燒汁焗雜丸 + 西蘭花 ( 7-NOV-2020 )

( 7-NOV-2020  SAT )

感恩起身都精神   始終半夜去咗廁所   唔算係一覺瞓天光嘛   哈哈 ~

今次試另 1 間早餐   雖然好味道   但真係好飽   我已經走包   但都食剩 1/3 麵   因為已經飽到上喉嚨   再格硬食就會比番哂佢了 ~

菇場勁忙呀   好在 12 點半就搞掂哂咋 ~

今日搭巴士去新都城   感恩車程順利   2 點唔夠已經到咗   咁我去大生買薯片同啫喱就 Join 埋家姐喇 ~

街邊乾炒牛河 ($56) - 家姐同姐夫 Share   我實在唔餓   所以唔想食

花生醬金磚西多士 ($32) - 我同家姐都鍾意糖漿

食完即同家姐去超市買雪糕   叫姐夫喺車度等   唔好阻住我哋周圍睇嘢   哈哈 ~

比完錢就我去拎雪糕先   點知見到船頭   咁等埋家姐一齊打過招呼先一齊去拎喇 ~

番到屋企都接近 4 點   Berry 又怪聲歡迎我 ~

衰女包   家姐整梳化   佢圍住梳化行   但對眼係望實家姐   家姐一郁就即飛樸咬家姐隻手呀   真係黐黐哋線咁 ~

用零食引佢   唔係咁樣係唔會理我的   哈哈哈哈

個頭好似 Key 落去咁

次次食完佢鍾意食嘅零食   就會舔舔脷

之後望都唔望我喇

個樣好搞笑 

最鍾意望住出面 (即係唔會望我)

佢鍾意中眼瞓   但我一行埋去就會走開

之後家姐拎電腦喺飯廳做嘢   咁我陪佢   估唔到 Berry 都坐喺隔離   好似陪住我哋咁

佢又好憎家姐拎起個鞋架   如果拍個鞋架仲會直接飛去咬佢   咁我叫家姐整比我睇   衰女真係即咬呀   到我整啦   諗住外人唔咬喇啩   點知都係即咬呀   咬到好鬼痛囉   之後仲咬我手腕位置   好在唔係大狗   唔係比佢咬死都似   怪不得家姐咁驚衰女包咬啦 ~

今日唔駛執嘢   所以可以抖下 ~

家姐好鍾意我個八哥電話套   咁里奧大人又送個比佢   但我話臨走前拎電話要小心啲   唔好拎錯番屋企   哈哈 ~

咁佢即換電話套   換完就無啦啦話拎錯我部電話   佢真係想企身去餐枱拎咁㗎   之後先知道自己將電話底面調轉囉   因為佢電話面係平嘅   調轉咗就凸出來同我電話一樣   但真係笑死我囉   佢自己一路拎住部電話同同事 Whatsapp 家嘛   點會拎咗我部電話呀   係咪比 Berry 嚇到神經衰弱呀   哈哈 ~

咁等 Berry 食完晚餐就同佢梳毛   佢超級 Enjoy 呀   放軟哂成個身瞓落地下   我哋同佢四手按摩   真係皇帝式享受   但點解成日蝦我哋㗎   嗚嗚嗚嗚 ~

7 點左右走喇   番到屋企再大清潔廁所   沖埋涼就等里奧大人放工 ~

里奧大人接近 9 點先放工   真係等到無哂 Mood ~

是日懶餐 - 燒汁焗雜丸 + 西蘭花

燒汁焗雜丸 - 我覺得里奧大人鍾意食焗多啲   可能加咗燒汁有啲味道 ~

西蘭花 - 單買一個要 $8.9   買兩個就$12   我驚食唔哂就買一個   買完之後就覺得超級唔抵   哈哈 ~

洗埋碗就再沖多次涼   真係沖涼攰過煮飯   哈哈 ~

見佢咁攰   等佢食完再比杯雪糕佢食   不知幾開心 ~

今晚雖然夜食   但 11 點幾都瞓喇 ~

家鄉釀涼瓜 & 麻辣燻蹄 (外賣) ( 6-NOV-2020 )

( 6-NOV-2020  FRI )

尋晚瞓到半夜   都要開番冷氣   因為里奧大人話我好似個火爐咁 ~

佢平時喺屋企會着抓毛外套   但一瞓覺就話覺得好熱   我個身真係好似發熱咁㗎   由細到大都係咁   所以成日咁火爆   哈哈哈哈 ~

早餐食奶醬多   本來想食芝腿治   但真係唔餓   所以都係食多士算喇 ~

忙咗一大輪   之後又做下自己嘢   好快又到 Lunch Time ~

去買榮華臘腸   買 2 送 1好抵   所以買咗半斤裝嘅精選臘腸   其實想買加瘦   但只得 1 斤裝   咁真係唔買喇   家姐之前又訂咗 1 斤臘腸比我   我都唔敢同家姐講話買臘腸添呀   唔係一陣又話我買咁多 ~

幫里奧大人拎埋條西褲   再行多陣就買牛雜河番菇場食喇 ~

上次要醋   今次阿姐都記得   所以呢間茶記嘅職員真係好有心呢 ~

唔忙呀   又比自己抖下 ~

放工即走   買埋外賣就番屋企喇 ~

忍唔住又大清潔廚房   之後先沖涼   抖陣先整晚餐 ~

里奧大人電 6 點半打嚟話公司有突發事要遲走   所以差唔多 7 點 45 分先開餐 ~

是日懶餐 - 家鄉釀涼瓜 & 麻辣燻蹄 (外賣)

家鄉釀涼瓜 & 麻辣燻蹄 (外賣) - 唔知煮咩好呀   所以買兩個餸   自己再煲飯   咁樣都唔錯 ~

洗埋碗就休息   抖陣先食生果 ~

今晚 11 點幾都瞓   就嚟冬天   要早啲瞓   咁樣身體先會健康呢 ~

燒汁焗金沙骨 + 鮑魚扒生菜 ( 5-NOV-2020 )

( 5-NOV-2020  THU )

感恩一覺瞓天光   起身好精神 ~

仍然奶醬多   食唔厭但好悶   哈哈哈哈 ~

菇場勁忙呀   咁同阿怪傾開消數問題   聽佢講完一大輪   但其實條數都消唔到   仲好話特登搵出條數來去消數   咁我實在唔太明佢講咩   所以叫埋溫總一齊傾   大家都覺得條數根本消唔到   佢仲話得我同溫總先溝通到   真係好想話得妳自己唔明咋 ~

我最憎佢串串共話慌死妳哋唔知條數點來   所以 Print 份 Supporting 比我哋對數   份 Supporting 根本同佢條數都唔啱啦   因為佢喺我最忙嘅時候同我講   我乜都話 OK   等我睇完再搞   依家比佢話番轉頭   同埋其實唔係我跟囉   激死我 ~

今日好快到 Lunch Time    時間一到就即幫里奧大人拎褲同改褲腳   之後順便買人參果   今次我又買 4 磅   諗住同家姐 Share   但都係覺得好似好少咁   咁即打比家姐啦   問佢要唔要 ?!   佢停咗一停無出聲   咁我就知佢要㗎喇   如果唔係佢會直接講唔要   因為今次啲人參果好甜   姐夫成日買比佢嗰啲係唔甜㗎   所以家姐想要囉 ~

之後行去再買啦   我話要多 2 磅   佢砰咗 3 磅   我都無問題   老闆話我好相與   做我呢啲客就最好   咁老實講   真係覺得甜先買咁多   同埋佢又有禮貌   有啲真係衰到死㗎   買完仲悔悔氣氣咁遞比你咁呢 ~

無諗過買咁多生果   所以要慢行去買炒麵+粉果   哈哈 ~

我最鍾意炒麵有好多菜

 

里奧大人同事喺公司用電子鍋煮麵   仲煮埋比里奧大人   實在太好喇   因為我見到有盤菜同碟肉同埋魷魚 ~

放工即走   番到屋企沖涼洗頭   今晚應該唔會出汗 ~

$15/2 磅真係超級平   我見另一檔生果店係 $20/6 個咋

里奧大人話 6 點幾放工   仲話今晚開會   好在我已經預備好晚餐咋   明明話聽晚先開會家嘛 ~

是日懶餐 - 燒汁焗金沙骨 + 鮑魚扒生菜

燒汁焗金沙骨 - 其實我非常之鍾意焗嘢   因為肯定唔熱   如果開鑊一定係炒   咁要大清潔啦   如果蒸   對住火爐又熱鬼辣辣   所以我點都要買個焗爐   煮嘢就方便好多喇 ~

鮑魚扒生菜 - 買咗 2 棵唐生菜   醒起家姐比咗罐鮑魚   咁即刻整呢個餸喇   唔想又擺到過期 ~

洗埋碗就開機洗衫   之後都係沖多次涼   雖然無汗   但都係唔習懶做完一輪嘢唔沖涼呢 ~

里奧大人準時 8 點半開會   9 點半開完   都算快喇 ~

之後同里奧大人講番今日阿怪單嘢   好在里奧大人第 1 句就話多咗條數喺邊度嚟呀 ?!  真係連外人都即時理解到   最搞笑係里奧大人話關我乜事   咁佢又講得啱   平時佢同溫總傾家嘛   做咩今次插手架   真係豬咗 ~

今晚 11 點幾都瞓喇   其實勁驚呀   因為頭先接近 11 點係無睡意㗎 ~

茄汁鹹牛肉意粉 + 粟米蛋花湯 + 自家制麵包 ( 4-NOV-2020 )

( 4-NOV-2020  WED )

今朝搭早咗班車   所以去大快活買早餐   好耐無食喇   覺得食新嘢   哈哈 ~

今次要少通粉   我覺得份量啱啱好

菇場勁忙呀   一望個鐘已經 11 點半   真係要抖下先 ~

咁我正想合埋眼抖下   點知小 A 無啦啦走埋嚟   話我戴咗眼鏡好似英文 Miss   我覺得好搞笑   點解要強調英文 Miss 呢 ~

不過我確實唔出聲個樣係比較斯文   但其實應該每個人都係咁啦   咁加上我戴咗眼鏡就更加斯文咁囉   初初番教會   好多教友都以為我係 Miss 或者社工   但識落我之後就覺得我痴痴地   哈哈 ~

Lunch Time 要行下   其一未餓   其二真係要出去解凍   咁去銀行打簿再買意粉   之後買埋 Lunch 就番菇場慢慢食 ~

鯪魚球米 (少米)   我覺得少米真係好好多   因為番到菇場都仲有湯呢  

仍然忙呀   差唔多做到放工   但仲未做完   留番聽日做 ~

放工即走   番到屋企沖埋涼就抖下先 ~

里奧大人 7 點放工   我都預備晚餐喇   又係接近 8 點先開餐 ~

是日晚餐 - 茄汁鹹牛肉意粉 + 粟米蛋花湯 + 自家制麵包

茄汁鹹牛肉意粉 - 之前買咗 2 罐鹹牛肉   估唔到咁快到期   但依家嘅鹹牛肉係無鹹香   所以我加塊芝士提味   嘻嘻 ~

粟米蛋花湯 - 本身想買菜   但同呢餐西餐唔 Match   所以要改為粟米湯   哈哈哈哈 ~

自家制麵包 - 里奧大人同事尋日同今日都比咗麵包   咁一次食埋去啦   唔想每晚焗兩個呀 ~

洗埋碗就開機洗衫   之後沖涼休息 ~      

睇電視睇到 11 點   之後我都都瞓先喇 ~

皇城餐廳小廚 @ 紅磡 ( 3-NOV-2020 )

至尊咖哩牛筋腩煲 ($63) - 呢個好味道   香香辣辣

都好多牛腩

虎皮椒四季豆炒咸肉 ($63) - 勁惹味   我話好辣   里奧大人話唔辣   嗰下覺得佢真係食得咁辣   點知原來佢無食虎皮椒呀   係我講得衰嘅   應該話虎皮椒好辣嘛   哈哈

( 3-NOV-2020  TUE )

尋晚瞓到半夜去廁所   之後瞓唔番咁滯呀   好在最後都瞓得番咋 ~

里奧大人話尋晚發惡夢   講佢搭嘅 Lift 直衝落地面   之後停低嘅時候見到我喺 Lift 出面   好似 Spider Man 咁黐住部 Lift 喎   咁佢大力開 Lift 門拉我入去   之後部 Lift 有好多人入咗嚟   呢下恐怖   哈哈哈哈   我話係咪好掛住我呀 ?!   呢兩次發夢都有我份   雖然都係惡夢   哈哈哈哈 ~

早餐食芝腿治烘底   芝士熔哂真係好好味 ~

菇場又整冷氣   不過又唔焗喎 ~

Lunch 食杯麵   阿齋話又食杯麵   我話就嚟過期喇   佢好大反應話唔係嘛   杯麵都會過期 ?!   之後我比佢睇囉   到期日係 20/11/2020 呀   佢話頂我唔順   杯麵都可以攏到就嚟講期   哈哈 ~

今次都唔駛問師傅整完冷氣未   我都知已經整好   因為啲手指已經凍到硬哂   打字都有困難 ~

家姐 Whatsapp 話鈣思寶好平   又買咗 4 Pack   我話又買 ?!   之後佢打比我解釋   話依家計埋係幾多幾多   咁我話咁平妳又唔買多啲 ?!   家姐話頭先又話我又買 ?!   依家又叫我買多啲   咁究竟妳想我點㗎 ?!   哈哈哈哈   咁我之前唔知價錢嘛   知道覺得勁抵咪可以買多啲囉 ~

去里奧大人公司等佢   佢啲同事見到我就話多謝我啲零食   我都差啲唔記得之前買比佢哋食添 ~

傾多陣就去食飯   食完都要走人喇   里奧大人要開會 ~

番到屋企都差唔多 8 點   沖埋涼就休息一下 ~

里奧大人接近 10 點先開完會   番到屋企即沖涼   抖多陣都瞓覺 ~

我就繼續睇電視   11 點先瞓呢 ~

招牌餃子 (外賣) + 節瓜鹹蛋湯 ( 2-NOV-2020 )

( 2-NOV-2020  MON )

尋晚明明 10 點幾眼瞓就即瞓   點知一上床又瞓唔到咁   所以成晚都瞓得唔係咁好   感恩今朝起身都精神 ~

番到菇場食早餐   食到半路都覺得有啲頭痛   因為無乜冷氣 ~

11 月喇   好快又到 2021 年 lu

我好鍾意呢個眼鏡盒

忙咗一大輪   依家戴眼鏡係睇得清楚   但飲水真係好煩   要除眼鏡 口罩同口罩托   但飲完水之後   我喺度諗   做咩要除眼鏡飲水呢 ?!   哈哈哈哈哈哈 ~

雖然忙但不在狀態   日子全部寫哂 3 號   好在睇到月曆咋   唔係出咗街就慘了 ~

11 點 40 分突然醒起無做 Report 比老闆   但都係食埋 Lunch 先做   因為用半個鐘頭去做呢 ~

怪不得今朝都覺得有啲嘢未做咁啦   呢個 Report 係每星期一要做的   咁上星期又放假   今日又溫溫燉燉   唉 ~

Lunch Time 出去幫里奧大人拎件漁夫褸同收褲腳   搞掂哂就買燒賣+炒麵   再買埋支雞骨草比里奧大人就番菇場喇 ~

食完就做 Report    搞掂又再做埋今朝收到嘅長命 Report   不過 3 點都搞掂哂   8 卦問做咩咁快 ?!   我話少嘢搞咪做得快囉   因為之前就算收到 Report 都唔會做得咁快   哈哈 ~

放工即走喇   里奧大人 Off 就要簡單煮   佢話買麥記啦   咁可以唔駛煮   但我又唔想食麥記囉  所以買餃子喇 ~

是日懶餐 - 招牌餃子 (外賣) + 節瓜鹹蛋湯

招牌餃子 (外賣) - 今晚想重口味   所以我嗰碟就加咗紅油同花生   真係好鬼正但好鬼辣 ~

節瓜鹹蛋湯 - 之前買咗 4 個節瓜   因為唔想睇住佢萎縮   所以今晚一定煮埋去   滖湯就最簡單   哈哈 ~

洗埋碗就沖涼   抖陣就熨咗幾件衫   但覺得好攰   都係留番聽晚熨 ~

里奧大人話淘多個 Headphone   因為之前要 $2xx   依家只係 $1xx   所以買多個沖淡番去喎   我話是鬼但啦   反正都淘咗   唔通話唔好咩   如果係我啲碗碟   佢肯定唔會咁啦   衰人 ~

準時睇 "木棘証人"   真係幾搞笑   我其實鍾意睇港劇   因為唔駛睇字幕 ~

今晚 11 點唔夠都瞓先喇   真係好攰呢   哈哈 ~

聚寶廚坊 @ 紅磡 ( 1-NOV-2020 )

2 人餐 ($185)

口水雞 (例牌) - 麻麻辣辣真係好惹味

生煎鹹魚茸肉餅 - 里奧大人叫㗎   佢真係好鍾意食呢啲肉餅

蜜椒薯仔牛柳粒 - 呢個我叫嘅   因為自己唔識整   哈哈

老火靚湯 (細煲) - 應該有 4 碗

青紅蘿蔔豬骨湯

凍檸檬七喜 (+$8)

配香茅油飯   個飯都幾好味

( 1-NOV-2020  SUN )

今朝里奧大人出咗門口都唔知   但我瞓到 7 點半就好似醒醒哋咁   不過都會繼續瞓   因為 10 點先鬧鐘響 ~

鬧鐘一響都起身   沖埋涼就去食早餐 ~

真係好鍾意中式早餐配咖啡   其實如果朝早去飲茶   我都一定會買杯咖啡飲㗎

今日有事奉   所以要早啲番去教會預備 ~

一到教會   又同弟兄姊妹傾偈   真係差啲唔記得自己有事奉   哈哈 ~

依家小組有啲問題   我已經將某幾個人當作陌路人看待   里奧大人都話平常心面對佢哋   始終喺教會   我好傾嘅弟兄姊妹都有 10 個   唔想因為某幾個人而令我番教會唔開心囉 ~

我同里奧大人講呀   我比哂機會佢哋   同埋次次係我主動上前打招呼   我要做嘅嘢已經做哂   我問心無愧   而佢哋仍然要咁   咁由得佢哋   我好攰   再無多餘嘅精神力氣再為佢哋做任何嘢 ~

今日喺教會勁多嘢做   又周圍走   真係出哂汗呀 ~

1 點半離開教會   即搭小巴出太子拎眼鏡   之後再行陣花園街   買埋燒餅就去里奧大人公司 ~

今次買咗燒餅比佢啲同事食   真係好鍾意開心 Share   同埋好難得出旺角   哈哈 ~

都唔少人買嘢

抖陣再去買 Lunch   食埋先再幫手 ~

好似病人餐咁   哈哈

6 點幾就走人   食埋晚飯就番屋企喇 ~

沖埋涼都休息   我就睇 Youtube 又打下機 ~

里奧大人 9 點半瞓覺喇   佢真係好攰呢   不過我 10 點幾都瞓 lu   今日勞動咗成日咁   都比較攰呢 ~