紅蟻泰國菜館 @ 牛頭角 ( 22-OCT-2016 )

椰菜苗炒咸豬肉 ($58) - 最鍾意食呢個餸

泰式炸蝦餅 (8 件) ($58) - 今次無咁彈牙噃  

香辣肉碎炒河 (雞) ($52) - 好大陣香草味     

木瓜沙律 (蝦米) ($42) - 最衰我啦   無啦啦好想食   食到一半已經好飽   不過點都要食哂去囉   真係唔想嘥嘢   

象啤 (大) ($25)- 我飲咗半杯   個胃都有啲脹   之後里奧大人話倒出嚟係無泡   唔怪得啦

青檸樂 ($20) - 好飽呀   所以最後都要叫杯酸嘢   咬哂啲青檸都唔覺消滯   其實飲咗半杯已經唔想飲   但廿蚊杯呀   點都要飲哂呢  

( 22-OCT-2016 SAT )

今朝 7 點 45 分起身   勁想食菠蘿油呀   不過仍都會係最後一次   因為呢間茶記好鬼污糟   好多一隻隻嘢黐住喺櫈同牆呀 ~

菇場居然忙   不過真係無 Mood 做囉   做下停下咁   星期一先全力以赴   哈哈 ~

放工即走  里奧大人去姑奶屋企整嘢   咁我就去街市買煲湯料   再去 Taste 買豬展   今次買咗 $40   我同阿姐話一定要過 $38   因為我要用張 9 折 Coupon   之後阿姐話買滿 $40 又多 $5 豬展送比妳   再用埋張 Coupon 就即係折上折   其實佢講完   我都唔知佢講咩   最緊要可以用到張 9 折 Coupon 就得喇   哈哈 ~  

差唔多 3 點先食下午茶   用埋張 $50 德福 Cash Coupon   咁又清咗一樣嘢 ~

N 年無食公司三文治喇   呢個真係兒時回憶嚟嚟㗎   講真   呢個 Set 要 $39   我覺得好貴囉   唔係有 Coupon   我唔食㗎   哈哈

食公治好煩   食食下啲料實會跌哂出嚟

豉椒排骨炒麵   喺美心食下午茶   差唔多 80% 係食公治同呢個炒麵

食完行陣就番屋企   勁眼瞓呀   4 點半瞓到 5 點半   爽哂 ~

勁想食泰菜   所以去紅蟻喇 ~   

今餐飽到好辛苦   番到屋企都唔願郁   里奧大人抖陣就去徑步   我就熨衫算喇 ~

沖埋涼就休息喇   聽朝早起身   不過都成 12 點先瞓 ~

龍蝦丸炒油麵 + 蒜頭豆豉炒娃娃菜 ( 21-OCT-2016 )

( 21-OCT-2016  FRI )

今朝 6 點幾   里奧大人細細聲同我講話 6 點掛咗 8 號   可以熄咗鬧鐘同埋瞓晏啲呢 ~

9 點幾都起咗身   咁就落樓食早餐喇   落到樓就感覺到好大風    好在無落雨 ~

食完就去 Taste 買菜   估唔到有娃娃菜   $6.9/Pack 都抵呀   起碼唔係隔夜菜嘛 ~

今日應該全日掛 8 號㗎喇   所以我都煲雪梨蘋果無花果茶   搞掂哂就焗油   沖埋涼就睇行程   突然多咗日假期   覺得啲時間好好用咁   哈哈 ~

12 點幾開始大風雨喇   開冷氣覺得凍   但又唔敢開窗   唉 ~   

差唔多 3 點去食下午茶   又無咩人喎   仲諗住打風   個個人都出街食添 ~

食完就番屋企   里奧大人做公司嘢   我就繼續睇行程   等里奧大人做完嘢就幫佢焗油   6 點就搞掂哂   到我煮飯喇 ~

5 點幾改發 3 號風球喇   一切又回復正常 lu ~ 

是日懶餐 - 龍蝦丸炒油麵 + 蒜頭豆豉炒娃娃菜 

龍蝦丸炒油麵 - 可能唔餓   覺得 $10 油麵都好多   但聽日星期六無得帶飯   所以點都要食哂去啦 ~  

蒜頭豆豉炒娃娃菜 - 唔想就咁淥咁寡   所以加蒜蓉豆豉炒   咁樣里奧大人就食好多喇 ~

搞掂就沖涼   真係越坐越凍   見出面又無風無雨   所以我話熄冷氣喇 ~

11 點又睇 viuTV   講鬼㗎   個嘉賓話做緊節目嘅地方有鬼   佢 Feel 到但望唔到   之後佢話有次去西貢郊野公園 BBQ   佢哋開車用咗半個鐘   仲要係單程車   所以無可能咁耐   但其實我未去過   唔知佢講邊 ?!   咁佢話去到就同朋友講話 : 好多人呀   咁多小朋友玩嘅   佢啲朋友話邊到有人呀   咁佢知乜事啦   之後再見到個女人企喺好遠   咁隔一陣再望個女人   已經企咗喺佢朋友後面   所以佢話走喇   佢啲朋友仍都知咩事   話走喇走喇   同埋個場得佢哋一個爐燒嘢食   所以有事都無人救到   唯一方法係即走 ~

之後佢話旅行住酒店   好多人會見到鬼   話咩沖涼開浴廉   呢下我堅驚喇   所以即轉台呀   大佬   自己有機會去旅行家嘛   唔想成日形住形住呢 ~

里奧大人又未瞓   我其實睇完入房瞓都驚驚哋   但又唔敢同里奧大人講   唔係比佢鬧鬼死呢   哈哈 ~

蜜糖焗雞扒 + 齋滷味 (外賣) + 西蘭花 + 粟米蛋花湯 ( 20-OCT-2016 )

( 20-OCT-2016  THU )

今朝無落雨   仲風平浪靜   睇嚟呢隻 "海馬" 應該聽日會殺到埋嚟㗎喇 ~

好餓呀   食芝腿治   本來想食甜嘢   但奶醬多一定唔夠飽呢 ~

菇場唔太忙   可以抖抖 ~

無啦啦又餓   所以 Lunch Time 一到就飛去買車仔麵喇 ~

份量真係好多    所以次次都索哂啲湯     

如果唔夾開啲餸   根本食唔到啲米粉呢   

次次食完都十級飽   如果可以落街行下就好 lu ~

好嘢   可以 Hea 等放工 ~

聽日打風   咁去街市買定啲菜啦   阿 mi 話中午去到街市已經無菜買   我哋覺得好誇張   點知真係一條菜都無得買呀   直頭係收檔添呀   其實本身買菜嘅檔口   都只係得蕃茄呢啲   咁仲要貴過平時添   我就一定唔會買囉   最唔鍾意啲人坐地起價   況且又可以買罐頭粟米同急凍雜豆   真係唔雖然一定要食新鮮菜囉 ~

有個生果檔檔主話 12 點都已經賣哂啲菜   話啲師奶好勁   一聽見話打得成就湧去買菜呀 ~

諗住買白蘿蔔同排骨   白蘿蔔都貴哂   梗唔買啦   最後只係買咗 1 斤油麵同 1 份鴨梨   咁之後再去 Taste 行下   買埋齋滷味就番屋企喇 ~

里奧大人差唔多 7 點放工   咁我都預備煮嘢 lu ~

是日懶餐 - 蜜糖焗雞扒 + 齋滷味 (外賣) + 西蘭花 + 粟米蛋花湯

蜜糖焗雞扒 - 前晚解凍   但唔想煮   所以今晚一定要煮呢~

齋滷味 (外賣) - 驚唔夠餸   所以買喇 ~ 

西蘭花 - 好在之前剩番個西蘭花   咁今晚可以有菜食   哈哈 ~ 

粟米蛋花湯 - 我覺得唔夠菜   所以開罐粟米湯   里奧大人話太多   我話我預咗自己飲大半碗   佢就食丁麵   佢以為我做咩唔食麵   我話 Lunch 個車仔麵份量好多   我夜晚唔想再食粉麵飯呢啲呀 ~        

搞掂哂就沖涼   之後又睇電視   11 點幾都瞓 lu ~

麻辣串串香 @ 九龍灣 ( 19-OCT-2016 )

我食腸粉   會灘開條腸粉   之後係咁掃哂啲豉油   咁先好味嘛   但就好花時間囉   

見到心型蘿蔔   其實我真係幾鍾意食呢個麻辣燙   因為有好多餸   無咁悶呢     

( 19-OCT-2016  WED )

今朝里奧大人上大陸   鬧鐘響完   我都即瞓番 lu   呢排好鬼攰 ~

落車先嚟落大雨   所以買定雞尾包做午餐   早餐再食飽啲   真係好怕落雨出街呢 ~

菇場忙呀   多嘢做到唔知做咩好 ~

Lunch Time 食麵包   好在真係買定包   睇嚟今日都係落長命雨㗎喇 ~

仍然忙   希望忙埋聽日啦 ~

放工去 Taste 買嘢   之後番屋企 lu   今晚好攰   唔想煮飯 ~

熨埋 2 機衫   里奧大人 7 點半都到九龍塘   咁我都預備落樓喇 ~

佢同我差唔多時間到牛下   無諗過佢咁快呢 ~

食完番屋企  抖陣就沖涼   呢排攰到連涼都唔想即刻沖呀 ~

10 點 45 分即入房瞓   雖然天氣涼咗   但都有開冷氣   所以呢兩晚蓋張厚被   真係好瞓咗㗎   之前半夜成日凍醒   最慘我唔係可以即刻瞓番嘅人   我越係想快啲瞓   反而仲更加瞓唔到   真係瞓 10 個鐘都無用呢 ~

金姆指米線 @ 九龍灣 ( 18-OCT-2016 )

鎮江豬軟骨飯 - 上次食米線加件豬軟骨覺得好入味   所以講過話下次要嚟食豬軟骨飯   不過今次係最後一次啦   唔好食嘅   唔酸唔甜無味囉

咖哩牛腩飯 - 里奧大人早餐唔食沙爹牛麵   打邊爐又話唔食牛肉   但佢又會食咖哩牛腩   哈哈

( 18-OCT-2016  TUE )

今朝大風又大雨   要出動水靴喇 ~

早餐食餐蛋治   咁應該可以頂到 2 點幾   哈哈 ~

菇場勁忙呀   要開行 Turbo 做先得   不過仍然係做唔哂 ~

今日送叔叔機   所以一夠鐘就飛去搭 A22   等咗 25 分鐘車   大風到呢   企喺巴士站都反咗幾次遮   大脾濕哂    好在今日着褲   唔係凍死 ~

2 點到機場   一去到就見到叔叔磅行李   咁就好喇   唔駛等來等去 ~

去到 Counter 搞掂哂就去翠華   同上年一樣   哈哈 ~

里奧大人去完博覽會拎資料   差唔多 2 點半都嚟到翠華 lu ~

叔叔佢哋 Share 食呢啲

香港名物   上年無得食   所以今年一定要叫來食呢   

呢個又係上年無得食呀   哈哈   睇個樣都好味道   

至潮魚蛋片頭河 ($45) - 加醋加辣椒油先好味   估唔到翠華辣椒油好香好辣   有驚喜   哈哈  

沙爹肥牛撈麵配珍珠雲吞 ($45) - 沙爹汁好味呀 

今次 Uncle Yiu 同 Uncle Cheong 送叔叔機   佢哋好細過已經識   佢哋仲識我爸爸   仲記得我住邊   反而我都唔記得自己住邊 lu ~

之後嬸嬸嘅表妹都嚟送機   每次叔叔嬸嬸番香港   佢都一定同埋我哋一齊食飯㗎   所以感覺好似親人咁 ~

佢坐咗一陣就走   趕住同個女睇醫生   仲話已經埋咗單   佢真係好有心喎 ~

叔叔 4 點幾 Check-in   我當然又忍唔住喊啦   嬸嬸又係眼濕濕   叔叔就無喊   但佢嘅眼神係好唔捨得   叔叔叫 Uncle Cheong 唔好再飲咁多酒   要飲就等埋佢番嚟再一齊飲   之後 Uncle 都忍唔住喊呀   連男人都喊   個場面仲令我喊得勁呢 ~

咁我同里奧大人就喺機場行一陣先走   之後坐 A22 番九龍灣    去到高速無啦啦死火   其實我瞓着咗㗎   不過突然聽到好嘈   又聽到話呢度死火就 PK 喇   咁我先醒咗   之後後面個女人煩到嘔   坐咁耐就話咁耐   話架車好慢   你睇隔離駕巴士行得幾快    無耐就話架車好   架貨車行得快過佢   其實架巴士都作死   實行得慢啦 ~

去到佐敦勁塞   呢下到我叫救命   因為都坐咗 1 個鐘頭 15 分鐘   條腰開始痛喇 ~

坐呢程 A22   足足坐咗 1 個鐘頭 35 分鐘   耐過由香港去台北   哈哈 ~

去金姆指食嘢   因為趕住去買早餐比里奧大人   如果唔係會去牛下囉 ~

番到屋企即沖涼休息   11 點唔夠都瞓喇  ~

辣肉腸螺絲粉 + 西蘭花 ( 17-OCT-2016 )

( 17-OCT-2016  MON )

嘩   勁鬼攰呀   睇嚟今日都係走肉行屍㗎喇 ~

早餐食麵餐   因為要飲凍奶茶提神   但今次唔夠濃   所以提唔到精神   哈哈 ~

菇場忙呀   今日完全不在狀態   平時一個鐘搞掂   今日兩個半鐘都仲未搞掂 ~

Lunch Time 出去行下   等個人精神啲   之後買埋菠蘿叉燒包就番菇場喇 ~

2 點幾終於搞掂   可以食包喇   因為唔想一路做一路食 ~

放工即走喇   去埋 Taste 買嘢就番屋企   勁大風  把縮骨遮反咗幾次   好在唔大雨呢 ~

番到屋企浸菜解凍辣肉腸   開埋機洗衫   食埋碗苦瓜沙就抖喇   終於食哂   下次真係要浸夠一晚先好煮   唔係搵自己嚟搞   哈哈 ~

里奧大人 7 點半放工   我都煮嘢喇   本來想食先   但又唔餓   如果食先嘅話   我嘅時間就好用好多呢 ~ 

是日懶餐 - 辣肉腸螺絲粉 + 西蘭花

辣肉腸螺絲粉 - 上次 Johnsonville 辣肉腸特價先買咋   不過 Expiry Date 就得個幾月囉   如果 Expiry Date 長啲嘅其實味道香腸就無特價   但煮一煮意粉   兩條份量都夠   所以好快可以食哂   我先會買 ~

西蘭花 - 星期六喺 Taste 買㗎   見 $9.9/2 棵都抵食 ~ 

洗埋碗就即沖涼喇   今晚唔駛追劇   可以抖下喇   哈哈 ~

今晚 10 點 45 分即入房瞓   真係好攰呀 ~

住家飯 @ 家姐屋企 ( 16-OCT-2016 )

蒜蓉蒸九節蝦 - 家姐尋日托同事買㗎   不過肉質唔係咁爽囉   

薑蔥炒奄仔蟹 - 我無食蟹呀   只係食咗啲薑蔥    

蒸沙巴龍躉 - 姑姐話蒸 15 分鐘就啱啱熟   勁正呀   家姐工人整啲蔥花同豉油   整到好似喺酒樓食咁呀   下次再叫佢整比我食先   嘻嘻

白切雞 - 新鮮雞真係好食好多   我最鍾意食雞潤呢

薑蔥蓉整得好正   下次要睇住佢點整   咁我就可以想食就食   哈哈  

炒芥蘭 - 呢啲細細條嘅芥蘭好味呀   不過我好少見到街市有得買噃    

冬菇鵝掌翼燜花膠 - 好味道呀   入哂味   我同家姐講話個味道好似食過咁   但又講唔出   之後家姐話咪媽咪煮嘅味道囉   因為媽咪之前教佢點煮㗎   哈哈

之後再放生菜底   但呢碟份量太多   食唔哂呀     

木瓜雞腳豬骨湯 - 好味道

( 16-OCT-2016  SUN )

今朝 9 點起身   里奧大人覺得我好攰   以為我仲會繼續瞓添   不過其實如果佢醒咗   我都會醒呢 ~

食埋早餐就番屋企抖下   之後番主日學同崇拜 ~

諗住崇拜完畢行新都城   但里奧大人話好攰   咁我話番屋企瞓啦梗係   反正我行唔行都得   番到屋企佢即入房瞓    我就睇電視   不過睇睇下我都瞓着咗   哈哈 ~

起身都 2 點半   之後等到 3 點就叫醒里奧大人去食嘢喇   今晚姑姐姑丈同加拿大叔叔嬸嬸 4 點會去到家姐屋企   所以我都唔想咁遲入去呢 ~

食完就搭巴士去家姐屋企   去到 4 點幾   佢哋已經食緊生果添喇   開心開心 ~

我都買咗 1 磅炒栗子一齊食   好在去到都仲熱 ~

叔叔最鍾意大自然   同埋原來佢之前想去林村睇下 ~

咁家姐見到有人種菜   咁姐夫就帶叔叔嬸嬸周圍行下睇下   我哋就陪姑姐姑丈傾偈呢 ~

都唔知佢哋出咗去幾耐添   不過都應該有 1 個鐘   工人又已經開始蒸嘢   正想問佢哋喺邊   佢哋咁啱就番嚟 ~

6 點食飯   咁可以慢慢食慢慢傾 ~

姑姐成日話叔叔最擔心我哋兩姐妹   但今晚見到我哋   佢忍唔住好開心咁話   我真係唔駛再擔心妳哋喇   我估係覺得家姐生活都唔錯   同埋知道家姐實會照顧我   我睇住叔叔個樣真係好放鬆好開心咁講㗎   雖然我哋相隔咁遠   原來佢都會擔心我哋   我真係好感動呀 ~ 

最搞笑成日叫我去加拿大玩啦   我話去一去起碼要 2 星期呀   同埋真係要佢哋車我哋周圍去   咁真係要佢哋得閒   我哋先可以過去呢   依家佢哋又湊埋孫   真係分分鐘忙過我哋添呀   哈哈 ~

話時話   姑姐都算睇住我哋大   因為我記得放學會去姑姐屋企㗎   仲記得我哋鍾意食煎釀三寶   同埋係姑姐教我織頸巾㗎   我印象中   姑姐姑丈無鬧過我   因為我個人比較小氣   鬧我實記得   哈哈   同埋我哋好鍾意去姑姐屋企㗎   地方夠大可以周圍走   同埋有表哥同我玩   我好記得成日同佢打機   哈哈 ~

差唔多走嘅時候   姑姐同我講話   有咩嘢記得要搵佢   講完嗰下   我勁想喊   所以我話知道之後   我都即走開 ~

話咁快又 9 點幾   咁家姐車佢哋去地鐵站   之後再番嚟車我哋番屋企   都知佢實會咁做   佢最驚我哋駛錢   哈哈 ~

番到屋企即沖涼   再睇埋 "律政強人" 大結局   11 點半做完   我都即瞓喇   好鬼攰呢 ~