KFC @ 九龍灣 ( 25-AUG-2016 )

用 Coupon 只係 $58 咋   仲有 2 杯細汽水   真係抵食啦   仲食剩 2 件雞   可以留番聽晚做餸添呀

( 25-AUG-2016  THU )

今朝里奧大人上大陸   鬧鐘響完我都即瞓   但其實瞓得唔係咁好   7 點 15 分醒醒哋   但又唔想起身住囉   之後瞓到 7 點 45 分先起身 ~

好餓呀   所以食奄列餐   正常一路食一路睇報紙   點知 8 卦又嚟埋   咁傾偈算喇 ~

菇場忙下停下   不過有啲眼瞓   唔係咁在狀態添 ~

無啦啦情緒好低落   所以 Lunch 要飲番杯凍奶茶   飲完真係心情靚番好多㗎   咁就買車仔麵食啦   因為包嘢飲   哈哈 ~

仍然忙下停下   話咁快就放工 ~

今晚 Book 咗 6 點洗牙   估唔到咁耐無洗牙   醫生話唔算多牙石   同埋好感恩我唔駛補牙囉   因為之前隻牙痛呀   勁驚有蛀牙囉   之後話我有隻智慧齒補咗蛀牙嘅面積都好大   同埋右邊牙應該有隻係杜咗牙根   講講下又係喎   但真係成 10 年無睇牙醫   所以佢唔講   我真係唔記得呢 ~

呢個牙醫好細心呀   最搞笑我話最驚聽到啲洗牙聲   佢居然問我駛唔駛拎部手機出嚟播啲音樂   我話唔駛理我   哈哈 ~

洗咗好似 20 分鐘   我覺得佢好細心   問佢嘢又好詳細咁解釋比我聽   真係感恩搵到個好牙醫   我對上果次睇嘅牙醫   我同里奧大人每睇一次都話有蛀牙   覺得唔對路囉   所以之後都無再睇牙醫 lu   今次遇到好嘅   叫埋里奧大人一齊搵佢 Check 牙添呀   因為上次佢睇個牙醫又係好無醫德   問都唔問就叫人即刻杜牙根   又唔講幾錢   我覺得好離譜囉 ~

里奧大人未咁早番   咁我就去 Taste 買下嘢   買完即番屋企喇   都原來已經係 7 點 15 分 lu ~

咁諗住一陣又出去就唔開冷氣啦   就咁開窗開風扇   但真係好鬼焗   之後差唔多 7 點 45 分真係頂唔順   問里奧大人喺邊   好在佢喺九龍塘   咁我都落樓喇   唔係會焗死   哈哈 ~

行陣先再去 KFC   無耐里奧大人都到 lu ~

食完就番屋企   沖埋涼就熨衫   熨到一半已經出汗   所以熨完再要沖身一次 ~

睇多陣電視   11 點左右瞓喇   今晚覺得好攰咁呢 ~

豆辦醬肉末茄子 + 五香肉丁炒飯 + 蕃茄南瓜甘筍粟米湯 ( 24-AUG-2016 )

( 24-AUG-2016  WED )

今朝早餐食芝腿治   居然食哂   平時會食剩啲麵包嘛   其實都覺得好折墮㗎   但真係食唔落囉 ~

菇場忙下停下   咁都好   時間過得快啲 ~

今日有 Lunch Box   尋晚食剩 2 塊豬扒   再淥埋半個食剩嘅烏冬   咁就搞掂   之前去吉野家打邊爐   成日都食唔到個烏冬   好在佢獨立包裝   可以留得耐啲   冰格仲有 2 包   搵晚整麻醬冷烏冬   里奧大人又煩喎   唔鍾意食麻醬同烏冬   如果唔係一次整哂就最好   唔駛成日記住做有啲咩嘢未食嘛 ~

食完就即去買麵包   再買埋南瓜同蕃茄   咁今晚就唔駛特登去街市買喇 ~

番到菇場即洗碗   之後諗住 Hea 過啦   點知又忙 ~

放工前搞掂哂喇   可以輕輕鬆鬆放工了 ~

番到屋企一放低袋就即煲水同切嘢   之後水滾即煲湯   咁都已經 6 點 20 分喇   唔知係咪太耐無煮   切完嘢之後   左手掌有啲痺添 ~

里奧大人 6 點 45 分放工   我都即煮喇   今晚單爐頭煮嘢   仲要炒兩樣   所以一定要快   咁里奧大人一番到嚟就有得食呢 ~

越心急就越 "呢咁 Hea"   咁我洗碗又落得太多洗潔精   所以勁跣手   整鬼爛咗隻碗   玻璃碎彈咗上嚟   咁頭先切好哂啲蒜蓉都唔敢要啦   驚有玻璃碎   嘥咗我啲心機添 ~

是日晚餐 - 豆辦醬肉末茄子 + 五香肉丁炒飯 +  蕃茄南瓜甘筍粟米湯  

豆辦醬肉末茄子 - 上網睇到好吸引咁   所以又整下啦   算係整新嘢   呵呵   同埋辣辣哋真係幾好味 ~        

五香肉丁炒飯 - 之前里奧大人剩罐半碗五香肉丁   尋晚聞咗又唔覺臭   咁今晚煮埋去喇   得嗰少少   所以用嚟炒飯最好   里奧大人分飯嘅時候   自己分咗大半碗添呀   平時比白飯佢食   佢就第一句會話唔鍾意食飯   一係話好飽   唔好比咁多我   麻煩 ~      

蕃茄南瓜甘筍粟米湯 - 好想飲湯呀   我覺得呢個湯真係好正   無肉都好甜呢 ~

搞掂哂就落強粉噴 Bio Kill   頭先喺廳見到隻反肚小強   我仲以為塵啦   再望清楚原來係小強   諗住用紙巾執起佢啦   頂佢吖   郁嘅   原來係垂死緊   好在唔係掃佢咋  唔係幫佢反番轉就到我死㗎喇   之後再拎多幾張紙巾蓋住佢   再踩多佢一腳   之後聽到 "必" 一聲呀   嚇死   比佢咁嚇一嚇   即刻個頭有啲痛   所以今晚點都要落強粉殺死哂佢哋 ~

我抖咗 5 分鐘   8 點半就出發去徑步   條街好焗呀   所以徑半個鐘算喇 ~

沖埋涼就休息喇   睇多陣電視   11 點都瞓 lu ~

黑椒豬扒 + 蠔油鮑魚唐生菜 + 芫茜皮蛋魚片湯 ( 23-AUG-2016 )

( 23-AUG-2016  TUE )

尋晚終於瞓得 OK 呀   之前幾晚瞓得好差   如果再瞓得唔好就慘喇 ~

早餐食熱狗餐   之後 8 卦又嚟埋   見佢食麵餐真係好吸引   但可惜我真係食唔哂   如果唔係一定叫嚟食呢 ~

菇場唔太忙呀   又做下自己嘢 ~

估唔到藍莓乾都幾好味   甜甜哋又煙煙韌韌

里奧大人 11 點同同事出發去深圳見客   希望早見早回啦 ~ 

Lunch Time 出去行陣   之後再買酸辣米線番菇場食   食到一半已經好飽   但真係唔想嘥   唯有慢慢食囉   食到有啲驚   哈哈 ~

我發覺次次食完酸辣米線   之後就覺得個肚好脹咁      

3 點幾無啦啦先忙   好在放工前搞掂 ~

放工去街市買餸   咁我成日同里奧大人講話呢排開始涼咗喇   但里奧大人就成日話好熱   可能我之前身體虛啲啦   又唔駛郁   咁今晚買完餸番到屋企就覺得勁熱喇   成個背脊係汗添呀 ~

里奧大人 7 點 15 分番到屋企   我都啱啱煮完咋   我覺得自己勁㗎喇   煮 3 樣嘢喺一個鐘頭內搞掂   哈哈 ~

是日晚餐 - 黑椒豬扒 + 蠔油鮑魚唐生菜 + 芫茜皮蛋魚片湯  

黑椒豬扒 - 三色椒係上星期㗎喇   仲開始有少少爛添   所以已經諗定今晚一定要整   本來想釀三色椒   但諗起要半煎炸嘅時間比較耐   最後都係煎豬扒算喇 ~   

蠔油鮑魚唐生菜 - Fat Fat 之前買咗 2 罐罐頭鮑魚比我   咁原來 7 月已經到期   我仲以為 8 月先到期添   好在再望一望咋   唔係又唔知擺幾耐   我明明打咗蠔油芡汁   不過唔夠杰   咁是但啦   反正啲鮑魚鹹鹹哋都好好味   同埋好在之前問咗 Mi 點煮   如果唔係我以為係要蒸完再切片呢 ~

每罐有 1 隻半 

芫茜皮蛋魚片湯 - 熱氣呀   要飲呢個湯清清熱 ~  

里奧大人成日話喉嚨唔舒服就去食芒黑白   食完就好番好多   咁我呢幾日都牙肉痛耳仔痛   我話我都想試下係咪食完舒服啲   所以佢食完飯抖陣去徑步   我就洗埋碗   再開機洗衫同拖地   搞掂哂就 Call 佢喺滿記等喇 ~

差唔多 9 點就搞掂   即落滿記喇   早食早消化嘛   雖然都係夜   哈哈 ~

食完即番上屋企沖涼   再睇陣電視   又 11 點幾先瞓 ~      

Cafe 首爾 @ 九龍灣 ( 22-AUG-2016 )

無骨甜辣炸雞 ($73) - 個汁都幾好味   但啲年糕就唔得啦   好鬼乾

韓式中華海鮮麵 ($58) - 越食越辣   正呀

韓式炸醬麵 ($60) - 咁里奧大人話想試下嘛   咁試啦   我就麻麻哋鍾意食   無味咁嘅   之後佢又話好漏   食剩一碗仔   嘥哂啲嘢

( 22-AUG-2016  MON )

尋晚諗定今朝一起身就要同里奧大人講生日快樂   點知喺佢刷牙嘅時候先記得講   無計啦   未瞓醒都唔知做緊咩   哈哈 ~

我同里奧大人講話生日快樂   身體健康   之後我話我幾好呀   咁早同你講祝賀說話   咁佢喺度笑嘛   我話你都覺得我好呀呢 ?!   佢話得我一個成日喺度自己讚自己   哈哈 ~

同佢喺地鐵站分開啦   之後佢隻手 Fing Fing 咁   衰到呢   咁做即係代表我咩都無表示   利是都無呀   不過我唔會理佢   呵呵 ~

今朝食米粉餐   其實唔餓   但 Lunch 要食番食剩嘅麵包   所以唔想成日都食麵包囉 ~

菇場唔太忙   做埋 Report 就可以做自己嘢 lu ~

Lunch 食上星期三買嘅乾果麵包   好在無壞咋   再飲埋包朱古力奶   但今次衰咗   叮之前加得太多水   所以濕濕哋好難頂   食咗 1 件頂唔順啲口感   剩番嗰 2 件都掉咗去喇 ~

里奧大人 3 點喺葵興見客   咁應該早番過我呢 ~

放工即走   今晚同里奧大人食新嘢慶祝生日   哈哈   咁佢去咗食店先嘛   佢話關咗門   我話應該未開門囉   之後笑哂打嚟話啱啱開門 ~

食到 7 點幾就走喇   咁我話明我請嘛   之後佢又串串共   我話再嘈就用佢找數嘅信用卡簽卡   但原來要夠 $200 先可以簽   咁我比 Cash 啦   呢餐食咗 $191   咁里奧大人行咗出去先嘛   問我呢餐幾錢 ?!   我話 $191   佢話咁都要報大數   明明聽到係 $161   頂佢咩   我話真係 $191 喎   之後我話請人食飯仲要比人講咁多嘢   真係慘   之後佢好驚咁望一望我   哈哈 ~

一番到屋企即熨 2 機衫喇   我覺得呢幾日都涼咗   熨衫都唔會出汗   最正係冷氣都唔駛開咁大   咁就最好啦   可以慳番啲電費 ~

熨咗個幾鐘   真係有啲攰   所以即沖涼喇   里奧大人就去徑步 ~

今晚水姑又約里奧大人去滿記   順便比埋蜜糖同喉糖比我哋   我知佢其實最想係比生日利是比里奧大人   由上星期已經約㗎喇   日日問得唔得閒   不過我唔舒服   所以里奧大人唔去食飯之嘛   同埋難得水姑今晚早咗   所以去食甜品啦   但等呀等   都等到 10 點幾先去滿記   我就唔去㗎喇   沖咗涼唔會再出街呢 ~

里奧大人成 11 點幾先番到屋企   之後叫我瞓先   因為佢好飽   佢話今晚徑步諗住減下肥   點知今晚咁食法仲肥   哈哈 ~

之後佢拎咗水姑比嘅生日利是出嚟   我第一次見個利是封係咁大個   好似揮春咁大張㗎   咁都知啲餡都唔野少 ~

今晚終於有睡意喇   不過都差唔多 11 點 45 分先瞓呢 ~

土司工坊 @ 九龍灣 ( 21-AUG-2016 )

2 人晚餐 ($110)

小魚椰漿飯配雞翼

星洲叻沙

娘惹沙律

( 21-AUG-2016  SUN )

今朝 8 點 45 分起身喇   沖埋涼就去食早餐   Fat Fat 今朝 11 點撒灰   所以我哋 10 點都出門口喇   搭地鐵再轉的士   11 點唔夠都到 lu ~

等埋馬姑娘   撒灰就開始喇   不過好快就搞掂   之後馬姑娘再去燒嘢   搞掂哂都只係 11 點半   感恩天氣非常之好   過程非常順利   感恩感恩 ~

今日家姐要去屯門搞媽咪啲嘢   所以嚟唔到   其實里奧大人尋朝 11 點先收到訊息話今朝 11 點撒灰囉   負責人話搵咗里奧大人好耐都搵唔到   但我覺得佢一早 Whatsapp 咪得囉   反正佢最後都係 Whatsapp 比里奧大人之嘛   好在我今日身體狀況都 OK 咋   唔係就去唔到啦   最衰又改唔到期   唔係就可以齊哂人嘛   唉 ~

搞掂哂就打的去葵芳   馬姑娘就番屋企   我同里奧大人就去葵涌廣場行下先 ~

行到 12 點半   但好多舖頭都未開   所以我話食啲嘢先   因為咁樣行住等真係好嘥腳骨力   哈哈 ~

豬腩肉雲南風菜小鍋米線 ($26) 

過橋九菜豬肉餃子 ($32/8 隻)

不過食到 1 點幾   啲舖頭都未開哂喎   咁算喇 ~

估唔到都買咗件外套   咁再買埋軟糖就走 lu ~

$3.8/100g   買咗 $20   好抵食   

搭地鐵番九龍灣   行咗陣 Zara 同 MP 就番屋企喇 ~

里奧大人瞓陣   我就睇下電視啦 ~

6 點半去食嘢   食完行陣商場   但無啦啦搞肚痛要即番屋企   我估頭先碗 Laksa 太多奶   下次都唔會再食 Laksa 喇   真係好驚 ~

里奧大人去徑步   我唔去喇   有啲攰   所以即沖涼 lu ~

等埋佢沖完涼就食龍眼   睇陣 "琅琊榜"   之後 10 點 50 分即睇團體體操   真係勁好睇呀 ~

今晚 11 點半都要瞓喇   聽日要番工呢 ~

吉野家 @ 九龍灣 ( 20-AUG-2016 )

明明好想食   但唔知做咩無啦啦勁唔想食   同埋樣樣都無味咁   勁驚自己頭先攝親呀   因為頭先食完炸嘢   瞓覺又無蓋被   唉 

( 20-AUG-2016  SAT )

尋晚瞓得唔好   唔知係咪每月一瞓得太多呢   我發覺得好多時都係咁 ~

今朝 10 點唔夠都起身喇   刷牙之後就落去食早餐 lu ~

食完去 Taste 買生果   之後番屋企喇 ~

好耐無做家務咁   所以抹下個櫃啦   抹完之後覺得勁攰   最後都係沖涼休息算喇 ~

里奧大人睇雜誌   我就睇電視   3 點有啲餓   但個肚赤赤痛咁   所以唔想出街   所以叫里奧大人去麥當勞買嘢番嚟食   好在佢次次都肯買咋   其實我都覺得自己好衰   成日要佢滕嚟滕去 ~

食完之後喉嚨有啲痛   唔知係咪太耐無食熱氣嘢呢   哈哈

食完又休息下   之後開機洗衫   差唔多 6 點半就去吉野家食嘢喇 ~

行陣就番屋企喇   趕住睇李宗偉呢   諗住沖埋涼先睇   但原來 7 點半係林丹對丹麥人   咁我都一定睇啦   之後睇埋李宗偉   可惜佢仍然係銀牌 ~

沖埋涼就繼續睇奧運   因為我鍾意睇跳水   之後就睇埋團體體操   原來咁好睇   不過聽朝要 8 點 45 分起身   所以睇到 12 點都要瞓喇 ~

叉鴨飯 + 茶葉蛋 (外賣) ( 19-AUG-2016 )

( 19-AUG-2016  FRI )

今朝瞓到 8 點先起身   其實個肚唔痛   只係想瞓晏少少   同埋我可以慢慢行去小巴站   唔駛里奧大人特登又放慢腳步陪我行呢 ~

早餐食蛋治   算勁喇   有胃口 ~

菇場唔忙   又可以抖下 ~

12 點幾無啦啦個肚扯住痛   勁慘   好在無嘔咋   但就好想瞓覺咁囉 ~

仍然痛痛痛   有啲暈添呀   好在都頂到放工   即打的番屋企喇 ~

我都唔沖涼住喇   喺梳化瞓陣   等埋里奧大人番嚟先沖涼   佢 7 點可以放工   咁我個肚無咩嘢 lu   又有啲餓   所以叫佢買茶葉蛋比我食呢 ~

抖陣就沖涼喇   之後睇羽毛球比賽   今屆一定要睇林丹同李宗偉   因為下屆都應該無得睇佢哋 lu ~

李宗偉終於贏林丹喇   希望佢今屆可以奪金啦 ~

睇完又睇 "琅琊榜"   睇到差唔多 1 點先瞓   其實我仲未眼瞓囉   不過難得聽日 Off   都想早啲起身   唔好話瞓到太晏咁呢 ~