榮基打冷小菜 @ 官塘 ( 7-MAY-2019 )

招牌牛腩河粉

招牌雲吞 + 手打牛丸河粉

炸魚皮

腐乳通菜

( 7-MAY-2019  TUE )

尋晚瞓到半夜   對手痛到呢   勁想喊出來   好在個人本身都攰   痛咗幾分鐘就可以瞓番 ~

大舅父 Whatsapp 我同大食   話舅母堅持要佛教儀式   叫我哋由她決定   我想話我所講嘅嘢   係代表弟傳遞比佢知啫   我絕對無比無何意見   我只係負責傳遞訊息   其實乜儀式都係佢哋話事   唔好講到我迫佢哋要用基督教儀式喎   我都無咁大權地要人哋用任何儀式   最重要呢啲係人哋家事   雖然我哋有親戚關係   但心哋一家人嘅事   真係唔到我哋理囉 ~

不過我唔想你一言我一語   所以我覆佢明白就算   確定日子同時間就話我知啦 ~

早餐食吞拿魚治烘底   其實叫完先收到 Whatsapp   激到我都唔想食 ~

菇場忙呀   搞掂哂啲 Urgent 嘢就抖下先   因為我雙手仲係好痛   最慘今日有長命 Report 要做   但我一寫字   隻手就好痛   所以都係留番聽日先做   最多聽日開行 Turbo 做呢 ~

Lunch Time 拎皮鞋去整   點知鞋踭未有貨   要等到星期一先再整得   咁拎番對鞋走喇   之後去萬寧拎番隻電動牙刷就即去買水餃河番菇場食 lu ~

對手仍然係痛   姊妹 TT 介紹隻手帶比我   等我搵日去睇下先   手痛真係好煩   咩都做唔到咁 ~

放工即走喇   呢兩日好鬼凍   真係用凍嚟形容   得 19 度咋   真係分分鐘凍過上年冬天   哈哈 ~

番到屋企又忍唔住抹嘢   抹咗一陣已經痛   真係唔再抹喇   咁休息等里奧大人番嚟食嘢 ~

差唔多 7 點都去食嘢   食完再去超市買嘢   之後番到屋企即開機洗衫   沖埋涼就休息 lu ~

9 點幾打比表弟   佢無聽電話   因為我話今晚打比佢嘛   佢有嘢想同我傾   所以點都要等埋電話先可以瞓 ~

表弟 10 點先打來   其實我正想 Whatsapp 佢知   我差唔多瞓   因為我真係好眼瞓 ~

之後佢係咁話唔好意思   無睇到電話   不過我都明嘅   我有時將電話放埋一邊   真係完全唔知有人搵我㗎 ~

我哋最主要係傾舅父身後事點樣搞   不過我只係一個聆聽者   絕對唔會比意見   始終我都係知道單方面嘅嘢   我話最緊要你哋一家人有共識   因為之後有好多嘢要一齊搞嘛 ~

傾傾下佢都喊   我都完全明白佢心情   自己都經歷過   我復原時間都好長   有啲嘢唔係話唔諗就唔諗   係有啲畫面好自然會彈出來   同埋嗰時我好怕合埋眼   但無可能唔瞓覺嘛 ~

我只能夠叫佢要堅強   將來仲有好多日子   要積極面對人生 ~

感激佢好信任我   始終好多年無見   我哋都係知道有啲人搞鬼   所以我都同佢講對唔住   實在無關心過佢   感恩係佢喺呢件事當中   佢倚靠神   同埋將我同大食作為一個關係好密切嘅親人   佢係獨仔   好多嘢真係未必知道對與錯   慶幸佢越大個越識諗   只係佢無人可以傾訴   所以佢都同我講咗好多令我震驚嘅事比我知   希望我今次做聆聽者可以舒緩到佢啲情緒啦 ~

傾到差唔多 11 點 45 分   我真係開始眼瞓   所以我話有問題就 Whatsapp 我啦 ~

之後我同番里奧大人傾啦   因為我驚唔記得頭先講嘢嘅重點   佢聽完都激鬼氣   但我又唔可以用我哋嘅諗法講出來   始終人哋家事嘛   只希望快快搞掂 ~

傾完都已經 1 點 15 分   真係要瞓喇 ~

米線陣 @ 官塘 ( 6-MAY-2019 )

川辣青瓜牛展粒 (細) - 個辣汁好味呀

麻辣蕃茄肥牛餃子皇米線 - 我要中辣   但比錯咗里奧大人係中辣   哈哈

紫菜 + 香酥豬頸肉 + 手打豬肉丸米線 (麻辣蕃茄湯底) - 里奧大人小辣變中辣   話食到出哂汗

( 6-MAY-2019  MON )

今朝都係 7 點半起身   沖埋涼就去食早餐 ~

一開電話   就見到表弟 Whatsapp 話舅父 3 點走了   唉 ~  

食完就番屋企等師傅整嘢   12 點左右搞掂哂   我都即刻做大清潔喇 ~

2 點食個杯麵   表弟又 Whatsapp 來搵我   為咗舅父身後事   我只係做中間人傳遞信息   但個個講嘢都唔同   我覺得做咩儀式真係唔需要外人插手   但大舅父偏偏就插手   呢啲係佢哋家事   雖然你係佢大佬   但都無權話事囉   麻鬼煩   依家直頭搞到我同大食都煩埋 ~

食完杯麵有氣有力就再大清潔   做到成身汗   順便沖涼再大清潔廁所 ~

抖陣又再執埋衣櫃   其實除咗廚房仲有啲嘢要執之外   咩都清潔哂   見差唔多 5 點   我都要抖下   坐喺梳化差啲瞓着添呀 ~

6 點半出發去食嘢   里奧大人拎埋淘寶   差唔多 7 點先到呢 ~

同里奧大人傾番舅父啲嘢   佢同大食嘅答案係一樣   話大舅父最鍾意霸住話事權   之後做到一鑊泡就要人搞掂   真係明明好簡單   依家就搞到麻麻煩煩 ~

呢啲嘢唔可以拖家嘛   都好想快啲搞掂   快啲完結啦 ~

食完就番屋企喇   我雙手超級勁痛呀   所以真係執唔到嘢住喇 ~

開機洗衫再沖涼   之後休息   抖陣就食消炎藥   之後叫里奧幫我搽服他靈   再幫我按摩   但都仲痛囉   嗚嗚 ~

11 點幾都瞓喇   呢幾日好攰呀 ~

翠河餐廳 @ 官塘 ( 5-MAY-2019 )

栗子燜雞煲

涼瓜味菜燜斑腩 ($62)

( 5-MAY-2019  SUN )

今朝里奧大人早啲起身洗啲地磚   我就瞓到 9 點半先起身 ~

咁沖埋涼就出去食早餐   食完就番教會 ~

早咗番教會   諗住睇聖經   但見到 Ivy 同姊姊 LW 兩公婆傾偈   佢又叫我一齊傾    原來傾番上次食飯嘅小風波   諗住完結啦   估唔到依家係大風波嘅開始 ~

今朝有侍奉   上次勁唔開心㗎   甩甩漏漏   所以即同組長講 Sorry   但佢話絕對無甩漏   我哋呢 Team 人係好合拍的   會自動走位幫忙   唔駛唔開心㗎 ~

崇拜完畢都即番屋企執嘢喇   里奧大人仍然幫手大清潔啲磚   之後再執埋廚房   差唔多 2 點 45 分就去食下午茶   食飽再執   今日又係好勞動 ~

點知食食下收到 Whatsapp 話舅父病危   咁即問阿姨邊層樓同床位   佢就 Send 舅父瞓床嘅相   我同里奧大人同家姐睇完覺得完全無嘢喎   因為無插喉又無儀器嘛   咁都唔理喇   快快食埋嘢番屋企睇咩情況   因為未到探病時間嘛 ~

無耐大食打嚟   佢話佢放工後會去醫院   我同佢講話舅父啲相無嘢咁喎   大食話係入院時影㗎   我話咁 Send 嚟做乜鬼呀 ?!   之後我即問阿姨 4 點幾嚟唔嚟得探舅父 ?!   佢話可以   咁我同里奧大人即飛的去博愛醫院   其實未到探病時間都比妳探   唔係好嘢囉   同埋大舅父同阿姨同大食媽咪都趕緊去 ~

去到病房   舅父已經係彌留狀態   望到佢咁   個心真係好唔舒服   雖然感情唔深厚   但始終都係舅父呢 ~

之後一齊去 Canteen 傾下偈   順便等埋大食 ~

舅母話舅父係一個負能量爆燈嘅人   由佢有病開始   就怨個天點解比個病佢   我舅母直頭話舅父一開聲   佢啲負能量好似個金鐘罩咁罩住佢   佢都好辛苦   呢樣又好明白   唔係唔想聽你講   但日日每分每秒都係怨   真係唔係佢顛就係我黐囉   怨怨怨真係無意思   我唔明呢啲人點解真係一世人只會怨   唔識感恩   有病醫好咗   過後嘅日子係賺番嚟   係咪應該更加好好珍惜呢 ?!

差唔多 6 點左右   大食同埋傳道人同牧師嚟咗   咁又上房喇   佢哋要為舅父祈禱 ~

7 點同埋大食佢哋一齊走   我同里奧大人打的番屋企喇   想快啲食完飯再執嘢 ~

食完飯都即番屋企   最搞笑屋企個鐘無電   所以顯示時間係 10 點 45 分   里奧大人話嚇死佢呀   已經打的㗎啦   都成 10 點幾先番到屋企   哈哈   其實嗰時係 8 點半咋 ~

好啦   執好廚房同廁所一部份   我叫里奧大人唔好執嘢   反正聽日師傅又再嚟整   我都要清潔   咁留番我聽日做就可以了 ~

其實都已經 10 點幾   睇多陣電視   11 點左右都瞓喇 ~

八方雲集餃子專門店 @ 官塘 ( 4-MAY-2019 )

我食 5 隻招牌鍋貼   里奧大人就食韓式辣味鍋貼餐   我話飲珍珠奶茶   里奧大人話驚唔驚瞓唔到呀 ?!   我話驚咩呀   茶精無料到

紅油抄手

( 4-MAY-2019  SAT )

今朝同里奧大人去麥當勞食早餐   之後佢就番屋企等師傅嚟整嘢喇 ~

菇場唔忙呀   又可以做自己嘢喇 ~

放工即去紅磡   食埋午餐就去洗牙喇 ~

豉椒排骨炒麵 ($45) - 叫家姐估我食咩   佢估幾次都錯   之後我話食豉椒排骨炒麵   佢話估我唔到   哈哈   我突然間好想食麵呀   呢間整得都好惹味   同埋好多脆麵   不過真係食唔哂   食剩 1/3   唉

2 點半去到診所   我同牙醫講話今日係嚟洗牙   同埋之前牙肉好痛   一開口就痛   所以驚有蛀牙 ~

佢見到我隻智慧牙生得好入呀   同埋有啲爛   所以幫我照 X-Ray   但感恩我唔需要做手術剥牙   不過我話唔痛就唔剥喇   真係好怕剥牙嘅感覺   雖然都只係需要 5 分鐘 ~

之後我話其實今次最主要係洗牙   佢話唔駛洗喎   我好大反應話 3 年前洗咗   係時候要洗啦   咁佢可能覺得我堅持想洗牙   所以佢就用洗牙儀器噴我啲牙   話無黑色嘢出來   牙肉粉紅色好健康   真係唔駛洗牙喎 ~

我真係無諗過咁囉   佢話我啲牙好乾淨   問我點刷 ?!   我話我好大力刷   哈哈   佢話我刷得乾淨但唔駛咁大力 ~

2 點 45 分可以走人   不過同姑娘傾偈啲時間仲耐過見牙醫   哈哈 ~

家姐同里奧大人都唔信我唔駛洗牙呀   唔好話佢哋啦   我都唔太相信自己唔駛洗牙啦 ~

番到屋企都抖陣   里奧大人就睇倚天   我就睇淘寶   因為要買廚房用品   望下個鐘已經 6 點半   咁出去食嘢喇 ~

食完行陣   番到屋企即沖涼休息 lu ~

里奧大人 11 點半都瞓   我就慘啦   仲未有睡意   里奧大人即串我   話珍珠奶茶係茶精無料到吖嘛   哈哈   今次係我衰口啦 ~

咁我仍然上淘寶買嘢   其實對眼好鬼攰㗎   所以 12 點半都開始攰   即去瞓覺 ~

肉餅哥 @ 官塘 ( 3-MAY-2019 )

金沙蛋黃煎肉餅 ($75)

肉餅哥小炒王 ($88)

( 3-MAY-2019  FRI )

今朝 7 點 45 分起身   沖埋涼就去食早餐   就算放假都係食芝腿治烘底   哈哈   其實係因為太早喇   食唔落麵餐   咁又唔知一陣幾點先可以食午餐   所以早餐都係食飽肚啲嘅嘢 lu ~

番到屋企抖陣   師傅 9 點唔夠都到喇 ~

佢哋有佢哋搞   我就上網睇嘢   話咁快又差唔多 1 點   佢哋去食飯   咁我都買嘢番屋企食喇 ~

食完無耐   佢哋又再整   咁我手機要叉電   又唔想睇電視   所以睇書   因為本書買咗起碼 2 年   係時候要盡快睇哂呢   哈哈 ~

家姐 3 點半嚟到   佢今朝要陪姐夫整嘢   所以佢話整完嘢過嚟陪我   實在太好啦   因為聽朝唔同佢食早餐   咁今日可以見面   補番聽日唔見嘅時間   哈哈 ~

里奧大人今日 3 點喺長沙灣見客   5 點半都番到嚟   佢見到家姐都嚇一嚇   無諗過會嚟陪我嘛   之後又一齊傾下偈 ~

師傅差唔多 6 點幾就走   咁我哋都去食嘢喇   家姐就番屋企 ~

食完陣再行一陣   番到屋企就睇下電視   今晚 12 點先可以沖涼   但我應該唔沖㗎喇   感恩今日雖然出街   但無汗出   我今日出街直頭覺得凍添呀   再睇天氣原來只有 19.4 度   怪不得凍啦 ~

我今晚都係 11 點唔夠都瞓喇   里奧大人就仍然繼續睇倚天   哈哈 ~   

翠河餐廳 @ 官塘 ( 2-MAY-2019 )

涼瓜味菜燜斑腩 ($62) - 幾好味

菠蘿咕嚕肉 ($59) - 炸得唔脆嘅

( 2-MAY-2019  THU )

尋晚瞓得唔係咁好   好在後尾都熟睡 4 個鐘   但都係攰   哈哈 ~

早餐食芝腿治烘底   以前鍾意大火   依家就唔鍾意喇   因為好乾咁呀 ~

菇場忙呀   忙到都唔記得攰呢樣嘢 ~

Lunch Time 出去萬寧買電動牙刷   但得番 1 支   咁梗係唔要啦   依家 $599 買 1 送 1 嘛   之後佢打去另一間分店問   佢話黃大仙有   我話唔去喇   咁我突然間清醒   叫佢 Send 過嚟比我就可以啦   佢哋即打去問   感恩聽日有貨到   當我比錢嘅時候   職員話今日 Last Day 買 1 送 1   真係佢唔講都唔知呀   仲諗住再無就聽日再去搵添~

搞掂哂都 1 點   即飛去買魚皮餃河番菇場食呢 ~

忙下停下   最緊要唔好有 Urgent 嘢就得喇 ~

里奧大人 4 點喺金鐘見客   咁今晚都唔番教會聽嘢   同埋都唔煮喇   聽日有人嚟整廚房廁所   今晚要執嘢呀 ~

放工即走   番到屋企熨 3 機衫   勁攰呀 ~

里奧大人 7 點先見完客   番到嚟都 8 點   即去食飯喇 ~

食完飯都即番屋企   搞掂哂嘢都成 10 點   沖埋涼抖陣   我 11 點唔夠都自己瞓先呀 ~

大家樂 @ 官塘 ( 1-MAY-2019 )

丹麥優質豚肉鍋 ($59)

咖哩厚切吉列豬扒飯 ($45)

( 1-MAY-2019  WED )

今朝瞓到 11 點 50 分先起身呀   好少瞓到咁晏   不過又好喎   超級精神   以前瞓到咁晏   反而好攰   可能呢排真係唔係咁夠瞓呢   要補眠補眠 ~

里奧大人先顛呀   半夜瞓唔着就起身睇倚天   好似話睇到 3 點 ~

沖埋涼就食早餐   今餐要食飽啲呀   因為要執屋   聽日有人嚟整嘢 ~

執開有條路   又執埋廚房   抹埋廚櫃   搞掂哂都 3 點幾   又要沖多次涼   順便開機洗衫 ~

家姐 Send 比我睇   好掛住乖女呀   但呢排又無時間探佢   之後佢做絕育手術   我又唔探得佢   驚佢見到我 "太興奮"   整爆傷口   哈哈

再大隻啲就入唔到梳化底㗎喇   呵呵

我同里奧大人都唔餓   所以我繼續執埋衣櫃   執到差唔多 5 點半都抖陣先   食完嘢番嚟再執埋啲手尾 ~

6 點出去食嘢   食完再行陣先番屋企 ~

執埋嘢諗住唔徑步   但好快就搞掂   所以 8 點 15 分又去徑步   難得有風嘛   徑咗半個鐘都番屋企喇 ~

沖埋涼再開機洗衫   之後真係抖喇 ~

里奧大人睇雜誌   我就坐喺梳化大聲話: 我嚟喇   里奧大人個樣好愕然咁   之後話咩又嚟呀 ?!   黐黐哋   無啦啦咩我嚟呀 ?!   講一句鬧十句   哈哈哈哈   其實我嚟喇意思係話依家睇無忌啫   哈哈哈哈 ~   

今晚里奧大人 11 點都瞓   我反而瞓唔着呀   睇倚天睇到 12 點 15 分   其實只係有少少眼瞓   但都瞓啦   聽日要番工嘛 ~