生炒臘味飯 - 里奧大人話幾煙韌喎   咁我試啖啦   又 OK 喎   呢枱居然無人食   咁就啱喇   我可以打包   聽晚唔駛煮飯

野菌乾燒伊麵 - 我同里奧大人講話可能啲人食唔哂   所以擺埋一碟   原來根本係無人食過   但點解扁 Pat Pat 咁拎出嚟㗎

壽包 - 唔好食嘅

蓮子紅豆沙 - 我最鍾意嘅紅豆沙   但只食咗 1 啖   因為口感好似鼻涕呀

( 6-MAR-2016  SUN )

今朝 8 點半鬧鐘響   我完全唔知   之後聽見洗手間有聲   勁驚   因為我驚唔知醒   再睇個鐘   原來已經 8 點 47 分   要起身喇 ~

里奧大人話我瞓得好林   所以無叫醒我   諗住自己食完早餐   番埋主日學先再叫我呢 ~

咁佢都搞掂好哂   就去大家樂搵位先 ~

但尋晚啲泰菜太辣喇   尋晚我番到屋企個肚都有啲唔舒服   今朝直頭肚屙 3 次   諗住叫里奧大人買外賣比我   不過佢原來已經食緊   感恩抖咗陣就無再肚痛   咁我落去食啦 ~

食完番屋企抖陣   之後番主日學喇 ~

崇拜完畢就番屋企   唔知做咩好餓   所以 2 點半都出去食嘢喇 ~

午餐食飯真係好鬼飽   同里奧大人又要兜大運先番屋企   今日好焗熱呀   我見好多人都着短袖添呀 ~

咖哩牛腩飯 - 雖然好細心咁滾住   但我又唔覺得個咖哩係好熱咁喎 

口水雞米線 - 都幾好味   下次會再嚟食   呵呵 

今晚里奧大人姐夫請食生日飯   我哋 4 點 45 分出發去大埔   去埋大埔墟買嘢就去酒樓喇 ~

有機味噌 ($21) / 日本芝麻脆海帶 ($28)

特選泰國龍眼肉 (特價 $79)

中 ($25) 係我嘅   細 ($18) 嘅比家姐  

今晚約咗爺爺早啲去酒樓   因為佢教里奧大人吉耳仔穴位呀   因為上次里奧大人送兒甥仔機嘅時候   姑奶同里奧大人講話爺爺幫佢吉咗耳仔穴位   初初都唔信係咪咁有效   點知一個星期之後   姑奶條腰真係唔痛   所以里奧大人即叫爺爺下次教佢按穴   因為里奧大人好擔心我個纖維瘤呢 ~

我覺得真係神嘅美妙安排   我之前甲狀腺有問題   又係同姑奶傾下偈   之後爺爺話佢睇開個軍醫好有料   所以陪我哋上去睇   我食咗 9 個月中藥   甲狀腺依家無再翻發   咁我依家諗住睇中醫調理下嘛   點知醫師番咗美國同仔女坐遊輪嘆世界   今年應該唔番㗎喇 ~

今次又係咁啱   里奧大人同姑奶傾開偈   知道爺爺識按穴   又可以幫我按穴   我最主要係調理內分泌失調   同埋我要求按埋減肥穴道   呵呵 ~

7 點半先開始食飯   食食下飯家姐打嚟話要訂氧氣樽   我好奇怪點解 0.5 度會用得咁快   佢話復康姑娘用儀器 Check 咗媽咪血氧得 77 度   所以要用 2 度氣   心同肺都好差   得閒探佢多啲   之後叫我唔好成日再鬧媽咪 ~

我聽完當堂驚啦   之後再慢慢冷靜落嚟   我同里奧大人講話媽咪要聞 2 度   佢話點解尋日 0.5 度   今日突然 2 度   但媽咪尋日用 0.5 度無話辛苦喎   因為如果明明係 2 度但用 0.5 度氣   根本條氣會好唔順囉 ~

我同里奧大人最憎家姐係人講妳就聽   又唔上網睇下有關資料   完全唔會用腦分析點解會有咁結果   如果用 2 度   妳第一時間都會問點解尋日半度無問題啦   唔好淨係重點放喺嗰句 "得閒要睇多啲媽咪"   應該再更加叫媽咪做多啲運動   心肺功能就會好啲啦   次次里奧大人叫媽咪郁多啲  家姐就會話媽咪有腎病所以好攰   但里奧大人同我講話都費事同佢講   因為媽咪不嬲都係懶   同埋妳明知媽咪有腎病   妳又買啲鹹嘢味精嘢佢食 ?!   咁即係妳想點呢 ?!

所以我好慶幸身邊有里奧大人   我一話媽咪聞 2 度   佢即刻幫我分析情況   之後隨即上網睇下係咪腎唔好   所以影響血氧 ~

我成日同里奧大人講   究竟係咪我過份緊張   一聽到媽咪有乜問題   我即刻勁擔心   同埋夜埋一定瞓得唔好   但家姐佢又無嘢㗎喎   仲問我點解會瞓得唔好添 ~

10 點半走人   番到屋企差唔多 11 點半   即沖涼瞓覺喇 ~

紅蟻泰國菜館 @ 牛頭角 ( 5-MAR-2016 )

木瓜沙律 (蝦米) - 雖然好味   但好鬼辣呀   嗚嗚   

泰式炸蝦餅 - 今次無咁金黃   但一樣好好味   好彈牙呢  

香辣肉碎炒河 (雞) - 里奧大人話好辣   我話唔辣喎   因為我知道有好多指天椒碎   所以撩哂出嚟   但只係撩自己嗰碗   哈哈   我實在太唔細心喇   下次我撩哂出嚟先夾比佢呢

芒果糯米飯 - 超勁正呀   因為糯米飯好煙韌   哈哈 

藍帶 - 一話食蝦餅   里奧大人就話要飲啤酒   

( 5-MAR-2016  SAT )

個天灰灰暗暗   又濕濕立立咁   春天又來喇   最難頂呢  哈哈 ~

今朝唔餓   所以好後悔口快快叫米粉餐 ~

菇場忙咗陣   之後 Hea 喇   今日無咩人番工   靜英英咁   又眼瞓喎   勁想番屋企瞓覺   哈哈 ~

家姐 11 點去到媽咪屋企等氧氣機喇   媽咪就 11 點左右出院   最搞嘢係氧氣機都未到   因為家姐約咗 12 點前   又無諗過媽咪咁快番到屋企呢   哈哈 ~

我放工就即走   里奧大人就幫我拎埋啲高鈣奶去媽咪屋企   再睇下部機點用   咁我就去餐廳攞位先 ~

羅漢齋炒麵 - 勁難食

西班牙海鮮焗飯 - 媽咪話食嘛   但只食咗幾啖

沙爹牛肉包配瑞士雞翼

午餐肉炒麵

家姐約咗 Agent 傾嘢   所以 2 點 15 分要即走   我同里奧大人就去媽咪屋企   因為工人想我哋再睇下部氧氣機用得啱唔啱呢   佢成日同媽咪講   話妳要食嘢做運動   唔好要兩位太太擔心   我成日都唔記得問佢   擔心呢兩個字點學番嚟   哈哈 ~

媽咪只係聞 0.5 度   但其實 0.5 度係好皮毛   幾間氧氣公司啲人都係咁講   有間直頭無 0.5 度氧氣機買添   佢話做運動好過   同埋氧氣機提供咗氧氣   個肺唔郁都有氧氣比妳   即係連深呼吸都可以慳番   咁就慘啦   呢啲咁重要嘅機能係要郁家嘛   不過我都唔再講咁多喇   講到我同里奧大人都好攰 ~

坐到 3 點幾就番屋企喇   好鬼攰   但又瞓唔到   所以打陣機   之後差唔多 5 點半先開始眼瞓   一瞓就瞓咗半個鐘   之後精神番好多喇   呵呵 ~

突然好想食泰菜   所以又去紅蟻喇 ~

我以前行得勁慢   因為唔鍾意做運動   自從鍾意行路同徑步之後   我行得快過之前好多   特別係夠精神同埋唔駛揹大袋嘅時候   行得仲快   所以里奧大人會同我講話我係拖住佢行   覺得我行得好快   因為我用咗徑步嘅步伐   但其實唔趕   真係唔知好定唔好呢 ~

食到好鬼飽   所以去咗晨運徑兜個大圈先番屋企   咁由泰菜館再加埋晨運徑到番到屋企   都要半個鐘   當做咗運動㗎喇   所以我鍾意去食泰菜就咁解   食完可以順便做埋運動   哈哈 ~

沖埋涼就睇電影   我睇睇下都瞓咗   里奧大人以為我扮瞓   之後我又醒番再睇   睇到 11 點半   終於做完   即刻入房瞓喇 ~

魚香茄子 + 蕃茄薯仔魚湯 ( 4-MAR-2016 )

( 4-MAR-2016 FRI )

今朝無咁凍   同埋開始感覺到黐黐立立嘅感覺   下星期又潮濕   星期五仲話降到 10 度   我前兩日先想收埋啲厚衫   依家唔駛收 lu ~

早餐食吉列魚柳餐   好味呀   之後 8 卦又嚟咗   等埋佢食完就番菇場喇 ~

菇場唔太忙   可以抖抖 ~

Lunch Time 仲未餓   所以去萬寧買嘢   再包 2 個包番菇場   1 點半先開始餓   不過大粒唔喺度   可以慢慢食呢   呵呵 ~

搞掂哂氧氣機   點知原來媽咪鉀高   要等聽朝醫生睇完報告先知出唔出到院   麻鬼煩   明知一食鹹就血壓高同鉀高   都仲要食   真係好鬼煩 ~

又 Hea 到放工   今晚去街市買餸   買完即番屋企   拎住啲餸好鬼重呀 ~

搞掂哂就開機洗衫   真係由旅行番嚟之後就晚晚開一機衫   好在有抽濕機   唔係真係有排都未乾 ~

里奧大人差唔多 8 點先放工   咁我即預備晚餐喇 ~

是日懶餐 - 魚香茄子 + 蕃茄薯仔魚湯  

魚香茄子 - 唔想食豬肉同雞肉   所以買咗 $10 魚片頭   再加埋 3 條茄子   原來用一包魚香茄子醬係唔夠味   可能太多茄子   下次都係買 1 條算喇   哈哈 ~ 

蕃茄薯仔魚湯 - 今次用 5 個蕃茄 + 1 個薯仔 + 1 條大眼雞   其實我鍾意用大眼雞多過紅衫魚   無咁多骨   條魚可以食番囉   依家 1 條都 $28   滾個咁嘅湯都要接近 $50   呢餐飯求其到不得了都要 $80   講緊仲係 1 個餸添   啲錢真係好唔見洗呀 ~

本來想徑步   但搞掂哂都 9 點半   覺得有啲攰   都係唔徑喇   沖涼休息好過 ~

睇下電視打下機   12 點先瞓   慘   聽日仲要番工 ~

麥當勞 (外賣) ( 3-MAR-2016 )

脆脆黑椒漢堡套餐 + 1 個巨無霸 - 我好耐無食麥記套餐   因為我唔係咁想飲杯汽水   但今晚就叫里奧大人買套餐喇   我仲以為套餐係有大薯條   因為我印象中好似無咁大包嘛   之後佢話加大㗎   佢話想食 Shake Shake 薯條喎

和風紫菜調味粉   Shake Shake 薯條又係幾好味嘅   哈哈 

( 3-MAR-2016  THU )

今朝都涼涼哋   不過下星期又會凍到得 10 度   好難想像 3 月會出現 10 度   全世界天氣都反想哂   好恐怖 ~

早餐食熱狗   食到一半又見到 8 卦   好在佢食嘢夠快   包保唔會遲到呢   呵呵 ~

菇場忙下停下   眨下眼又到 Lunch Time ~

今晚探媽咪   所以食飽啲 ~

放工同高妹一齊搭小巴   呢幾次都係同佢一齊坐   佢好搞笑   成日話陪我坐   好似細路仔咁  哈哈 ~

去到醫院係 6 點 10 分   咁媽咪又係坐喺度瞓   咁我由佢瞓啦   都費事叫佢   反正叫完佢都係瞓   我同工人傾偈好過   之後我同家姐話好羨慕媽咪可以咁好瞓   瞓到 7 點半都未起身   之後姑娘叫幫佢量血壓   姑娘都話佢唔好瞓啦   呢度咁隔涉都嚟探妳   我即刻話佢就係好鍾意我睇住佢瞓㗎   次次都瞓嘅   佢最開心係咁呢 ~

到佢聞藥   又係懶到唔自己拎   根本係有力㗎喎 ~

另一個姑娘都話媽咪好懶   入嚟咁耐   次次都見佢瞓   又話媽咪唔見我哋探就唔係咁開心   但我話我哋嚟探佢   佢次次都瞓   咁妳話探佢其實都無意思啦 ~

醫生同 2 個姑娘都話媽咪懶   咁唔係得我話佢啦   之後工人同我講話   佢叫媽咪郁下隻手咋   媽咪同佢講話想死   我話我哋想死都未到佢想死啦   唔珍惜自己所擁有嘅嘢   有啲人想郁都無郁呀 ~    

咁家姐 7 點 15 分到嚟到   我同佢商量下用咩氧氣機   但我話其實 1 度係根本唔需要揹機咁嚴重   係佢太懶唔願郁   所以條氣實唔好啦   咁點都甩唔到條貓鬚   咁醫生就唯有話用氧氣機啦   但家姐話媽咪都唔會令到醫生講明要佢用氧氣機喎   咁我都無嘢好講啦   佢兩個完全唔明   成日覺得有機器同藥物   就係會醫得好   但其實最重要係妳郁   妳唔郁   乜機能都一定退化   都唔知佢哋諗乜 ~

同埋明知一食鹹嘢就血壓就高 20 度   但媽咪照食   家姐又照買   所以我都唔會理佢哋   鍾意點就點   唔係一陣又話我衰   咩都唔買咩都唔比佢食 ~   

到我哋差唔多走   咁媽咪上番床瞓啦   我聽到媽咪話依家瞓唔到喇   我慶到呢   不過我唔話佢呀   家姐就話佢囉   又叫阿妹嚟   佢嚟到又瞓   媽咪喺度笑一笑   咁我無望佢同拜拜就走嘛   之後聽到媽咪話阿妹無同佢祈禱   我黑哂臉行去佢嗰邊   特登求其好快祈禱就即走   望都唔想望佢   經此一役   下次佢再入院   我會同家姐講明一星期先探佢一次   唔好嘥我時間   就算隔日探   我都係望完一眼就走   唔想令自己激氣 ~

今日里奧大人送兒甥仔機   所以我番屋企   等佢買嘢食番嚟   因為我想快啲沖涼同埋開機洗衫呀 ~

差唔多 9 點先開餐   好在里奧大人知我激氣   就會坐定定聽我呻   成日叫我唔好激氣   哈哈 ~

佢食完抖陣就沖涼   10 點半就瞓   鬼咩   尋晚飲完綠茶瞓唔到呀   成 2 點先瞓   今日仲唔早啲瞓番咩 ~

我就激氣得滯   所以差唔多 11 點半先想瞓 ~

大阪王將 @ 九龍灣 ( 2-MAR-2016 )

自家製東坡肉醬油拉麵 ($68)

吉列魚柳 元祖天津蛋 五味海苔飯 王將咖哩汁 - 今次我要求少蛋   但都覺得好多囉

元祖餃子 + 宇治抹茶 (+$30)

( 3-MAR-2016  WED )

今朝又見到陽光   實在太開心喇 ~

早餐食奶醬多   食完又嘆下報紙打陣機   成個男人咁   哈哈 ~   

快快手做埋個 Report   了咗心事就可以繼續 Load 相 ~

醫院姑娘打嚟叫我哋今晚去揀氧氣機   因為媽咪想快啲出院喎   咁早揀早出院   不過我同家姐今晚都唔會探媽咪囉   如果佢日日郁多啲係因為想快啲出院   我今晚一定嚟   但叫我特登今晚嚟揀機就可以快啲出院   我就一定唔會嚟囉   我真係唔明   佢由轉靈實開始已經甩咗貓鬚   依家反而要一路帶住貓鬚   寧願帶住貓鬚都唔願郁   我真係無嘢好講 ~

之後媽咪打嚟話出院   但仲要揀氧氣機   但我話明聽晚先嚟揀嘛   我心諗   唔好諗住因為妳想快啲出院   我今晚會嚟囉   我做到咁   係妳自己攞嚟 ~

Lunch 食雜丸烏冬   覺得好好味呀   食完之後好開心呢 ~

好嘢   又 Hea 等放工   里奧大人今日請咗半日假去睇牙醫   因為蛀牙太犀利   要杜牙根   最搞嘢係醫生唔講價錢就叫佢即刻做   咁一定唔會啦   之後醫生先講杜牙根   加埋牙套同補牙要 $5,000   同埋要睇多 3 次喎   咁都做啦   都唔拖喇 ~

放工去教會拎測試表做功課   咁啱見到牧師   牧師問媽咪咩情況 ?!   我話已經入咗個幾月醫院喇   牧師好愕然   以為咩咁大件事住個幾月醫院   咁我話媽咪咁咁咁囉   牧師話老人家要人氹   我話我咩都做過哂   次次探佢佢都係瞓   心肺腎唔好又唔郁   懶到出汁   之後牧師好無奈話要做都做咗   佢唔聽真係無辦法   咁牧師再問我醫院探病時間   再搵多個婆婆一齊探佢呢   大家係老人家   應該會放開個心講嘢呢 ~

其實我自己都好感恩   媽咪入院咁耐   我心情就唔好咁耐   唔係因為媽咪身體有事   而係次次探完佢   我個人就好似顛咗咁   關心妳又唔珍惜   仲要作對   係咪咁衰格先 ?!   好在阿 Mi 同冰姑成日安慰我   基本上我都唔係咁想講媽咪啲衰格嘢   但真係令我好火滾   我唔搵人傾   我真係會顛   無理由佢入院反而係我激到心口痛家嘛   同埋我可能 AQ EQ 乜 Q 都無啦   好容易激動   所以好多人都叫我不如唔好探佢   但唔探又心掛掛   之後我都激鬼氣   唔再晚晚探啦   講真   我唔探佢嗰晚   我心情真係好好㗎喎 ~

咁啱 CC 今日又問我媽咪點 ?!   我話咁咁咁   佢都話老人家要氹   之後我話媽咪咁咁咁   就算妳話我冷血   我都係咁話佢㗎喇   事實如此   佢之後都話又會咁嘅 ?!   同埋我話下次媽咪入靈實   真係叫婆婆探下佢   等佢知道醫院係幾咁隔涉 ~

我認我係衰女㗎   成日咁話媽咪   但我真係覺得佢好過份   我由上年 6 月開始擔心到佢依家   真係好多時都瞓得唔好   我真係要做嘅嘢真係做哂   我個心好攰   仍都覺得再做都係多餘   同埋我開始覺得佢好煩   好多嘢妳自己唔珍惜   我就唔會再花氣力去做㗎喇 ~

番到屋企都 6 點 15 分   咁去食嘢喇   因為今晚想去徑步 ~

里奧大人話食拉麵   咁又去大阪王將啦   我呢期都幾鍾意去呢間   不過去多幾次都要停下㗎喇   唔係就好悶   因為我來來去去都係食嗰啲   嘻嘻 ~

食完就即番屋企熨 2 機衫   熨到差唔多 8 點就停喇   因為要去徑步呢 ~

正想出門口   婆婆打嚟問媽咪點 ?!   我話無嘢啦   之後佢問我係咪尋日番嚟 ?!   又話家姐話我去 4 日旅行   咁我話係囉   又問我幾點番嚟 ?!   真係黐線   幾點番嚟又點呀 ?!   係咪一落車就要飛去探媽咪呀 ?!   定係妳覺得我哋講緊大話呀 ?!   其實我覺得唔探咪唔探囉   我都唔想呃佢   但就因為我一唔探   佢就係咁打比家姐   由 5 點半打到 8 點   打到家姐聽為止   真係黐線   妳認為 5 點半家姐已經到咗醫院 ?!   大佬   探病時間係 6 點開始   5 點半打嚟做乜 Q 呀 ?!   所以媽咪一入醫院   我就覺得佢哋兩個係最煩㗎 ~

我頭先無着外套嘛   咁里奧大人已經問咗幾次我凍唔凍 ?!   但我真係唔凍   咁落到平台   我就真係覺得好鬼凍喇   但唔想再上番屋企拎外套   所以照去徑步   徑咗半個鐘   之後里奧大人話頭先見所有人都着外套   得我無着   好驚我甲狀腺翻發會成日覺得熱   咁我話我頭先係覺得好鬼凍㗎   所以急步跑咗兩個圈先無咁凍咋   哈哈 ~

沖埋涼就熨埋衫   再做埋測試表就休息喇   11 點唔夠就瞓 lu ~

梅菜蒸鯇魚 + 唐生菜 + 皮蛋芫茜魚片湯 ( 1-MAR-2016 )

( 1-MAR-2016  TUE )

好多時瞓喺床度都會傾下偈先瞓   但其實里奧大人最驚   哈哈   佢次次都會話唔瞓唔傾偈   我話呀   無理由一路睇新聞一路講嘢呀嘛   係喺床度先可以靜靜哋講下嘢之嘛 ~

無啦啦講起乳豬   我話我超勁愛食㗎   可以食好多乳豬皮㗎   佢話佢反而覺得食皮好漏   會揀食肉   咁我話我可以食到十嚿㗎   之後佢話睇下點切喎   我話黐啦   你估切起好多嚿咩   佢話佢會切開 3 嚿   就係頭身尾   之後笑得勁開心話等妳話食十嚿吖嗱   睇妳點食   哈哈哈哈 ~

尋晚又瞓得好   所以今朝起身都精神   加上今朝好好陽光   又凍凍哋   心情唔錯呢 ~

差唔多落車就收到 8 卦 Whatsapp 話試新嘢   咁就試啦   了咗佢心事   因為尋朝佢已經話要試㗎喇   食到咁上下見到船頭   估唔到佢同埋我哋一齊坐呢 ~

菇場忙呀   之後仲要做埋 Report   咁啲時間一定過得好快   哈哈 ~

Lunch Time 就出去行陣   之後就買燒賣粉果番菇場食   食到好鬼飽   有啲驚咗 ~

船頭請我食嘅芝士包   係佢自己焗㗎

仍然做 Report   做到眼都濛   所以 5 點要抖下喇   留番聽日再做 ~

放工去街市買餸   番到屋企預備哂嘢就滾湯   之後開機洗衫   咁又執下嘢啦   諗住里奧大人好快放工   點知 8 點半先放工   好在我未餓   所以等埋佢先食呢 ~      

是日晚餐 - 梅菜蒸鯇魚 + 唐生菜 + 皮蛋芫茜魚片湯  

梅菜蒸鯇魚 - 好耐無食魚喇   求求其其蒸鯇魚算喇 ~        

唐生菜 - 貪佢唔駛浸得耐   同埋淥兩淥就熟   呵呵 ~

皮蛋芫茜魚片湯 - 仍都好耐無湯水喇   唔想切蕃茄薯仔   所以呢個湯最啱我 ~  

食完飯都差唔多 10 點   之後洗埋碗就即沖涼喇   諗住緊衫   一望個鐘原來已經 10 點半   咁唔熨喇   因為其實都有啲攰   哈哈 ~

11 點就瞓喇   餐飯都未消化   但真係無計   眼皮已經 Dup 哂落嚟   唔瞓唔得 lu ~