嘉華大酒樓 @ 官塘 ( 25-FEB-2014 )

白灼生海蝦 一斤

原籠蒜香糯米蒸羔蟹仔

東江沙薑雞半隻

燒汁腰果牛柳粒

金菇瑤柱扒豆苗

( 25-FEB-2014  TUE )

尋晚瞓瞓下勁想嘔   不過忍住   之後瞓瞓下又勁餓   咁都好   起碼有餓嘅感覺 ~

早餐食通粉餐   不過奄列同多士就食唔哂咯   留番晏少少先食 ~

家姐今朝問完我食咩早餐   之後里奧大人又問我食咩早餐   等我以為自己無答到人添   但明明記得有答家嘛   哈哈   我次次唔舒服   佢哋第朝實問我食咩早餐   搞笑 ~

本來諗住唔食藥   但個胃仲係唔舒服   所以照食啦   食 4 粒藥丸   但其中 2 粒係食完令人昏昏欲睡   呢下先慘 ~

10 點幾勁餓   咁食埋奄列多士啦   點知食完就勁忙   雖然勁眼瞓   但都要開行 Turbo 做   因為聽日 Off   唔想有手尾 ~

Lunch  Time 落去買星洲粉米   不過呢間又係麻麻   我覺得有啲米粉有啲苦   唔知係落得太多咖哩粉定我本身食完藥   個口苦呢 ~

1 點半準時開工啦   做呀做   做呀做   5 點 45 分終於搞掂哂 ~

今晚同媽咪 家姐去酒樓食飯   因為今個星期三四五都唔得閒   咁我又唔想個幾星期之後先見媽咪   所以改今晚食   但其實我都唔係咁想去   因為我食完藥超勁攰呀 ~

媽咪又煲咗魚湯比我   不過我一早話唔要   但佢係都要煲   我話根本無時間飲   唔記得飲會倒㗎   所以唔好煲比我   但媽咪唔理㗎   話里奧大人都要飲   之後媽咪話啲魚湯落咗陳皮   可以幫我化胃氣   我聽完之後    終於明白媽咪點解堅持要煲比我啦   因為我之前話個胃好脹   聽完之後勁感動呀   同時我覺得自己超級勁衰格呀 ~      

感恩家姐今晚 6 點 45 分已經到酒樓喇   咁都好   我可以早食早休息 ~

媽咪食完就番屋企先   咁我哋都唔上媽咪屋企喇   同家姐行埋萬寧就各自歸家 ~   

里奧大人 7 點 45 分放工啦   佢食埋嘢先番屋企   咁我差唔多番到屋企樓下   佢想去麥當勞買冰雪新地   咁我去買囉   不過架機壞咗   所以無得食   咁 Join 埋一齊行番屋企 lu ~

番到屋企即沖涼喇   之後就一睇睇電視劇 ~

我同里奧大人講   今年咩嘢表示都無噃   我預咗無蛋糕   但估唔到連生日歌都無噃   不過佢無理我   哈哈 ~      

11 點就瞓喇   其實我未眼瞓   不過里奧大人瞓   我都會跟住瞓嘅   咁我就唔駛熄燈熄電視 ~

窩蛋牛肉飯 + 雞扎 (外賣) ( 24-FEB-2014 )

( 24-FEB-2014  MON )

今朝個胃仲係好脹添   又係成日想嘔想嘔   胃唔舒服真係好鬼辛苦呢 ~

早餐食奶油多   居然食唔哂添呀   想走嘅時候   有人同我講早晨   原來係渠王   咁就一齊傾下偈   等埋佢食完先一齊番菇場 ~

好鬼攰呀   不過要做 Report   做到 11 點幾就搞掂   可以抖抖 ~

今朝買咗個吞拿魚燒餅做 Lunch   第一次覺得食嘢係咁辛苦   但唔食又唔得喎 ~

本來諗住今晚早啲煮飯早啲休息   但里奧大人係都要我睇醫生   咁放工即睇啦   雖然已經掛號   但都要等半個鐘   勁攰呀 ~

原來係感冒菌入腸胃   衰里奧大人話我應該攝親   加上又食埋杏仁呢啲熱氣嘢   所以就病喎 ~   

里奧大人今晚早啲放工   都差唔多 7 點先放工   佢叫我食粥   不過我驚食完成肚水仲唔舒服   所以我唔想食   最後叫里奧大人去唐記買飯番屋企 Share 食   我就唔駛出街食   之後我即刻沖熱水涼喇   哈哈 ~

食完睇陣電視就瞓喇   因為開咗電毯   我瞓咗半個鐘熱醒咗呀   出汗添呀   即刻叫里奧大人幫我熄電毯   佢喺度笑啦   話今晚其實都唔凍   開電毯實熱   但我瞓之前仲係占寒占凍嘛 ~

譚仔三哥 九龍灣 ( 23-FEB-2014 )

我叫里奧大人比哂 d 酸菜我食呀   因為我勁反胃   食完好似好 dd 咁

( 23-FEB-2014  SUN )

今朝差唔多 10 點就自己醒   咁梳洗之後就去食早餐 lu ~

諗住番教會   點知今日啲早餐好遲先上   所以食完番到屋企都已經 11 點 15 分   我又未沖涼洗頭喎   最後都趕唔切番教會呢 ~

喺屋企執下嘢   再煲八珍湯   飲埋就出門口喇 ~    

約咗媽咪 家姐同姐夫飲茶   不過家姐差唔多 1 點半就走先   媽咪差唔多 2 點又走   因為想做運動   咁我同里奧大人就差唔多 2 點半走   再去埋街市買菜就番屋企 lu ~

番到屋企 Hea 住過   4 點就飲湯   之後我就食 Wasabi 果仁   食咗差唔多 20 粒   之後慘喇   個人好似唔多舒服   想嘔想嘔咁   唔知係咪果仁頂胃呢 ~

7 點左右就出去食嘢   但其實我真係唔餓   所以去譚仔食麻辣米線   開胃啲嘛   同埋依家得寶開咗間譚仔三哥   唔駛行到牛頭角咁遠   方便好多 ~

勁想食紅豆雪條   所以去埋超市買雪條先番屋企 ~

個人無啦啦發冷   我即沖熱水涼呀   同埋叫里奧大人開定電毯比我   咁我隨時瞓都暖笠笠 ~

我睇睇下電視都瞓咗   之後索性入房瞓喇   反正都差唔多 11 點要瞓嘛 ~

公司春茗 ( 22-FEB-2014 )

( 22-FEB-2014  SAT )

今朝 8 點起身   天氣清清涼涼好舒服呀 ~

早餐食飛碟   食完超勁飽   下次問佢有無半份先   咁樣食完無咁辛苦   哈哈 ~

諗住 Hea 過啦   點知 11 點又有嘢做   邪到爆 ~

放工坐 297 去 Mega Box   同埋里奧大人一齊喺百樂門飲茶   燃燒時間呀 ~

魚翅灌湯餃 - 好味道   因為想食啲濕濕哋嘅嘢

大蝦腐皮卷

涼瓜煎魚餅

脆皮紅豆餅 - 唔得煙韌   如果唔係一定好好食囉

桂花五粮糕

食完就行 Ikea 再 AEON   勁想食黃蘿蔔壽司呀   所以買嚟食 ~

真係無咩想行   同埋約咗阿後 5 點喺九龍灣地鐵站等   所以 4 點左右就坐 Shuttle Bus 去德福   順便去麥當勞飲咖啡 ~

金榛朱古力咖啡 / 藍莓紐約芝士餅 - 今次加 $4 要杯大嘅   飲到好辛苦   哈哈

準時到 Pie & Tart   咁里奧大人就自己番屋企   我同阿後就出發去佐敦   到咗佐敦就約埋溫總一齊去酒樓呢 ~

酒樓地方超勁細   咁工作人員又有嘢整   佢哋講咩都聽到哂   所以阿頭話叫我哋不如出去行陣   其實咁仲好   因為酒樓都好焗呀 ~

我哋去咗寶靈街   之後再去裕華   6 點幾先番酒樓   都好多同事到咗 lu   咁就埋位坐喇 ~

差唔多 7 點先開始   玩咗陣枱獎就食嘢 lu   之後又睇 Slide   又食又玩遊戲咁   差唔多 10 點幾先走   不過我最後都無去唱 K 呀   之前 Admin 同事又話好多人去   但原來係好多工廠同事去   我又唔熟佢哋   咁都唔好玩啦   早啲番屋企陪里奧大人好過   哈哈 ~

同阿後一齊坐小巴番屋企   番到屋企都 11 點   即沖涼   抖陣就瞓覺喇 ~      

住家飯 @ 媽咪屋企 ( 21-FEB-2014 )

烚蜆 - 估唔到好味喎   好鮮甜呢

蒸龍躉仔

白切雞 (外賣)

叉燒 (外賣)

炒生菜

青紅蘿蔔豬骨湯 - 我上星期話想飲啲清甜嘅湯   唔想成日飲豬橫脷   咁今晚媽咪煲青紅蘿蔔湯啦   但無啦啦走去加 2 粒瑤柱   味道根本都唔夾嘅

( 21-FEB-2014  FRI )

佛跳牆   佛~跳~牆   點解咁鬼香   今朝一起身就唱佛跳牆   里奧大人嚇呆啦   唱埋啲咁嘅歌   之後就話我真係為食   一起身就諗起食   哈哈 ~

早餐食吉列石斑   食完覺得好熱氣咁呀 ~

菇場忙咗陣   之後又做自己嘢 lu ~

晏晝出去食白粥 + 炒米粉   食完再周圍行   想郁多啲呀   哈哈 ~

放工即走喇   雖然里奧大人今日唔駛上大陸   不過我都照番媽咪屋企食飯 ~

等埋家姐   又係 7 點開飯   最理想嘅開飯時間呢 ~

差唔多 8 點 45 分就走喇   因為糟糟過嚟車我哋   想一齊去佐敦睇下雞煲嘅位置喎 ~

睇完就番屋企喇   原來都 9 點半   要快快手沖涼   因為里奧大人陪我睇電視劇呀   又 12 點先瞓呢 ~

黑椒牛扒炒麵 ( 20-FEB-2014 )

( 20-FEB-2014  THU )

實在太開心喇   尋晚終於正常入睡呢   仲瞓得都唔錯   感恩感恩 ~

今朝仍然凍噃   但就有陽光   呢啲天氣都好舒服呀 ~

早餐食熱狗餐   見對面食吉列石斑好似好好味咁   一於聽日試下先 ~

菇場唔太忙   之前狂玩 Pokopang   依家對眼成日眼濛濛   所以都無咩 Mood 上網 ~

晏晝出去食韭菜水餃麵   食完再去超市買嘢   之後就番菇場喇  ~

放工去牛頭角藥房買嘢   番到屋企就預備晚餐   之後開機洗衫   再拆埋利是錢   勁開心呀 ~   

今年收穫唔錯   不過年年都係媽咪同家姐最大大份   加埋媽咪家姐又比埋生日利是   又係大大份   所以 2 月就最多私己錢   哈哈   

里奧大人今日上大陸同煩客開會   所以我今晚可以 7 點食飯呢 ~

是日懶餐 - 黑椒牛扒炒麵  

黑椒牛扒炒麵 - 第一次咁整   味道都唔錯   不過如果再辣啲就更好   哈哈 ~

食完即洗碗再沖涼   之後就睇雜誌   爽呀 ~

大食表妹買比我嘅花街朱古力   不過我未見過呢啲禮盒裝   款式都唔多嘅   同埋無我最鍾意嗰款   都係一罐罐嗰啲吸引啲  

里奧大人差唔多 10 點半先番到屋企   沖涼之後仲做咗陣公司嘢   好在好快做完咋   11 點半可以瞓覺呢 ~   

蔥油雞扒 + 皇帝菜 ( 19-FEB-2014 )

( 19-FEB-2014  WED )

尋晚又係瞓得唔好   我估係因為之前每月一到時連瞓兩日   瞓到夠哂 Quota   所以成日唔係咁易瞓到呢   哈哈 ~

今朝又凍又落毛毛雨   真係無咩 Mood 咁囉 ~

菇場唔忙喇   可以 Hea 過 ~

晏晝買豬潤酸辣米線番菇場食   阿齋話成個菇場都係酸辣米線味   所以佢話佢都想食呀   哈哈 ~

放工即走喇   今晚去百佳買菜   因為依家啲菜咁貴   去街市都唔會平囉 ~

今晚自己食先   食完就即刻洗碗   抖陣就沖涼   天氣太凍喇   真係想快啲休息呢 ~

是日晚餐 - 蔥油雞扒 + 皇帝菜

蔥油雞扒 - 想食口啲惹味嘅醬汁呀   所以整蔥油汁   咁我好小喺百佳買蔥嘅   咁我睇哂佢擺蔬菜薯仔呢啲位置   都唔見有蔥   真係勁失望   點知我再轉頭睇下啲菜   比我見到有棵蔥呀   唔知係咪有人唔要   所以放番喺度呢   頭先真係唔見㗎   今次用光波爐焗雞扒   乾手淨腳   哈哈 ~  

皇帝菜 - 我覺得皇帝菜幾好食   又爽口 ~

里奧大人 9 點先番到屋企呀   所以煮個丁麵佢食啦   依家我都唔會帶 Lunch Box 番菇場 lu   因為我同事話佢唔食叮嘢   每月一到係無嘔呀   所以我都想試下係咪囉 ~

搞掂哂都差唔多 10 點   叫里奧大人即刻沖涼   之後陪我睇電視劇   哈哈 ~

今晚 11 點都有啲睡意   希望正常入睡啦 ~