麻辣串串香 @ 九龍灣 ( 7-AUG-2016 )

我食剩少少紅薯粉   但里奧大人食剩好多餸呀   反而米線食哂   真係好暈囉   梗係食哂啲餸先嘛   不過我幫唔到佢食啦   我自己個肚都就嚟爆   下次一定 Share 食   大家都唔駛咁痛苦   哈哈

煎釀三寶 ($20/9 件) - 我好想食   但驚里奧大人又特登陪我食   估唔到佢今次話食   呵呵  

( 7-AUG-2016  SUN )

今朝 9 點半起身   沖埋涼就即落樓食早餐   其實唔餓   但我最衰一定要飲街嘅咖啡先精神   所以要出去食早餐   同埋朝早好多人   費事坐兩個位只食一份早餐   如果唔係 Share 一份早餐食就啱啱好呢 ~   

食完又番屋企抖陣   今日有事奉   所以我要早啲出門口呢 ~

咁見到媽咪街坊阿嬸   佢話唔見媽咪幾個月   問媽咪有無嘢   我話媽咪走咗喇   之後我又爆喊啦   估唔到阿嬸都喊   我又無拎紙巾   阿嬸仲幫我抹眼淚添呀   呢下好感動   好有親人嘅感覺 ~

佢話我哋對佢同阿伯好好   成日買衫比阿伯   其實我都唔記得呢啲事 lu   但就好記得   我哋食完早餐   次次都等埋阿伯嚟   比朱朱佢抱   等佢抱完先走呢   阿伯次次見到朱朱都好開心㗎   同埋我哋將朱朱比阿伯抱呢   朱朱唔會郁嚟郁去   好乖咁坐喺阿伯大脾度㗎 ~

其實我番親教會都見到阿嬸嘅   但唔同位置坐呢   而呢幾個月我番到教會   我都會避開佢視線範圍   就係驚佢問媽咪啲嘢囉   我一定會喊嘛 ~

今日講道   正正就係我想知嘅嘢   媽咪走咗   我曾經喺苦難當中有疑惑   點解神要帶走媽咪   其實我唔應該咁諗   我唔應該用自己諗法嚟到諗上帝所做嘅嘢   因為上帝有佢嘅旨意   我哋係唔會明嘅   但我真係覺得自己祈禱之後係得平安   得力量呢 ~

崇拜完就番屋企   諗住執衫   拎哂出嚟又唔想執   同埋唔知係咪喊完   所以個人好攰咁呀 ~

2 點幾仲無啦啦好餓   所以即去食下午茶   之後就即番屋企執衫喇 ~

執到差唔多 5 點就搞掂   咁灘喺梳化抖下啦   終於瞓到 5 點 45 分   好在醒咋   唔係夜晚瞓唔到就慘咯 ~

好想食麻辣   但食到真係好飽   所以到我開始有啲驚喇   哈哈 ~

食完番屋企抖陣   8 點幾就出去徑步   徑半個鐘就走喇   條街好焗熱 ~

番到屋企即沖涼   睇埋歡樂頌都 11 點半   要瞓喇 ~

住家飯 @ 阿 Mi 屋企 ( 6-AUG-2016 )

酸辣鳳爪 - 超勁好味囉   我期待咗好耐   依家講起都想食   同埋我食咗好多好多配菜   唔怪得我好似咁快飽咁啦   好難想像可以喺屋企食到自家制泰式鳳爪   呵呵 

蒜蓉蒸蟶子皇 - 唔韌嘅蟶子   哈哈   真係覺得阿 Mi 堅勁   阿喂就好啦   成日食好嘢

果皮蒸鮑魚 - 好香陳皮味呀   呢味餸   即刻令我諗起媽咪

豉汁炒蟶子皇 - 我同里奧大人每人 2 隻   阿 Mi 拎走隻碟嗰陣   我勁唔捨得啲汁呀   突然間好想食撈汁食飯   哈哈

一啖放哂入口

炸魚皮 - 阿 Mi 話阿喂特登買比我食㗎   佢上次都特登買包比我番屋企食呢

泰式鹽焗魚 - 阿 Mi 叫阿喂入廚房拎嘢出嚟夾魚   阿喂玩嘢拎兩支牙刷牙出嚟   扮到好似拎緊筷子咁呀   笑死我哋呀   其實佢都有拎對筷子嘅   但係都要整鬼阿 Mi 啫

呢個汁又係正   睇見都流口水      

雪菜秋葵煮花甲湯 - 阿喂同阿 Mi 話唔夠鹹味   我覺得 OK 呀   我又係咁飲湯同食芹菜   因為我鍾意飲完之後個身暖暖哋   好舒服呢   呵呵

唔想再飲水   想飲有味嘢   之後阿 Mi 問要酸梅定金桔   我話唔知咩分別呀 ?!   佢話酸莓係酸啲   金桔就無咁酸   我話要酸嘅   佢個樣好驚咁   哈哈

泰式金不換焗魷魚 (粉絲底) - 其實都唔記得阿 Mi 講咩餸喇   因為係咁食係咁食   都記唔到咁多   哈哈   呢個餸係 10 點半上枱   勁有食宵夜 Feel 呀   哈哈   但我哋食咗好少咋   因為真係好飽囉   唔係我實食㗎   阿 Mi 仲話仲有個芥蘭炒豬肉   但真係好鬼飽   所以叫佢唔好煮喇   好在可以留番咋   唔係就唔好意思啦

鮮淮山木瓜桃膠糖水 - 阿 Mi 話今晚有糖水   我問佢係咪桃膠   佢好驚訝點解我會知   我話我講過想食囉   哈哈   好味呀   同埋今晚食辣嘢   食埋呢碗糖水   感覺滋潤番哂呀 

( 6-AUG-2016  SAT )

今朝 7 點 40 分起身   有啲餓   所以食奄列餐   但其實真係好想食麵   但上次食完之後勁飽   真係驚驚哋   之後 8 卦嚟咗   佢食麵餐   香到呢   真係聞完當自己食咗啦   哈哈 ~

菇場唔忙   但 12 點半先有嘢做   好在唔係急嘢   咁我可以星期一先做呢   因為一做起碼要 2 個鐘囉 ~

今日約咗阿 Mi 喂交收淘寶嘢   所以放工 Join 埋里奧大人喺鑽石山地鐵站車廂等   一齊去荃灣呢 ~

佢哋 2 點唔夠就到喇   一嚟到就話同我哋去睇背囊   其實上次講完比佢哋聽之後   佢哋就特登去睇去試幾次   真係唔好意思啦   阻到佢哋唔係咁好囉   所以我同里奧大人講話   佢哋對你   好過我對你呀   哈哈 ~

之後再去買驅蟲機   初初覺得家姐會實用啲   估唔到要用喺自己屋企   嗚嗚 ~

阿 Mi 講用咗佢之後就無哂啲強   呢點最重要啦   之前見到粒強蛋   又唔知個竇喺邊   唯一方法只好用驅蟲機   同埋阿 Mi 用緊   所以我信佢   呵呵 ~

好在阿 Mi 講我哋知買滿 $500 有 $30 Cash Coupon 咋   咁我哋買多隻匙更啦   九蚊雞算最平㗎喇   之後諗住買 Hand Cream   最緊要實用嘛   但見到肌研水 $108   所以買佢喇   $88 都抵   因為萬寧都只係做緊 $108 呢 ~

買完就去意粉屋食下午茶   仲以為同阿 Mi 初相識嗰間添   原來唔係 ~

悠閒品味拼盤 (脆春卷 / 脆洋蔥圈及檸檬雞翼) - 我覺得呢 Set 要 $60 就唔係咁抵喇   一個人食真係唔飽㗎噃

珍寶雜錦板板薄餅 (意大利煙肉 / 加拿大煙肉 / 辣肉腸 / 沙樂美腸 / 蘑菇 / 洋蔥 / 青椒及菠菜) - 餅底又薄又脆   好味呀

加拿大藍青口海鮮蕃茄扁意大利麵 - 唔記得咩味道添      

威尼斯貢多拉特色三文治 (嫩雞 / 火腿 / 依曼頓大孔芝士 / 雞蛋 / 羅沙菜及蕃茄) - 呢個又係好味呀   同埋每人一件啱啱好         

一路食一路傾   又講番 GPS 單嘢   明明好凍要披肩   之後講講下都好慶   因為今次真係阿 Mi 同阿喂提醒   里奧大人先知買乜買乜   唔係就煩啦   買錯又退唔到   最慘得物無所用嘛 ~

咁食完就去阿 Mi 屋企喇   阿喂話打的   其實佢哋話咩就咩   因為我唔識去嘛   哈哈 ~

我唔識買酒   又唔識買生果   但無理由兩手 Fing Fing 去人屋企   所以我只係買咗啲零食比佢哋咋   希望佢哋唔好見怪 ~

去到佢哋屋企   完全似新居入伙啦   地板駛唔駛咁立立令呀   之後里奧大人話諗住着襪先會咁跣   點知原來除咗襪仲跣   笑死我 ~

所以我行路係跣住嚟行㗎   好似踩冰咁   呵呵   其實真係好易撻死   無諗過地板可以咁滑   地磚咁滑就會有囉   真係要買定保險先去佢屋企   哈哈   最勁係無塵㗎喎   我忍唔住摸咗幾次地下   都係好爽㗎   又凍冰冰   所以坐地下係好舒服呢 ~

好喇   要試下張充氣墊   咁順便開埋帳篷扮去露營   之後再叫阿喂拎埋支自拍神棍影相   笑死   勁無聊   哈哈   但原來兩樣都係易開難收囉   佢哋都搞到身水身汗 ~

好玩呀   好期待下次一齊野餐呢 

搞到 5 點幾   之後阿 Mi 又整杯紅火龍果益力多比我哋飲   好味呀   但好飽呀我   把口好似無停過咁 ~

我唔客氣喇   食咗山渣片   勁想食好耐㗎喇   但一買又要買好多   同埋最慘係擺得太耐會好快溶哂   但呢啲又唔係成日想食喎   真係好間唔中先食一粒   今日食咗粒   了咗心事   呵呵  

飲埋就參觀啦   之後阿喂同阿奧唔知整咩   我同阿 Mi 喺書房又傾咗陣密偈   呵呵 ~

參觀哂成間屋   真係頂唔順自己點解可以儲咁多嘢   所以我同阿奧話   聽晚唔煮飯   要執屋掉嘢 ~

好啦   男人就淘嘢   女人就去廚房預備嘢   雖然我幫唔到手   但真係唔慣坐喺度等食 ~

阿 Mi 切嘢   我有我講啦   真係越傾呢   就覺得大家嘅嘢勁相似   呵呵 ~

見阿 Mi 洗嘢切嘢好鬼快   話咁快仲放埋上碟   又預備另一個餸   睇佢煮嘢同整嘢過程   同我婆婆一樣   又係好快手   想幫佢整第一個餸嘅時候   但其實佢哋已經開始煮第二個餸   所以我企喺度都可能阻住佢   哈哈 ~  

話咁快又話食飯   睇阿 Mi 預備啲嘢   今晚都應該都會好飽呢 ~

7 點開餐   雖則每樣每樣餸咁上枱   但全晚係咁密密食   把口唔係咬嘢就飲嘢   再唔係就講嘢   真係無停過 ~

咁我間唔中扮下嘢入廚房   睇下有咩幫手   阿 Mi 問我   里奧大人係咪唔鍾意食啲嘢 ?!   我話一定唔會   因為佢話里奧大人食嘢嘅時候好靜   之後我問番阿奧   佢話飲咗啤酒   所以有啲眼瞓   唔記得佢飲咗啤酒會咁添   之後阿 Mi 話比茶佢飲   佢又話飲茶會眼光光   又要飲番啤酒先可以瞓   所以麻鬼煩啦   哈哈 ~  

傾呀傾   阿 Mi 同阿喂話我講嘢唔識收同放   之後里奧大人即話係啦   講極都唔改   但如此同時   真係覺得佢哋好包容我   因為可以喺當時直接話我家嘛   佢哋又無話我㗎喎   真係好對唔住佢哋   要佢哋受氣添   所以佢哋話完我   我一定唔會再咁   唔想再傷到人都唔知呢 ~

食飽哂喇   之後睇下相又傾一大餐   好多嘢實在太似喇   勾起哂好多回憶   之後阿 Mi 話要甜甜哋   又食朱古力傾下偈   雖然我好飽   但一齊咁食又好想食喎   阿 Mi 都好似開咗幾包糖同朱古力   哈哈 ~

12 點 40 分又食糖水喇   真係食足兩日   哈哈 ~      

我去完洗手間   阿喂已經 Call 咗的士   原來已經 1 點幾   我仲以為 11 點幾咋   無諗過咁夜呢 ~

咁阿 Mi 喂送我哋走   我話唔駛啦   之後阿 Mi 即刻話: 妳知點走咩 ?!   哈哈哈哈   我真係唔知點走喎   阿奧都話點解我會話自己走得喎   哈哈 ~

臨走裝下個廚房   睇下阿 Mi 係咪未洗哂啲碗   點知乜鬼都已經洗埋   個廚房好似無煮過嘢咁   真係好勁   點可以咁快手㗎   同埋之前陪佢切菜煮嘢   佢可以邊切邊傾   我唔得㗎   手腳會當堂慢哂㗎 ~

今晚我同里奧大人真係好唔好意思啦   阿 Mi 喂早一晚已預備飲品同食材   今朝又趕去買餸預備   頻頻樸樸   我覺得整 3 個買 3 個最好   唔駛佢咁辛苦   同埋我同呀奧真係唔識煮   又幫唔到手   咁外賣嚟到   收下嘢都好啦   哈哈 ~

我同里奧大人講話呢餐飯係阿喂請㗎   阿 Mi 話係你嘅生日飯   佢好驚訝呀   因為佢無諗過阿 Mi 喂記得佢生日   所以我話佢囉   人哋生日嘅時候   唔好成日話唔記得人哋生日日子   有心嘅點都要記住囉   所以我叫佢下次識做啦 ~

番到屋企 1 點 35 分   仲係興奮狀態   所以沖埋涼   Line 多陣   2 點幾先瞓 ~

黑椒豚肉炒扁意粉 + 蠔油燜節瓜鴨腎 ( 5-AUG-2016 )

( 5-AUG-2016  FRI )

又星期五喇   時間過得真係好快   咁就 8 月   好快就 2017 㗎喇   以前覺得 2046 套戲名係好遙遠嘅事   依家覺得好快就到 2046 咁   到時都唔知仲喺唔喺度 lu ~

早餐食奶醬多   如果里奧大人知我食奶醬多   佢實會講話水公食奶醬多呢   花生醬係同麵包同一厚度   勁恐怖啦   同埋佢哋喺屋企食雪糕唔係一杯杯咁食   係一桶桶家庭裝咁食   由此可見   佢哋食嘢係偏食囉   小食多滋味嘛   我以前就同里奧大人講過   話將鍾意食嘅嘢就日日食   食到厭咗   以後唔駛食   之後佢話點解要咁快食哂啲 Quota   咁其實咪即係食少一樣嘢囉   比佢講完之後   我都覺得佢講得幾啱   哈哈 ~

以前我好火爆㗎   見到唔鍾意嘅人   一定唔會同佢笑   佢話點解關係只係朋友同敵人喎   又成日話我無灰色   只得黑白色   比佢哦得多   我都改咗好多啦   起碼見到唔鍾意嘅人會勉強一笑   但如果真係係我超級唔鍾意嘅人   我依然唔會同佢笑   當佢無到㗎   咁樣好似好無家教   但我覺得   妳可以令到我咁憎妳   妳個人都唔方好   因為我憎一個人   唔係話憎就憎家嘛   係睇妳平時所做嘅一切   日久見人心   真係囉 ~

菇場忙下停下   但呢排好攰咁呀   成日追劇追到 11 點半   對我嚟講算好夜㗎喇   哈哈 ~

好餓呀   Lunch Time 即飛去食粥   之後去惠康買零食同蘋果   買埋粟米湯   買完之後有人叫我個名   嚇死囉   原來係高妹   之後一齊番菇場喇   拎住一袋二袋好熱呢 ~

仍然 Hea 到放工   今晚去價真棧買朱古力餅   再去惠康買薯圈同零食   之後再買滷水鴨腎   番屋企已經 6 點半   要快快預備喇 ~ 

里奧大人 6 點 45 分放工   好在今晚煮嘅嘢係非常簡單   唔係佢要等 lu   呵呵 ~

是日懶餐 - 黑椒豚肉炒扁意粉 + 蠔油燜節瓜鴨腎

黑椒豚肉炒扁意粉 - 本來想淥麵食㗎   不過里奧大人今個星期食咗一次即食麵   所以都係煮意粉好啲 ~  

蠔油燜節瓜鴨腎 - 唔想就咁節瓜咁悶   所以買 $20 鴨腎   感覺豐富啲 ~

如果我煮完   里奧大人未番嘅話   我會洗埋鑊同煲   所以有時食完飯就咁洗幾隻碟同碗   好似洗少好多嘢咁   哈哈 ~

咁之前水姑喺澳洲扭親隻腳嘛   佢睇咗醫生   所以里奧大人今晚約水姑食糖水   順便拎啲正式收據 Claim 保險 ~

但里奧大人睇到張單係無寫原因   睇番啲保險 Terms   所以話未必 Claim 到   但水姑話同醫生講話扭親   但醫生點都唔肯寫喎   所以里奧大人話唔知佢哋點講   我話應該同醫生講明話要 Claim 保險   咁咪得囉   同埋妳要堅持囉   事實真係 Claim 保險用嘛 ~         

依家佢咪白痴囉   買咗保險都可能 Claim 唔到   所以激到里奧大人呢   仲特登幫佢買最貴隻保險   又特登 Send 埋保單保啲咩比佢兩公婆   但佢哋乜差都唔睇 ~

如果佢哋有當地醫生寫紙證明   喺香港再睇醫生   中醫可以每月 Claim 最多 $1,000   最多 3 個月   西醫就好似可以 Claim 到 12 萬   所以我咪話囉   買保險又要買廿幾日驚之後會有事   依家有事又唔識去 Claim 保險   真係買嚟做咩呢 ?!

之後水姑又話唔嚟食糖水 lu   咁里奧大人抖半個鐘就去徑步   我就唔去喇   突然間好攰咁 ~

抖多陣就沖涼   無啦啦覺得好凍咁   所以全程沖熱水涼   覺得勁舒服   但好驚自己唔知係咪作感冒囉 ~

之後我敷 Mask 嘛   咁里奧大人按鐘   我一開門   佢一望到我   佢嚇到 "吖" 大咗個口呀   哈哈   佢已經唔係第一次咁驚   有次佢直頭話嚇死佢添呀   哈哈 ~

又睇 "歡樂頌"   想快啲睇哂   唔駛晚晚追   又追到 11 點半   不過我都瞓先喇   聽日要番工呢 ~  

栢檔極品海南雞飯 @ 九龍灣 ( 4-AUG-2016 )

香煎手剁魚香肉餅飯 

極品海南雞飯 + 翠綠時菜 + 雞油香飯 + 飲品 

( 4-AUG-2016  THU )

問里奧大人尋晚係咪瞓得唔好   佢話係呀   之後話因為唔記得帶兩球塞耳仔喎   話瞓瞓下覺   聽到周圍都好嘈好嘈   有天崩地裂   世界末日嘅感覺   哈哈哈哈   形容得零舍誇張   我話鼻鼾聲之嘛   少少嘢都驚   點做大事喎 ~

今朝里奧大人上大陸   我又可以瞓到 7 點 45 分 lu ~

無啦啦好想食蛋治   間唔中食係幾好味嘅 ~

菇場忙呀   好在 11 點左右搞掂   可以抖下 ~

Lunch Time 去綠盈坊拎 4 包龍眼肉   諗住行多陣先買嘢食   但落雨呀   所以即去買酸辣米線喇   唔係越落越大就煩 lu ~

放工即走   唔知點解個人情緒有啲低落   所以都唔煮飯喇 ~

番到屋企就開機洗衫   之後睇下報紙   開咗冷氣唔夠半個鐘就熄喇   好鬼凍咁   之後開窗開風扇   但又好似有啲焗   不過是但啦   一陣又出門口食飯   最多早啲出去涼下冷氣囉 ~   

今晚想食飯   所以去柏檔   里奧大人差唔多 8 點就到九龍灣   好在等咗 5 分鐘就有位呢 ~

咁里奧大人比錢嘛   問我有無尾數兩蚊   我話無呀   食早餐比哂   之後佢找完錢   我話我有兩蚊呀原來   唔醒起 Lunch 食米線找咗散紙   之後佢話依家連兩蚊都唔比   哈哈哈哈   笑死我   估唔到佢反應咁快 ~

番到屋企即沖涼   之後又一齊睇歡樂頌   睇到 11 點半先瞓   呢排都係最早 11 點半瞓   有時 12 點   所以朝早起身都好攰咁   真係唔迫自己 11 點要瞓   唔係唔掂呀   哈哈 ~

百樂門國際宴會廳 @ 九龍灣 ( 3-AUG-2016 )

上湯龍蝦伊麵 ($98) 特惠 4 選 1 - OK 啦 

冰梅欖角骨 - 呢個又係姑奶必叫㗎   但呢個好味喎   豬扒炸到脆脆哋   個汁又甜甜哋   我識整就好 lu 

南乳什菜煲 - 好鹹  

豉汁涼瓜燜斑塊 - 姑奶至愛   中午又叫   夜晚又叫   百樂門一日唔摺埋都會叫呢個餸

蒜香九肚魚 - 我叫㗎   但食咗 2 嚿   真係頂唔順啲口感   哈哈   好在姑奶拎走咋   唔係嘥哂 

( 3-AUG-2016  WED )

里奧大人今朝唔舒服   所以 S/L   佢應該感冒啦   前晚無啦啦包雲吞   之後就成日話攰 ~

早餐食芝腿治   之後 8 卦又嚟埋   我睇完報紙先同佢傾偈   因為我鍾意睇報紙介紹食嘢同玩嘅地方   睇完都開心啲呢   哈哈 ~

菇場唔忙喇   可以做自己嘢   爽 ~             

今日有 Lunch Box   但食完都唔出街 lu   因為落大雨 ~

無啦啦好鬼眼瞓   如果無哂人喺度   我估我應該可以瞓着呢 ~

今晚里奧大人去接姑奶機   之後去食飯   咁我都 Join 佢哋啦 ~

咁放工去惠康買嘢先   再約埋姑奶一齊去百樂門   佢哋 7 點幾都到   可以開飯 lu ~

食到 8 點半就走喇   之後上姑奶屋企拎沐浴露同麵包機   佢買咗唔用   我其實都買咗部 JNC 㗎   咁我將 JNC 比家姐   我就要佢部 Panasonic   呵呵 ~

打的番屋企   沖埋涼都 10 點幾   睇多陣電視   11 點幾先瞓   希望今晚好瞓啦 ~ 

蕃茄海鮮扁意粉 + 蕃茄薯仔三文魚骨腩湯 ( 2-AUG-2016 )

呢碗正呀   我次次都會留比里奧大人飲㗎   但佢就成日話好多好多   嘈嘈閉 

( 2-AUG-2016  TUE )

今朝依然 7 點半要起身   因為要睇下落咗風球未   見仍然係 8 號風球   但就話 1 點前會改發 3 號風球   咁無問題啦   繼續瞓 ~

瞓到 10 點幾都醒 lu   沖埋涼就落樓食早餐 ~

番到屋企就抖下啦   但就要開住電視睇最新風暴消息   睇睇下電視居然有啲眼瞓   所以抹櫃啦   見到地下有隻強屍   唉 ~

12 點 40 分改發 3 號風球喇   要準備番工呢 ~

1 點出門口   同里奧大人食埋 Lunch 就番工喇   等咗 10 分鐘先有小巴   好在 2 點 10 分番菇場咋 ~

整埋 Report 就做自己嘢   話咁快又放工 lu ~

今晚去 Taste 買餸同生果   再買定啲急凍蝦同蜆   買夠 $100 有 92 折   以前一百蚊就好好洗   依家買 1 Pack 豆豉鯪魚同五香肉丁都接近一百蚊   仲要係特價先捨得買   所以我同里奧大人講話   依家買嘢要用好多時間格價   唔係話買就買㗎喇 ~

番到屋企已經 6 點半   要即刻預備喇   比我見到 2 隻超級細小小強   即殺喇   頂   真係好煩   依家望到黑色嘢就好驚   遲早發顛 ~

里奧大人 7 點放工   咁我都抹埋地先喇   勁鬼熱 ~   

是日晚餐 - 蕃茄海鮮扁意粉 + 蕃茄薯仔三文魚骨腩湯  

蕃茄海鮮扁意粉 - 今晚意粉份量唔多   因為我唔想食   但里奧大人又食唔哂   咁我帶 Lunch Box 啦 ~

蕃茄薯仔三文魚骨腩湯 - 喺 Taste 買三文魚骨腩   今次要 $17.9   不過點都抵過紅衫魚   再買埋袋裝薯仔   有 1 大 2 細只係 $7.9   我覺得平過街市   咁里奧大人話個湯無味   我話有 3 大個蕃茄喎   我飲到蕃茄味喎   之後佢話頭先食意粉落咗 Tabasco   所以覺得個湯無味 ~

咁掉垃圾啦   一開門見到有小強屍   里奧大人問強頭方向喺邊 ?!   我話佢打橫瞓囉   之後都唔記得佢講咩 lu ~

搞掂哂就沖涼   之後等埋里奧大人沖涼   就睇歡樂頌同食龍眼   我覺得今晚成肚水咁 ~

去洗手間又見到小強   頂佢   爬埋啲罅位   佢不動我不動   佢一動就即拍鬼瓜佢   之後狂噴 Bio Kill   有殺無賠 ~

今晚差唔多 12 點先瞓   呢排成日好想快啲睇哂歡樂頌   所以搞到好夜瞓   但好衰囉   追開又想睇   真係要快啲睇哂去   唔駛成日心掛掛追劇呢   呵呵 ~

煎蝦卷 + 蠔油燜節瓜 ( 1-AUG-2016 )

( 1-AUG-2016  MON )

尋晚瞓得唔好啦   因為太夜食西瓜   半夜要去洗手間   里奧大人話佢去咗 3 次洗手間   所以瞓得勁差 ~

今朝食芝士治   呀姐以為我食雙拼   所以仲等緊我叫多樣嘢   哈哈   我話就咁芝士治呀   佢都覺得好奇怪咁   因為我多數芝腿芝蛋嘛 ~

菇場忙呀   仲諗住做埋 Report 就可以抖喇 ~

今日有 Lunch Box   諗住好餓可以食哂啦   點知食到一半已經好飽   食完之後個胃有啲唔舒服添   慘 ~

好啦   忙埋諗住 Hea   點知又要做個長命 Report   真係做到眼到濛埋 ~

未做完都放工 lu   依家 3 號風球喇   襯唔大風雨都快快趣番屋企喇 ~

里奧大人 4 點喺中環見客   諗住好早見完   點知 6 點半先見完   咁好啦   我預備煮飯喇   佢 7 點幾都應該番到屋企呢   呵呵 ~

是日懶餐 - 煎蝦卷 + 蠔油燜節瓜 

煎蝦卷 - 今次醒喇   買 $15 算喇   次次買 $30 都食到好辛苦   今次啱啱好 ~  

蠔油燜節瓜 - 買咗 2 個巨節瓜   今晚煮 1 個   聽晚煮 1 個   咁就唔駛特登去買蔬菜喇 ~

搞掂哂就開機洗衫   之後沖涼   等埋里奧大人沖涼就睇 "歡樂頌" ~

咁今晚食龍眼嘛   里奧大人問我食幾多粒 ?!   其實真係好難答佢啦   我求其話 30 粒   唔知佢係咪真係會數啦下   咁一齊食嘛   剩番 10 粒左右   我叫佢食哂啦   佢話太多喇   我問咁想我幫妳食幾多粒呀 ?!   佢叫我幫手食 1 粒   笑鬼死我啦   哈哈   食果 1 粒係咪真係分別咁大呀 ?!   哈哈哈哈 ~

8 點 40 分終於 8 號風球喇   呢個 "妮妲" 風力好勁咁   預咗聽日只係放半日呢 ~

睇呀睇  睇到 12 點都瞓喇  ~