黑椒牛仔骨螺絲粉 + 超甜粟米 ( 7-OCT-2020 )

( 7-OCT-2020  WED )

感恩仍然係一覺瞓天光   日日係咁就好喇   哈哈 ~

今朝涼咗好多呀   但個天色就灰灰暗暗   如果有啲太陽就好啲   精神啲嘛 ~

早餐食芝腿治烘底   好好味呀   我真係覺得外賣好味過堂食 ~

菇場唔忙   所以好鬼靜   冷氣又勁凍   真係好易瞓着 ~

實在要解凍   所以 Lunch Time 出去行下   之後諗住買炒麵   居然賣哂   咁樣會令我覺得更加肚餓   哈哈   咁唯有快快番菇場食 Flakes + 乳酪啦 ~

之前里奧大人同事係買 SAMJIN 呢個牌子嘅麻薯   口感好煙韌   所以買呢盒試下

仍然唔忙   可以準時放工 ~

番到屋企即沖涼   里奧大人 7 點先放工   等到我好攰   所以叫佢食完飯先沖涼 ~

是日晚餐 - 黑椒牛仔骨螺絲粉 + 超甜粟米

黑椒牛仔骨螺絲粉 - 間唔中就好想食牛仔骨   但又唔想食飯   咁煮螺絲粉啦   但其實好難掛汁   可能又唔想特登整茄汁螺絲粉囉 ~   

超甜粟米 - 之前買咗就係時侯要食   但每次食粟米都會比里奧大人話難消化   佢知我胃唔好   不過我真係好想食呢 ~

洗埋碗就大清潔廚房   里奧大人見我係咁抹   佢話已經好乾淨   再用手指抹個廚櫃   再縐哂眉頭比隻手指我睇   即係話有塵咁呢   衰格   之後佢話講笑咋   其實我都唔會信佢囉   因為我頭先先抹完 ~

搞掂哂就即沖涼喇   今晚唔駛開冷氣都唔覺熱   其實唔開冷氣好舒服   可能菇場已經嘆夠冷氣啦 ~

咁我切生果比里奧大人食   佢話 You're the Best   我話你依家先知道呀 ?!   佢應該見我今晚真係好攰   因為我好少會叫佢食完先沖涼呀 ~

10 點半即瞓   呢排好攰呀  係咪轉天氣呢 ?!

泡菜年糕炒豚肉 + 蒜蓉炒菜心 + 自家制麵包 ( 6-OCT-2020 )

( 6-OCT-2020  TUE )

感恩一覺瞓天光呀   唔知係咪天氣涼咗   好似好瞓啲咁 ~

依排朝早成日塞車   睇嚟都要搭早一班車喇 ~

買埋早餐番菇場已經 8 點半   其實如果 8 點 20 分番到就最好   可以洗埋杯先食嘛 ~

菇場唔忙   依家冷氣正常   我又剪短頭髮   條頸好鬼凍   所以手袋一定要有絲巾呀 ~

Lunch Time 去整件褸   因為肥得滯   所以入面啲內喱爆開哂呀   但里奧大人話係啲料唔好囉   咁又係喎   以前啲褸唔會咁爛法   嗰時比依家仲肥添喎 ~

整完件褸就去入票   之後買牛雜河番菇場食 ~

菇場仍然唔忙   但冷氣超級勁寒 ~

3 點幾又好眼瞓   尋日又係咁   但我呢兩日都一覺瞓天光好精神喎   之後諗諗下   應該係粉麵嘅味精   之前停過一排   依家居然唔記得係呢個原因先唔食   哈哈 ~

放工即走   番到屋企即沖涼   之後拖地   搞掂哂就開始煮晚餐 ~

里奧大人 7 點幾先番到屋企   等佢沖埋涼   8 點先開餐 ~   

是日晚餐 - 泡菜年糕炒豚肉 + 蒜蓉炒菜心 + 自家制麵包

泡菜年糕炒豚肉 - 想快啲清哂泡菜同年糕   其實呢個餸真係超級方便   又夠惹味   不過呢排唔係咁想食泡菜   可能我嘅韓國風已過   哈哈哈哈 ~

蒜蓉炒菜心 - 真係唔想成日烚菜   今次試下炒菜心   不過我唔想又炒到手痛   所以灼熟晾乾水再加蒜蓉炒   再加自己調嘅蠔汁   估唔到好好味呀   下次會再整   始終食菜心有益   但烚就真係令到連自己都唔想食   哈哈 ~

自家制麵包 - 里奧大人同事星期日比我㗎   但等到今晚先食 ~

大清潔廚房就開機洗衫   之後即沖涼   抖陣就食涼粉   過咗期 3 日喇   要快快食 ~

今晚都攰   又係 10 點半就瞓 ~

XO 醬肉片炒雜菜 + 菠蘿咕嚕肉 + 油雞 & 燒鴨 (外賣) ( 5-OCT-2020 )

( 5-OCT-2020  MON )

雖然尋晚去咗一次廁所   但感恩都算瞓得唔錯 ~

臨醒之前個夢係我去游水   仲要係好大浪   最勁係我向上游   因為個海係打斜 ~

今朝落超級大雨加上塞車   落車已經 8 點 50 分   手機又無電唔可以叫定外賣 ~

買埋腿蛋治就即番菇場喇   都已經 9 點 10 分   但原來好多同事未番   咁我可以唔駛咁趕 ~

今日好多同事都由頭濕到腳   個個換哂拖鞋   我都要換呀   好似一家人喺屋企咁   哈哈 ~

菇場忙呀   做完都已經 11 點 ~

咁快就 10 月

唉   菇場最慘無冷氣   搞到個頭有啲痛   希望快啲維修完啦 ~

Lunch time 去一田買蘋果   再喺點點綠買芝麻粉同豆漿   買完即去買淨水餃   阿姐話今日做咩連粉都走埋   我話今朝食咗腿蛋治   中午食少啲囉 ~

12 點半先番到菇場   好在仲有半個鐘食飯   無冷氣唔可以食得急呢 ~

2 點左右終於整番好冷氣喇   菇場又進入冰河時期了 ~

無啦啦好眼瞓   同 8 卦講話可能冷氣凍得滯   出現低溫症   佢話我咁多脂肪點會凍   哈哈 ~

其實同 8 卦真係識咁耐就傾足咁耐   係無間斷日日乜都傾   雖然期間有誤會   但佢對我都好好嘅   我唔舒服又問 3 問 4   日日番嚟就問我食乜早餐 ?!   Lunch 食咩 ?!   佢食完就瞓   一醒就問我食乜 Lunch   真係準時過食藥   哈哈 ~

依家菇場食咁忙   放工都可以即走   今晚唔煮喇   買埋外賣就即番屋企 ~

估唔到里奧大人執書枱   以前一定唔會啦   依家知道整齊同歸類係幾咁重要呢   哈哈 ~

沖埋涼就開餐   勁鍾意咁樣   但成日食外賣就真係唔好嘅   我都覺得自己好懶 ~

睇下電視   今晚都好攰   已經無煮飯都咁   里奧大人話我熱氣喎 ~

同里奧大人傾開漢堡包   佢話 Jack in the Box 嘅一片片薄牛肉好食   我話係 Haagen Dazs 呀   之後再講多次   但佢好似一頭霧水咁   之後我話係 Hardee's 呀   哈哈哈哈 ~

我去泰國又係成日講咗 SuperRich 做 SuperSandwich   次次都要講 2 次先講啱  哈哈 ~

今晚 10 點半都瞓添喇   其實依家夜晚無電視節目睇都唔錯   因為一睇就要起碼 11 點先瞓   雖然唔係夜   但可以早啲瞓就更加好呢 ~

蠔皇鮮竹卷 & 雞扎 & 潮州粉果 & 魚翅餃 & 鮮肉燒賣 + 咸水角 & 春卷 (外賣) ( 4-OCT-2020 )

( 4-OCT-2020  SUN )

今朝里奧大人出門口之後   我都即刻瞓番   9 點半就起身 ~

食埋早餐就番教會   好開心終於實體崇拜呀 ~

鼎爺見到我就即比自家制麵包比我   里奧大人話佢依家會直接話比你太太   以前會話你 1 份你太太 1 份咁㗎   笑鬼死 ~

今日大食都一齊崇拜   完畢之後就陪我行咗陣   但我要行好邋買嘢   所以佢最後都係去婆婆屋企 lu ~

行下行下又買咗胎菊 & 金銀花   之後再買杞子同雪梨乾   買埋牛油果醬同薄餅就接里奧大人放工   原來已經行咗一個鐘 ~

估唔到我未去到里奧大人公司   佢已經放工   要佢等番我轉頭   之後同佢啲同事傾陣偈都走喇 ~

食埋 Lunch 就去九龍灣   里奧大人去剪髮   我就去買晚餐   去埋街市買瓜菜就番屋企 ~

今日明明已經涼咗   但我去完街市又係一身汗 ~

入屋即刻沖涼   之後里奧大人都番到屋企 lu ~

我就煲雪梨乾羅漢果茶   里奧大人就染頭髮   染完就睇電視   見佢眼皮塌哂落嚟   我叫佢瞓啦   雖然已經 6 點 ~

我諗住 8 點先可以食晚餐   估唔到里奧大人 7 點 15 分起咗身   咁又好喎   整得嚟真係 7 點 45 分可以開餐 ~

慢慢食   洗埋碗就沖涼   抖到 9 點幾就食冰皮月餅   依家有咩都快啲食   唔係攏攏下又唔記得呢 ~

我叫家姐 Send Berry 比我睇下   咁樣影好似個大肥婆呀    

明明眼瞓   但點都唔入房瞓

今晚睇 Youtube   一望個鐘原來已經 11 點半   要即刻瞓喇 ~  

炸雞 & 薄餅 + 肉醬意粉 ( 3-OCT-2020 )

( 3-OCT-2020  SAT )

今朝 9 點 15 分起身   里奧大人就早我少少起身   佢叫我瞓多陣   但我話一覺瞓天光好精神   唔駛再瞓喇 ~

梳洗完就食早餐   之後熨 4 機衫   估唔到又唔攰喎   感恩感恩 ~

里奧大人 12 點幾出門口番工   咁家姐今日要幫糟糟整嘢   所以我今日喺屋企執廚房喇   連續 3 日閉關真係好爽   因為依家出一出去又要沖涼   我覺得好煩呀 ~

今日勁喇   又掉咗好多餐具同廚房用具   仲掉哂所有曲奇模   之後好多唔捨得掉都掉哂   實在好舒服   屋企實在太多嘢   依家覺得好多空間用呀   哈哈 ~

搞掂廚房就再大清潔廁所   之後個肚咕嚕咕嚕   我望個鐘已經係 5 點喇   真係唔經唔覺執咗 4 個鐘 ~

沖埋涼就食個迷你月餅   快快清埋去 ~

抖陣就張整理文件 File   我要一個人靜靜哋先可以執   因為好多保單要分類呢 ~

里奧大人 8 點放工   咁我都預備晚餐喇 ~

其實只係焗熱炸雞 & 薄餅   再炒熱啲意粉   非常簡單呢 ~

里奧大人番到嚟就沖涼   我就擺好哂陣   佢出嚟見到啤酒倒落杯入面   佢笑住話做咩今晚咁好招呼 ?!   我話因為執完廚櫃   拎嘢得手應手所以好開心   對佢好少少咁啦   哈哈 ~

洗埋碗就沖涼   之後休息 ~

今晚睇多陣電視   11 點幾都要瞓   因為聽朝要番崇拜喇 ~

CHUBBY'S PIZZA (外賣) ( 2-OCT-2020 )

大胃王 A 餐 ($225) - 環球世界大批 (薄批) & 招牌肉醬意粉 & 炸雞 3 件 & 飲品 4 罐

( 2-OCT-2020  FRI )

今朝 9 點 20 分起身   里奧大人就 8 點半已經起身靈修   我覺得 9 點幾起身係最好   多啲時間用同埋唔會話瞓得太多咁呢 ~

梳洗完就等里奧大人去買早餐番嚟   佢真係從來無怨言㗎   呢樣真係抵讚 ~

食完又執雜物櫃   終於將所有嘢歸類   又係入膠袋+貼 Label   好整齊同埋易搵好多   以前我好憎啲物品貼 Label   但依家真係買得太多嘢   同埋年紀大無記性   所以有 Label 提醒下真係好好多   今次部編印 Label 機真係買得合時喇 ~

今次掉埋部 WI 同埋 PS2   其實玩咗幾次   之後一直擺喺度   所以今次點都要掉咗去呢 ~

差唔多 2 點半食下午茶   我同里奧大人講話唔食都得   因為我一執嘢就唔想食嘢   想快快搞掂   佢聽完嚇到 O 咀   哈哈哈哈 ~

之前已經執好哂所有相片   今日再執啲   又令到自己情緒即刻低落   好在好快執好哂 ~

本身我話今晚焗 Pizza   但只係細嘅 Pizza   我覺得唔夠飽   不過我又懶   唔想煮多一樣嘢   所以最後又叫 Pizza   但其實里奧大人一早就話叫 Pizza   所以佢都忍唔住笑 ~  

因為上次等咗 2 個鐘   加上今日又係假期   所以 5 點 20 分叫定   預佢哋 1 個鐘後先到   叫完之後就沖涼喇 ~

咁到里奧大人去沖涼啦   佢話 Pizza 唔會咁早到   點知 5 點 50 分到咗   里奧大人出嚟見到個 Pizza 都呆咗   因為無諗過咁快到呀   哈哈 ~

早食早休息   難得假期都想多啲時間抖下 ~

家姐比我嘅貓山王冰皮月餅   今晚要食喇   但里奧大人飲咗啤酒   所以唔食得

睇下電視又睇下 Youtube   今晚 11 點幾都瞓   假期都係想正常時間瞓覺   始終番工時間多過放假時間   要調教番正常時間瞓係好慘囉   哈哈 ~

雜菜魚丸米 ( 1-OCT-2020 )

里奧大人公司有同事派咗 "耶穌愛你" 嘅月餅

( 1-OCT-2020  THU )

話咁快就到 10 月   今日開始連放 4 日假   勁開心 ~

9 點半起身   之後梳洗等食早餐 ~

食完抖到 10 點半就開始執屋   今日要學習斷捨離   最緊要掉得夠狠   哈哈 ~

首先執好里奧大人嘅 Lan 線櫃桶   因為一定要比佢過目先可以掉   我唔知道邊啲要唔要呀 ~

呢度只係一部份咋

   

一執就執到 12 點半   足足 2 個鐘   執到我發脾氣   因為我鍾意將所有嘢分類先   之後再執   但里奧大人就係邊執邊睇要唔要呢 ~

我就負責入膠袋加 Label   真係前所未有咁整齊   其實叫咗佢好多次執好㗎喇   但今日佢終於的起心肝話執嘢   所以我第一樣就叫佢執好所有 Lan 線   哈哈 ~

繼續執所有櫃桶同書櫃   又掉咗唔少書   終於執到 3 點左右就食下午茶 ~

食完有力再執   我成日買衫   但買咗好多都無着   所以我拎哂所有衫褲出嚟   如果里奧大人話掉就即掉   感覺無自己掉咁心痛   哈哈哈哈 ~

終於掉咗 6 大袋衫   加埋之前總共 7 袋   都唔明點解可以咁鬼多衫仲要唔着   好在依家可以捐出去   咁樣唔會浪費 ~

好開心今日同里奧大人掉咗咁多嘢   我哋一講完掉就唔會望番轉頭   不過最緊要係唔好再買買買   否則執完都一樣 ~

唔想里奧大人又頻頻樸樸出去買晚餐   所以我話今晚煮米粉算喇 ~

7 點 45 分先開始煮晚餐   差唔多 8 點先食 ~

洗埋碗就開機洗衫   之後沖涼   食埋生果就休息喇   今日執咗成日有啲攰 ~

呢隻新甘泉水晶梨真係好味道   又甜又多汁   今次切開嘅時候係爆汁添呀   第一次見到咁情況咋

睇陣電視   但 12 點半先瞓到   可能晏晝飲咗杯奶茶呀 ~