香煎鯰魚柳 + 腐乳唐生菜 + 蝦子麵 ( 2-NOV-2011 )

( 2-NOV-2011  WED )

今朝去另一間茶餐廳食早餐   終於可以食燒賣粉果喇   食食下嘅時候周圍望   一望就望到老闆兩公婆坐近門口食   真係呢   我仲諗住轉場   依家都係唔好喇   雖然佢哋都好好人   但我都係想輕鬆啲咁食囉 ~

番到菇場靜英英   望住會計部啲同事做嘢   覺得自己部門真係好得閒咁呀   我發覺做會部嘅人多數戴眼鏡咁㗎喎 ~

今朝唔係太飽   未到 Lunch Time 已經好餓   所以一夠鐘就同 8 卦一齊去明星買 2 餸飯喇   $20 一盒真係超抵   餸同飯都超多   已經少飯   都係好多   下次要叫少少飯先得呢   因為樣樣食到一半已經想放棄   不過唔想浪費囉   嚟緊呢個月都唔會再食 2 餸飯呀 ~  

唔知係咪晏畫耐無食飯   所以飯氣攻心   超勁想瞓覺   平時唔會咁㗎 ~

放工去 H & M 買手鐲   行行下再買多個斜揹袋   呢間啲嘢都幾平   間唔中去買下嘢都唔錯呢 ~

今晚要去德福拎嘢   所以行埋 Piago 同 Market Place   諗住里奧大人無咁早放工   點知佢 7 點打嚟話放工   嗰時我差唔多番到屋企咋   所以一番到屋企放低嘢   開機洗衫   之後就預備晚餐   趕到我吖   不過今次煮嘅嘢就超簡單   所以半個鐘頭搞掂   我覺得自己好勁㗎喇 ~

是日懶餐 - 香煎鯰魚柳 + 腐乳唐生菜 + 蝦子麵

香煎鯰魚柳 - 本來想整吉列魚柳   但里奧大人話爆緊瘡   所以唔想食   不過咁都好   因為我都無咁多時間用心慢慢炸   所以就咁半煎炸算喇   估唔到今次都煎得唔錯   好香口   我用咗 1 條鯰魚柳   煎開咗 4 件   少到不得了呢 ~

腐乳唐生菜 - 之前食剩嗰 Pack 嚟咋   今次就蘸腐乳食   我覺得將 "中" 爛咗腐乳舖喺菜面   賣相比較核突 ~ 

蝦子麵 - 本來想煮蕃茄意粉   不過又係唔夠時間啦   煮一煮意粉起碼要多 10 分鐘   所以煮蝦子麵算數喇 ~

洗哂所有嘢   我又開始好專心焗芝士麻糬喇   又係因為包芝士麻糬預拌粉 5/11 到期   所以我又焗埋比家姐佢哋食啦   唔好浪費嘛 ~

估唔到焗麻糬咁簡單   口感同味道同出面賣嘅係一樣   真係超勁開心呀   好似好有成功感   但其實功勞都係包芝士麻糬預拌粉啫 ~

里奧大人去跑步   咁我就拖地喇   微力達纖維地拖真係好好用   又索水又夠輕   同埋最緊要快乾   好怕啲地拖蹹到一陣味呀 ~

今晚超過勁攰   所以連衫都唔想熨呀   不過就硬係覺得有啲嘢未做咁囉 ~  

自家製芝士麻糬 ( 2-NOV-2011 )

呢晚又要清咗包芝士麻糬預拌粉   所以就跟佢包裝嘅做法嚟焗麻糬喇 ~

我本身都鍾意食麻糬   煙煙韌韌嘛   不過 Panash 嘅麻糬好似無以前咁好食   又越嚟越細咁   同埋我覺得佢哋加價加得好犀利   好似佢嘅條裝芝士包咁   初初食真係又平又多芝士粒又好食   所以成日買   嗰時好似 $15.5   之後一加就加到 $19.5   咁有排好似日本啲牛有事定唔知咩   無出一輪   之後就加到 $25.5   咁都買嚟食啦  因為想食好耐嘛   不過發覺啲芝士少到呢   得以前嘅 1/3   好搵笨囉   所以之後都無買 lu ~  

所以今晚都好期待自己整嘅芝士麻糬   雖然係用預拌粉   但都要搞家嘛   同埋今次焗嘅時間比食譜嘅少 10 分鐘   估唔到又啱啱好喎   因為有一盤試跟佢哋嘅時間   差啲燶呀 ~   

一出爐就自己試咗味道同口感   好似 Panash 嗰啲咁呀   之後再比里奧大人試   佢都話好味   我超勁開心呀 ~

一包預拌粉焗 20 個   其實份量真係好多   話哂都係飽肚嘢嘛   不過唔緊要嘅   因為我比哂家姐同佢啲同事食   咁應該好快食哂呢   如果我自己食   要食幾餐   真係唔想鍾意食嘅嘢   要食幾日   咁樣會好厭囉 ~

板長壽司 @ 九龍灣 ( 1-NOV-2011 )

蝦天婦羅壽司


三文魚醬油漬壽司 / 三文魚壽司 / 珍味廣島蠔壽司 

( 1-NOV-2011  TUE )

呢排成日都 11 點 45 分左右先瞓   所以有少少攰   早瞓有早瞓嘅好   會精神啲   皮膚又靚啲   人都長命啲啦   但唔好嘅就係出街嘅時候   一到 10 點幾就好眼瞓囉   好在我唔係成日出街啫 ~

今朝去另一間冰室試下啲早餐   無咩特別   我坐卡位   對面係一個男人   食嘢又好大聲   好煩   不過我啲早餐又嚟哂   我就費事轉枱囉   食食下後面嘅人又唔知做咩鬼係咁郁張櫈    搞到我坐得超唔舒服   下次都係唔嚟食喇 ~

番到菇場   見到會計部又有新同事   不過無介紹   比我都唔介紹住啦  一陣又係做一日就唔做   睇定啲再介紹好過咯 ~

Lunch Time 仲未餓   所以出去行咗半個鐘先番菇場食嘢   又係 Special K   不過今次係用朱古力奶呢 ~

今日要去診所拎藥   佢哋收 6 點   本來我想早走本粒鐘   咁可以慳番 80 蚊   不過都係唔好咁喇   比人感覺唔係病就早走咁囉 ~

里奧大人今日要上大陸見客   好感恩 7 點可以走   我一早諗好咗煮蕃茄意粉   但里奧大人話想食麵   咁我依家又唔駛帶 Lunch Box   我食咩都無問題嘅   之後差唔多番到屋企果時   佢打嚟話想食壽司   因為又難得 8 點幾可以番到嚟   所以想出去食下嘢   Relax 下咁話喎   我唔駛煮喎   當然唔會反對啦 ~

番到屋企第一件事係試過 Cheese Cake   味道同口感都 OK 呀   不過 Oreo 餅底就真係唔掂囉   下次都係自己買消化餅番嚟打碎   口感正好多呀 ~

我哋叫埋家姐一齊嚟食壽司   不過佢去完媽咪屋企食飯話好飽   所以就咁嚟坐   同埋食下我嘅 Cheese Cake   食下傾下   9 點幾就各自歸家 lu ~

梅菜蒸鯇魚 + 沙爹醬炒唐生菜 ( 31-OCT-2011 )

( 31-OCT-2011  MON )

星期一喇又   又係美好開始   今日天氣非常之好   有風有太陽又唔乾燥   真係好想行山呀 ~

早餐食芝腿治烘底   今次烘得好靚呀   平時好似求其烘咁呢 ~

依家多數 9 點前番菇場   真係唔想成日遲到   咁樣準時走都無咁異相嘛 ~

晏晝食 Special K + 高鈣脫脂奶   估唔到都夠飽   都唔錯   唔想自己咁大食呀 ~

放工去超市買餸   因為要清咗包 Oreo 餅底   所以整  New York Cheese Cake   惠康得酸忌廉   但又無 Cream Cheese   所以我又要去百佳買   計落條數買材料嘅錢仲費過我上次喺太子酒店買嘅 Blueberry Cheese Cake   好記 3 年前先開始對煮嘢食有興趣   買嘅價錢同今時今日嘅價錢係貴咗一陪   有啲唔止添呢   我買 Unsalt Butter 係 $19.9   之後睇住佢加   加到依家好似接近 $40   所以我次次焗嘢失敗就會好心痛囉 ~ 

是日懶餐 - 梅菜蒸鯇魚 + 沙爹醬炒唐生菜

梅菜蒸鯇魚 - 我想里奧大人食多啲魚   所以又整呢個餸喇   希望之後自己可以蒸冰鮮魚啦   唔駛咁悶嘛   但一諗到要全接觸條魚   我就好唔想買   好唔想食囉 ~ 

沙爹醬炒唐生菜 - 蘸印尼沙爹醬食唔錯   其實我想用蒜蓉炒   不過唔夠時間切蒜蓉呢 ~

食完飯就即浪衫   里奧大人話日日見我開機洗嘢咁喎   不過真係唔知點解我都覺好多嘢洗咁   搞到我又要密密熨   同埋里奧大人成日拎完啲衫出嚟又唔着   之後又唔擺番入去   再之後又唔知自己有無着到   所以又要洗   我咪話要有手尾先得㗎   熨一件衫唔少時間嘛   真係吖 ~

洗好哂碗就專心焗蛋糕喇   今次將所有材料放哂喺碗度   逐步遂步咁跟食譜   因為我次次焗嘢都係邊睇邊拎邊磅   所以啲 Step 會亂咗   今次整比家姐食   所以想做好啲   一路焗仲一路睇住   焗第 2 次嘅時候   我就去沖涼   一路沖涼一路聞到好香嘅蛋糕味呀 ~

今次焗蛋糕連埋預備同洗嘢   好似用咗個半鐘   都算快㗎喇   焗完出嚟都幾靚仔   放涼後放入雪櫃   留番聽晚食   希望好食啦 ~   

電視又無嘢睇   所以我又抹梳化   里奧大人笑笑話尋晚見妳抹完今日又抹嘅   我話無鐘點嘅日子   我都要保持屋企乾乾淨淨呢 ~  

自家製 New York Cheese Cake ( 31-OCT-2011 )

( 31-OCT-2011 MON )

因為要清咗包 Oreo 餅底   所以想整 Cheese Cake 喇   其實想掉咗去算   因為都係 $20   同埋依家買料都唔平   Cream Cheese $33.9   Sour Cream $14.9   一陣失敗會發顛囉   但包餅底又未開過   就咁掉好似好折墮咁 ~

今次真係好有決心整㗎   去完惠康又去百佳買材料   點知番到屋企先知無哂沙糖   因為我依家係用黃糖煮嘢   所以我又要再落去惠康買過 ~

我平時好少用打蛋器   因為要洗多樣嘢   同埋啲d Cream 成日打到飛哂出嚟   可能用嘅器皿唔啱   今次用 Ikea 買嘅 Stainless Steel 煲嚟整   無飛出嚟呀   所以好開心   咁我第時都會用打蛋器   因為打得軟滑啲嘛   同埋真係無咁攰囉 ~

今次按哂 Step 咁做   同埋一路焗一路睇住個火   因為真係好驚燶浪費心機嘛   同埋今次整比家姐同佢啲同事食   所以責任比較大 ~

焗完出嚟再查 Cream Cheese   不過查得好樣衰囉 ~ 

放涼就擺入雪櫃焗一晚   任務完成   好開心同好期待呀 ~

大快活 @ 九龍灣 ( 30-OCT-2011 )

( 30-OCT-2011  SUN )

我次次如果一覺瞓到 7-8 個鐘   中途無醒嘅話   咁樣之後起身再瞓番   就好難瞓得着   就係因為咁   今朝 7 點 45 分已經醒咗喇   但又喺度諗   難得星期日可以瞓晏啲   不如瞓多陣啦   不過瞓極都瞓唔到   終於 8 點 15 分 起身喇   費事郁嚟郁去整到里奧大人無覺好瞓 ~

依家鐘點唔嚟   所以我就諗定點樣執屋   因為唔想一次過咁辛苦做哂   但做開又想即刻樣樣都做哂㗎喎 ~ 

早餐又未食   唔可以做啲太粗重嘅嘢呢   所以就抹鞋櫃喇   里奧大人好煩㗎   次次我一買鞋就話呢對唔見我着   呢對又無着過咁   所以襯佢瞓覺就順便掉咗唔想要嘅鞋喇 ~

佢 10 就起身喇   一齊去太興食早餐   諗住影相嘅時候   相機個屏幕無畫面   但有啲模式又影到   但我用開嘅模式又影唔到喎   雖然我部機都用咗差唔多 3 年   已我都好想換機   不過一諗到部機無壞   又唔想買新囉   但我慣咗影相   所以同里奧大人講話要即刻買機呀   買 G12 算   平平哋玩下   但佢又話 S95 好啲   因為 Configure 好啲喎   但我鍾意 G12 機款   因為 S95 同我部差唔多款   買得新機更想轉下款家嘛   不過依家 S95 應該好平   咁又幾抵玩嘅 ~

食完就番教會喇   之後去德福行一陣   行下行下都差唔多 2 點 lu   所以就去大快活食 Tea 喇 ~

里奧大人番到屋企又做公司嘢   我就幫佢煲中藥   之後開機洗窗簾   難得有陽光   之後就抹睡房   熨衫   超攰呀 ~  

今晚又會去大快活   因為我想打邊爐呀   里奧大人又唔打   所以去大快活就最好   你食你嘅嘢   我食我嘅嘢 ~ 

食完去買鞋   因為見里奧大人着對 Cross 好舒服咁   所以我又買對喇   之後佢就話咩都跟佢   咁又係喎   佢買咩我又想買㗎喎 ~

番到屋企抖陣   里奧大人就話出去徑步   我唔去啦   因為之前睇過環境   附近有條渠好鬼臭囉   我話你再聞下臭唔臭先   唔臭我都會去跑呢   佢跑咗 20 分鐘就番嚟   話落雨   同埋話條渠唔臭喎   下次一齊跑呢 ~    

豉汁排骨雙腸煲仔飯 + ABC 雜菜湯 + 雪梨茶 ( 29-OCT-2011 )

( 29-OCT-2011  SAT )

今朝要拎中藥比家姐   家姐咁啱又要覆診   所以一齊食埋早餐喇   我食牛扒好鍾意食牛筋   家姐話同媽咪食牛扒見到牛筋嘅時候   就會第一時間諗起我呢 ~

番到菇場當然無 Mood 做嘢啦   明明諗住上網睇報紙   點知突然有嘢做喎 ~

家姐覆完診就去我屋企坐陣   等埋我放工食 Tea   但我要陪里奧大人睇中醫   估唔到佢又陪埋里奧大人一齊過嚟   咁仲好   唔駛再約嚟約去 ~ 

經過美心就入去睇下有咩食   好耐無去美心食 Tea   見到啲 Tea 都幾吸引   所以食埋先番屋企   不過 Tea 嘅份量係好細   但張相嘅份量係好大囉   呃人嘅 ~

食完同家姐去惠康買嘢   次次同佢去超市都一袋二袋   佢話如果住附近   成日一齊買嘢就慘喇   我話如果住附近嘅話   樣樣買一份 Share 就搞掂啦   唔駛樣樣買兩份   同埋佢依家好鍾意買嘢食放喺我屋企   之後上嚟一齊食囉 ~

家姐差唔多 4 點幾就走喇   我就幫里奧大人煲中藥   又煲雪梨茶   又熨衫拖地   超充實呀 ~  
   
是日懶餐 - 豉汁排骨雙腸煲仔飯 + ABC 雜菜湯 + 雪梨茶

豉汁排骨雙腸煲仔飯 - 唔知煮咩好   唯有煮我認為完全無難度嘅蒸排骨啦   今次又扮煲仔飯   不過其實係假煲   因為我只用將煲好嘅飯放喺煲仔度   再將蒸好嘅豆樣排骨同雙腸放喺飯面   里奧大人笑住話 A 貨   問我點解唔整真正嘅煲仔飯   我話我只識 A 貨咋   同埋 A 貨製作唔簡單㗎   又要預備多個煲仔   又要擺啲餸上去   用唔少時間㗎 ~

ABC 雜菜湯 - 本來想整粟米湯   不過驚太飽肚   同埋豉汁比較鹹   所以都係想飲啲酸酸哋嘅湯呀 ~   

雪梨茶 - 天氣乾燥   超市買鴨梨又平   $8.8/5 個咋   所以買嚟煲雪梨茶呢 ~