辣雞煲 @ 阿 Mi 屋企 ( 7-OCT-2017 )

辣雞煲 - 今次要中辣   超級好味道呀   阿 Mi 記得要分開配料   咁樣真係好味好多呢   諗起都想食



墨魚滑



水餃 / 蝦腐皮卷 - 呢兩樣嘢一定有   因為阿喂同阿 Mi 記得里奧大人鍾意食呢 



我同里奧大人輪住斟酒嘛   衰喂話喝死啦   乜妳個啤酒妹斟咁耐㗎 ?!   哈哈哈哈

( 7-OCT-2017  SAT )

感恩一覺瞓天光呀   其實 9 點醒咗   但起身嗰下暈暈哋咁   所以再瞓番   瞓到 10 點就真係精神喇 ~

咁我有啲 餓   所以沖埋涼就去食早餐   同里奧大人 Share 一份早餐就啱啱好   叫嘢飲嘅時候   里奧大人話要凍咖啡   我好奇怪佢好少飲凍咖啡   原來佢記得我話想飲凍咖啡   感動感動 ~

好黃色嘅炒蛋   我覺得好吸引㗎





諗住出門口   點知廚房啲磚甩咗   所以要黐番好去   搞咗成大半個鐘   搞掂哂即出門口   差唔多 12 點半先到荃灣呀 ~

講好去食酸辣米線呢    但我哋唔識路    因為里奧大人無睇阿 Mi 教佢行嘅位置囉   最後都係由阿喂帶路   哈哈 ~

我嘅豬潤+蘿蔔酸辣米線 (中小辣) - 好在跟阿 Mi 叫多青少米線咋   不過份量都好多   同埋好多豬潤呀   夠哂補血喇   哈哈



里奧大人嘅豬腩肉+生菜酸辣米線 (中小辣) - 都唔記得豬腩肉係咩味道添   



阿 Mi 嘅午餐肉+芽菜酸辣米線 (中小辣多酸) - 我同 Mi 講   點解妳多青會有咁多芽菜嘅 ?!   佢話係叫咗 1 份芽菜呀   唔怪得咁多啦   哈哈



阿喂嘅午餐肉+豬扒酸辣米線 - 兩樣都煎得好靚呀    下次我會叫呢兩樣   呵呵   



今日一定要請食 Lunch   因為阿喂餐生日飯都未請   今次 Cheap Cheap 哋就由我請啦   哈哈   但好似係里奧大人比咗 ~

阿 Mi 搞笑   話佢又漁人得利   我話實會請埋妳啦   之後佢好平靜咁話: 唔係㗎   上次有人話唔請㗎   哈哈   我先記得上次佢好開心話佢都有份   我即刻話: 無妳份   之後佢話: 咁呀   叫阿喂請   哈哈 ~

食完就一路行一路睇嘢啦   首先行去一田   因為里奧大人想買個環保袋   不過無囉   之後阿 Mi 又同我講靈異洋娃娃嘅節目   仲話一陣開比我睇   想嚇死我咩 ~

阿喂哥係咁嗌口渴   所以去 AEON Lounge 抖下   又傾下   今日我哋把口真係無停過 ~

無啦啦講起象拔蚌刺身   我勁想食囉   但出面食就驚啲   咁阿 Mi 整就放心好多啦   所以阿 mi 話整比我食   之後里奧大人又話我麻麻煩煩   咁又係幾煩嘅   哈哈 ~

之後去街市買象拔蚪   不過阿 Mi 話得番 2 條   所以唔買   留番下次先食   又要阿 Mi 記住了 ~

差唔多 3 點幾再去拎雞煲   我問阿喂駛唔駛幫手拎   佢諗都唔駛諗話好呀   之後我話佢對阿表唔係咁嘅   點解對我咁 ?!   佢話我扮得太假喇   哈哈哈哈 ~   

行多陣   到我好想飲珍珠奶茶喇   所以就去 Come Buy 買嘢飲   再去埋 AEON 買生果就番屋企喇 ~

阿 Mi 話我同佢行得好快喎   兩個男人居然喺我哋後面   之後我問番里奧大人做咩行咁慢   佢話慢慢行傾下偈好舒服喎   阿 mi 話我行咁快都無喘氣呀   佢唔講真係唔覺   但我話上樓梯同上斜仍然會喘囉 ~ 

今日食完又行   行完又抖   抖完再行   雖然有啲熱   但咁樣行程又好 OK 喎   起碼食完要郁下嘛   係阿喂辛苦啲   要拎住碗雞煲   阿 Mi 就拎其他餸   里奧大人就拎唔知咩   我就兩手 Fing Fing   所以比阿喂話我成日扮嘢都係啱嘅   哈哈 ~

阿喂去買啤酒   所以我哋番屋企先 ~

阿 Mi 就即刻處理煲雞煲同火鍋料   里奧大人就拎定 Laptop 出嚟睇有咩網劇   阿喂番到嚟   又即 Download 聽歌 Apps   個個忙到爆   哈哈 ~

我最鍾意睇阿 Mi 個零食兜   次次都唔同㗎   不過大部份都係餅乾   所以佢次次都會比啲我試下架   名副其實有食有拎 ~

今晚嘅晚餐好簡單呀   因為我覺得自己無咩點企喺廚房   同埋阿 Mi 做嘢好快手快腳   一拎一放就搞掂   話時話   我真係完全無咩印象有幫到手添啊 ~

差唔多 7 點食嘢喇   雖然中午食完米線   又飲埋杯珍珠奶茶   但都有啲餓呀   今日由朝食到晚嘅嘢    我都好鍾意呢   開心開心 ~

食下傾下又睇下電視   啲時間過得超級快 ~

咁阿 Mi 飲咗啖啤酒之後話無咁頭痛   原來佢今日一路頭痛㗎 ?!   又唔同我哋講喎   今日我哋仲周圍行添   仲要整埋晚餐   今勻真係唔好意思咯   Sorry ~

差唔多 9 點就食生果   最鍾意跟阿 Mi 買生果   佢教我點揀係最好   如果住佢附近就好啦   可以一齊去買   有好嘢又可以即時同佢分享   一齊食真係開心好多呢 ~       

韓國網紋蜜瓜 + 韓國梨 - 蜜瓜好甜呀   

 
食完生果   大半個鐘之後又話食大菜糕   所以次次喺阿 Mi 屋企食嘢   真係飽到上頭穀頂   好在我哋會 Say No   唔係真係仲有排食   哈哈 ~

大菜糕 - 今次無咁甜呀   但今次好飽呢   食得唔多   哈哈哈哈  



今日係咁食食食   傾傾傾   好盡慶呀   勁開心   里奧大人話唔係睇到播晚間新聞   都唔知原來已經 11 點半咁夜   哈哈 ~

咁打的番屋企 lu   差唔多 12 點 20 分番到屋企   沖埋涼又抖多陣   都差唔多 2 點先瞓呢 ~

翠河餐廳 @ 官塘 ( 6-OCT-2017 )

( 6-OCT-2017  FRI )

今朝里奧大人 5 點半起身   咁佢同我講話有飛強   好在佢飛拖   之後隻強暈咗喎   佢再用膠袋包住佢   仲強調話叫我唔駛驚   隻強暈咗   但佢無掉垃圾袋喎 ~

咁我都瞓得唔好啦   諗住 7 點 40 分先起身   但 7 點 26 分已經醒咗   即刻用漂白水抹窗   貼強藥   搞掂哂先刷牙沖涼呀 ~

我要掉個 Grill Pan   所以將個垃圾袋放喺 Grill Pan 上面   一路行聽到膠袋有聲   但其實係我隻手郁   所以膠袋咪響囉   但嗰下真係勁驚隻強翻生囉 ~

咁樣嚇一嚇   個人完全不在狀態呀   勁眼瞓囉 ~

雖然見唔到隻強   但諗起都無胃口   所以食醬占多算喇 ~



菇場勁忙呀   但好攰囉   真係慢慢做   唔想出錯 ~

Lunch Time 出去食水餃米   之後去百佳買薄荷糖   上次請咗粒比 8 卦食   佢居然愛上   話薄荷夠勁呀   買完就番菇場喇   好鬼攰 ~



百佳做特價   只係 $4.6/條咋   抵



忙到 3 點幾   終於搞掂   了咗心事咯 ~

放工即走   今晚約咗家姐食飯   又要睇下里奧大人喺邊度落車   所以我都唔煮飯 lu ~

番到屋企抖下喇   應該作乜乜   個人好鬼攰 ~

里奧大人喺落馬洲落車   所以 7 點半可以番到屋企   感恩感恩 ~

家姐就 8 點左右嚟到   咁就去翠河食啦 ~

食完就番屋企坐陣   傾下偈   家姐 9 點幾都要走喇   聽朝要番工   唔想咁夜 ~

送家姐去搭車   番到屋企都即沖涼喇   之後睇下電視   11 點幾都瞓 lu ~

大家樂 @ 官塘 ( 5-OCT-2017 )

( 5-OCT-2017  THU )

今朝瞓到 11 點呀   里奧大人話佢 10 點左右已經醒咗   但見我瞓到剧剧聲   所以由我瞓喎  ~

食完早餐就番屋企   今日唔出街喇   想喺屋企抖下 ~

沖埋涼就休息   但又忍唔住執個櫃桶   因為想執好耐㗎喇   但成日的唔起心肝   今日終於執好哂   勁開心 ~

咁之後吸塵啦   吸到我成身汗   又要再沖多次涼 ~

晏晝唔出去食下午茶   就咁食生果算 lu  ~

食完就熨衫   之後真係抖喇 ~

今晚勁想打邊爐   所以去大家樂喇   好在 6 點前去咋   次次有得打邊爐就好快坐滿人呢 ~

食完就即去徑步喇   里奧大人就徑 2 個圈   我就實在太飽啦   點都要徑 30 分鐘   好在有汗出   呵呵 ~

番到屋企即沖涼   睇多陣電視   里奧大人 10 點 15 分已經要瞓   咁我又有啲眼瞓   所以都一齊瞓 lu   今晚早食又早瞓   其實都好健康   但無咩機會成日係咁呢   哈哈 ~

焦糖洋蔥炒豚肉 + 蒜蓉蒸節瓜粒 ( 4-OCT-2017 )

( 4-OCT-2017  WED )

今朝起身都精神   可能知今日會放 4 點   所以特別開心   哈哈 ~

早餐食蕃茄通粉   唔知係咪落得太勁胡椒粉   一路食一路出汗呀 ~

記得叫少通粉   但唔記得叫走包

菇場忙呀   仲諗住 Hea 過添 ~

今次 Admin 同事好正常喇   11 點 45 分出 Email 話今日放 4 點 ~

Lunch Time 食吞拿魚包 + 雞尾包   好在今朝買定咋   因為出面落好大雨呀 ~



呵呵   完全無 Mood 做嘢喇   真係等 4 點放工呢   一搭正 4 點   個個即起身走喇 ~

番到屋企抖陣就預防晚餐   里奧大人 3 點喺葵芳見客   差唔多 6 點先番到屋企呀 ~

今晚 6 點半可以開飯   依家叫做早食飯   所以都以簡單為主呢 ~

是日晚餐 - 焦糖洋蔥炒豚肉 + 蒜蓉蒸節瓜粒

焦糖洋蔥炒豚肉 - 我真係覺得自已好勁   睇住食譜都可以完全錯哂 Step   我都頂自己唔順   哈哈   咁其實呢個餸賣點都係甜甜哋啫   不過食譜就煎香五花腩   我就炒熟啲豚肉   係咁上下啦   好味就得啦   哈哈 ~

蒜蓉蒸節瓜粒- 蒸咗 3 個節瓜   但其實下次真係 2 個都夠   次次都整得太多咁呢 ~

洗埋碗就去徑步   其實今晚唔想徑呀   好想抖下 ~

嘩哈哈   徑咗一個圈就落雨   咁徑多個圈先走啦   諗住番屋企   點知又停雨   咁喺屋企樓下行 2 個圈啦   點知一路行又一路落雨   天呀   你想點呀 ?!   不過最後都番咗屋企   叫做做咗 15 分鐘運動啦 ~

沖埋涼就熨 2 機衫   搞掂哂就食雪糕同餅喇 ~

又係家姐比我㗎   佢次次一收到月餅劵就會比我呢  

仲夏野莓雪糕 / 雲呢嗱雪糕 / 朱古力雪糕 x 2


里奧大人 10 點就瞓喇   始終喉嚨仲有啲唔舒服   瞓多啲好啲嘅 ~

我就 11 點幾先瞓   唔想咁早瞓住   好似無哂私人時間咁呀   哈哈 ~ 

雜丸出前一丁 + 菜心苗 ( 3-OCT-2017 )

( 3-OCT-2017  TUE )

前排無咩點煮飯   又加上有假期   感覺好似放咗好耐假咁   開心開心 ~

呢排真係瞓得唔太好   點解呢 ?!   諗住徑步會瞓得更好   點知唔係嘅 ~

尋晚諗定今朝一定要食芝腿治呀   因為呢幾朝都食麵餐   想食番啲三文治呀   哈哈 ~



菇場超級超級勁忙   不過我都預咗 ~

Lunch Time 出去超市買嘢   之後買燒賣粉果番菇場食   因為我叫人留粉果比我   費事 2 隻咁少啦   所以要 3 隻   但食埋今次   我決定要停一停   大嫂呀大嫂   我食到好驚呀   加埋燒賣   真係好鬼滯囉 ~



仍然忙爆   不過都係做唔哂   留番聽日做啦 ~

放工即走   今晚搭遲一班車呀   遲咗好多先番到屋企   咁 6 點鬆啲   里奧大人打嚟話放工   所以都即刻浸菜   解凍啲丸呀 ~

里奧大人 6 點 40 分番到屋企   淥埋個丁就可以開餐 lu   今晚 Share 一個丁算喇   咁就可以食哂啲菜呢 ~

是日懶餐 - 雜丸出前一丁 + 菜心苗  

雜丸出前一丁 - 里奧大人見到碗嘢   就問啲麵呢 ?!   我話比啲丸遮住咗啫 ~

菜心苗 - 我整咗一大碗蔥   之前買魚送嘛   里奧大人見到碗蔥   就話妳一定好鍾意食蔥喇   哈哈   但我不嬲都係好鍾意食蔥㗎噃   唔係依家先發現呀嘛 ?!   如果我咁話佢   佢一定會話: 因此妳實在太多鍾意食嘅嘢   所以記唔到咁多 ~

洗埋碗就開機洗衫   之後我自己去徑步   又係徑半個鐘   無計啦   放工煮飯洗埋碗   其實都有啲攰   但我唔會再比自己有藉口唔徑步囉   出一身汗真係好舒服架 ~

沖埋涼就休息   里奧大人 9 點半都瞓喇   我就 11 點幾先瞓 ~

梅菜蒸鯇魚 + 菜心苗 + 芫茜皮蛋魚片湯 ( 2-OCT-2017 )

里奧大人話終於用隻 line 隻碟喇 ?!   我話用過好多次啦   之後問我係咪唔鍾意 Line 喇 ?!   我好快咁答係呀   佢話無諗過我答得咁快   仲諗住睇下我點兜添   哈哈





( 2-OCT-2017  MON )

瞓到 11 點 10 分自然醒   里奧大人話叫我自己食早餐   佢唔係咁舒服想瞓多陣   之後我刷完牙   佢又話陪我去食早餐 ~



食完之後去買餸   佢就番屋企再瞓 ~

買完餸即番屋企   搞掂哂啲嘢就拖地同抹櫃   再廁所大清潔   最鍾意啲牆磚係爽身嘅   感覺好乾淨咁   哈哈 ~

沖埋涼再熨 2 機衫   話咁快就 3 點半喇   里奧大人就啱啱醒   佢又瞓咗 2 個鐘   都好好瞓喎   咁之後即切個水晶梨比佢食   因為太夜食要成日去廁所呢 ~

咁抖陣啦   之後大食 Whatspp 我   話婆婆係咁搵我   話打咗成日都無人聽   但我電話真係無響噃   大食話阿婆以為佢裝咗 GPS   可以跟蹤到我   哈哈 ~

今朝咁晏食早餐   所以唔食下午茶喇   早啲食晚餐好過   煮埋兩個拉麵   6 點 15 分已經開飯喇   哈哈 ~

是日懶餐 - 梅菜蒸鯇魚 + 菜心苗 + 芫茜皮蛋魚片湯  

梅菜蒸鯇魚 - 今次我居然食好多魚呀   之前煮完唔會食㗎   唔通真係餓得滯 ?!   咁我話好味呀啲梅菜   里奧大人話以為我話條魚好味   佢可能覺得點解會話配菜好味過主菜   哈哈 ~   

菜心苗 - $8/斤   好在煮咗 1/3 咋   因為食拉麵好飽肚 ~  

芫茜皮蛋魚片湯 - 里奧大人話喉嚨唔舒服   咁即滾個下火湯佢飲啦   阿 mi 教我落埋茶瓜一齊煲   好在我記得咋   呵呵 ~  

7 點左右到剪髮表妹打比我   話阿婆打比佢問我喺邊度 ?!  成日都無人聽喎   死嘢仲衰   話我係咪 Set 咗阿婆電話喺黑名單呀 ~

真係頂婆婆唔順   佢哋又唔係我細妹   駛唔駛煩到佢哋呀   救命 ~

我同里奧大人話今日婆婆根本無打嚟   佢叫我問婆婆係咪打錯電話囉 ~

咁我打番比婆婆啦   再問佢打幾號電話 ?!   原來佢真係打錯電話號碼呀   將 2 組號碼調轉咗   大佬   咁妳唔好成日同人講   我唔聽佢電話啦 ~

咁我喺老表谷度講呢單嘢   家姐幾衰呀   話終於到妳喇阿妹   幫我哋分擔一下   因為婆婆一日打兩次比佢哋呢   表妹就話害咗我   哈哈 ~

我覺得打唔係問題   唔係 Chur 住打嚟   同埋我講咗 9 千次   我番工係唔方便傾電話   唔係因為老闆鬧   而係菇場太靜   係人知妳講咩   無理由我行出 Pantry 傾   係人都知妳傾私人嘢啦 ~

好耐之前   我試過坐喺位打去銀行問嘢   個職員好掹咁叫我: 妳大聲啲啦    我次次又要按住個口講嘢嘛   所以好在依家可以 Whatsapp   唔係下下講電話 ~

搞掂哂都 7 點半   我即去徑步喇   今晚徑半個鐘都好夠   因為今日做咗好多家務   個人有啲攰 ~

沖埋涼就休息喇   里奧大人 10 點幾瞓   我就 11 點幾先瞓呢 ~ 

住家飯 @ 阿 Mi 屋企 ( 1-OCT-2017 )

口水雞 - 我想食咗好耐喇   起碼 3 個月   但一個人又食唔哂   所以今日食到真係超滿足呀   勁開心    



蒜蓉蒸龍躉腩 - 阿喂一入廚房見到碟魚   即刻問 Mi 做咩唔落陳皮嘅 ?!   之後阿 Mi 即刻落啦   但其實佢一早已經浸好咗   咁掛住同我傾偈   拎漏咗囉   就係呢個位比阿喂入到   話我呢個助手係九流   哈哈哈哈   咁里奧大人唔食魚皮嘛   阿喂話魚皮先係最正呀   阿 Mi 話骨膠原嚟㗎   食完之後   塊臉會彈下彃下   好似氹細路仔食嘢咁   哈哈

  
冬菇海參燜鮑魚 - 阿 Mi 話中秋就要食好啲   所以買咗罐 8 頭鮑魚   呢個燜餸好入味呀   所以我都要食飯   撈汁一流呢 



西蘭花 - 阿 Mi 話 3 樣餸都濃味   所以就咁淥熟就算   咩油都唔落   我話我平時都係咁㗎咋 

蕃茄薯仔螺頭湯 - 好味道呀   原來阿 Mi 落咗 13 個細蕃茄來煲㗎   咁樣煲湯   其實材料加加埋埋都好重喎   下次都係一齊買餸好喇   每人拎啲就最好   不過阿 Mi 同里奧大人又係唔會比我拎重嘢囉

蛋花大菜糕 - 里奧大人好開心咁問阿 Mi: 妳整咗大菜糕呀 ?!   好少見佢咁開心咁問人嘢呢   哈哈  



我一出嚟就飲咗呢杯白酒   之後個人就熱哂喇

     

( 1-OCT-2017  SUN )

今朝 9 點 45 分起身   沖埋涼就要出門口喇 ~

食埋早餐諗住番崇拜   但里奧大人有 Urgent 嘢要覆   所以佢又要番屋企拎電腦   咁我就自己番教會先喇   今日有事奉   唔可以遲到呢 ~





1 點左右完畢   去搵阿 Mi 喇    開心開心 ~

之前問咗 2 間 7仔   都無 Minions 旅行包   咁荃灣都得換   其實我都打定輸數㗎喇   點知個職員話有   仲話得番黃色   我就係要黃色呀   但我都要睇睇內籠先   唔啱就唔會買   估唔到內籠 又 OK 喎   所以里奧大人話快啲買啦   佢都比我搞到緊張埋   哈哈   我真係超級勁開心呀   開心過中六合彩呀   哈哈哈哈 ~

我叫里奧大人影㗎   似唔似啲人去拎獎   點都要拎住份獎品影張相咁呢   哈哈

約阿 mi 喺 Pacific Coffee 等   佢哋啱啱食完 Lunch   所以分頭行事   我哋行街買嘢   阿 Mi 喂就去街市買餸   其實勁唔好意思   要人買完又拎又煮 ~

阿 Mi 問買唔買忘不了 ?!  我成日叫佢提我買   所以佢要成日記住真係慘   哈哈   之後阿喂再問買唔買玫瑰腸 ?!   呢下感動喇   因為反而係佢記得呢 ~

其實今日算係即慶   因為阿 Mi 喺谷講話 Citystore 有折   估唔到里奧大人問邊幾日有折 ?!   仲話殺入去荃灣添 ~

厚切扎肉 + 春卷 + 迷你撈檬 - OK 啦   但個醋汁好薄      



河內牛肉湯粉 (生牛肉及牛丸) - 呢個 OK 呀   唔知係咪自己想食啲熱嘢   哈哈

餐飲 +$10 凍越滴咖啡 - 抵飲呀  



估唔到咁大杯



餐飲 - 熱百香果茶



食完就行陣   急步睇下有咩嘢買   不過無嘢好買   咁里奧大人即打比阿喂   驚佢哋特登周圍行等我哋呀   佢哋又拎住啲餸   條街又熱   但估唔到佢哋已經番咗屋企   里奧大人話佢哋一定係特登唔打比我哋   等我哋可以慢慢行   原來真係囉   阿 Mi 話唔想我哋急住行呀   所以唔比阿喂打比我哋呀   哈哈   阿 Mi 同里奧大人真係好似 ~

咁佢哋都番咗屋企   我哋再行一個圈囉   去咗髮品店買髮泥   最後喺千色滙買咗個迷彩旅行袋   原價 $108 再九折   即係 $98.1   再用埋之前 Apps 嘅 $50 Coupon   真係抵上加抵   哈哈 ~

買完即打的去 Mi 屋企   諗起都搞笑   我之前懶醒話自己打的去 Mi 屋企咪得囉   里奧大人好冷漠咁話: 妳知道地址咩 ?!

又係老規矩   男嘅喺廳傾偈   女嘅就入廚房整嘢   估唔到阿 Mi 話熱   但我又唔覺喎   奇景也 ~ 

阿 Mi 自家制 Cream   佢又醒咗樽比我

托阿 Mi 買㗎   本來無諗住益里奧大人   但依家算啦   哈哈

6 點半開飯   邊食邊傾   未試過喺阿 Mi 屋企食中菜   多數打邊爐嘛   所以今餐感覺好似喺酒樓食咁   哈哈 ~

最鍾意喺阿 Mi 屋企食晚餐   好味唔在講   最正係食唔哂   佢哋可以留番聽日食   呵呵 ~      

8 點幾食甜品   食完就去梳化傾偈   坐地下最舒服   咁當然睇下坐邊個屋企嘅地下啦   哈哈 ~

11 點幾打的走人   報埋平安就沖涼   今晚成 1 點先瞓呀   好在聽日放假啫 ~

呢個眼罩係得意   但就唔會用啦   因為有個扣頂住   唔舒服呢