麥當勞 (外賣) @ 屋企 ( 3-MAR-2016 )

脆脆黑椒漢堡套餐 + 1 個巨無霸 - 我好耐無食麥記套餐   因為我唔係咁想飲杯汽水   但今晚就叫里奧大人買套餐喇   我仲以為套餐係有大薯條   因為我印象中好似無咁大包嘛   之後佢話加大㗎   佢話想食 Shake Shake 薯條喎

和風紫菜調味粉   Shake Shake 薯條又係幾好味嘅   哈哈 

( 3-MAR-2016  THU )

今朝都涼涼地   不過下星期又會凍到得 10 度   好難想像 3 月會出現 10 度   全世界天氣都反想哂   好恐怖 ~

早餐食熱狗   食到一半又見到 8 卦   好在佢食嘢夠快   包保唔會遲到呢   呵呵 ~

菇場忙下停下   眨下眼又到 Lunch Time ~

今晚探媽咪   所以食飽啲 ~

放工同高妹一齊搭小巴   呢幾次都係同佢一齊坐   佢好搞笑   成日話陪我坐   好似細路仔咁  哈哈 ~

去到醫院係 6 點 10 分   咁媽咪又係坐喺度瞓   咁我由佢瞓啦   都費事叫佢   反正叫完佢都係瞓   我同工人傾偈好過   之後我同家姐話好羨慕媽咪可以咁好瞓   瞓到 7 點半都未起身   之後姑娘叫幫佢量血壓   姑娘都話佢唔好瞓啦   呢度咁隔涉都嚟探妳   我即刻話佢就係好鍾意我睇住佢瞓㗎   次次都瞓嘅   佢最開心係咁呢 ~

到佢聞藥   又係懶到唔自己拎   根本係有力㗎喎 ~

另一個姑娘都話媽咪好懶   入嚟咁耐   次次都見佢瞓   又話媽咪唔見我哋探就唔係咁開心   但我話我地嚟探佢   佢次次都瞓   咁妳話探佢其實都無意思啦 ~

唉   醫生同 2 個姑娘都話媽咪懶   咁唔係得我話佢啦   之後工人同我講話   佢叫媽咪郁下隻手咋   媽咪同佢講話想死   我話我哋想死都未到佢想死啦   唔珍惜自己所擁有嘅嘢   有啲人想郁都無郁呀 ~    

咁家姐 7 點 15 分到嚟到   我同佢商量下用咩氧氣機   但我話其實 1 度係根本唔需要揹機咁嚴重   係佢太懶唔願郁   所以條氣實唔好啦   咁點都甩唔到條貓鬚   咁醫生就唯有話用氧氣機啦   但家姐話媽咪都唔會令到醫生講明要佢用氧氣機喎   咁我都無嘢好講啦   佢兩個完全唔明   成日覺得有機器同藥物   就係會醫得好   但其實最重要係妳郁   妳唔郁   乜機能都一定退化   都唔知佢地諗乜 ~

同埋明知一食鹹嘢就血壓就高 20 度   但媽咪照食   家姐又照買   所以我都唔會理佢哋   鍾意點就點   唔係一陣又話我衰   咩都唔買咩都唔比佢食 ~   

到我哋差唔多走   咁媽咪上番床瞓啦   我聽到媽咪話依家瞓唔到喇   我慶到呢   不過我唔話佢呀   家姐就話佢囉   又叫阿妹嚟   佢嚟到又瞓   媽咪喺度笑一笑   咁我無望佢同拜拜就走嘛   之後聽到媽咪話阿妹無同佢祈禱   我黑哂臉行去佢嗰邊   特登求其好快祈禱就即走   望都唔想望佢   經此一役   下次佢再入院   我會同家姐講明一星期先探佢一次   唔好嘥我時間   就算隔日探   我都係望完一眼就走   唔想令自己激氣 ~

今日里奧大人送兒生仔機   所以我番屋企   等佢買嘢食番嚟   因為我想快啲沖涼同埋開機洗衫呀 ~

差唔多 9 點先開餐   好在里奧大人知我激氣   就會坐定定聽我呻   成日叫我唔好激氣   哈哈 ~

佢食完抖陣就沖涼   10 點半就瞓   鬼咩   尋晚飲完綠茶瞓唔到呀   成 2 點先瞓   今日仲唔早啲瞓番咩 ~

我就激氣得滯   所以差唔多 11 點半先想瞓 ~